‘Kwɛmɔ Bɔni Ehi Ha Akɛ Aaawie Yɛ Be Ni Sa Mli!’
“WIEMƆ ni awie yɛ be ni sa mli lɛ ehi pam!” Nakai ji bɔni ninelɔ ko ni ŋma Biblia mli abɛ ko lɛ kɛɛ. (Abɛi 15:23) Ni mɛɛ anɔkwale eji nɛkɛ!
Yɛ Europa bokã shikpɔŋ ko nɔ lɛ, Yehowa Odasefoi enyɔ ko miishara shi yɛ heko kpataa ko, ni amɛbɔ̃i oblanyo ko ni kɛ ebi miishara shi yɛ jɛmɛ lɛ kɛ sanegbaa. Sanegbaa lɛ sɛɛ lɛ, efɔ̃ Odasefoi lɛ ateŋ mɔ kome nine kɛba eshia lɛ. Beni etee lɛ, egba nuu nɛɛ kɛ eŋa lɛ Biblia mli shiwoo lɛ. Sɛɛ mli lɛ, mɛi enyɔ nɛɛ kɛ oblanyo nɛɛ nyɛ bamɔ Nyɔŋmɔ Wiemɔ mli anɔkwale lɛ mli atuu.
Miishɛɛsane ji akɛ, yɛ nakai gbi lɛ nɔŋŋ dani oblanyo lɛ kɛ Odasefoi enyɔ lɛ baakpe klɛŋklɛŋnɔ̃ lɛ, ewá yɛ sɔlemɔtsu ko ni yɔɔ jɛmɛ lɛ mli ni esɔle akɛ: ‘Nyɔŋmɔ, kɛji oyɛ lɛ, belɛ ofainɛ ha male bo.’ Afii etɛ sɔŋŋ ji no ni nuu nɛɛ bɔ̃i shisharamɔ yɛ jɛmɛ. Shi yɛ nakai gbi lɛ nɔŋŋ nɔ lɛ, ekɛ Yehowa Odasefoi enyɔ kpe. Mɛɛ miishɛɛ po eji akɛ amɛmiishwe waa ni amɛjaje “sanekpakpa” lɛ! Oblanyo lɛ susu akɛ enɛ ji esɔlemɔ lɛ hetoo ni Nyɔŋmɔ ehalɛ.