Hana—Yoo Ko Ni Kɛ Sɔlemɔ Shɛje Emii Lɛ
HANA, yoo kene lɛ, hi shi yɛ be ko, nɔ̃ mli ni yei buɔ kenefeemɔ akɛ loomɔ ko ni naa wa waa lɛ mli. Amɛhenumɔi lɛ tamɔ Rahel, mɔni kɛ hejaramɔ kɛɛ ewu Yakob akɛ, “Hami bii, kɛ́ jeee nakai lɛ, magbo,” lɛ henumɔi nɔŋŋ. (1 Mose 30:1) Hana hu nu he akɛ yoo ni eji lɛ yeko emuu ejaakɛ ebɛ bii. Ni akɛni eji Elkana ŋamɛi enyɔ ateŋ mɔkome hewɔ lɛ, naagba lɛ mli wo wu. Ebalɛ nakai, ejaakɛ Elkana kɛ eŋa Penina hiɛ bihii kɛ biyei.
Kɛji Elkana kɛ eweku lɛ fã gbɛ kɛtee Shilo hekrɔŋkrɔŋ lɛ kɛba jamɔ lɛ, Penina ŋɔɔ hegbɛ lɛ ni ekɛwoɔ Hana mli la, ni eyeɔ ehe fɛo yɛ kene ni eji lɛ hewɔ. Hana baafo aahu, ni eyeee afɔleshaa niyenii ni aaahalɛ lɛ. Kɛkɛ lɛ ewu Elkana aaabɔ mɔdɛŋ akɛ eeeshɛje emii, ni eeekɛɛlɛ akɛ: “Hana, mɛɛba ofoɔ? Ni mɛɛba oyeee nii? Ni mɛɛba hu oyeɔ otsui? Ani mihiii mihaaao fe bihii nyɔŋma?”—1 Sam. 1:2-8.
Naagbee lɛ, Hana kɛ ekɔmɔyelii lɛ fɛɛ wo Yehowa Nyɔŋmɔ dɛŋ. Gbi ko beni etee Shilo lɛ, eshi niyeli okpɔlɔ lɛ he ni “eyakpa Yehowa fai, ni efo aahu.” (1 Sam. 1:9, 10) Hana kɛ hiɛdɔɔ diɛŋtsɛ kpá Yehowa fai akɛ: “Yehowa kɛji oookwɛ oweyoo amanehulu nɛɛ, ni oookai mi, ni ohiɛ kpaŋ oweyoo nɔ, shi moŋ oooha oweyoo binuu lɛ, no lɛ maŋɔlɛ maha Yehowa ewala gbii fɛɛ, ni asoyi naa esaŋ eyiteŋ.”—1 Sam. 1:11.
Akɛni beni Hana kɛ etsuiŋ awerɛhooyelii lɛ shwieɔ Yehowa hiɛ lɛ, enaabui pɛ kpokpoɔ hewɔ lɛ, osɔfonukpa Eli susu yɛ gbɛ ni ejaaa nɔ akɛ etɔ dãa, ni ekãlɛ. Shi Hana tsɔɔ mli oya nɔŋŋ akɛ: “Dabi, minuntsɔ! Miji yoo ko ni miwerɛ eho mihe; minuko wein loo dãa ko ni wa, shi moŋ miifɔse misusuma miishwie shi yɛ Yehowa hiɛ. Kaabu oweyoo akɛ yakagbɔmɔ ko; ejaakɛ mikɔmɔ kɛ mimlila ni awoɔ sɔŋŋ naa miwieɔ yɛ kɛbashi benɛ nɛɛ.”—1 Sam. 1:15, 16.
Beni Eli yɔse etɔmɔ lɛ, ebi Nyɔŋmɔ jɔɔmɔ moŋ ehalɛ, ni ekɛɛ: “Yaa yɛ hejɔlɛ mli, ni Israel Nyɔŋmɔ lɛ aaahao onibimɔnii ni obilɛ lɛ.”—1 Sam. 1:17.
