Aatutua Gbalashihilɛ

SANE KPAKPA kɛ sane fɔŋ yɛ gbalashihilɛ mli ŋmɛnɛ yɛ je lɛ mli. Sane kpakpa lɛ baa kɛjɛɔ Toronto jwɛŋmɔŋ hela he nilelɔ, Dr. Alan Lyall ŋɔɔ. Ekɛɛ Toronto Star lɛ saneŋmalɔ ko akɛ, yɛ haomɔi babaoo ni eba nɔ yɛ nyɛsɛɛ afii nɛɛ amli lɛ fɛɛ sɛɛ lɛ, gbalashihilɛ miihe shi ekoŋŋ. Mɛni hewɔ esa akɛ ebalɛ nakai? Eha hetoo akɛ: “Ebanyɛ efee gbɛ ni haa mɔ tsui nyɔɔ emli ni haa enine shɛɔ nibii ni etaoɔ yɛ shihilɛ mli lɛ nɔ.”

Shi sane fɔŋ lɛ ji akɛ, gbalashihilɛi pii yɛ ni miishɛɛ bɛ mli. Obalayoo ko ni ŋmalaa saji ewoɔ adafitswaa woji amli lɛ wie eshi gbalashihilɛ he jwɛŋmɔ ni ahiɛ lɛ, ni ekɛɛ akɛ: “Kɛ mikwɛ gbalashihilɛ lɛ, nɔ ni minaa babaoo ji piŋmɔ. Ni nɔ kome ni kɔɔ piŋmɔ he ji akɛ, kɛji akɛ okpa pɛ kɛkɛ lɛ ohe ejɔ bo.” Ahi onuɔ he akɛ gbalashihilɛ ji shihilɛ gbɛ ko ni haa mɔ tsui nyɔɔ emli aloo eji piŋmɔ jɛɛhe kɛkɛ?

Anyɛŋ aje piŋmɔ kɛ nɔnaa ni yɔɔ gbalashihilɛi komɛi amli lɛ ahe ŋwane. Anaa enɛ yɛ bɔ ni atseɔ gbalashihilɛ mli oyayaayai yɛ maji ni ŋmɛɔ gbalamlitsemɔ gbɛ lɛ amli lɛ. Yɛ United States, Amerika nɛkɛ lɛ, gbalamlitsemɔ Iɛ oku ebɔ he shii etɛ yɛ afii nyɔŋmai enyɔ pɛ mli. Yɛ Soviet Union, Rusia lɛ, gbalashihilɛi etɛ fɛɛ etɛ mli ekome fiteɔ. Yɛ Australia lɛ, gbalamlitsemɔ lɛ ku ebɔ he shii ejwɛ yɛ afi kome pɛ mli be mli ni akɛ gbalamlitsemɔ mla hee ba lɛ. Taakɛ London, Financial Times lɛ tsɔɔ lɛ, gbalamlitsemɔ ni faa babaoo yɛ England lɛ ha afite shika aaafee dɔla akpekpei toi akpei enyɔ yɛ afi kome pɛ mli akɛkwɛ mɛi ni amɛwumɛi eshwie amɛ lɛ kɛ amɛbii.

Mɛni hewɔ gbalashihilɛ efee basaa nɛkɛ?

Mɔ Ko Mɔ Yeee Emuu

Naagba lɛ ekome ji akɛ mɔ ko bɛ ni yeɔ emuu. Wɔ fɛɛ wɔyɛ sui komɛi ni baanyɛ agba mɛi krokomɛi anaa. Kɛ wɔkɛ aŋkroaŋkroi komɛi kpeɔ yɛ bei kɛ bei amli lɛ, nakai sui lɛ ejeee kpo. Shi kɛji akɛ wɔkɛ mɔ ko hi shi yɛ gbalashihilɛ mli lɛ, sui nɛɛ jeɔ kpo waa diɛŋtsɛ. Ebaanyɛ ekɛ béi bibii ni fiteɔ nii aba aloo wekukpaa lɛ baafɛ kɛ basabasafeemɔ. Akɛ nɔkwɛmɔ nɔ lɛ, abɔ amaniɛ akɛ yɛ Canada lɛ, yɛ ŋamɛi nyɔŋma fɛɛ nyɔŋma ateŋ lɛ, mɔ kome yɛ ni ewu yiɔ lɛ.

Sɔrɔtofeemɔ yɛ su kɛ baŋ mli, aloo yɛ oti ko tiumɔ mli lɛ baanyɛ ekɛ naagbai wuji aba. Mɛni baa kɛji akɛ mɔ ko ni sumɔɔ wiemɔ waa kɛ mɔ ni sumɔɔ ni ehi shi kpoo kɛ diŋŋ bote gbalashihilɛ mli? Aloo be mli ni gbalashihilɛ mli hefatalɔ kome buɔ heloo gbɛfaŋ nibii pii fe mɔ kroko lɛ? Ekolɛ ŋa lɛ baanu he akɛ ehiɛ eshwie shi akɛni ewu lɛ haaa lɛ heloo gbɛfaŋ nibii ni enaa mli ŋɔɔmɔ yɛ etsɛ shia lɛ dɔŋŋ lɛ. Aloo ekolɛ wu lɛ kɛ ŋmlɛtswai pii baatsu nii ni eshi eŋa lɛ pɛ yɛ shia, ni eha ŋa lɛ anu he akɛ etsɔ mɔ kome.

