NIKASEMƆ 4
Eha Epapa kɛ Yehowa Ná Miishɛɛ
Mɛni Yefta woɔ Yehowa shi akɛ ebaafee lɛ?
Yefta shiwoo lɛ naa wa, shi ebiyoo lɛ tsu he nii
Oona oblayoo lɛ ni yɔɔ mfoniri lɛ mli lɛ?— Eji papa ko ni atsɛɔ lɛ Yefta lɛ biyoo. Biblia lɛ etsɔɔɔ wɔ egbɛ́i, shi wɔle akɛ eha epapa kɛ Yehowa ná miishɛɛ. Ha wɔkase lɛ kɛ epapa Yefta he nii.
Yefta ji gbɔmɔ kpakpa. Ehe be kɛtsɔɔ ebiyoo lɛ Yehowa he nii babaoo. Ehe wa, ni eji hiɛnyiɛlɔ kpakpa hu. No hewɔ lɛ Israelbii lɛ kɛɛ lɛ akɛ enyiɛ amɛhiɛ ni amɛkɛ amɛhenyɛlɔi lɛ ayanɔ.
Yefta sɔle ni Nyɔŋmɔ aye abua lɛ koni eye kunim. Yefta wo Yehowa shi akɛ, kɛ́ eye kunim lɛ ekɛ mɔ klɛŋklɛŋ ni baajɛ eshĩa lɛ mli abakpee lɛ lɛ baaha lɛ. Nɛkɛ mɔ nɛɛ baahi Nyɔŋmɔ kpee-buu lɛ mli ni ebaasɔmɔ yɛ jɛmɛ ewala gbii abɔ fɛɛ. Yɛ Yefta beaŋ lɛ, he ni kpee-buu lɛ yɔɔ lɛ ji he ni ajaa Nyɔŋmɔ yɛ. Yefta ye kunim yɛ ta lɛ mli! Ani ole mɔ klɛŋklɛŋ ni je kpo yɛ eshĩa lɛ mli ebakpee lɛ beni eku esɛɛ eba lɛ?—
Hɛɛ, Yefta biyoo lɛ ni! Lɛ ji bi koome pɛ ni eyɔɔ, ni bianɛ lɛ esa akɛ ekɛ lɛ aya koni eyasɔmɔ yɛ kpee-buu lɛ mli. Enɛ ha Yefta ye awerɛho waa. Shi kaimɔ akɛ ewo Yehowa shi. Oya nɔŋŋ ni ebi lɛ kɛɛ lɛ akɛ: ‘Ataa, owo Yehowa shi, no hewɔ lɛ esa akɛ oye nɔ.’
Daa afi lɛ, Yefta biyoo lɛ nanemɛi yasaraa lɛ
Yefta biyoo lɛ hu ye awerɛho waa. Enyɛŋ ebote gbalashihilɛ mli ni efɔ bii kɛ́ eesɔmɔ yɛ kpee-buu lɛ mli. Shi eesumɔ ni etsu epapa shiwoo lɛ he nii, ní eha Yehowa aná miishɛɛ. No he miihia lɛ kwraa fe gbalashihilɛ mli ni ebaabote loo bii ni ebaafɔ. No hewɔ lɛ, eshi shĩa ni eyahi kpee-buu lɛ mli ewala gbii abɔ fɛɛ.
Ani osusuɔ akɛ nɔ ni efee lɛ ha epapa kɛ Yehowa ná miishɛɛ?— Hɛɛ, eha amɛná miishɛɛ! Kɛ́ ofeɔ toiboo ni osumɔɔ Yehowa lɛ, obaanyɛ otsɔ tamɔ Yefta biyoo lɛ. Boo hu obaaha ofɔlɔi kɛ Yehowa aná miishɛɛ waa.