Hemɔkɛyeli Tsamɔ​—Te Etsuɔ Nii Ehaa Tɛɛŋ?

‘“NAKAI gbekɛyoo ni nɔ ko fi ekuɛ lɛ. Jiemɔ nakai nii lɛ yɛ okuɛ. Atsao. Kwɔɔ kɛba biɛ ni ojie Yesu yi.” Gbekɛyoo lɛ te shi ni enyiɛ kɛtee wielɔi akpoku lɛ nɔ. Ekɛɛ akɛ afee lɛ opireshɛn shii 12 ni tswetsweetswe eha ekumɔ kɛjɛ 1973. Edamɔ osɔfo lɛ hiɛ, ni etsɔmɔ ekuɛ kɛtee hiɛ kɛ sɛɛ. Osɔfo lɛ jɔɔ lɛ, asafo lɛ tswa amɛdɛ ni osɔfo lɛ kɛɛ: “Atsa gbekɛyoo lɛ!’”

Susumɔ mɔ ko ni atsa lɛ ni ebɛ hewalɛ kɛjɛ tswetsweetswe ni ekumɔ lɛ lɛ mli lɛ miishɛɛ lɛ he okwɛ! Ani nibii ni tamɔ nɛkɛ baa mli diɛŋtsɛ?

Amaniɛbɔɔ tamɔ enɛ ni yɔɔ Worcester Sunday Telegram adafitswaa wolo lɛ mli lɛ tsɔɔ akɛ eeenyɛ eba lɛ nakai. Ŋwanejee ko kwraa bɛ he akɛ ŋmɛnɛŋmɛnɛ beaŋ hemɔkɛyeli tsamɔ miigbala gbɔmɛi babaoo ajwɛŋmɔ. Helatsɛmɛi hoɔ yuu kɛyaa hemɔkɛyeli tsalɔi aŋɔɔ, ni amɛhiɛ ka tsamɔ nɔ. Ani amɛhiɛnɔkamɔi lɛ baa mli? Ani hemɔkɛyeli tsamɔ nyɛɔ etsaa helai lɛlɛŋ? Te etsuɔ nii ehaa tɛɛŋ?

MƐNI NI?

Yɛ anɔkwale mli lɛ hemɔkɛyeli tsamɔ baa yɛ gbɛi sɔrɔtoi anɔ. Yɛ Anaigbɛ lɛ, afeɔ enɛ kɛtsɔ sɔlemɔ ni sanekpakpa jajelɔi loo jamɔi wuji lɛ amli osɔfoi​—ekolɛ mɛi ni kɛ amɛhe ebɔ kui ni amɛkɛɛ amɛyɔɔ tsamɔ hewalɛi lɛ ahe lɛ asɔlemɔi anɔ. Nɛkɛ hemɔkɛyeli tsalɔi nɛɛ kɛɔ akɛ amɛmiikase Yesu Kristo kɛ ebɔfoi lɛ, ni amɛnuɔ he akɛ Nyɔŋmɔ diɛŋtsɛ ji amɛ hewalɛ lɛ jɛɛhe.

Kuu kroko hu ji “tsalɔi” ni jɛɛɛ Kristofoi ajamɔi amli lɛ​—wulɔmɛi, ayɛi, tsofatsɛmɛi,wɔŋtsɛmɛi kɛ mɛi krokomɛi. Mɛnɛɛmɛi heɔ yeɔ akɛ mumɔi fɔji kɛ helai baa ni amɛkpaa musui koni amɛkɛshwie mumɔi lɛ.

Agbɛnɛ “susuma tsalɔi” hu yɛ ni feɔ nɔ ni atsɛɔ lɛ “susuma opireshɛn.” Akɛ nɔkwɛmɔ nɔ lɛ, yɛ Philippines lɛ, amɛkɛɔ akɛ amɛkɛ amɛ niji woɔ helatsɛ lɛ gbɔmɔtso mli ni amɛjieɔ gbɔmɔtso lɛ mli nii ni hela emɔ lɛ lɛ kɛ lá ni efi loo ewɔ yɛ gbɔmɔtso lɛ mli lɛ. Abɔɔ amaniɛ akɛ amɛfeɔ enɛ ni amɛ “helatsɛmɛi” lɛ miikwɛ nɔ ni yaa nɔ lɛ, ni anaaa faladoku ko hu yɛ jɛmɛ yɛ no sɛɛ.