Daatɔɔ hu ji nɔ titri ni fiteɔ gbala. Ni nakai ji jeŋba gbonyo. Mɛi komɛi yɛ yinɔ ni ŋmɛɔ nɔ fɛɛ nɔ feemɔ gbɛ ŋmɛnɛ lɛ mli ni nuɔ he akɛ sɛɛnamɔ aaanyɛ aba anɔkwale ni ayeee yɛ gbalashihilɛ mli lɛ he yɛ bei kɛ bei amli. Shi mɛi ni pɛiɔ nibii amli lɛ kɛɔ akɛ: “Sɛɛnamɔ bɛ gbalashihilɛ mli anɔkwale ni ayeee lɛ he. Gbɔmɛi pii susuɔ akɛ yoo kroko loo nuu kroko ni akɛ lɛ aaana bɔlɛ baanyɛ aha gbalashihilɛ aŋɔɔ, shi enɛ feemɔ ji naagbai diɛŋtsɛ ni yɔɔ lɛ he okadi. Ejeee nii ni piŋmɔ bɛ mli.” Yɛ be mli ni eyeɔ enɛ he odase lɛ amaniɛbɔɔ ko ni je kpo yɛ England lɛ tsɔɔ akɛ gbalafitemɔ ji nɔ titri ni adamɔɔ nɔ atseɔ gbala mli yɛ jɛmɛ. Eji anɔkwale akɛ gbalafitelɔ lɛ ji “mɔ ni taoɔ lɛ diɛŋtsɛ esusuma hiɛ ekpata.”​—Abɛi 6:⁠32.

Ani osusu bɔ ni shikahelɛtemɔ he gbɛjianɔtoo lɛ baanyɛ afite gbalashihilɛ lɛ hu he? Kɛji akɛ wu kɛ ŋa fɛɛ je kpo akɛ amɛmiiya amɛyatsu nii​—taakɛ mɛi pii feɔ ŋmɛnɛ lɛ​—ehaa weku lɛ mlibii lɛ amli gbalaa. Ni kɛji akɛ gbalashihilɛ mli hefatalɔi nɛɛ kɛ amɛhe wo nyɔmɔ mli vii lɛ, haomɔ, mlifu kɛ bolɔmɔ ji nɔ ni jɛɔ mli baa.

Agbɛnɛ hu, ŋmɛnɛŋmɛnɛ beaŋ su ni mɛi hiɛ ni ji ‘amɛ diɛŋtsɛ amɛ nii ni amɛaafee’ lɛ teɔ shi ewoɔ toiŋjɔlɛ ni aaaba gbalashihilɛ mli. Ewaa kɛhaa gbalashihilɛ mli hefatalɔi lɛ akɛ amɛaakpɛlɛ nɔ ni amɛhefatalɔi lɛ sumɔɔ kɛ nɔ ni amɛsumɔɔɔ nɔ. Yɛ bei pii amli lɛ amɛkpaa heyeli ni amɛyɔɔ be mli ni amɛji oshijafoi lɛ agbɛ yɛ gbalashihilɛ mli. Gbalashihilɛ mli hefatalɔi ni nyɛŋ ana su ni ji na ni anaa ahaa mɔ lɛ yɛ naagbai diɛŋtsɛ ni hiɛdɔɔ yɔɔ mli.

Agbɛnɛ hu wekumɛi baanyɛ ni amɛkɛ naagbai diɛŋtsɛ aba, titri lɛ yɛ shikpɔji ni asusuɔ gbalashihilɛ lɛ he akɛ ekomefeemɔ ni baa wekui enyɔ teŋ moŋ fe ekomefeemɔ ni baa gbɔmɛi enyɔ pɛ teŋ lɛ. Nɔnyɛɛ ni jɛɔ wekumɛi aŋɔɔ lɛ mli baanyɛ awa yɛ hei ni tamɔ nɛkɛ. Wu lɛ nyɛ loo shaayoo lɛ baanyɛ afee mɔ ni yeɔ mɔ nɔ aahu akɛ lɛ moŋ ebatsɔɔ yitso fe ŋa lɛ wu lɛ. Aloo ekolɛ gbekɛyoo lɛ fɔlɔi aaafee veveeve yɛ nɔ ni esa akɛ efee lɛ kɛɛmɔ mli, moŋ fe ni amɛaaŋmɛ obalanyo kɛ obalayoo ni amɛbote gbalashihilɛ mli ehee lɛ gbɛ ni amɛhi shi bɔ ni amɛsumɔɔ.

Enɛɛmɛi ji naagbai komɛi ni gbalashihilɛ mli hefatalɔi kɛbaakpe kɛ amɛbote gbalashihilɛ mli. No hewɔ lɛ, wɔbaanyɛ wɔkɛɛ yɛ anɔkwale mli akɛ aatutua gbalashihilɛ ŋmɛnɛ lolo, eyɛ nɔnyɛɛ babaoo shishi. Ani ebaanyɛ eje mli? Hɛɛ, gbalashihilɛ, akɛ gbɛjianɔtoo lɛ baaje mli, ejaakɛ ebaanyɛ efee “gbɛ ni haa mɔ tsui nyɔɔ emli ni haa enine shɛɔ nibii ni etaoɔ yɛ shihilɛ mli fe nɔ fɛɛ nɔ lɛ ateŋ ekome.” Shi eka shi faŋŋ akɛ gbalashihilɛi komekomei lɛ baanyɛ afite yɛ mple ni eshiɔ lɛ mli. Ani ole gbɛ ni oootsɔ nɔ okwa shihilɛ ni miishɛɛ bɛ mli ni baa lɛ?

[Mfoniri ni yɔɔ baafa 3]

DAATSƆƆ

GBALASHIHILƐ MLI ANƆKWALE NI AYEEE

HELOOŊ NIBII ASƐƐDII

NƆNYƐƐ NI JƐ WEKUMƐI

NYƆMƆBƆƆ