AKRABATSA 19A
Fai Ni Kɛ Jɔɔmɔi Ni Jɛɔ Yehowa Ŋɔɔ Baa
Susumɔ Biblia mli ŋmalɛi krokomɛi ni kɛ wiemɔi ni ji “faa” kɛ “nu” tsuɔ nii kɛfeɔ jɔɔmɔi ni jɛɔ Yehowa ŋɔɔ lɛ ahe mfoniri lɛ he okwɛ. Kɛ́ wɔkane ŋmalɛi nɛɛ fɛɛ lɛ, ewoɔ wɔ hewalɛ waa ejaakɛ amɛhãa wɔleɔ bɔ ni Yehowa jɔɔ wɔ. Yɛ mɛɛ gbɛ nɔ?
YOEL 3:18 Gbalɛ nɛɛ wieɔ nuhiŋmɛi ko ni tue kɛjɛ sɔlemɔ shĩa lɛ he. Ehoɔ kɛyahãa “Akasia Tsei Jɔɔ” lɛ nu. No hewɔ lɛ, Yoel kɛ Ezekiel fɛɛ na faa ko ni hãa shikpɔŋ ni wooo yibii lɛ bɔi yibii woo. Yɛ shihilɛi enyɔ lɛ fɛɛ amli lɛ, faa lɛ hoɔ kɛjɛɔ Yehowa shĩa lɛ loo sɔlemɔ shĩa lɛ.
ZAKARIA 14:8 Gbalɔ Zakaria na “wala nui” miiho kɛmiijɛ Yerusalem maŋ lɛ mli. Nu nɛɛ fã hoɔ kɛyaa bokãgbɛ ŋshɔ lɛ loo Ŋshɔ Ni Egbo lɛ mli, ni fã hu hoɔ kɛyaa anaigbɛ ŋshɔ lɛ loo Mediterenia Ŋshɔ lɛ mli. No mli lɛ, Yerusalem ji Yehowa Nyɔŋmɔ ni ji “Maŋtsɛ kpele lɛ maŋ.” (Mat. 5:35) Maŋ nɛɛ tã ni Zakaria tsĩ lɛ hãa wɔkaiɔ akɛ Yehowa baaye shikpɔŋ muu lɛ fɛɛ nɔ yɛ be ni kã wɔhiɛ lɛ mli. Kɛjɛ jeeŋmɔ lɛ, wɔnuɔ gbalɛ nɛɛ shishi akɛ nu ni atsĩ tã yɛ gbalɛ nɛɛ mli lɛ tsɔɔ akɛ Yehowa baajɔɔ anɔkwafoi akui enyɔ yɛ Paradeiso lɛ mli, ni ji mɛi ni baafo amanehulu kpeteŋkpele lɛ kɛ mɛi ni abaatee amɛ shi yɛ no sɛɛ lɛ.
KPOJIEMƆ 22:1, 2 Bɔfo Yohane na mfonirifeemɔŋ faa ko ni tamɔ nɔ ni Ezekiel na lɛ nɔŋŋ. Shi jeee sɔlemɔ shĩa lɛ mli faa nɛɛ jɛɔ, moŋ lɛ ejɛɔ Yehowa maŋtsɛ sɛi lɛ mli. No hewɔ lɛ, etamɔ nɔ ni ninaa nɛɛ miima jɔɔmɔi ni Nyɔŋmɔ nɔyeli lɛ kɛbaaba yɛ Afii Akpe lɛ mli lɛ nɔ mi, tamɔ Zakaria nɔ lɛ ji lɛ nɔŋŋ.
Shi srɔto fioo ko pɛ yɔɔ jɔɔmɔi ni jɛɔ Yehowa nɔyeli lɛ mli lɛ kɛ jɔɔmɔi ni jɛɔ faa ni yɔɔ Ezekiel ninaa lɛ mli kɛbaa lɛ teŋ. Jɔɔmɔi nɛɛ fɛɛ jɛɔ Yehowa ŋɔɔ, ni amɛhoɔ tamɔ faa kɛhãa anɔkwafoi fɛɛ.
LALA 46:4 Etamɔ nɔ ni ŋmalɛ kome nɛɛ kɔɔ jamɔ kɛ nɔyeli fɛɛ he. Ŋmalɛ nɛɛ wie faa ni hãa “Nyɔŋmɔ maŋ lɛ” náa miishɛɛ lɛ he, ni enɛ kɔɔ Maŋtsɛyeli lɛ kɛ nɔyeli he, ni ewie “Mɔ Ni Nɔ Kwɔ Fe Fɛɛ lɛ sɔlemɔ buu kpele krɔŋkrɔŋ lɛ” hu he, ni no kɔɔ jamɔ krɔŋŋ he.
Kɛ́ wɔsusu ŋmalɛi nɛɛ fɛɛ ahe jogbaŋŋ lɛ, amɛhãa wɔnáa nɔmimaa akɛ Yehowa baajɔɔ anɔkwafoi lɛ yɛ gbɛi enyɔ nɔ. Klɛŋklɛŋ lɛ, wɔbaaná enɔyeli lɛ he sɛɛ kɛya naanɔ, nɔ ni ji enyɔ lɛ, wɔbaaná gbɛjianɔ ni eto kɛhã jamɔ krɔŋŋ lɛ hu he sɛɛ kɛya naanɔ. No hewɔ lɛ, amrɔ nɛɛ nyɛhãa wɔtswaa wɔfai shi akɛ wɔbaaya nɔ wɔtao “wala nu” kɛjɛ Yehowa Nyɔŋmɔ kɛ e-Bi lɛ ŋɔɔ; “wala nu” lɛ ji gbɛjianɔ ni amɛjɛ amɛsuɔmɔ mli amɛto koni wɔná naanɔ wala lɛ!—Yer. 2:13; Yoh. 4:10.