Nɔ Hewɔ ni Eshaifaa He Hiaa

Petro nu ŋaa ni Yesu wo yɛ bɔ ni esa akɛ nyɛmimɛi enyɔ ni naagba ete shi yɛ amɛteŋ lɛ atsu naagba lɛ he nii amɛhã yɛ amɛ sɔŋŋ amɛteŋ lɛ. Fɛɛ sɛɛ lɛ, etamɔ nɔ ni Petro miitao ele shii abɔ ni esa akɛ mɔ ko abɔ mɔdɛŋ afee nakai.

Petro bi akɛ: “Nuŋtsɔ, shii enyiɛ esa akɛ minyɛmi atɔ̃ minɔ ni miŋɔfa lɛ? Kɛyashi shii kpawo lo?” Jamɔŋ hiɛnyiɛlɔi komɛi tsɔɔ akɛ esa akɛ, akɛ esha afã kɛyashi shii etɛ nɔ. No hewɔ lɛ, ekolɛ Petro susu akɛ, kɛ́ eŋɔfa nyɛmi ko “shii kpawo” lɛ, belɛ efee mɔ lɛ ejurɔ pii.​—Mateo 18:21.

Shi Yesu tsɔɔmɔ lɛ wooo hewalɛ ni akane shii abɔ ni mɔ ko efee esha ko. No hewɔ lɛ, ejaje Petro ekɛɛ: “Miikɛɛ bo akɛ, jeee kɛyashi shii kpawo, shi moŋ kɛyashi shii nyɔŋmai kpawo kɛ kpawo.” (Mateo 18:22) Kɛ́ wɔɔwie lɛ yɛ gbɛ kroko nɔ lɛ, kɛmiiya naanɔ. Husu bɛ shii abɔ ni esa akɛ Petro aŋɔ esha afa enyɛmi ko lɛ he.

No sɛɛ lɛ, Yesu gba Petro kɛ mɛi krokomɛi lɛ nɔkwɛmɔnɔ ko koni ekɛhã amɛna akɛ esa akɛ amɛkɛ eshai afa. Ekɔɔ nyɔŋ ko ni ekaseee enuŋtsɔ ni naa mɔbɔ lɛ he. Maŋtsɛ lɛ tao akɛ ekɛ enyɔji abu akɔntaa. Akɛ nyɔŋ ko ni hiɛ lɛ nyɔmɔ kpele ni naa shiɔ talɛntai 10,000 [denarioi 60,000,000] lɛ ba eŋɔɔ. Enyɛŋ ewo nyɔmɔ nɛɛ kɔkɔɔkɔ. Kɛkɛ ni maŋtsɛ lɛ fã akɛ ahɔ̃ɔ nyɔŋ lɛ, eŋa, kɛ ebii ni akɛwo nyɔmɔ lɛ. No hewɔ lɛ, nyɔŋ lɛ ho egbee shi yɛ enuŋtsɔ lɛ naji anaa ni ekpa lɛ fai ekɛɛ: “Too otsui shi ohã mi, ni mawo bo nyɔmɔ lɛ fɛɛ.”​—Mateo 18:26.

Maŋtsɛ lɛ musuŋ tsɔ lɛ yɛ no hewɔ, ni ejɛ mɔbɔnalɛ mli ekɛ nyɔŋ lɛ nyɔmɔ kpele lɛ ke lɛ. Be ni maŋtsɛ lɛ fee nakai sɛɛ lɛ, nyɔŋ nɛɛ tee ni eyana enaanyo nyɔŋ ko ni hiɛ lɛ nyɔmɔ denarioi 100. Emɔ nyɔŋ kroko lɛ, ni ebɔi esɛ̃ miamɔ ekɛɛ: “Wo mi nyɔmɔ ni ohiɛ mi lɛ fɛɛ.” Shi enaanyo nyɔŋ lɛ ni hiɛ lɛ nyɔmɔ lɛ ho egbee shi yɛ enaji anaa ni ekpa lɛ fai ekɛɛ: “Too otsui shi ohã mi, ni mawo bo nyɔmɔ lɛ.” (Mateo 18:28, 29) Shi nyɔŋ nɛɛ ni maŋtsɛ lɛ kɛ nyɔmɔ ni ehiɛ lɛ eke lɛ lɛ, ekaseee enuŋtsɔ lɛ. Ehã awo enaanyo nyɔŋ lɛ tsuŋ kɛyashi be ni ebaawo lɛ nyɔmɔ lɛ.

Yesu gba akɛ be ni nyɔji krokomɛi lɛ na bɔ ni nyɔŋ lɛ enaaa enaanyo nyɔŋ lɛ mɔbɔ lɛ, amɛtee amɛyabɔ nuŋtsɔ lɛ, ni emli fu ni efã ni ayatsɛ nyɔŋ lɛ kɛba ni ekɛɛ lɛ akɛ: “Nyɔŋ fɔŋ, be ni okpa mi fai lɛ, miŋɔ onyɔmɔ lɛ fɛɛ mike bo. Ani esaaa akɛ kulɛ bo hu onaa onaanyo nyɔŋ lɛ mɔbɔ taakɛ mina bo mɔbɔ lɛ?” Maŋtsɛ ni mli efu lɛ ŋɔ nyɔŋ ni enaaa mɔbɔ lɛ ehã tsuŋwoohe nɔkwɛlɔi lɛ, kɛyashi be ni ebaawo nyɔmɔ lɛ fɛɛ. Yesu mu sane lɛ naa akɛ: “Mi-Tsɛ ni yɔɔ ŋwɛi lɛ hu kɛ nyɛ baaye yɛ nakai gbɛ nɔ nɔŋŋ, kɛ́ nyɛteŋ mɔ fɛɛ mɔ kɛ enyɛmi tɔmɔ efaaa lɛ kɛjɛɛɛ etsui mli.”​—Mateo 18:32-35.

Nɔkwɛmɔnɔ nɛɛ hãa wɔnaa akɛ esa jogbaŋŋ akɛ wɔkɛ eshai afa! Nyɔŋmɔ kɛ nyɔmɔ kpele ni wɔhiɛ lɛ akɛ eshafeelɔi lɛ eke wɔ. Esha fɛɛ esha ni nyɛmi Kristofonyo ko baafee kɛshi wɔ lɛ jeee nɔ ko kwraa kɛ́ akɛto nyɔmɔ ni wɔhiɛ Nyɔŋmɔ lɛ he. Yehowa kɛ esha ni wɔfeɔ lɛ faa wɔ shii akpei abɔ, jeee shi kome pɛ. Kɛ́ wɔnyɛmi ko fee esha eshi wɔ lɛ, ani wɔnyɛŋ wɔkɛfa lɛ shii abɔ? Taakɛ Yesu tsɔɔ yɛ Gɔŋ nɔ Shiɛmɔ lɛ mli lɛ, Nyɔŋmɔ ‘kɛ wɔnyɔji lɛ baake wɔ, taakɛ wɔ hu wɔkɛkeɔ mɛi ni hiɛ wɔ nyɔji lɛ.’​—Mateo 6:12.