Ani Jamɔi Fɛɛ Yaa Nyɔŋmɔ Ŋɔɔ

ANI ole akɛ nyɔŋmɔjamɔ ko yɛ ni atsɛɔ lɛ “Kennedy Jálɔi”? Mɛi ni nyiɛɔ sɛɛ lɛ heɔ yeɔ akɛ U.S. Amerika maŋnɔkwɛlɔ John P. Kennedy ni egbo lɛ baanyɛ ‘atsa lá mli helai ni akɛfɔɔ mɔ kɛ hela ni anyɛɛɛ atsa ni kɛgbele baa po.’

Aloo Jeŋ Muu Fɛɛ Nilee sɔlemɔ lɛ hu? Amɛ hemɔkɛyeli lɛ damɔ ŋwɛiniiaŋ lɛji ni asusuɔ akɛ amɛjɛ shibɔlemɔ ŋulamii krokomɛi anɔ lɛ anɔ ni mɔ ni kɛ sɔlemɔ nɛɛ ba lɛ kɛɔ akɛ eta enɛ eko mli be ko aaafee maŋkɛ 2.

Ni namɔ nuko, ni ŋmiŋmi mɔko lɛ yɛ “Osɔfo Jim Jones People’s Temple” sɔlemɔ,lɛ ni ha esɛɛnyiɛlɔi fe 900 gbe amɛhe yɛ Guyana lɛ he.

Nɔkwɛmɔ nii ni tamɔ nɛkɛ baatee sanebimɔi ni hiɛdɔɔ yɔɔ mli ni mɛi pii biɔ lɛ ashi, ekolɛ eko ni onu ni mɛi pii miiwie he. Atsɔɔ jwɛŋmɔ ni ahiɛ nɛɛ mli yɛ nɛkɛ gbɛ nɔ yɛ be babaoo mli, ‘Nyɔŋmɔjamɔi fɛɛ lɛ amɛji gbɛi sɔrɔtoi ni fɛɛ kɛ mɔ yaa Nyɔŋmɔ ŋɔɔ.’

Nɔ Hewɔ Ni Jwɛŋmɔ Nɛɛ Ehe Gbɛi

Yiŋtoo kome hewɔ ni ŋmɛnɛ mɛi pii heɔ gbɛ nɛɛ amɛyeɔ lɛ jɛ ‘heyeli’ mumɔ ni faa yɛ mɛi pii amli lɛ. Mɛi pii sumɔɔɔ ni amɛhaa anaa akɛ amɛsusuuu nii ehe yɛ gbɛi sɔrɔtoi anɔ aloo amɛyɛ keketee

Yiŋtoo kroko hewɔ ni mɛi komɛi kɛɔ akɛ ‘ekpakpa ko yɛ nyɔŋmɔjamɔi fɛɛ mli’ lɛ ji akɛ, sɔlemɔi babaoo wieɔ suɔmɔ he ni amɛtsɔɔ akɛ ehiii akɛ aaapila mɛi krokomɛi, aye amɛ awui, amale aloo aju. Sɔlemɔi sɔrɔtoi emamɔ helatsamɔhei kɛ skul sɔrɔtoi koni amɛkɛye amɛbua mɛi ni ehia amɛ lɛ. Ni nyɔŋmɔjamɔ kuui etsɔɔ Biblia lɛ shishi ni amɛja enɛ, ni enɛ eha mɛi pii enyɛ amɛkase anɔkwa Nyɔŋmɔ lɛ kɛ e-Bi Yesu he sane.

Belɛ kɛji akɛ anɔkwa Nyɔŋmɔ yɛ, ni ekɛ gbɛtsɔɔmɔ eha yɛ e-Wiemɔ ni aŋma afɔ shi lɛ mli, ni e-Bi lɛ tsɔɔ nii ni kɔɔ jamɔ he yɛ anɔkwale mli lɛ, belɛ wɔbaabi akɛ: “Te Nyɔŋmɔ kɛ Yesu buɔ nyɔŋmɔjamɔi sɔrɔtoi lɛ amɛhaa tɛɛŋ? Ani amɛkpɛlɛɔ nɔ akɛ ‘jamɔi fɛɛ kɛ mɔ yaa Nyɔŋmɔ ŋɔɔ”?

Okɛ “Babaoo” Lɛ Aloo “Fioo” Lɛ Yaa?

