Yesu Tsa Mɔ Ko Yɛ Hejɔɔmɔ Gbi Lɛ Nɔ

Farisifoi lɛ sumɔɔɔ Yesu sane kwraa, ni no hewɔ lɛ, amɛtao nɔ ko ni amɛbaanyɛ amɛdamɔ nɔ amɛhã amɔ lɛ. Amɛkɛɛ lɛ akɛ ekatsa mɛi yɛ Hejɔɔmɔ Gbi lɛ nɔ. Gbi ko lɛ, Yesu na nuu shwilafo ko ni eeba nii yɛ gbɛjegbɛ ko he. Nakai gbi lɛ, Hejɔɔmɔ Gbi ni. Yesu kɛɛ ekaselɔi lɛ akɛ: ‘Nyɛkwɛa bɔ ni Nyɔŋmɔ hewalɛ lɛ baaye abua nuu nɛɛ.’ Ekɛ elajɔ̃ kpɔtɔ sũ ni ekɛkpa nuu lɛ hiŋmɛii anɔ. Kɛkɛ ni ekɛɛ nuu lɛ akɛ: ‘Yaa ni oyafɔ ohiŋmɛii anɔ yɛ Siloam kpaakpo lɛ mli.’ Nuu lɛ yafee nakai, ni ehiŋmɛii gbele. Kɛjɛ be ni afɔ lɛ lɛ, kpaako kwraa enaa nii.

Mɛi fɛɛ ni na lɛ lɛ anaa kpɛ amɛhe. Amɛbi akɛ: ‘Ani nuu ni taa shi ebaa nii lɛ nɛ, aloo mɔ ko ni je lɛ kɛkɛ?’ Shi nuu lɛ kɛɛ amɛ akɛ: ‘Mi nɔŋŋ ni. Mi afɔ mi shwilafo lɛ!’ Mɛi lɛ bi lɛ akɛ: ‘Te fee tɛŋŋ ni ohiŋmɛii gbele lɛ?’ Be ni egba amɛ bɔ ni eba lɛ lɛ, amɛmɔ lɛ kɛtee Farisifoi lɛ ahiɛ.

Nuu lɛ kɛɛ Farisifoi lɛ akɛ: ‘Yesu kpɔtɔ sũ ni ekɛkpa mihiŋmɛii anɔ, ni ekɛɛ mi akɛ miyafɔ. Miyafɔ, ni amrɔ nɛɛ miina nii.’ Farisifoi lɛ kɛɛ akɛ: ‘Kɛ́ Yesu tsaa mɛi yɛ Hejɔɔmɔ Gbi lɛ nɔ lɛ, belɛ ehewalɛ lɛ, jeee Nyɔŋmɔ ŋɔɔ ejɛ.’ Shi mɛi krokomɛi hu wie akɛ: ‘Kɛjeee Nyɔŋmɔ ŋɔɔ ehewalɛ lɛ jɛ kulɛ, enyɛŋ etsa mɔ ko mɔ ko.’

Farisifoi lɛ tsɛ nuu lɛ fɔlɔi kɛba ni amɛbi amɛ akɛ: ‘Te fee tɛŋŋ ni nyɛbinuu lɛ naa nii lɛ?’ No mli lɛ, Farisifoi lɛ ewie akɛ mɔ fɛɛ mɔ ni baahe Yesu nɔ eye lɛ, amɛbaashwie lɛ kɛje kpeehe lɛ. No hewɔ lɛ, nuu lɛ fɔlɔi lɛ she gbeyei, ni amɛkɛɛ Farisifoi lɛ akɛ: ‘Wɔleee. Nyɛ diɛŋtsɛ nyɛbia lɛ.’ Farisifoi lɛ bibii nuu lɛ saji krokomɛi. Shi nuu lɛ kɛɛ amɛ akɛ: ‘Mikɛɛ nyɛ nɔ fɛɛ nɔ momo. Mɛni hewɔ nyɛbiɔ mi saji pii lolo?’ Farisifoi lɛ amli fu, ni amɛshwie lɛ kɛje jɛmɛ.

Yesu yatao nuu lɛ, ni ebi lɛ akɛ: ‘Ani oheɔ Mesia lɛ nɔ oyeɔ?’ Nuu lɛ kɛɛ lɛ akɛ: ‘Eji mile lɛ kulɛ, mahe enɔ maye.’ Yesu kɛɛ lɛ akɛ: ‘Miji Mesia lɛ.’ Nɔ ni Yesu fee lɛ tsɔɔ akɛ emli hi, aloo jeee nakai? Efee nibii enyɔ ehã nuu lɛ. Etsa lɛ, ni eye ebua lɛ koni ená hemɔkɛyeli.