KƐ́ OYAAJE SANEGBAA SHISHI
NIKASEMƆ 5
Okɛ Hiɛshikamɔ Atsu Nii
Shishitoo mla: “Nuŋtsɔ lɛ nyɔŋ lɛ . . . esa akɛ efee mɔ ni kɛ mɛi fɛɛ yeɔ yɛ hiɛshikamɔ mli.” —2 Tim. 2:24, shn.
Nɔ Ni Paulo Fee
1. Kwɛmɔ VIDIO lɛ, loo kanemɔ Bɔfoi 17:22, 23. No sɛɛ lɛ, susumɔ sanebimɔi ni nyiɛ sɛɛ nɛɛ ahe:
Be ni Paulo na amagai ni Atenebii lɛ jáa lɛ, te enu he ehã tɛŋŋ?—Kwɛmɔ Bɔfoi 17:16.
Mɛɛ gbɛ nɔ etsɔ nibii ni Atenebii lɛ jáa lɛ anɔ eshiɛ sane kpakpa lɛ ehã amɛ moŋ fe ni ebaawie eshi amɛ?
Mɛni Wɔkaseɔ Yɛ Nɔ Ni Paulo Fee Lɛ Mli?
2. Kɛ́ wɔsusu nɔ ni wɔyaawie lɛ he jogbaŋŋ, bɔ ni wɔbaawie lɛ wɔhã, kɛ be ni wɔbaawie lɛ he lɛ, ewaaa akɛ mɛi baabo wɔ toi.
Kasemɔ Paulo
3. Susumɔ nɔ ni obaawie lɛ he jogbaŋŋ. Akɛ nɔkwɛmɔnɔ lɛ, kɛ́ okɛ mɔ ko ni jeee Kristofonyo miiwie lɛ, esa akɛ okwɛ bɔ ni obaawie Biblia lɛ loo Yesu he ohã lɛ jogbaŋŋ.
4. Kaaye ohe oyai ojaje mɔ lɛ. Hã ewie nɔ ni yɔɔ etsui mli. Kɛ́ ewie nɔ ko ni kɛ nɔ ni Biblia lɛ tsɔɔ lɛ kpãaa gbee lɛ, okɛ lɛ akataa naa. (Yak. 1:19) Kɛ́ obo lɛ toi jogbaŋŋ lɛ, obaana nɔ ni eheɔ eyeɔ kɛ nɔ hewɔ ni eheɔ nakai nii lɛ eyeɔ lɛ.—Abɛi 20:5.
5. Kɛ́ ewie nɔ ko ni okɛ lɛ kpãa gbee lɛ, jiemɔ eyi. Ekolɛ enuɔ he waa akɛ nɔ ni eheɔ eyeɔ lɛ ja. Kɛ́ nakai ni lɛ, gbalamɔ ojwɛŋmɔ kɛya nibii ni okɛ lɛ kpãa gbee yɛ he lɛ anɔ klɛŋklɛŋ koni sɛɛ mli lɛ, oye obua lɛ fiofio ni ena nɔ ni Biblia lɛ tsɔɔ.