Wolo Ni Jɛ Gbɛtsɔɔmɔ Kuu Lɛ Dɛŋ

Kɛhã mɛi ni sumɔɔ Yehowa Nyɔŋmɔ kɛ e-Wiemɔ, ni ji Biblia lɛ:

Yesu wie akɛ: “Nyɛbaale anɔkwale lɛ, ni anɔkwale lɛ baahã nyɛye nyɛhe.” (Yohane 8:32) Ani okaiɔ bɔ ni onu he ohã be klɛŋklɛŋ ni okase anɔkwale ni yɔɔ Biblia lɛ mli lɛ? Omii shɛ ohe waa akɛ, yɛ jeŋ ni amale eyi mli obɔ nɛɛ mli lɛ, obaanyɛ ole anɔkwale lɛ.​—2 Timoteo 3:1.

Yehowa Nyɔŋmɔ miisumɔ ni wɔle anɔkwale lɛ. Ni akɛni wɔsumɔɔ gbɔmɛi hewɔ lɛ, wɔ hu wɔmiisumɔ ni wɔgba amɛ. Shi jeee no pɛ wɔbaanyɛ wɔfee kɛjá Nyɔŋmɔ. Esa akɛ wɔmia wɔhiɛ ni wɔhi shi akɛ Kristofoi, ejaakɛ wɔbuɔ Yehowa shishitoo mlai lɛ waa. Yesu tsɔɔ gbɛ ko ni he hiaa ni wɔbaanyɛ wɔtsɔ nɔ wɔhã Nyɔŋmɔ ana akɛ wɔsumɔɔ lɛ. Ekɛɛ akɛ: “Kɛji nyɛye mikitãi lɛ anɔ lɛ, nyɛbaahi misuɔmɔ lɛ mli, tamɔ bɔ ni mi hu miyeɔ Tsɛ lɛ kitãi lɛ anɔ ni mihiɔ esuɔmɔ lɛ mli lɛ.”​—Yohane 15:10.

Yesu sumɔɔ e-Tsɛ waa, ni efeɔ nɔ fɛɛ nɔ ni e-Tsɛ lɛ kɛɔ lɛ akɛ efee lɛ. Kɛ́ wɔkase Yesu yɛ bɔ ni wɔhiɔ shi wɔhãa lɛ mli lɛ, Yehowa baasumɔ wɔ, ni wɔbaaná miishɛɛ waa. Yesu wie akɛ: “Kɛji nyɛle nibii nɛɛ ni nyɛkɛtsu nii lɛ, nyɛyɛ miishɛɛ.”​—Yohane 13:17.

Wɔgbɛkpamɔ ji akɛ, wolo nɛɛ baawa bo ni ohi shi yɛ anɔkwale ni yɔɔ Biblia lɛ mli lɛ naa, ni obatsɔ Nyɔŋmɔ naanyo. Wɔsɔlemɔ ji akɛ, suɔmɔ ni oyɔɔ kɛhã Nyɔŋmɔ lɛ mli baaya nɔ awa, ni oya nɔ ohi ‘Nyɔŋmɔ suɔmɔ ni baahã oná naanɔ wala lɛ mli.’​—Yuda 21.