Naagbee lɛ, mɛi hu yɛ ni kɛɔ akɛ amɛ “tsamɔ” lɛ damɔɔɔ Nyɔŋmɔjamɔ loo hemɔkɛyeli nɔ. Amɛwieɔ enɛ he akɛ adebɔɔ mli nii ni baa, gbɛ ni amɛtsɔɔ nɔ amɛgbalaa helatsamɔ hewalɛi ni yɔɔ naakpɛɛ ni ebɔle wɔhe lɛ, aloo yɛ gbɔmɔtso lɛ diɛŋtsɛ mli. Mɛnɛɛmɛi ateŋ mɛi komɛi sumɔɔ ni atsɛ amɛ akɛ “susuma tsalɔi” moŋ fe “hemɔkɛyeli tsalɔi.”

ANI EYEƆ OMANYƐ

Hetoo ni aaana aha enɛ lɛ damɔ mɔ ni obiɔ lɛ sane lɛ nɔ. Mɛi ni heɔ yeɔ lɛ gbaa tsamɔi ni amɛna loo amɛdiɛŋtsɛ amɛtsɔ mli lɛ ahe sane. Ŋwanejelɔi lɛ tsɔɔ mɛi ni ekpa shi amɛna ni amɛnyiɛ ekomɛi asɛɛ ni amɛna akɛ nɛkɛ naakpɛɛ tsamɔi nɛɛ jeee nɔ ni baa diɛŋtsɛ. Mɛni hewɔ saji nɛɛ teɔ shi woɔ amɛhe lɛ?

Yɛ bei komɛi amli lɛ eeenyɛ eba akɛ tɔmɔ diɛŋtsɛ baanyɛ aba. Yoo ko hé ye yɛ anɔkwale mli akɛ atsa hela ko ni ba efɔmɔhe lɛ diɛŋtsɛ aha lɛ. Aka akwɛ ni ana akɛ nakai hela lɛ yɛ ehe; no hewɔ lɛ etee hemɔkɛyeli tsalɔ ko ŋɔɔ. Be kroko ni ayaka akwɛ lɛ ana akɛ hela lɛ bɛ jɛmɛ. Ehe eye diɛŋtsɛ akɛ hemɔkɛyeli tsalɔ lɛ etsa lɛ. Shi tsofafeelɔ lɛ kɛɛ akɛ klɛŋklɛŋ kaa lɛ bafee nɔ ni tɔmɔ yɔɔ mli, taakɛ bɔni ebaa bei komɛi lɛ.

Yɛ bei komɛi amli hu lɛ, gbɔmɛi ni kɛ hiɛdɔɔ taoɔ naakpɛɛ nii ana lɛ kɛ amɛhe woɔ nibii ni amɛtaoɔ lɛ he susumɔ mli. Gbekɛyoo fioo ko ni ehe miiye kɛ samee ko ni mliwa tee eyasara hemɔkɛyeli tsalɔ ko. Yɛ sɛɛ mli lɛ etsofafeelɔ lɛ kwɛ lɛ ekoŋŋ. Gbekɛyoo nɛɛ kɛ miishɛɛ kɛɛ akɛ: “Beni mitsofafeelɔ lɛ na mi lɛ eheee eyeee. Eto akɛ yɛ nyɔji enyɔ pɛ mli lɛ magbo. Shi nɔ ko nɔ ko baaa. Akpaaa gbɛ akɛ mahi wala mli, shi mileee nɔ hewɔ ni Nyɔŋmɔ ehere miyiwala” Nɔ ni yɔɔ awerɛho ji akɛ, yɛ sɛɛ mli beni eshɛɛɛ afi lɛ egbo.