Mɛɛ hewalɛ Hana sɔlemɔ lɛ kɛ Eli wiemɔi lɛ ná yɛ Hana nɔ? Ená miishɛjemɔ diɛŋtsɛ. Hana bɔ̃i niyeli, “ni ehiɛ efeee tɔtɔɔtɔ dɔŋŋ.” (1 Sam. 1:18) Akɛni ekɛ esane lɛ wo Yehowa Nyɔŋmɔ dɛŋ hewɔ lɛ, eyeee awerɛhoo ni naa wa dɔŋŋ. Hana yɔse akɛ Ŋwɛi Flooflonyo lɛ jwɛŋɔ ehe akɛ mɔko, ni ekɛ nɔmimaa kwɛ yelikɛbuamɔ gbɛ kɛjɛ edɛŋ. Tsɛ Hana leee bɔni sane lɛ naa baayakpa eha moŋ, shi ena hejɔlɛ yɛ etsuiŋ. Ebaafee akɛ esusu akɛ ekenefeemɔ lɛ baaba naagbee, aloo benɛ Yehowa Nyɔŋmɔ baatsɔ gbɛ ko nɔ etolɛ najiaŋ yɛ bii ni ebɛ yɛ yoo kene ni eji hewɔ lɛ gbɛfaŋ.
Hana he ni ekɛfɔ̃ Nyɔŋmɔ Ofe lɛ nɔ lɛ efeee yaka. Efɔ́ binuu ni ewolɛ gbɛi akɛ Samuel. Beni etselɛ fufɔ sɛɛ lɛ, ekɛ Samuel tee hekrɔŋkrɔŋ lɛ koni eyasɔmɔ yɛ jɛi. (1 Sam. 1:19-28) Akɛni Biblia lɛ tsɔɔ akɛ abɔiɔ Levibii akanemɔ yɛ amɛwekukpaa naa kɛjɛɔ “mɛi ni eye afii etɛ nɔ kɛyaa” anɔ hewɔ lɛ, ebaafee akɛ, kɛ́ hooo kwraa lɛ, gbekɛ lɛ ye afii etɛ dani akɛlɛ tee—2 Kron. 31:16.
Hana hiɛ sɔ mlihilɛ ni Yehowa jie kpo etsɔɔlɛ lɛ, ni esɔle ekɛdalɛ shi. Esɔlemɔ lɛ wo Yehowa hiɛ nyam akɛ Mɔ ni mɔkomɔko kɛlɛ yeee egbɔ. Hana kɛɛ: “Mɔkrɔŋkrɔŋ ko bɛ ni tamɔ Yehowa, ejaakɛ osɛɛ lɛ mɔkomɔko bɛ; ni tɛsaa ko hu bɛ ni tamɔ wɔnyɔŋmɔ lɛ.” (1 Sam. 2 :2) Yɛ Hana diɛŋtsɛ gbɛfaŋ lɛ, ena akɛ Ŋwɛi Flooflonyo lɛ tamɔ tɛsaa ko ni wa, no ji akɛ eji mɔko ni anyɛɔ akɛ he fɔ̃ɔ enɔ ni egbugbaaa. Mɔ baanyɛ ekɛ ehe afɔ̃ Nyɔŋmɔ nɔ lɛɛlɛŋ.
Jɔɔmɔi krokomɛi yɛ lolo ni Hana nine baashɛ nɔ. Gbi ko beni ekɛ ewu ba Shilo lɛ, Eli jɔɔ amɛyi enyɔ lɛ fɛɛ, ni ekɛɛ: “Yehowa ahao seshibii kɛjɛ nɛkɛ yoo nɛɛ mli yɛ . . . [Samuel, mɔni] nyɛkɛbake Yehowa nɛɛ hewɔ!” (1 Sam. 2:20) Jɔɔmɔ nɛɛ ba mli yɛ Hana nɔ. Naagbee lɛ, ebafɔ bihii etɛ ekoŋŋ kɛ biyei enyɔ hu.—1 Sam. 2:21.
Tamɔ bɔni Hana kɛ sɔlemɔ shɛje emii lɛ, wɔ hu wɔbaanyɛ wɔna ekaawoo kɛji wɔkɛ nibii ni gbaa wɔnaa fɛɛ wo Yehowa Nyɔŋmɔ dɛŋ. Ebaaha wɔnibimɔi fɛɛ ni kɛ eyiŋtoo kpaa gbeɔ lɛ ahetoo. Nohewɔ lɛ kɛji wɔjɛ wɔtsuiŋ tɔ̃ɔ wɔkɛ wɔkɔmɔyelii shwie wɔ ŋwɛi Tsɛ lɛ hiɛ lɛ, aba mli akɛ, taakɛ Hana efeee lɛ, wɔ hu ‘wɔkaye wɔtsui yɛ wɔdiɛŋtsɛ wɔhe dɔŋŋ,’ shi wɔna nɔmimaa akɛ ebaajie jatsu lɛ kɛjɛ wɔnɔ, bɔfɛɛbɔ ni eji eha, aloo eeewaje wɔ koni wɔnyɛ wɔdamɔ naa.