Suɔmɔ, “Ekomefeemɔ Kpaa” Lɛ
“Shi, yɛ enɛɛmɛi fɛɛ sɛɛ lɛ, nyɛwoa suɔmɔ, ejaakɛ eji ekomefeemɔ kpaa ni yeɔ emuu.”—KOLOSEBII 3:14, NW.
1. Mɛni hewɔ famɔ ni yɔɔ Kolosebii 3:14 lɛ ji nɔ ni kaa mɔ ŋmɛnɛ lɛ?
1 FAMƆ ni jɛɔ Nyɔŋmɔ Wiemɔ ni aŋma yɛ Kolosebii 3:14 baa Yehowa Odasefoi aŋɔɔ ŋmɛnɛ yɛ jeŋ ni hetsɛ̃ aloo nyɛ̃ɛ eyi mli obɔ ni emli egbala nɛɛ mli lɛ ji nɔ ni kaa mɔ diɛŋtsɛ. Etamɔ nɔ ni anyɛŋ atsu he nii kwraa, ejaakɛ efa amɛ akɛ: “Shi, yɛ enɛɛmɛi fɛɛ sɛɛ lɛ, nyɛwoa suɔmɔ, ejaakɛ eji ekomefeemɔ kpaa ni yeɔ emuu.” Shi kɛlɛ, aatsu nakai famɔ ni jɛ mumɔŋ lɛ he nii kɛmiiwo ehiɛ nyam.
2. Mɛni ji nɔ ni tamɔ kpaa ni fimɔɔ Kristendom jamɔi sɔrɔtoi lɛ, ni enɛ haa Kristendom feɔ mɛni fa?
2 Eka shi faŋŋ ni anyɛŋ aje he ŋwane, suɔmɔ akɛ ekomefeemɔ kpaa ni yeɔ emuu lɛ bɛ Kristendom, ejaakɛ emli egbala efee jamɔ kui ohai abɔ ni amɛhiɛ jamɔ mli hemɔkɛyelii kɛ nifeemɔi sɔrɔtoi abɔ. Nɔ ni sa kadimɔ ji akɛ, nibii ni feɔ tamɔ nɔ ni no haa Kristendom sɔlemɔ gbɛjianɔtooi lɛ feɔ ekome ji amɛnyɛ̃ɛ loo hetsɛ̃ kɛ shi ni amɛteɔ amɛwoɔ Yehowa odasefoi ni amɛjɔɔ amɛhe nɔ ni abaptisi amɛ ŋmɛnɛ lɛ Kristofoi asafo lɛ. (Yesaia 43:10, 12) Nɛkɛ nyɛɛ loo hetsɛ̃ kɛ shitee kɛ woo nɛɛ ni amɛjieɔ lɛ kpo hewɔ lɛ, Kristendom jamɔ gbɛjianɔtooi lɛ feɔ amɛhe je ni yɔɔ Satan Abonsam, “je nɛŋ nyɔŋmɔ” lɛ nɔyeli shishi lɛ fa. (2 Korintobii 4:4) Enɛ tamɔ bɔ pɛ ni Kristojamɔ Shishitolɔ lɛ kɛɛ akɛ ebaafee lɛ. Yɛ be mli ni ekɛ enaagbee wiemɔ haa enɔkwa bɔfoi lɛ, yɛ be mli ni Yuda Iskariot sɛɛgbɛtsɔɔlɔ lɛ eshi amɛ lɛ, Yesu kɛɛ: “Enɛ mikɛɔnyɛ, akɛ nyɛsumɔ nyɛhe. Kɛji je lɛ miinyɛnyɛ lɛ, nyɛnaa nyɛlea akɛ mitsutsu enyɛ. Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihalanyɛ kɛjɛ je lɛŋ lɛ, no hewɔ je lɛ nyɛɛɔ nyɛ lɛ.”—Yohane 15:17-19.
