Naakpɛɛ Nii Ba Yɛ Ŋshɔ Tsuru Lɛ Naa

Be ni Farao nu akɛ Israelbii lɛ eshi Ejipt lɛ nɔŋŋ ni etsake ejwɛŋmɔ. Efã esraafoi lɛ akɛ: ‘Nyɛsaa ta shwiilii lɛ, ni wɔnyiɛa Israelbii lɛ asɛɛ! Kulɛ, esaaa akɛ wɔhãa amɛyaa.’ No hewɔ lɛ, ekɛ esraafoi lɛ nyiɛ Israelbii lɛ asɛɛ koni amɛyamɔ amɛ.

No mli lɛ, Yehowa nyiɛ ewebii lɛ ahiɛ. Kɛ́ je tsɛre lɛ, ekɛ atatu nyiɛɔ amɛhiɛ, ni kɛ́ je na lɛ, ekɛ la nyiɛɔ amɛhiɛ. Enyiɛ amɛhiɛ kɛtee Ŋshɔ Tsuru lɛ naa, ni ekɛɛ amɛ akɛ amɛjɔɔ amɛhe fioo yɛ jɛmɛ.

Kɛkɛ ni Israelbii lɛ na Farao kɛ esraafoi lɛ ni amɛmiiba amɛbanina amɛ. Efee tamɔ nɔ ni Israelbii lɛ eka ŋshɔ lɛ kɛ Ejiptbii lɛ ateŋ. No hewɔ lɛ, amɛtsui fã ni amɛkɛɛ Mose akɛ: ‘Wɔbaagboi! Kulɛ, esaaa akɛ ohãa wɔshiɔ Ejipt.’ Shi Mose kɛɛ amɛ akɛ: ‘Nyɛkashea gbeyei. Nyɛdamɔa shi shiŋŋ ni nyɛkwɛa nyɛyiwala ni Yehowa baahere.’ Mose kɛ ehiɛ fɔ̃ Yehowa nɔ waa, aloo jeee nakai?

Yehowa kɛɛ Israelbii lɛ akɛ amɛtsa amɛgbɛfãa lɛ nɔ. Nakai gbɛkɛ lɛ, Yehowa hã atatu lɛ baje Ejiptbii lɛ kɛ Israelbii lɛ ateŋ. Atatu lɛ hã duŋ wo yɛ he ni Ejiptbii lɛ yɔɔ lɛ, shi ehã la kpɛ yɛ he ni Israelbii lɛ yɔɔ lɛ.

Yehowa kɛɛ Mose akɛ ekpã enine mli yɛ ŋshɔ lɛ nɔ. Kɛkɛ ni Yehowa hã kɔɔyɔɔ ni naa wa tswa nakai nyɔɔŋ lɛ mli fɛɛ. Enɛ hã ŋshɔ lɛ mli gba enyɔ, ni Israelbii akpekpei abɔ lɛ fɛɛ nyiɛ kɛtsɔ shikpɔŋ gbiŋ nɔ kɛyaje afã kroko lɛ. Ŋshɔ lɛ tsɔ tamɔ gbogbo yɛ amɛninejurɔ nɔ kɛ amɛbɛku nɔ.

Farao asraafoi lɛ nyiɛ Israelbii lɛ asɛɛ kɛtee ŋshɔ lɛ teŋ. Kɛkɛ ni Yehowa famɔ amɛshwiilii lɛ anaji. Enɛ hã amɛhao waa ni amɛbolɔ amɛkɛɛ: ‘Nyɛhãa wɔshia biɛ! Yehowa miiwu eehã amɛ.’

Yehowa kɛɛ Mose akɛ: ‘Kpã onine mli yɛ ŋshɔ lɛ nɔ.’ Be ni efee nakai lɛ, nui ni mamɔ shi tamɔ gbogbo lɛ fɛɛ kumɔ eshwie Ejipt asraafoi lɛ anɔ. Farao kɛ esraafoi lɛ fɛɛ gboi. Amɛteŋ mɔ kome folo po eshwɛɛɛ.

Israelbii asafo muu lɛ ni fo ŋshɔ lɛ lá lala ko kɛjie Nyɔŋmɔ yi. Amɛlá akɛ: ‘Lá ohã Yehowa, ejaakɛ ewo ehiɛ nyam waa diɛŋtsɛ. Eshɛrɛ okpɔŋɔ kɛ enɔtalɔ lɛ eshwie ŋshɔ lɛ mli.’ Be ni amɛmiilá lɛ, yei lɛ miijo ni amɛmiisha akashaa. Mɔ fɛɛ mɔ mii shɛ ehe waa akɛ, agbɛnɛ, amɛye amɛhe kwraa.