Nɔ Ko Nɔ Ko Hãaa Amɛkpa

Nuu ko ni nyɛɛɛ anyiɛ taa sɔlemɔ shĩa lɛ geetii lɛ ekome naa daa gbi ni ebaa shika. Shwane ko be ni Petro kɛ Yohane yaa sɔlemɔ shĩa lɛ, nuu lɛ na amɛ ni ekɛɛ amɛ akɛ: ‘Nyɛfainɛ, nyɛhãa mi nɔ ko.’ Petro kɛɛ lɛ akɛ: ‘Miyɛ nɔ ko ni fe shika, ni no mikɛbaahã bo nɛɛ. Yɛ Yesu gbɛ́i mli lɛ, tee shi ni onyiɛ!’ Kɛkɛ ni Petro mɔ enineshi koni ete shi. Nuu lɛ te shi ni ebɔi nyiɛmɔ! Mɛi ni ebabua shi lɛ amii shɛ amɛhe aahu akɛ, amɛteŋ mɛi pii he Yesu nɔ amɛye.

Shi osɔfoi lɛ kɛ Sadukifoi lɛ amli fu. Amɛyamɔmɔ bɔfoi lɛ, ni amɛkɛ amɛ tee Sanhedrin lɛ, ni ji jamɔŋ hiɛnyiɛlɔi ni kojoɔ mɛi lɛ ahiɛ. Amɛbi bɔfoi lɛ akɛ: ‘Namɔ hã nyɛ hewalɛ ni nyɛkɛtsa nuu nɛɛ?’ Petro kɛɛ akɛ: ‘Yesu Kristo, mɔ ni nyɛgbe lɛ lɛ, ni hã wɔ hewalɛ lɛ.’ Amɛbolɔ amɛwo bɔfoi lɛ amɛkɛɛ: ‘Nyɛkawiea Yesu he sane dɔŋŋ!’ Shi bɔfoi lɛ here nɔ akɛ: ‘Esa akɛ wɔwie ehe sane wɔtsɔɔ mɛi. Wɔfeŋ diŋŋ.’

Be ni aŋmɛɛ Petro kɛ Yohane he lɛ, amɛtee kaselɔi krokomɛi lɛ aŋɔɔ amrɔ nɔŋŋ ni amɛyagba amɛ nɔ ni ba lɛ. Amɛfee ekome ni amɛsɔle amɛkɛɛ Yehowa akɛ: ‘Ofainɛ, hã wɔná ekãa koni wɔnyɛ wɔya nɔ wɔtsu onitsumɔ lɛ.’ Yehowa hã amɛ emumɔ krɔŋkrɔŋ lɛ, ni amɛtee nɔ amɛshiɛ ni amɛtsa mɛi. Mɛi pii bahe Yesu nɔ amɛye. Enɛ dɔ Sadukifoi lɛ waa. No hewɔ lɛ, amɛmɔmɔ bɔfoi lɛ ni amɛwo amɛ tsuŋ. Shi nyɔɔŋ lɛ mli lɛ, Yehowa tsu ŋwɛibɔfo ko ni eyagbele tsuŋwoohe lɛ shinai lɛ, ni ekɛɛ kaselɔi lɛ akɛ: ‘Nyɛkua nyɛsɛɛ kɛyaa sɔlemɔ shĩa lɛ, ni nyɛtsɔa nii yɛ jɛmɛ.’

Enɔ jetsɛremɔ nɔŋŋ lɛ, ababɔ Sanhedrin lɛ amaniɛ akɛ: ‘Aŋa tsuŋwoohe lɛ naa, shi mɛi lɛ ni nyɛhã awo amɛ tsuŋ lɛ bɛ jɛmɛ! Amɛyɛ sɔlemɔ shĩa lɛ amɛmiitsɔɔ mɛi nii!’ Sanhedrin lɛ hã ayamɔmɔ bɔfoi lɛ kɛba ekoŋŋ, ni osɔfonukpa lɛ bi amɛ akɛ: ‘Ani wɔkɛɛɛ nyɛ akɛ nyɛkawiea Yesu he sane dɔŋŋ?’ Shi Petro hã hetoo akɛ: “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.”

Jamɔŋ hiɛnyiɛlɔi lɛ amli fu aahu akɛ, kulɛ amɛmiitao amɛgbe bɔfoi lɛ. Shi Farisifonyo ko ni atsɛɔ lɛ Gamaliel lɛ te shi edamɔ shi ni ekɛɛ: ‘Nyɛkwɛa jogbaŋŋ! Ekolɛ Nyɔŋmɔ kɛ hii nɛɛ yɛ. Ani nyɛmiitao nyɛkɛ Nyɔŋmɔ anɔ?’ Amɛbo eŋaawoo lɛ toi. Amɛgwao bɔfoi lɛ, ni amɛkɛɛ amɛ shi kome ekoŋŋ akɛ amɛkpa shiɛmɔ, kɛkɛ ni amɛŋmɛɛ amɛhe. Shi bɔfoi lɛ kpaaa. Amɛtee nɔ amɛshiɛ sane kpakpa lɛ kɛ ekãa yɛ sɔlemɔ shĩa lɛ kɛ mɛi ashĩai amli.