3. Mɛɛ sanebimɔ teɔ shi yɛ nɔ ni je lɛ nyɛ̃ɛɔ lɛ he?
3 Yɛ Yesu wiemɔi nɛɛ hewɔ lɛ, sanebimɔ lɛ teɔ shi akɛ, Mɛɛ jamɔ kuu ŋmɛnɛ, je lɛ fɛɛ nyɛɛɔ ni amɛsumɔɔɔ amɛsane, ni ajieee Kristendom po yɛ mli? Adesa yinɔsane, titri lɛ kɛjɛ Jeŋ Ta I, yeɔ ebuaa anɔkwafo fɛɛ anɔkwafo ni taoɔ amɛ ale yɛ gbɛ ni tɔmɔ ko kwraa bɛ he nɔ.
4. Paulo famɔ ni yɔɔ Kolosebii 3:14 lɛ kɔɔ namɛi ahe, ni namɔ ji nɛkɛ gbɔmɛi nɛɛ amumɔŋ Tsɛ kome?
4 Yehowa Odasefoi ni yɔɔ ŋmɛnɛ lɛ le akɛ efamɔ: “Nyɛwoa suɔmɔ, ejaakɛ eji ekomefeemɔ kpaa ni yeɔ emuu” lɛ kɔɔ amɛhe tɛɛ yɛ wiemɔi ni bɔfo Paulo kɛje Kolosebii awolo lɛ shishi lɛ hewɔ. Wɔkaneɔ akɛ: “Paulo, ni ji Yesu Kristo bɔfo yɛ Nyɔŋmɔ suɔmɔ naa, kɛ wɔnyɛmi Timoteo lɛ, ŋma yaha hetselɔi ni yɔɔ Kolose lɛ kɛ nyɛmimɛi heyelilɔi ni yɔɔ Kristo mli lɛ: Duromɔ kɛ hejɔlɛ ni jɛ wɔtsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ ahanyɛ.” (Kolosebii 1:1, 2) Ojogbaŋŋ, namɔ ji klɛŋklɛŋ afii oha lɛ mli Kristofoi ni yɔɔ Kolose maŋ ni yɔɔ Asia Bibioo lɛ mli lɛ aŋwɛi Tsɛ? Lɛ ji amɛmumɔŋ Hiɛnyiɛlɔ, Yesu Kristo Tsɛ lɛ, ni e-Tsɛ lɛ ji Nyɔŋmɔ ni ji “mɔ ni kwɔ fe fɛɛ yɛ shikpɔŋ lɛ nɔ fɛɛ” kɛ “mɔ ni egbɛi ji Yehowa.”—Lala 83:19.
5. Mɛi ni Paulo ŋma ewolo lɛ eyaha lɛ baanyɛ afee mɛi ni jaa namɔ, ni te Yesu kɛ bɔfo Yohane fee enɛ he mfoniri amɛha tɛŋŋ?
5 Ah, belɛ, esa akɛ mɛi ni Paulo ŋma ewolo lɛ eyaha lɛ afee Yehowa Nyɔŋmɔ jalɔi, taakɛ bɔ ni Yesu Kristo diɛŋtsɛ ji lɛ! Yesu kpoo nɔ ni Abonsam kɛhaa lɛ ni ji jeŋ muu fɛɛ kɛ́ Yesu aaakula shi ni eja lɛ lɛ, yɛ kaa gɔŋ lɛ nɔ. Yesu shwie Kaalɔ lɛ amrɔ nɔŋŋ ni etsɛ wiemɔ kɛjɛ mumɔnaa famɔ lɛ mli: “Yehowa o-Nyɔŋmɔ lɛ esa akɛ oja, ni lɛ pɛ kɛkɛ okɛ sɔɔmɔ krɔŋkrɔŋ aha.” (Mateo 4:8-11; Luka 4:8; 5 Mose 6:4, 5, 13, NW) Yɛ Yesu kasemɔ mli lɛ, esa akɛ ekaselɔi lɛ hu ajá Nyɔŋmɔ kometoo lɛ nɔŋŋ ni lɛ diɛŋtsɛ eja lɛ yɛ be fɛɛ mli ni ji Yehowa. (Yohane 20:17) Nɔ ni kɛ enɛ kpaa gbee lɛ, beni bɔfo Yohane ho gbee ŋwɛibɔfo lɛ ni kɛ Kpojiemɔ lɛ ha lɛ naji anaa yɛ jamɔ gbɛ nɔ lɛ, ŋwɛibɔfo lɛ te shi wo enɛ, akɛ: “Nyɔŋmɔ moŋ oja; ejaakɛ Yesu odase lɛ ji gbalɛ mumɔ lɛ.”—Kpojiemɔ 19:10; 1:1.