Awoɔ Yesu Kristo hiɛ nyam yɛ jeŋ muu lɛ fɛɛ akɛ eji tsɔɔlɔ ni le nii ni sheɔ Nyɔŋmɔ gbeyei, ni eka shi faŋŋ akɛ ejeee mɔ ni kwɛɔ nii yɛ gbɛ fintɔŋŋ nɔ. Shi kɛlɛ Yesu kɛɛ yɛ faŋŋ mli yɛ e-Gɔŋ nɔ Shiɛmɔ lɛ mli akɛ:

“Jeee mɔ fɛɛ mɔ ni kɛɔ mi akɛ-Nuntsɔ, Nuntsɔ! Lɛ aaabote ŋwɛi maŋtsɛyeli lɛ mli; shi moŋ mɔ ni feɔ mi tsɛ ni yɔɔ ŋwɛi lɛ suɔmɔnaa nii lɛ. Mɛi pii aaakɛɛ mi yɛ no gbi lɛ nɔ akɛ: Nuntsɔ, Nuntsɔ! Ani jeee ogbɛi lɛ mli wɔfee hewalɛ nibii pii yɛ lo? Ní no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa.”​—Mat. 7:​21-23.

Kadimɔ akɛ Yesu ekpɛlɛɛɛ nyɔŋmɔjamɔ jwɛŋmɔ ni ehe gbɛi akɛ mɛi pii ni kɛ amɛhe ewo jamɔ ko mli yɛ amɛ diɛŋtsɛ amɛ gbɛ nɔ lɛ saa Nyɔŋmɔ hiɛ lɛ nɔ. Shi Yesu kɛɛ po akɛ, akpɛlɛɛɛ “mɛi pii” ni kɛɔ akɛ amɛle Yesu ákɛ Nuntsɔ aloo Kristo lɛ nɔ.

Yesu kɛɛ yɛ nakai shiɛmɔ lɛ nɔŋŋ mli yɛ faŋŋ mli akɛ:

“Nyɛbotea agbo fintɔŋŋ lɛ mli! Ejaakɛ agboi ni lɛɛ kɛ gbɛ tɛtrɛɛ lɛ ji nɔ ni kɛ mɔ yaa hiɛkpatamɔ mli lɛ, ni mɛi ni boteɔ mli lɛ fa pii. Shi agbo fintɔŋŋ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.”​—Mat. 7:​13, 14.

Mɛni hewɔ osusuɔ akɛ Yesu kɔ gbɛ ni tamɔ nɛkɛ? Ŋmalɛi lɛ feɔ lɛ faŋŋ akɛ Yesu le akɛ dani mɔ aaasa Nyɔŋmɔ hiɛ lɛ ehe hiaa ni mɔ lɛ afee Tsɛ lɛ suɔmɔnaa nii, taakɛ atsɔɔ mli yɛ Biblia Iɛ mli lɛ. Beni eyeɔ enɛ he odase lɛ, Yesu wie eshi nibii ni afeɔ kɛ tsɔɔmɔi ni teɔ shi woɔ Nyɔŋmɔ Wiemɔ lɛ. Eja gbɛ akɛ eeefee nakai ejaakɛ ele akɛ abaanyɛ akɛ nyɔŋmɔjamɔ atsu nii ni akɛtsɔ̃ mɛi atsɔne ni akɛshishiu amɛ. (Mat. 23:​13; 2 Kor. 4:⁠4) Kɛ akɛ nɔ ni atsɔɔ yɛ sɔlemɔi lɛ amli ŋmɛnɛ lɛ to Ŋmalɛi lɛ ahe lɛ, anaa akɛ babaoo maleɔ anɔkwa Nyɔŋmɔ lɛ suɔmɔ kɛ mlihilɛ gbɛi lɛ ahe.

Belɛ nɔ ni nyiɛ sɛɛ ji akɛ ebafeŋ nɔ ni fa akɛ mɔ ko, ni wɔ diɛŋtsɛ hu wɔfata he kɛ jamɔ ni wɔfɔlɔi yaa lɛ aaanyiɛ kɛkɛ aloo ni wɔɔdi nyɔŋmɔjamɔi wuji ni ebɔle wɔhe kɛkpe lɛ asɛɛ. Kɛji akɛ wɔfee enɛ yɛ anɔkwayeli mli po lɛ, ebaaha wɔfata “mɛi pii”, ni Yesu kɛɛ akɛ ‘amɛnyiɛ gbɛ tɛtrɛɛ ni kɛ mɔ yaa hiɛkpatamɔ mli lɛ nɔ’ lɛ ahe.