Be ko lɛ akɛɛ tsofafeelɔ ko kɛɛ akɛ ehelatsɛ lɛ hewalɛ ni ena lɛ fee lɛ naakpɛɛ. Beni adafitswaa ŋmalɔ ko yadi nakai sane lɛ sɛɛ lɛ, tsofafeelɔ lɛ kɛɛ akɛ wiemɔ “naakpɛɛ nii” lɛ ji wiemɔ ni akɛtoɔ nɔ ko he. Enu he akɛ tsamɔ lɛ ba yɛ “adebɔɔ nibii anaa.” Ekɛɛ akɛ: “Miheee miyeee akɛ wɔbaanyɛ wɔye odase akɛ Nyɔŋmɔ kɛ ehe wo mli diɛŋtsɛ. Nii ni tamɔ enɛ eba dã yɛ be mli ni hemɔkɛyeli tsamɔ bɛ mli.”

Nibii komɛi yɛ ni haa ewaa akɛ aaanyɛ ale nɔ krɛdɛɛ ni kɛ nɛkɛ “tsamɔi” nɛɛ baa lɛ. Anuɔ hewalɛ ni jwɛŋmɔ lɛ naa yɛ gbɔmɔtso lɛ hewalɛnamɔ nɔ lɛ shishi yɛ gbɛ ni yeee emuu nɔ. Helai komɛi hu yɛ ni amɛtsamɔ lɛ jeee nɔ ni abaanyɛ atsɔɔ akɛ ebaaba aloo ebaŋ. Ekomɛi baa shi yɛ gbɛ ni aleee nɔ. Helai pii yɛ ni gbɔmɔtso lɛ diɛŋtsɛ tsaa, yɛ bei komɛi amli yɛ tsofafeemɔ mli yelikɛbuamɔ naa. Dr. William A. Nolan wo ŋaa akɛ helatsamɔ nitsumɔi komɛi ni akɛ hiɛdɔɔ aaatsu he nii lɛ haa helai komɛi taa mra fe bɔni esa akɛ eba lɛ. Esa akɛ akadi hu akɛ nɔ ni akɛɛ atsa lɛ ateŋ babaoo ji nɔ ni haa helatsɛ lɛ shihilɛ lɛ hiɔ fioo ko.

Hemɔkɛyeli tsalɔi nɛɛ ateŋ mɛi pii le akɛ tsamɔi nɛɛ baanyɛ aba ni jeee yɛ naakpɛɛ gbɛ nɔ. Osɔfo ko ni ekɛ ehe ebɔ mɛi ni kɛ mumɔi atsamɔ kuu lɛ tsuɔ nii lɛ ahe lɛ kɛɛ akɛ: “Tsamɔi lɛ ekomɛi yɛ ni anuɔ he nakai yɛ jwɛŋmɔ lɛ mli, ekomɛi hu jɛ gbeyeishemɔ ni teeɔ bolɔmɔ shi ni abaanyɛ atsɔɔ ekomɛi amli kɛtsɔ adebɔɔ mli nibii anaa.” Kɛkɛ ni ekɛfata he akɛ: “Enɛ gbaaa minaa ejaakɛ amɛyɛ diɛŋtsɛ.”

Shi moŋ, jeee mɛi fɛɛ kpɛlɛɔ susumɔ akɛ tsamɔi lɛ yɛ adebɔɔ mli shishitsɔɔ ko lɛ nɔ. Mɛi pii yɛ ni amɛheɔ amɛyeɔ yɛ anɔkwale mli akɛ naakpɛɛ nibii baa ni ákɛ atsaa helatsɛmɛi kɛtsɔɔ hewalɛ ni fe adesa nɔ̃ nɔ. No hewɔ lɛ mɔ ni taoɔ nibii amli ale lɛ baasusu akɛ: ‘Ojogbaŋŋ, hemɔkɛyeli tsamɔ baanyɛ atsu nii, aloo ekolɛ enyɛŋ etsu nii, shi mɛɛ awui enɛ aaanyɛ aye, kɛji akɛ mɔ ko bɔ enɛ feemɔ he mɔdɛŋ? Enɛ ji sanebimɔ ko ni he hiaa.