NIKASEMƆ 14
Mɛni Baahã Nyɔŋmɔ Aná Wɔjamɔ He Miishɛɛ?
Tamɔ wɔna yɛ nikasemɔ ni tsɔ enɛ hiɛ lɛ mli lɛ, jeee jamɔi fɛɛ Nyɔŋmɔ kpɛlɛɔ nɔ. Fɛɛ sɛɛ lɛ, wɔbaanyɛ wɔjá wɔ-Bɔlɔ lɛ yɛ gbɛ ni baahã ená miishɛɛ nɔ. Mɛɛ gbɛ kɛ́ wɔtsɔ nɔ wɔjá lɛ lɛ ebaasa ehiɛ? (Yakobo 1:27) Hã wɔkwɛ nɔ ni Biblia lɛ tsɔɔ.
1. Mɛni esa akɛ wɔhã ekudɔ wɔjamɔ?
Esa akɛ wɔhã Biblia lɛ akudɔ wɔjamɔ. Yesu kɛɛ Nyɔŋmɔ akɛ: “Owiemɔ lɛ anɔkwale ni.” (Yohane 17:17) Jamɔi komɛi kɛ anɔkwalei ni yɔɔ Biblia lɛ, ni ji wolo ni Nyɔŋmɔ hã aŋma lɛ mli lɛ tsuuu nii. Amɛtsɔɔ adesai atsɔɔmɔi kɛ kusumii moŋ. Shi Yehowa náaa mɛi ni ‘kuɔ amɛhiɛ amɛfɔ̃ɔ Nyɔŋmɔ kitã lɛ nɔ’ lɛ ahe miishɛɛ. (Kanemɔ Marko 7:9.) Shi kɛ́ wɔhã Biblia lɛ kudɔ wɔjamɔ, ni wɔhi shi yɛ emli ŋaawoi lɛ anaa lɛ, Nyɔŋmɔ baaná miishɛɛ.
2. Te esa akɛ wɔjá Yehowa wɔhã tɛŋŋ?
Esa akɛ wɔjá Yehowa kome too pɛ, ejaakɛ lɛ ji wɔ-Bɔlɔ. (Kpojiemɔ 4:11) Enɛ tsɔɔ akɛ, esa akɛ wɔsumɔ lɛ, ni esaaa akɛ wɔtsɔɔ nɔ ko nɔ ko nɔ wɔjáa lɛ—amaga ko jio, mfoniri ko jio.—Kanemɔ Yesaia 42:8.
Esa akɛ wɔjamɔ lɛ afee nɔ ni “yɔɔ krɔŋkrɔŋ,” ni Yehowa “náa he miishɛɛ.” (Romabii 12:1) Enɛ tsɔɔ akɛ, esa akɛ wɔye emlai lɛ anɔ. Akɛ nɔkwɛmɔnɔ lɛ, mɛi ni sumɔɔ Yehowa lɛ sumɔɔ emlai ni kɔɔ gbalashihilɛ he lɛ, ni amɛyeɔ nɔ. Agbɛnɛ hu, amɛtsiɔ amɛhe kɛjeɔ nifeemɔi ni yeɔ mɔ awui lɛ ahe, hewɔ lɛ, amɛshɛreee zigareti kɛ ehenɔi lɛ, ni amɛkɛ tsofai loo dãa tsuuu nii yɛ gbɛ ni esaaa nɔ.a
3. Mɛni hewɔ esa akɛ wɔkɛ Yehowa jálɔi krokomɛi afee ekome kɛjá lɛ lɛ?
Kpeei ni wɔfeɔ daa otsi lɛ hãa wɔnáa hegbɛ ‘kɛjieɔ Yehowa yi yɛ asafo lɛ mli.’ (Lala 111:1, 2) Gbɛ kome ni wɔtsɔɔ nɔ wɔfeɔ enɛ ji, wɔláa kɛjieɔ Nyɔŋmɔ yi. (Kanemɔ Lala 104:33.) Yehowa kɛɛ wɔya asafoŋ kpee, ejaakɛ esumɔɔ wɔ, ni ele akɛ no baawa wɔ koni wɔyi aná wala kɛya naanɔ. Kɛ́ wɔtee asafoŋ kpee lɛ, wɔwoɔ mɛi hewalɛ ni amɛ hu amɛwoɔ wɔ hewalɛ.
KASEMƆ PII OFATA HE
Obaana nɔ hewɔ ni Yehowa sumɔɔɔ ni akɛ amagai kɛ mfonirii tsuɔ nii yɛ ejamɔ mli lɛ. Ni obaana gbɛi ni he hiaa ni wɔbaanyɛ wɔtsɔ nɔ wɔjie Nyɔŋmɔ yi.
4. Esaaa akɛ wɔkɛ amagai loo mfonirii tsuɔ nii yɛ wɔjamɔ mli
Te wɔfeɔ tɛŋŋ wɔleɔ akɛ kɛ́ wɔfee nakai lɛ Nyɔŋmɔ náŋ he miishɛɛ? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
Be ni Nyɔŋmɔ webii ni hi shi yɛ blema lɛ ekomɛi ka akɛ amɛbaatsɔ amaga nɔ amɛjá lɛ lɛ, mɛni ba?
