Awo Yesu Hiɛ Nyam Dani Afɔ Lɛ

Be ni bɔfo Gabriel kɛɛ oblayoo Maria akɛ ebaafɔ binuu ni ebaawo lɛ gbɛ́i akɛ Yesu, ni gbekɛ lɛ baaye nɔ akɛ Maŋtsɛ kɛya naanɔ lɛ sɛɛ lɛ, Maria bi lɛ akɛ: “Te enɛ baafee tɛŋŋ aba mli lɛ, akɛni mikɛ nuu náko bɔlɛ dã nɛɛ?”​—Luka 1:34.

Gabriel to he ehã lɛ akɛ: “Mumɔ krɔŋkrɔŋ baaba onɔ, ni Mɔ ni Nɔ Kwɔ Fe Fɛɛ lɛ hewalɛ lɛ baaha onɔ. Ni no hewɔ lɛ, abaatsɛ mɔ ni abaafɔ lɛ lɛ akɛ krɔŋkrɔŋ, Nyɔŋmɔ Bi.”​—Luka 1:35.

Ekolɛ, akɛni Gabriel miitao Maria ahe sane nɛɛ aye hewɔ lɛ, ekɛfata he akɛ: “Naa! owekunyo Elizabet, mɔ ni atsɛ lɛ kene lɛ hu hiɛ binuu hɔ, yɛ egbɔlɛ be nɛɛ mli, ni enyɔɔŋ ni ji ekpaa mli eyɔɔ lɛ; ejaakɛ Nyɔŋmɔ gbɛfaŋ lɛ, wiemɔ ko bɛ ni nyɛŋ aba mli.”​—Luka 1:36, 37.

Nɔ ni Maria wie lɛ hãa wɔnaa akɛ ehe nɔ ni Gabriel wie lɛ eye. Maria kɛɛ akɛ: “Naa! Yehowa nyɔŋ yoo ji mi! Bɔ ni owie lɛ, aba mli nakai ahã mi.”​—Luka 1:38.

Be ni Gabriel shi Maria lɛ, Maria to gbɛjianɔ koni eyasara Elizabet, mɔ ni kɛ ewu Zakaria yɔɔ Yudea ŋmeŋmei lɛ anɔ yɛ he ko ni kɛ Yerusalem jekɛɛɛ lɛ. Kɛ́ Maria jɛ he ni eyɔɔ yɛ Nazaret yɛ Yerusalem kooyi lɛ kɛmiiya he ni Elizabet yɔɔ lɛ, ebaahe gbii etɛ loo gbii ejwɛ.

Naagbee lɛ, Maria yashɛ Zakaria shĩa lɛ. Be ni eboteɔ shĩa lɛ mli lɛ, eŋa ewekunyo Elizabet. Be ni Elizabet nu ŋamɔ lɛ, mumɔ krɔŋkrɔŋ yi lɛ obɔ, ni ekɛɛ Maria akɛ: “Ajɔɔ bo yɛ yei ateŋ, ni ajɔɔ omusuŋ bi lɛ! No hewɔ lɛ, te fee tɛŋŋ ni miná hegbɛ nɛɛ, akɛ mi-Nuŋtsɔ lɛ nyɛ eba miŋɔɔ nɛɛ? Ejaakɛ naa! be ni oŋamɔ lɛ gbɛɛ yɛ mitoiiaŋ lɛ, abifao lɛ ni yɔɔ mimusuŋ lɛ tumɔ kɛ miishɛɛ.”​—Luka 1:42-44.

Kɛkɛ ni Maria kɛ hiɛsɔɔ wie akɛ: “Misusuma miiwó Yehowa nɔ gojoo, ni mimumɔ mli miifili lɛ babaoo yɛ Nyɔŋmɔ, mi-Yiwalaherelɔ lɛ hewɔ, ejaakɛ ebakwɛ enyɔŋ yoo lɛ gbɛhe ni baa shi lɛ. Ejaakɛ naa! kɛjɛ be nɛɛ nɔ kɛyaa lɛ, yinɔi fɛɛ baajaje akɛ miyɛ miishɛɛ, ejaakɛ Hewalɛtsɛ lɛ efee nibii wuji ehã mi.” Wɔnaa akɛ yɛ duromɔ ni aduro Maria lɛ fɛɛ sɛɛ lɛ, ekɛ anunyam lɛ fɛɛ hã Nyɔŋmɔ. Ekɛɛ akɛ: “Krɔŋkrɔŋ ji egbɛ́i, ni emɔbɔnalɛ yɛ mɛi ni sheɔ lɛ gbeyei lɛ anɔ kɛyashi yinɔi ayinɔi.”​—Luka 1:46-50.

Maria tee nɔ ejie Nyɔŋmɔ yi kɛ gbalɛ wiemɔi ni jɛ mumɔŋ nɛɛ akɛ: “Ekɛ enine etsu hewalɛ nitsumɔ; egbɛ mɛi ni wóɔ amɛhe nɔ yɛ amɛtsuiiaŋ yiŋtoi amli lɛ eshwã. Ekpa hii ni yɔɔ hegbɛi kpelei kɛjɛ maŋtsɛ sɛii anɔ, ni ewó mɛi ni ji humii lɛ anɔ; ehã mɛi ni hɔmɔ yeɔ amɛ lɛ etɔrɔ kɛ nibii kpakpai, ni eshwie niiatsɛmɛi lɛ kɛ amɛdɛ̃ folo. Eye ebua etsulɔ Israel, ekai shi ni ewo akɛ ebaajie mɔbɔnalɛ kpo etsɔɔ Abraham kɛ eseshi lɛ kɛya naanɔ, taakɛ ekɛɛ wɔtsɛmɛi lɛ.”​—Luka 1:51-55.

Maria kɛ Elizabet hi shi aaafee nyɔji etɛ, ni eeenyɛ efee akɛ eye ebua Elizabet yɛ otsii fioo ni eshwɛ lɛ ni ebaafɔ nɛɛ amli. Kwɛ bɔ ni ehi jogbaŋŋ akɛ yei anɔkwafoi enyɔ nɛɛ, ní amɛ fɛɛ amɛŋɔ hɔ yɛ Nyɔŋmɔ yelikɛbuamɔ naa lɛ, baahi shi yɛ he kome yɛ amɛwala shihilɛ be nɛɛ mli!

Agbɛnɛ, kadimɔ bɔ ni awo Yesu hiɛ nyam po dani afɔ lɛ lɛ. Elizabet tsɛ lɛ akɛ “mi-Nuŋtsɔ,” ni bi ni yɔɔ emusuŋ lɛ “tumɔ kɛ miishɛɛ” be ni Maria pue lɛ. Taakɛ wɔbaana lɛ, esoro enɛ kwraa yɛ bɔ ni sɛɛ mli lɛ mɛi kɛ Maria kɛ bi ni ebaafɔ lɛ ye hã lɛ he.