Hiɛnɔkamɔ—Nɔ Ko Ni Jara Wa
HIƐNƆKAMƆ yɛ hewalɛ kpele ko ni wajeɔ mɔ. Akɛni mɛi pii heɔ yeɔ akɛ amɛdeŋmegbomɔ lɛ baaye omanye be ko hewɔ lɛ, amɛnyɛ amɛdamɔ jalɛsane ni ayeee, yiwaa kɛ ohia naa. Bei komɛi lɛ, helatsɛmɛi ni yɔɔ helatsamɔhei ni tsofafeelɔi bɛ hiɛnɔkamɔ akɛ amɛhelai lɛ baatã lɛ náa hewalɛ yɛ naakpɛɛ gbɛ nɔ. Mɛni hewɔ? Ejaakɛ amɛyɛ hiɛnɔkamɔ. Shi mɛi ni ana yɛ amɛhewojiaŋ akɛ amɛhe baawa amɛ lɛ moŋ egboi yɛ gbeyeishemɔ kɛ nijiaŋwujee hewɔ.
Yɛ nyɛsɛɛ afii ni eho lɛ mli lɛ, tsofafeelɔi kɛ mɛikrokomɛi ebayɔse sɛɛnamɔ ni yɔɔ hiɛnɔkamɔ he lɛ. Shi wɔ-Bɔlɔ, Yehowa Nyɔŋmɔ, pɛ ji mɔni le bɔni ehe hiaa lɛ jogbaŋŋ. Yɛ suɔmɔ kpele ni eyɔɔ kɛha adesa weku lɛ hewɔ lɛ, ekɛ hiɛnɔkamɔ eha yɛ be mli ni nibii efee tamɔ hiɛnɔkamɔ kpakpa ko bɛ lɛ. Ŋwɛi flooflonyo lɛ wie kojomɔ wiemɔ ko ni haa hiɛnɔkamɔ. Namɔ akɛ kojomɔ wiemɔ nɛɛ shi, ni mɛni hewɔ etsɔɔ wɔsɛɛ be kpakpa kɛba wɔklɛŋklɛŋ fɔlɔi, Adam kɛ Hawa, shwiei lɛ?
Wɔkase yɛ Biblia wolo ni ji Mose Klɛŋklɛŋ Wolo lɛ mli akɛ, atsɔ onufu ko nɔ alaka Hawa. Akadi Satan Abonsam, mumɔ gbɔmɔ ko ni anaaa lɛ yɛ Ŋmalɛi lɛ hekroko akɛ mɔni kɛ lakamɔ lɛ ba ni eka shi faŋŋ akɛ lɛ ekɛ onufu lɛ tsu nii taakɛ bɔni ashwaiafeelɔ wieɔ kɛtsɔɔ mumui nɔ lɛ. Nɛkɛ mumɔŋ gbɔmɔ nɛɛ je gbɛ ete shi ewo Nyɔŋmɔ ni enyiɛ eshishi hu. Nohewɔ lɛ efee ehe Satan, ni shishi ji “Shiteekɛwolɔ,” kɛ Abonsam, ni shishi ji “Mɔ-shishinyiɛlɔ.” Akɛni Henyɛlɔ lɛ kɛ onufu lɛ tsu nii hewɔ lɛ, Biblia lɛ tsɛɔlɛ “blema onufu.”—1 Mose 3:1-6; Yoh. 8:44; Kpoj. 12:9.
Nohewɔ lɛ akɛ kojomɔ wiemɔ lɛ shi “blema onufu” lɛ akɛ: “Mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ; eeetswa oyitso nɔ̃, ni bo hu oootswa enanetsitsi nɔ̃.”—1 Mose 3:15.
Kojomɔ wiemɔ ni akɛshi blema onufu lɛ feɔ lɛ faŋŋ akɛ abaanaanaa enɔ kwraa ni ehiŋ shi dɔŋŋ. Awie Yesu Kristo he faŋŋ yɛ Ŋmalɛi lɛ amli akɛ mɔni baanaanaa onufu lɛ nɔ koni ejie fitemɔ ni ekɛba lɛ fɛɛ kɛya. Wɔkaneɔ yɛ 1 Yohane 3:8 akɛ: “Enɛ hewɔ Nyɔŋmɔ bi lɛ jie ehe kpo, koni efite Abonsam nitsumɔi lɛ.” Beni Yesu yɔɔ shikpɔŋ nɔ lɛ, ‘apila enanetsitsi’ beni agbele yɛ tso nɔ lɛ. Shi akɛni ateelɛ shi yɛ ŋwɛi shihilɛ ni fiteee mli hewɔ lɛ, ebaanyɛ etswa Abonsam yitso nɔ̃.
Abonsam, kɛ ehewalɛ ni ekɛyeɔ awui lɛ kɛ enitsumɔi gbohii fɛɛ ni abaajie kɛjɛ jɛmɛ lɛ kɛ jɔɔmɔi ni yɔɔ nyam baaha adesa weku lɛ. Nɛkɛ miishɛjemɔ wiemɔi nɛɛ baaba mli akɛ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.”—Kpoj. 21:4.
[Akrabatsa ni yɔɔ baafa 3]
“Kɛ nɔni wɔnaaa lɛ nɔ wɔhiɛ kã lɛ, belɛ wɔkɛ tsuishiŋmɛɛ kwɛɔlɛ gbɛ.”—Rom. 8:25.