Sane Ko Ni Ba Yɛ Karmel Gɔŋ Lɛ Nɔ

Maŋtsɛmɛi ni baye Israel wekui nyɔŋma maŋtsɛyeli lɛ nɔ lɛ ateŋ mɛi babaoo fee nibii gbohii. Maŋtsɛ Ahab fata amɛteŋ mɛi ni fee efɔŋ waa lɛ ahe. Ekɛ yoo ko ni bɛ subaŋ kwraa ni atsɛɔ lɛ Yezebel lɛ bote gbalashihilɛ mli. Yoo nɛɛ jáa amale nyɔŋmɔ ko ni atsɛɔ lɛ Baal. Ahab kɛ Yezebel hã Baal jamɔ he shi yɛ Israel, ni amɛgbe Yehowa gbalɔi lɛ. Ani ole nɔ ni Yehowa fee yɛ he? Etsu gbalɔ Elia kɛtee Ahab ŋɔɔ ni ekɛ lɛ ayawie.

Elia kɛɛ Maŋtsɛ Ahab akɛ, efɔŋ ni efeɔ lɛ hewɔ lɛ, nugbɔ enɛŋ yɛ Israel. Afii etɛ kɛ sɛɛ ni nugbɔ enɛɛɛ. No hewɔ lɛ, nibii ni maŋbii lɛ du lɛ baaa, ni hɔmɔ ye amɛ waa. Sɛɛ mli lɛ, Yehowa tsu Elia kɛtee Ahab ŋɔɔ ekoŋŋ. Be ni Maŋtsɛ Ahab na lɛ lɛ, ewie akɛ: ‘Bo ogbaa wɔnaa lɛ! Ohãaa nugbɔ anɛ.’ Elia kɛɛ lɛ akɛ: ‘Jeee mi mihãaa nugbɔ lɛ anɛ. Bo ofeɔ, ejaakɛ oojá Baal. Buamɔ maŋbii lɛ kɛ Baal gbalɔi lɛ anaa yɛ Karmel Gɔŋ lɛ yiteŋ. Wɔbaakwɛ mɔ ni ji anɔkwa Nyɔŋmɔ lɛ.’

Maŋbii lɛ bua amɛhe naa yɛ gɔŋ lɛ nɔ. Elia kɛɛ amɛ akɛ: ‘Nyɛkpɛa nyɛyiŋ. Kɛ́ Yehowa ji anɔkwa Nyɔŋmɔ lɛ, nyɛnyiɛa esɛɛ; ni kɛ́ Baal ji anɔkwa nyɔŋmɔ lɛ, nyɛnyiɛa esɛɛ.’ Kɛkɛ ni ekɛɛ: ‘Baal gbalɔi 450 lɛ agbe kooloo ni amɛkɛfɔ̃ afɔleshaa latɛ nɔ, ni amɛsɔle amɛhã Baal. Mi hu magbe kooloo ni mikɛfɔ̃ afɔleshaa latɛ nɔ, ni masɔle mahã Yehowa. Nyɔŋmɔ ni baahã la abashã afɔle lɛ, lɛ ji anɔkwa Nyɔŋmɔ lɛ.’ Maŋbii lɛ kpɛlɛ nɔ.

Baal gbalɔi lɛ saa amɛfɔle lɛ. Amɛbolɔ amɛtsɛ amɛnyɔŋmɔ lɛ gbi muu lɛ fɛɛ akɛ: ‘Ao Baal, heremɔ wɔnɔ!’ Shi Baal hereee amɛnɔ. No hewɔ lɛ, Elia bɔi amɛ ŋmɔɔ. Ekɛɛ amɛ akɛ: ‘Nyɛbolɔa waa. Ekolɛ Baal ewɔ, ni esa akɛ mɔ ko atsĩɛ lɛ.’ Baal gbalɔi lɛ bolɔ amɛtsɛ Baal aahu kɛyashi gbɛkɛ, shi efooo amɛdaaŋ.

Elia saa efɔle lɛ efɔ̃ afɔleshaa latɛ lɛ nɔ, ni ehã atsɔ nu ashwie nɔ fɛɛ. No sɛɛ lɛ, esɔle akɛ: ‘Ao Yehowa, ofainɛ, hã mɛi nɛɛ ana akɛ bo ji anɔkwa Nyɔŋmɔ lɛ.’ Amrɔ nɔŋŋ lɛ, Yehowa hã la jɛ ŋwɛi ebashã afɔle lɛ. Kɛkɛ ni maŋbii lɛ bolɔ akɛ: ‘Yehowa ji anɔkwa Nyɔŋmɔ lɛ!’ Elia wie akɛ: ‘Nyɛkahãa Baal gbalɔi lɛ joa foi!’ Nakai gbi lɛ, agbe Baal gbalɔi 450 lɛ fɛɛ.

Elia na atatu bibioo ko yɛ ŋshɔŋ gbɛ, ni ekɛɛ Ahab akɛ: ‘Nugbɔ miiba ebanɛ. Okɛ okpɔŋɔ lɛ aŋmɔ shwiili lɛ, ni oya shĩa.’ Ŋwɛi badi tuŋŋ kɛ atatui, kɔɔyɔɔ bɔi tswaa, ni nugbɔ bɔi nɛmɔ waa. Nu hɔmɔ lɛ eba naagbee. Ahab wo eshwiili lɛ foi waa. Shi Yehowa hã Elia nyɛ ejo foi ni eho shwiili lɛ he! Ani Elia náŋ naagba ko dɔŋŋ? Hã wɔkwɛ.