Sanebimɔi Ni Jɛ Kanelɔi Adɛŋ

● Mɛni ji “nyɔmɔwoo” ni bɔfo Paulo ná yɛ esuɔmɔ mli ni ejɛ eshiɛ “sanekpakpa” lɛ hewɔ lɛ?

Bɔfo lɛ kɛɛ: “Kɛ́ midiɛŋtsɛ misuɔmɔ naa mitsu enɛ lɛ, miyɛ nyɔmɔwoo, shi kɛ́ jeee suɔmɔ naa tete lɛ, atuu tsulɔnukpayeli awo midɛŋ kɛ̃.” (1 Kor. 9:17) Kɛji wɔsusu sane mli ni ajɛ awie wiemɔi nɛɛ he lɛ, ehaa wɔnaa nɔni yɔɔ Paulo jwɛŋmɔ mli lɛ faŋŋ.

Yɛ 1 Korintobii Awolo yitso 9 lɛ mli fɛɛ lɛ, bɔfo lɛ ma nɔ mi akɛ etsuko hegbɛ ni eyɔɔ akɛ ekatsu heloonaa nitsumɔ ko shi ‘eye sanekpakpa lɛ he nii’ lɛ he nii kɛhako lɛdiɛŋtsɛ esɛɛnamɔ. (Kk. 14) Bɔfo lɛ kɛ daagbi shihilɛ mli saji, Mose mla lɛ, kɛ nɔni Yesu Kristo diɛŋtsɛ kpɛlɛ nɔ akɛ afee lɛ tsu nii, ni eha ana faŋŋ akɛ eja gbɛ akɛ mɔ naa heloo gbɛfaŋ yelikɛbuamɔ yɛ “sanekpakpa” lɛ shiɛmɔ hewɔ.

Akɛni Paulo jɛ lɛdiɛŋtsɛ esuɔmɔ mli eŋmɛɛ nɛkɛ hegbɛ nɛɛ he ni etsu nii ekɛkwɛ ehe yɛ heloo gbɛfaŋ hewɔ lɛ, enyɔmɔwoo lɛ ji miishɛɛ kɛ tsuiwoo ni jɛ nakai gbɛ ni ekɔ lɛ mli kɛba lɛ. Ebaanyɛ ekɛ henilee ni mli tse awie nɔkwɛmɔnɔ ni pɛsɛmkunyafeemɔ bɛ mli ni efee yɛ mɛikrokomɛi amumɔŋ nɔyaa he mɔdɛŋ ni ebɔ mli lɛ he. Mɔkomɔko nyɛŋ afolɔ enaa akɛ etsɔ “sanekpakpa” lɛ nɔ ená nii yɛ heloo gbɛfaŋ. Ebuleko hegbɛ ni akɛhalɛ akɛ mɔko ni akɛ nitsumɔ krɔŋkrɔŋ ko ni ji tsulɔnukpayeli wo edɛŋ lɛ. Nohewɔ ni enyɛ́ ekɛɛ, “Agbɛnɛ mɛni ji minyɔmɔwoo mɔ? No ji akɛ, kɛ́ mijaje sanekpakpa lɛ, majajelɛ yaka, ni miheee nɔko yɛ Kristo sanekpakpa lɛ hewɔ, beni afee ni mikafee mihegbɛ ni miyɔɔ yɛ sanekpakpa lɛ mli lɛ he nɔko tuutu ko” lɛ.​—1 Kor. 9:​18.

● Ani okpɔŋɔi ejwɛ ana yɛ kpojiemɔ ninaa lɛ mli, aloo enumɔ?

Wiemɔ kuku ni ji “Kpojiemɔ lɛ mli okpɔŋɔi ejwɛ lɛ” ni Spania niŋmalɔ Vicente Blasco Ibanez ha ehé gbɛi akɛ Jeŋ Ta I adesã-wolo ko ni eŋma lɛ gbɛi, lɛ jɛ sane ni aŋma yɛ Kpojiemɔ yitso ekpaa lɛ mli.

Jɛi aŋma yɛ akɛ bɔfo Yohane na ‘okpɔŋɔ yɛŋ ko ni mɔko ta nɔ,’ yɛ ninaa mli, ni asusuɔ akɛ edamɔ shi kɛha Yesu Kristo ni ta okpɔŋɔ nɔ kɛmiiho akɛ ŋwɛi maŋtsɛ. No sɛɛ lɛ ena “okpɔŋɔ kroko ni tsuɔ” ni mɔko ta nɔ, ni damɔ shi kɛha ta tamɔ nɔni fɛ́ yɛ afi 1914 Ŋ.B. mli lɛ. Nɔni ji etɛ lɛ ji okpɔŋɔ diŋ kɛ enɔtalɔ, ni edamɔ shi kɛha hɔmɔ wulu ko. Kɛkɛ ni nɔni aŋma lɛ kɛfata he akɛ: “Ni mikwɛ, ni naa, okpɔŋɔ Iamulu; ni mɔni ta enɔ lɛ gbɛi ji Gbele, ni Gbohiiaje nyiɛ esɛɛ.”​—Kpoj. 6:​1-8.a

Shi mɛɛ gbɛ nɔ Gbohiiaje nyiɛ Gbele sɛɛ yɛ? Ani Gbohiiaje ta lɛdiɛŋtsɛ ekpɔŋɔ nɔ shi atsɔɔɔ bɔni no yɔɔ? Aloo Gbohiiaje ta Gbele sɛɛ yɛ okpɔŋɔ lamulu lɛ nɔŋŋ nɔ? Aloo Gbohiiaje taaa okpɔŋɔ ko nɔ po shi enyiɛ Gbele sɛɛ kɛ̃? Yɛ anɔkwale mli lɛ, wɔteŋ mɔkomɔko nyɛŋ enɛɛmɛi ateŋ nɔni ji anɔkwale lɛ atsɔɔ kɛ nɔmimaa, ejaakɛ Yohane haaa ale no. Nohewɔ lɛ nɔni wɔbaanyɛ wɔkɛɛ kɛtsɔ nɔni aŋma afɔ̃ lɛ nɔ nɔŋŋ ji akɛ Yohane na okpɔŋɔ-nɔtalɔi ejwɛ kɛ̃​—mɛi ejwɛ kɛ okpɔŋɔi ejwɛ ni amɛsui ji eyɛŋ, etsuru, ediŋ kɛ lamulu. Ehe ehiaaa ni wɔfeee keketee yɛ sane akɛ Gbohiiaje ta okpɔŋɔ ni ji enumɔ nɔ loo dabi, lɛ nɔ.

Kɛlɛ Yohane wiemɔ lɛ haa wɔnaa nɔni ebulɛ akɛ ehe hiaa fe gbɛ nɔ ni Gbohiiaje nyiɛ Gbele sɛɛ yɛ lɛ. No ji akɛ mɛi ni kpatu-gbele​—tamɔ nɔni ta, hɔmɔ kɛ gbelehela kɛbaa​—ŋɔɔ amɛ lɛ yaa Gbohiiaje ni ji adesai fɛɛ agbonyobu lɛ mli.​—Kpoj. 20:⁠13.

[Shishigbɛ niŋmai]

May Daa Gbi Ŋmalɛ

(for fully formatted text, see publication)