Nyɔŋmɔ Wiemɔ Lɛ Hiɛ Kã
Nɛgbɛ Gbohii Lɛ Yɔɔ?
NUU ni foɔ yɛ biɛ lɛ ji Yakob. Eeye awerɛho waa ejaakɛ eheɔ eyeɔ akɛ agbe ebi Yosef ni esumɔɔ lɛ lɛ. Nakai atade kakadaŋŋ ni lá ekpa mli ni Yakob hiɛ lɛ ji Yosef nɔ. Yakob fo akɛ: “Kooloo fɔŋ ko eye lɛ, tserɛmɔ etserɛ Yosef mli nɛɛ!”—1 Mose 37:33.
Mɛi ni ebɔle Yakob he kɛkpe lɛ ji ebii krokomɛi. Amɛmiibɔ mɔdɛŋ ni amɛshɛje amɛtsɛ mii. Shi kɛlɛ, taakɛ Biblia lɛ ni ji Katolek Douay Shishitsɔɔmɔ lɛ tsɔɔ mli lɛ: “Ekpɛlɛɛɛ miishɛjemɔ, shi moŋ ekɛɛ: Maya mibi Iɛ ŋɔɔ yɛ hell, kɛ yaafo.”—1 Mose 37:35.
Nɛgbɛ Yakob heɔ yeɔ akɛ Yosef yɔɔ? Ani ehe eye akɛ Yosef etee he ko ni apiiɔ mɛi yɛ koni eyahi jɛmɛ kɛya naanɔ, ni ani Yakob miisumɔ ni eya jɛmɛ ni ekɛ lɛ ayakpe? Aloo, Yakob susu moŋ akɛ ebi lɛ egbo ni eyɛ gbonyobu mli ni ákɛ Yakob diɛŋtsɛ miisumɔ ni egbo?
Kwɛmɔ nuu ni naa nɔ babaoo nɛɛ. Lɛ ji anɔkwafo Hiob. Esɔle eha Nyɔŋmɔ yɛ epiŋmɔ lɛ mli akɛ: “Namɔ aaafee enɛ aha mi, akɛ ooobu mihe yɛ hell, koni okɛ mi atee kɛyashi be mli ni omlifu lɛ aaaho aya, ni oto be oha mi beni oookai mi?”—Hiob 14:13, Douay Version.
Eka shi faŋŋ akɛ Hiob miisumɔ ni egbo ni ejo piŋmɔ kɛ nɔnaa lɛ naa foi. No hewɔ lɛ mɛni eheɔ eyeɔ akɛ ebaafee eshihilɛ beni egbo? Nɛgbɛ gbohii lɛ yɔɔ? Hiob heee yeee akɛ ebaafee he ko ni atsɛɔ jɛmɛ hell kɛ egbo, aloo akɛ abaapiŋ lɛ yɛ la ko mli yɛ jɛmɛ. Hiob le akɛ kɛ mɔ ko tee nɛkɛ he ni Katolek Biblia lɛ tsɛɔ lɛ hell nɛɛ, egbonyobu mli kɛkɛ eyaa ni mɔ ko ehiii wala mli yɛ jɛmɛ, no hewɔ lɛ piŋmɔ ko bɛ jɛmɛ. (Jajelɔ 9:5, 10) Shishijee Hebri wiemɔ kɛha nɛkɛ heni gbohii lɛ yɔɔ lɛ ji Sheol, ni eshishi ji adesai akwamaŋ gbonyobu. No hewɔ lɛ, Bibliai komɛi tamɔ Authorized Version lɛ wieɔ ŋmalɛi ni atsɛ, yɛ biɛ lɛ ahe akɛ “gbonyobu” moŋ fe “hell.”
Ani hiɛnɔkamɔ ko yɛ kɛha mɛi ni leee nɔ ko ni yɔɔ gbonyobu mli lɛ? Ani amɛbaanyɛ amɛba wala mli ekoŋŋ? Hɛɛ, Biblia lɛ kɛɔ akɛ: “Gbele kɛ hell [afagbɛ niŋmaa, “gbohiiaje”] jie gbohii ni yɔɔ amɛmli lɛ amɛha.” (Kpojiemɔ 20:13, 14; Authorized Version) Mɛɛ sanekpakpa nɛ! Nyɔŋmɔ kɛ mɛi ni egboi lɛ baaba wala mli ekoŋŋ, ni eha gbɔmɛi tamɔ Hiob ni heɔ gbohiiashitee lɛ amɛyeɔ lɛ ahiɛnɔkamɔ lɛ aba mli.—Hiob 14:14, 15.
[Mfoniri ni yɔɔ baafa 8]
Beni Yakob kɛɔ eweku lɛ akɛ ebi lɛ etee hell lɛ, mɛni etsɔɔ?
[Mfoniri ni yɔɔ baafa 9]
Hell—mɛni hewɔ Hiob baasɔle ni eya jɛmɛ?