Gɔŋ Nɔ Shiɛmɔ Lɛ

Be ni Yesu hala bɔfoi 12 lɛ egbe naa lɛ, ekpeleke shi kɛba he ko ni mɛi babaoo ebabua amɛhe naa yɛ. Mɛi lɛ jɛ Galilea, Yudea, Tiro, Sidon, Siria, kɛ Yordan sɛɛ. Amɛkɛ helatsɛmɛi kɛ mɛi ni daimonioi miihao amɛ ba Yesu ŋɔɔ koni eye ebua amɛ. Yesu tsa mɛi lɛ fɛɛ. Kɛkɛ ni eta shi yɛ gɔŋ lɛ nɔ he ko ni ebɔi wiemɔ. Etsɔɔ nibii ni esa akɛ wɔfee kɛ́ wɔmiitao wɔtsɔmɔ Nyɔŋmɔ nanemɛi. Esa akɛ wɔyɔse akɛ Yehowa he miihia wɔ, ni wɔkase ehe nii, ni wɔsumɔ lɛ. Shi kɛ́ wɔsumɔɔɔ mɛi krokomɛi lɛ, wɔnyɛŋ wɔsumɔ Nyɔŋmɔ. No hewɔ lɛ, esa akɛ wɔmli ahi ahã mɛi fɛɛ, kɛ́ amɛji wɔhenyɛlɔi po, ni esaaa akɛ wɔshishiuɔ mɔ ko mɔ ko.

Yesu wie akɛ: ‘Esaaa akɛ nyɛsumɔɔ nyɛnanemɛi pɛ. Esa akɛ nyɛsumɔ nyɛhenyɛlɔi hu, ni nyɛjɛ nyɛtsui mli nyɛkɛ mɛi atɔmɔi ake amɛ. Kɛ́ mɔ ko mli fu nyɛ lɛ, nyɛyaa mɔ lɛ ŋɔɔ amrɔ nɔŋŋ ni nyɛyakpaa lɛ fai. Nyɛkɛ mɛi ayea tamɔ bɔ ni nyɛbaasumɔ ni amɛkɛ nyɛ aye lɛ.’

Agbɛnɛ hu, Yesu wo mɛi lɛ ŋaa kpakpa yɛ nibii ni yɔɔ je lɛ mli lɛ ahe. Ewie akɛ: ‘Yehowa nanemɛi ni nyɛbaatsɔmɔ lɛ he miihia fe shika pii ni nyɛbaaná. Julɔ baanyɛ abaju nyɛshika lɛ, shi mɔ ko mɔ ko nyɛŋ aju naanyobɔɔ ni yɔɔ nyɛkɛ Yehowa teŋ lɛ. Nyɛkagbaa nyɛhe naa yɛ nɔ ni nyɛbaaye, nɔ ni nyɛbaanu, loo nɔ ni nyɛbaawo he. Nyɛkwɛa loofɔji lɛ. Be fɛɛ be lɛ, Nyɔŋmɔ hãa amɛnáa niyenii pii amɛyeɔ. Nyɛnyɛŋ nyɛhã gbi kome po abafata nyɛwala gbii lɛ ahe, ekɔɔɔ he eko bɔ ni nyɛbaagba nyɛhe naa nyɛhã. Nyɛkaia akɛ, Yehowa le nibii ni he hiaa nyɛ.’

Mɛi lɛ nuko pɛŋ ni mɔ ko miitsɔɔ nii tamɔ bɔ ni Yesu tsɔɔ amɛnii lɛ. Jamɔŋ hiɛnyiɛlɔi lɛ etsɔko amɛ nibii ni Yesu tsɔɔ amɛ lɛ. Mɛni hewɔ Yesu he esa kɛ nitsɔɔmɔ waa nakai lɛ? Ejaakɛ nibii ni etsɔɔ mɛi lɛ fɛɛ jɛ Yehowa ŋɔɔ.