Tsɔsemɔ ni Maŋtsɛyeli lɛ Kɛhãa​—Maŋtsɛ lɛ Tsuji Atsɔsemɔ

OKWƐ wielɔ lɛ yɛ wiemɔ kpoku lɛ nɔ, ni okɛ miishɛɛ ŋmɔ fioo. Eji nyɛmi nuu ko ni jɛ osafo lɛ mli, ni enɛ ji klɛŋklɛŋ kwraa ni ehãa wiemɔ yɛ kpokpaa nɔ kpee shishi. Be ni ehãa wiemɔ lɛ jogbaŋŋ ni oboɔ toi lɛ, onaa kpɛ ohe pam yɛ tsɔsemɔ ni Nyɔŋmɔ webii lɛ anine shɛɔ nɔ lɛ hewɔ. Okai klɛŋklɛŋ gbi kwraa ni nyɛmi nuu nɛɛ ná nifeemɔ yɛ nyɛsafo lɛ mli lɛ—amrɔ nɛɛ, onaa akɛ ehe esa jogbaŋŋ! Etee ehiɛ oyayaayai be ni egbe Gbɛgbamɔ Sɔɔmɔ Skul lɛ naa lɛ. Nyɛsɛɛ nɛɛ nɔŋŋ hu ni ekɛ eŋa gbe Skul Kɛhã Maŋtsɛyeli Sane Kpakpa Jajelɔi lɛ naa. Be ni otswaa odɛŋ yɛ wiemɔ ni ŋɔɔ ni nyɛmi nuu lɛ hã lɛ hewɔ lɛ, okwɛ ohewɔ ni ojwɛŋ tsɔsemɔ ni akɛhãa Nyɔŋmɔ webii fɛɛ lɛ he.

Biblia lɛ gba akɛ be ko baashɛ ni Nyɔŋmɔ webii lɛ fɛɛ baafee mɛi ni ‘Yehowa tsɔɔ amɛ nii.’ (Yes. 54:13) Nakai beaŋ wɔyɔɔ nɛɛ. Jeee wɔwoji lɛ pɛ anɔ atsɔɔ atsɔseɔ wɔ, atsɔɔ wɔsafoŋ kpeei, kpeei bibii, kpeei wuji, kɛ skul srɔtoi ni ato he gbɛjianɔ lɛ hu anɔ atsɔseɔ wɔ kɛhãa sɔ̃i krɛdɛi komɛi ahe nitsumɔ yɛ Yehowa gbɛjianɔtoo lɛ mli. Wɔbaasusu bɔ ni tsɔsemɔi nɛɛ fɛɛ maa nɔ mi akɛ Nyɔŋmɔ Maŋtsɛyeli lɛ miiye nɔ ŋmɛnɛ lɛ he yɛ fã nɛɛ mli.