Mɛi komɛi susuɔ akɛ kɛ́ amɛtsɔ amagai kɛ mfonirii anɔ amɛjá Nyɔŋmɔ lɛ, no baahã amɛbɛŋkɛ lɛ waa. Shi kɛ́ amɛfee nakai lɛ, ani no moŋ hãŋ gbɛ abakã amɛ kɛ lɛ teŋ? Nyɛkanea 2 Mose 20:4-6 kɛ Lala 106:35, 36 lɛ, ni nyɛsusua sanebimɔi nɛɛ ahe:
Mɛɛ amagai kɛ mfonirii ona ni mɛi kɛmiitsu nii yɛ jamɔ mli?
Te Yehowa naa amagai kɛ mfonirii ni akɛtsuɔ nii lɛ ehãa tɛŋŋ?
Bo hu te onaa amagai kɛ mfonirii ni akɛtsuɔ nii lɛ ohãa tɛŋŋ?
5. Kɛ́ wɔjá Yehowa kome too pɛ lɛ, wɔbaaye wɔhe kɛje susumɔi ni ejaaa ahe
Obaana bɔ ni kɛ́ wɔjá Yehowa yɛ gbɛ ni ja nɔ lɛ, wɔbaaye wɔhe kɛje susumɔi ni ejaaa ahe. Jiemɔ VIDIO lɛ.
Nyɛkanea Lala 91:14 lɛ, ni nyɛsusua sanebimɔ nɛɛ he:
Mɛni Yehowa ewo shi akɛ ebaafee ehã wɔ kɛji wɔjá ekome too pɛ kɛtsɔɔ akɛ wɔsumɔɔ lɛ?
6. Wɔjáa Nyɔŋmɔ yɛ wɔsafoŋ kpeei lɛ ashishi
Wɔláa ni wɔhãa sane hetoo yɛ asafoŋ kpeei ashishi kɛjieɔ Yehowa yi, ni wɔkɛwowoɔ wɔhe hewalɛ. Nyɛkanea Lala 22:22 lɛ, ni nyɛsusua sanebimɔi nɛɛ ahe:
Ani onyaa saji ahetoi ni mɛi hãa yɛ asafoŋ kpeei ashishi lɛ he?
Ani obaasumɔ ni bo hu osaa ohe ni ohã sane hetoo?
7. Kɛ́ wɔgba mɛi nɔ ni wɔkaseɔ lɛ, Yehowa mii shɛɔ ehe
Gbɛi pii yɛ ni wɔbaanyɛ wɔtsɔ nɔ wɔgba mɛi Biblia mli anɔkwalei lɛ. Nyɛkanea Lala 9:1 kɛ 34:1 lɛ, ni nyɛsusua sanebimɔ nɛɛ he:
Mɛɛ nɔ ko okase yɛ Biblia lɛ mli ni obaasumɔ ni ogba mɔ ko?
MƐI KOMƐI KƐƆ AKƐ: “Anyɛŋ asa Nyɔŋmɔ hiɛ kɔkɔɔkɔ.”
Bo hu te osusuɔ tɛŋŋ?
EMLI OTI
Kɛ́ wɔjá wɔ-Bɔlɔ lɛ kome too pɛ, wɔjie eyi yɛ asafoŋ kpeei ashishi, ni wɔgba mɛi nibii ni wɔkaseɔ lɛ, ebaaná wɔhe miishɛɛ.
Mɛni Okase?
Mɛni esa akɛ wɔhã ekudɔ wɔjamɔ? Mɛni hewɔ?
Mɛni hewɔ esa akɛ wɔjá Yehowa kome too pɛ lɛ?
Mɛni hewɔ esa akɛ wɔkɛ mɛi ni sumɔɔ ni amɛsa Nyɔŋmɔ hiɛ lɛ afee ekome kɛjá lɛ lɛ?
EHE SAJI KROKOMƐI
Kɛ́ okane sane ni ji, “Mijáaa Wɔji Dɔŋŋ” lɛ, obaana bɔ ni fee ni yoo ko kpa wɔji jamɔ.
Obaana nɔ ni baawa bo ni onyɛ ohã sane hetoo yɛ asafoŋ kpeei ashishi.
Obaana bɔ ni oblanyo ko ná asafoŋ kpeei ahe sɛɛ, eyɛ mli akɛ enáaa lɛ mlɛo akɛ ebaaya.
Mɛi pii susuɔ akɛ krɔs ji okadi ni Kristofoi kɛtsuɔ nii, shi ani esa akɛ wɔkɛtsu nii yɛ wɔjamɔ mli?
“Mɛni Hewɔ Nyɛkɛ Krɔs Tsuuu Nii yɛ Nyɛjamɔ Mli Lɛ?” (jw.org lɛ nɔ sane)
a Abaasusu saji nɛɛ ahe yɛ nikasemɔi ni nyiɛ sɛɛ lɛ ekomɛi amli.