Amɛtse Yehowa Hiɛ Atua

Be ni Israelbii lɛ yɔɔ ŋa lɛ nɔ lolo lɛ, Kora, Datan, Abiram, kɛ hii 250 komɛi tse Mose hiɛ atua. Amɛkɛɛ lɛ akɛ: ‘Oofee nɔ ko tsɔ! Mɛni hewɔ esa akɛ bo ofee wɔhiɛnyiɛlɔ, ní Aaron afee osɔfonukpa? Yehowa kɛ wɔ fɛɛ yɛ; jeee okɛ Aaron pɛ.’ Shi nɔ ni amɛfee lɛ tsɔɔ akɛ, amɛmiitse Yehowa hiɛ atua. Enɛ hã Yehowa mli fu amɛ waa!

Mose kɛɛ Kora kɛ mɛi ni nyiɛ esɛɛ lɛ akɛ: ‘Wɔ́ lɛ, nyɛbaa sɔlemɔ buu lɛ naa, ni nyɛkɛ tsofa-kɛ-ŋma awoa nii mli ni nyɛkɛbaa. Yehowa baatsɔɔ wɔ mɔ ni ehala.’

Enɔ jetsɛremɔ lɛ, Kora kɛ hii 250 lɛ ni fata ehe lɛ tee sɔlemɔ buu lɛ naa koni amɛkɛ Mose ayakpe. Be ni amɛshɛ jɛmɛ lɛ, amɛshã tsofa-kɛ-ŋma oookɛɛ osɔfoi ji amɛ. Yehowa kɛɛ Mose kɛ Aaron akɛ: ‘Nyɛtsia nyɛhe kɛjea Kora kɛ hii ni fata ehe lɛ ahe.’

Eyɛ mli akɛ Kora tee Mose ŋɔɔ yɛ sɔlemɔ buu lɛ naa moŋ, shi Datan, Abiram, kɛ amɛwekui lɛ eyaaa. Yehowa kɛɛ Israelbii lɛ akɛ amɛtsi amɛhe kɛje mama tsũi ni Kora, Datan, kɛ Abiram wɔɔ mli lɛ ahe. Amrɔ nɔŋŋ ni Israelbii lɛ tsi amɛhe. Datan, Abiram, kɛ amɛwekui lɛ je kpo amɛbadamɔ amɛmama tsũi lɛ anaa. Trukaa lɛ, shikpɔŋ lɛ gba ni amɛ fɛɛ amɛbote mli! La jɛ ŋwɛi ni ebashã Kora kɛ hii 250 lɛ yɛ sɔlemɔ buu lɛ naa.

Kɛkɛ ni Yehowa kɛɛ Mose akɛ: ‘Hã tsɛmɛi ashĩa fɛɛ tsɛmɛi ashĩa hiɛnyiɛlɔ kɛ tso aba, ni oŋma hiɛnyiɛlɔ fɛɛ hiɛnyiɛlɔ gbɛ́i yɛ etso he. Shi ŋmaa Aaron gbɛ́i yɛ Levi weku lɛ tso lɛ he, ni okɛ tsei lɛ fɛɛ awo sɔlemɔ buu lɛ mli. Hiɛnyiɛlɔ ni fɔfɔi baaba etso he lɛ, lɛ ji mɔ ni mihala.’

Enɔ jetsɛremɔ lɛ, Mose jie tsei lɛ fɛɛ ni ekɛtsɔɔ hiɛnyiɛlɔi lɛ. Amɛna akɛ Aaron tso lɛ pɛ ni fɔfɔi eba he, ni ewo yibii. Yehowa tsɔ nɛkɛ gbɛ nɔ ehã Israelbii lɛ na faŋŋ akɛ, ehala Aaron akɛ osɔfonukpa.