Rut Kɛ Naomi

Be ko lɛ, hɔmɔ ba Israel. No hewɔ lɛ, Israel yoo ko ni atsɛɔ lɛ Naomi lɛ kɛ ewu kɛ amɛbihii enyɔ lɛ fã kɛtee Moab shikpɔŋ lɛ nɔ. Sɛɛ mli lɛ, Naomi wu lɛ gbo. Ebihii lɛ kɛ Moab yei bote gbalashihilɛ mli. Atsɛɔ amɛŋamɛi lɛ Rut kɛ Orpa. Shi mɔbɔ sane ji akɛ, sɛɛ mli lɛ, ebihii lɛ hu gboi.

Be ni Naomi nu akɛ niyenii eba Israel lɛ, ekpɛ eyiŋ akɛ ebaaku esɛɛ kɛya emaŋ. Rut kɛ Orpa kpɛ amɛyiŋ akɛ amɛkɛ lɛ baaya. Shi yɛ gbɛ lɛ nɔ lɛ, Naomi kɛɛ amɛ akɛ: ‘Nyɛkɛ mi kɛ mibihii lɛ hi shi jogbaŋŋ. Masumɔ ni nyɛbote gbalashihilɛ mli ekoŋŋ. No hewɔ lɛ, nyɛkua nyɛsɛɛ nyɛyaa Moab.’ Shi amɛkɛɛ lɛ akɛ: ‘Wɔsumɔɔ osane! Wɔkɛ bo baaya.’ Naomi kɛ amɛ wie aahu, kɛkɛ ni Orpa ku esɛɛ, shi Rut ekuuu esɛɛ. Naomi kɛɛ lɛ akɛ: ‘Orpa miiku esɛɛ kɛmiiya emaŋbii lɛ kɛ enyɔŋmɔi lɛ aŋɔɔ. Okɛ lɛ aku sɛɛ, ni oya omami shĩa.’ Shi Rut kɛɛ lɛ akɛ: ‘Mishiŋ bo. Omaŋbii lɛ baatsɔ mimaŋbii, ni o-Nyɔŋmɔ lɛ baatsɔ mi-Nyɔŋmɔ.’ Te osusuɔ akɛ Naomi nu he ehã tɛŋŋ be ni Rut wie nakai lɛ?

Be ni Rut kɛ Naomi yashɛ Israel lɛ, no mli lɛ abɔi barle kpamɔ. Gbi ko lɛ, Rut tee nuu ko ni atsɛɔ lɛ Boaz lɛ ŋmɔ mli koni eyabua barle ni eshwie shi lɛ anaa ni ekɛya shĩa. Boaz ji Rahab binuu. Boaz nu akɛ Rut jɛ Moab, ni akɛ, ekɛ Naomi ehi shi jogbaŋŋ ni eye lɛ anɔkwa. Ekɛɛ enitsulɔi lɛ akɛ amɛje gbɛ amɛshi barle lɛ eko yɛ ŋmɔ lɛ mli amɛhã Rut.

Nakai gbɛkɛ lɛ, be ni Rut yashɛ shĩa lɛ, Naomi bi lɛ akɛ: ‘Namɔ ŋmɔ mli oyatsu nii yɛ ŋmɛnɛ?’ Rut hã hetoo akɛ: ‘Nuu ko ni atsɛɔ lɛ Boaz lɛ ŋmɔ mli.’ Naomi kɛɛ lɛ akɛ: ‘Boaz ji miwu lɛ wekunyo. Okɛ oblayei krokomɛi lɛ aya nɔ atsu nii yɛ eŋmɔ lɛ mli. Kɛ́ otee jɛmɛ lɛ, mɔ ko mɔ ko yeŋ bo awui.’

Rut tee nɔ etsu nii yɛ Boaz ŋmɔ lɛ mli kɛyashi akpa barle lɛ fɛɛ agbe naa. Boaz na akɛ Rut tsuɔ nii waa ni eji yoo kpakpa. Yɛ nakai beiaŋ lɛ, kɛ́ nuu ko gbo ni ebɛ binuu lɛ, ewekunyo ko kɛ eŋa lɛ boteɔ gbalashihilɛ mli. No hewɔ lɛ, Boaz kɛ Rut bote gbalashihilɛ mli ni amɛfɔ binuu. Awo lɛ gbɛ́i akɛ Obed. Obed nabi ji David. Naomi nanemɛi lɛ amii shɛ amɛhe waa, ni amɛwie akɛ: ‘Klɛŋklɛŋ lɛ, Yehowa hã bo Rut, ni Rut kɛ bo ehi shi jogbaŋŋ. Amrɔ nɛɛ ehã bo nabi hu. Ajie Yehowa yi.’