Yehowa Hã Samson He Wa

Israelbii babaoo bɔi amagai jamɔ ekoŋŋ. No hewɔ lɛ, Yehowa kɛ amɛshikpɔŋ lɛ hã Filistibii lɛ. Shi Israelbii lɛ ateŋ mɛi komɛi tee nɔ amɛsɔmɔ Yehowa. Atsɛɔ amɛteŋ mɔ kome Manoa. Manoa kɛ eŋa lɛ bɛ bi. Gbi ko lɛ, Yehowa tsu ŋwɛibɔfo ko Manoa ŋa lɛ ŋɔɔ. Ŋwɛibɔfo lɛ kɛɛ lɛ akɛ: ‘Obaafɔ binuu, ni lɛ ebaakpɔ̃ Israelbii lɛ kɛje Filistibii lɛ adɛŋ. Ebaatsɔ Nazirnyo.’ Ani ole mɔ ni Nazirnyo ji? Nazirnyo ji mɔ ko ni sɔmɔɔ Yehowa yɛ gbɛ krɛdɛɛ nɔ. Ahãaa Nazirbii aku amɛyitsɔi.

Manoa ŋa lɛ bafɔ, ni Manoa wo amɛbinuu lɛ Samson. Be ni Samson da lɛ, Yehowa hã ehe wa waa. Samson gbe jata kɛ edɛ̃ folo. Be ko lɛ, Samson kome too gbe Filistibii 30. Filistibii lɛ nyɛ Samson, ni amɛka shii abɔ akɛ amɛbaagbe lɛ. Gbɛkɛ ko be ni Samson miiwɔ yɛ Gaza lɛ, Filistibii lɛ yatee yɛ maŋ lɛ geeti lɛ naa, koni kɛ́ je tsɛre lɛ amɛgbe lɛ. Shi nyɔɔŋteŋ lɛ, Samson te shi ni eyakpɔ geeti lɛ. Ekɛ geeti lɛ fɔ̃ ekɔŋ nɔ ni ekɛtee gɔŋ ko ni bɛŋkɛ Hebron lɛ yiteŋ!

Sɛɛ mli lɛ, Filistibii lɛ tee Samson naanyo yoo ko ni atsɛɔ lɛ Delila lɛ ŋɔɔ, ni amɛyakɛɛ lɛ akɛ: ‘Wɔbaahã bo shika pii koni otao nɔ hewɔ ni Samson he wa nakai lɛ ni obakɛɛ wɔ. Wɔmiitao wɔmɔ lɛ ni wɔwo lɛ tsuŋ.’ Delila sumɔɔ shika, no hewɔ lɛ, ekpɛlɛ nɔ. Be ni ekɛɛ Samson akɛ etsɔɔ lɛ nɔ hewɔ ni ehe wa nakai lɛ, Samson sumɔɔɔ ni etsɔɔ lɛ. Shi esu etsui aahu ni etsɔɔ lɛ. Ekɛɛ lɛ akɛ: ‘Kɛjɛ be ni afɔ mi lɛ, akuko miyitsɔi pɛŋ, ejaakɛ Nazirnyo ji mi. Kɛ́ aku miyitsɔi lɛ, magbɔjɔ.’ Kulɛ, esaaa akɛ Samson kɛɔ lɛ, aloo onaaa?

Oya nɔŋŋ ni Delila yakɛɛ Filistibii lɛ akɛ, Samson etsɔɔ lɛ nɔ hewɔ ni ehe wa lɛ. Ewɔle Samson yɛ enakutsei anaa, ni ehã mɔ ko ku eyitsɔi lɛ fɛɛ. Kɛkɛ ni Delila bolɔ akɛ: ‘Samson, Filistibii lɛ miiba ee ei!’ Samson hiɛ tsɛ̃, shi no mli lɛ egbɔjɔ. Filistibii lɛ kpiti lɛ, amɛfite ehiŋmɛii, ni amɛwo lɛ tsuŋ.

Gbi ko lɛ, Filistibii babaoo bua amɛhe naa yɛ amɛnyɔŋmɔ ko ni atsɛɔ lɛ Dagon lɛ shĩa, ni amɛbolɔ akɛ: ‘Wɔnyɔŋmɔ lɛ ehã wɔmɔ Samson! Nyɛkɛ lɛ abaa biɛ koni ebajie wɔhiɛtserɛ!’ No hewɔ lɛ, amɛhã akɛ lɛ badamɔ akulashiŋi enyɔ ateŋ, ni amɛŋmɔ lɛ. Samson bo ekɛɛ Yehowa akɛ: ‘Ao Yehowa, ofainɛ, hã mi hewalɛ shi kome nɛɛ pɛ.’ No mli lɛ, Samson yitsɔi etsa ekoŋŋ. Ekɛ ehewalɛ fɛɛ tsi akulashiŋi lɛ. Enɛ hã shĩa muu lɛ fɛɛ kumɔ eshwie mɛi ni yɔɔ jɛmɛ lɛ anɔ, ni egbe amɛ kɛ Samson fɛɛ.