Hiɛnyiɛlɔ Hee Kɛ Yei Enyɔ Ni Fee Ekãa

Yoshua nyiɛ Yehowa webii lɛ ahiɛ afii pii, kɛkɛ ni egbo be ni eye afii 110. Be ni eyɔɔ wala mli lɛ, Israelbii lɛ sɔmɔ Yehowa. Shi be ni egbo lɛ, Israelbii lɛ booo Yehowa toi dɔŋŋ. Amɛbɔi amagai jamɔ, tamɔ bɔ ni Kanaanbii lɛ feɔ lɛ. No hewɔ lɛ, Yehowa hã Kanaanbii lɛ amaŋtsɛ ko ni atsɛɔ lɛ Yabin lɛ hao amɛ. Israelbii lɛ kpa Yehowa fai ni ewa amɛ. No hewɔ lɛ, Yehowa hã amɛ hiɛnyiɛlɔ hee. Atsɛɔ lɛ Barak, ni eye ebua amɛ ni amɛku amɛsɛɛ kɛba Yehowa ŋɔɔ.

Gbalɔyoo ko ni atsɛɔ lɛ Debora lɛ tsu ni ayatsɛ Barak kɛba. Ekɛɛ Barak akɛ, nɔ ni Yehowa kɛɛ nɛ: ‘Taomɔ hii 10,000, ni okɛ Yabin kɛ esraafoi lɛ ayakpe yɛ Kishon faa lɛ naa. Obaaye Sisera, ni ji Yabin asraafoi lɛ atatsɛnukpa lɛ nɔ kunim yɛ jɛmɛ.’ Barak kɛɛ Debora akɛ: ‘Kɛ́ okɛ mi baaya lɛ, no lɛ maya.’ Debora kɛɛ lɛ akɛ: ‘Mikɛ bo baaya. Shi ná ole akɛ, jeee bo obaagbe Sisera. Yehowa kɛɛ yoo ko ni baagbe lɛ.’

Debora fata Barak kɛ esraafoi lɛ ahe kɛtee Tabor Gɔŋ lɛ nɔ koni amɛkɛ Sisera ayawu. Be ni Sisera nu enɛ lɛ, ebua esraafoi kɛ eta shwiilii lɛ anaa yɛ jɔɔ lɛ mli. Debora kɛɛ Barak akɛ: ‘Ŋmɛnɛ lɛ, Yehowa baahã oye kunim.’ Barak kɛ esraafoi 10,000 lɛ jo foi kɛkpeleke jɔɔ lɛ koni amɛkɛ Sisera kɛ esraafoi lɛ ayakpe.

Yehowa hã Kishon faa lɛ yi ni Sisera kɛ ewebii lɛ ata shwiilii lɛ ka ŋmɔtɔ lɛ mli. Sisera yi shi kɛjɛ eshwiili lɛ mli ni ejo foi. Barak kɛ esraafoi lɛ ye Sisera webii lɛ anɔ kunim, shi amɛnine shɛɛɛ Sisera nɔ! Ejo foi ni eyatee yɛ yoo ko ni atsɛɔ lɛ Yael lɛ mama tsũ mli. Yael hã lɛ mliki ni enu, kɛkɛ ni eha lɛ kuntu. Etsɛɛɛ kwraa ni Sisera wɔ, ejaakɛ etɔ lɛ waa. Kɛkɛ ni Yael kɔ tso ko kɛ enaa piɔpiɔ ni efee blɛoo ni eyaka ewo Sisera yitsoŋ ni egbe lɛ.

Barak ba Sisera taomɔ. Shi Yael kɛ lɛ yakpe ni ekɛɛ lɛ akɛ: ‘Ba ni matsɔɔ bo nuu ni otaoɔ lɛ.’ Yael kɛ Barak tee mama tsũ lɛ mli. Be ni ebote mli lɛ, naa Sisera kã shi ni egbo. Barak kɛ Debora lá kɛjie Yehowa yi akɛ ehã Israelbii lɛ eye amɛhenyɛlɔi lɛ anɔ kunim. Israelbii lɛ ná toiŋjɔlɛ afii 40.