Eka shi faŋŋ akɛ obaasumɔ ni ofata “mɛi fioo” ni Nyɔŋmɔ kojoɔ amɛ akɛ amɛnyiɛ “gbɛ” ni kɛ amɛ baa eŋɔɔ yɛ anɔkwale mli lɛ nɔ lɛ ahe. No nɔŋŋ ji gbɛ ni Yesu kɛɛ akɛ ekɛ mɔ yaa “wala,” naanɔ wala mli lɛ.​—Yoh. 3:​16; 17:⁠3.

ANƆKWALE NILEE NI KƐ MƆ YAA NYƆŊMƆ ŊƆƆ

Ŋwanejee kɔ kwraa bɛ he akɛ obaanyɛ ona akɛ ehe ehiaaa ni wɔfee mɛi ni amɛkase nyɔŋmɔjamɔ he nii yɛ skul wuji amli aloo ni wɔyɛ nyɔŋmɔjamɔ he nilee babaoo dani wɔkwa sɔlemɔi ni heɔ naakpɛɛ nii ni maŋkwralɔi ni amɛgboi baafee aha amɛ lɛ amɛyeɔ, aloo ni wɔkwá nɔ ni heɔ ŋwɛiniiaŋ lɛji ni miifiliki, aloo mɛi ni amɛyɛ jamɔ he sɛkɛ ni gbeɔ amɛhe lɛ. Shi kɛlɛ, nilee he miihia wɔ​—anɔkwale nilee .

Wɔyɛ enɛ he odaseyeli ni aŋma afɔ shi yɛ faŋŋ mli yɛ Yudanyo mlalelɔ ni hi shi yɛ klɛŋklɛŋ afii oha lɛ mli ni atsɛɔ lɛ Saul (aloo Paulo) ni yɛ sɛɛ mli lɛ ebatsɔ Kristofonyo bɔfo lɛ sane lɛ mli. Ekɛ ekaa babaoo tsu etsutsu hemɔkɛyeli lɛ he nii, ni ebɔ mɔdɛŋ po ni efite jamɔ ni esusuɔ akɛ ehiii lɛ. Shi kɛtsɔ Nyɔŋmɔ mɔbɔnalɛ nɔ lɛ, Paulo bayoo akɛ gbɔmɛi ni diɔ nyɔŋmɔjamɔ sɛɛ waa ni lɛ hu efata he lɛ baanyɛ afee mɛi ni “amɛhiɛ dɔɔ yɛ Nyɔŋmɔ he moŋ; shi jeee yɛ anɔkwale nilee naa.” Beni Paulo baná Nyɔŋmɔ suɔmɔnaa nii kɛ enifeemɔi ahe nilee babaoo lɛ, ebafee mɔ ni atsake lɛ awo jamɔ gbɛ ni ja lɛ mli.​—Bɔf. 8:​1-3; 9:​1, 2; Rom. 10:2; 1 Tim. 1:​12-16.

Esa akɛ enɛ ahe wɔjwɛŋmɔ ŋmɛnɛ, ejaakɛ eji Nyɔŋmɔ suɔmɔnaa nii akɛ gbɔmɛi fɛɛ “ashɛ anɔkwale lɛ lee mli” ni amɛja lɛ yɛ nɛkɛ gbɛ nɔ. (1 Tim. 2:​3, 4) Nyɔŋmɔ kɛ emumɔ tsirɛ Paulo koni egba efɔ shi akɛ mɛi pii baahiɛ Nyɔŋmɔ jamɔ su shi amɛbaakwa emli hewalɛ lɛ yɛ wɔ be nɛɛ mli. Áfã wɔ akɛ “tsi ohe kɛjɛ nɛkɛ gbɔmɛi ahe.”​—2 Tim. 3:​1-5.

Belɛ ehe miihia waa ni wɔkwɛ akɛ ani “wɔmiitiu nyɔŋmɔjamɔ aloo jamɔ gbɛ ko ni kɛ mɔ yaa Nyɔŋmɔ ŋɔɔ lɛlɛŋ lo.

[Akrabatsa ni yɔɔ baafa 4]

“Ha, ola kɛ onɔkwale lɛ aba, ni amɛbatsɔɔ mi gbɛ, ni amɛkɛ mi aya ogɔŋ krɔŋkrɔŋ lɛ ni kɛ oshihilɛhei lɛ. No lɛ matee Nyɔŋmɔ afɔleshaa latɛ lɛ he kɛ Mawu ni ji mimliflimɔ kpeteŋkpele lɛ ŋɔɔ, ni majie oyi kɛ saŋku Nyɔŋmɔ, ni Nyɔŋmɔ.”​—Lala 43. 3, 4.

Ani onyiɛ gbɛ tɛtrɛɛ lɛ nɔ . . . . . . aloo gbɛ fintɔŋŋ lɛ nɔ?