Yehowa Hala Yoshua

Mose nyiɛ Israelbii lɛ ahiɛ afii babaoo. Be ni eshwɛ fioo ni ebaagbo lɛ, Yehowa kɛɛ lɛ akɛ: ‘Jeee bo okɛ Israelbii lɛ baaya Shiwoo Shikpɔŋ lɛ nɔ. Shi mahã ona shikpɔŋ lɛ.’ Kɛkɛ ni Mose kɛɛ Yehowa ni ehala mɔ kroko ni baanyiɛ ewebii lɛ ahiɛ. Yehowa kɛɛ lɛ akɛ: ‘Yaa Yoshua ŋɔɔ ni oyakɛɛ lɛ akɛ, lɛ ji mɔ ni mihala.’

Mose kɛɛ maŋ lɛ akɛ eshwɛ fioo ni ebaagbo, ni Yehowa ehala Yoshua ni enyiɛ amɛhiɛ kɛya Shiwoo Shikpɔŋ lɛ nɔ. Kɛkɛ ni ekɛɛ Yoshua akɛ: ‘Kaashe gbeyei. Yehowa baaye ebua bo.’ No sɛɛ etsɛɛɛ lɛ, Mose kwɔ kɛtee Nebo Gɔŋ lɛ nɔ, ni Yehowa kɛ shikpɔŋ ni ewo Abraham, Isak, kɛ Yakob shi akɛ ekɛbaahã amɛ lɛ tsɔɔ lɛ. Kɛkɛ ni egbo yɛ jɛmɛ. No mli lɛ, eye afii 120.

Yehowa kɛɛ Yoshua akɛ: ‘Nyɛfoa Yordan Faa lɛ, ni nyɛyaa Kanaan. Maye mabua bo tamɔ bɔ ni miye mibua Mose lɛ. Bɔɔ mɔdɛŋ ni okane mi-Mla lɛ daa gbi. Kaashe gbeyei. Feemɔ ekãa. Yaa ni oyafee nɔ ni mifã bo akɛ ofee lɛ.’

Yoshua tsu mɛi enyɔ ni amɛyakwɛ bɔ ni Yeriko maŋ lɛ yɔɔ hã. Yɛ nikasemɔ ni nyiɛ sɛɛ lɛ mli lɛ, wɔbaana nɔ ni ba yɛ jɛmɛ. Be ni amɛku amɛsɛɛ lɛ, nɔ ni amɛbawie lɛ hã Israelbii lɛ na akɛ, amɛbaanyɛ amɛya Kanaan. No hewɔ lɛ, enɔ jetsɛremɔ lɛ, Yoshua kɛɛ maŋ lɛ akɛ amɛbɔi amɛnibii too. Kɛkɛ ni ekɛɛ osɔfoi ni tere kpaŋmɔ adeka lɛ akɛ amɛtsɔ maŋ lɛ hiɛ kɛya Yordan Faa lɛ naa. No mli lɛ, faa lɛ eyi. Shi be ni osɔfoi lɛ anaji sa nu lɛ mli pɛ ni faa lɛ kpa hoo, ni nu ni yɔɔ mli lɛ fɛɛ tã! Osɔfoi lɛ nyiɛ kɛtee faa lɛ teŋ, ni amɛdamɔ jɛmɛ kɛyashi maŋ muu lɛ fɛɛ fo faa lɛ kɛtee afã kroko lɛ. Ani eeenyɛ efee akɛ naakpɛɛ nii nɛɛ kai amɛ nɔ ni Yehowa fee yɛ Ŋshɔ Tsuru lɛ naa lɛ?

Israelbii lɛ kɛ afii babaoo efã gbɛ. Agbɛnɛ lɛ, amɛshɛ Shiwoo Shikpɔŋ lɛ nɔ. Bianɛ lɛ, amɛbaanyɛ amɛmamɔ tsũi, ni amɛtotoo maji. Amɛbaanyɛ amɛfee ŋmɔji ni amɛdu aduawai, ni amɛbaanyɛ amɛfee wain abɔi hu. Biblia lɛ kɛɛ eji shikpɔŋ ni fufɔ kɛ woo miiho yɛ nɔ, ni tsɔɔ akɛ Israelbii lɛ ná niyenii babaoo yɛ jɛmɛ.