6. Mɛɛ Kristendom nifeemɔ ko sɛɛ ni famɔ ni yɔɔ Kpojiemɔ 18:4, 5 lɛ bafee nɔ ni he hiaa waa, ni namɛi etsu nakai famɔ Iɛ he nii, ni mɛni ejɛ mli eba?
6 Beni Babilon Kpeteŋkpele, jeŋ apasa jamɔ maŋtsɛyeli lɛ efee yinɔsane ko ni gbeɔ Nyɔŋmɔ gbɛi lɛ he guɔ eha lɛ diɛŋtsɛ ehe yɛ Jeŋ Ta I lɛ mli lɛ sɛɛ lɛ, ŋwɛi famɔ ni yɔɔ Kpojiemɔ 18:4, 5 lɛ bafee nɔ ni he hiaa waa fe December 1880 Buu-Mɔɔ wolo tɛtrɛɛ lɛ be lɛ aloo be ko ni tsɔ enɛ hiɛ lɛ, akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko. Ejaakɛ ehe eshai lɛ eshɛ ŋwɛi tɔɔ ni Nyɔŋmɔ ekai enifɔjianii lɛ.” Yɛ nakai famɔ lɛ toiboo mli lɛ mɛi ni sumɔɔ akɛ amɛaafee Yehowa Nyɔŋmɔ “maŋ” lɛ je kpo kɛjɛ Babilon Kpeteŋkpele lɛ mli ni amɛfee ekome yɛ Kristofoia ekomefeemɔ mli, koni amɛdi nakai suɔmɔ lɛ sɛɛ, nɔ ni ji “ekomefeemɔ kpaa ni yeɔ emuu lɛ.” Amɛkɛ hiɛdɔɔ ŋɔɔ bɔfo lɛ wiemɔi ni yɔɔ 1 Korintobii 14:33 lɛ amɛwoɔ amɛtsui mli: “Nyɔŋmɔ lɛ, ejeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ni.” No hewɔ lɛ, yɛ be mli ni wɔkwɛɔ Yehowa Odasefoi asafoi fe akpei nyɔŋmai ejwɛ kɛ etɛ ŋmɛnɛ lɛ, etsirɛɔ wɔ koni wɔjaje wiemɔi ni yɔɔ Lala 133 lɛ:
“Kwɛ bɔ ni ehi, bɔ ni eyɔɔ fɛo kɛ nyɛmimɛi fee ekome kɛhi shi lɛ! Etamɔ mu kpakpa ni yɔɔ yiteŋ ni tsereɔ shwieɔ tsɛŋ mli, ni ji Aaron tsɛŋ lɛ, ekpelekeɔ shi kɛbashwieɔ etade yuu lɛ naamuu lɛ nɔ; etamɔ Hermon bɔ ni nyɔɔ Zion gɔji lɛ anɔ lɛ. Ejaakɛ Yehowa ewo jɔɔmɔ kɛ wala shi eha jɛi kɛyashi naanɔ.”—Lala 133:1-3.
7. Gbɛnaa nii ka namɛi anɔ ŋmɛnɛ akɛ amɛmɔ nɛkɛ ekomefeemɔ nɛɛ mli, ni mɛɛ yiŋtoo hewɔ Nyɔŋmɔ baa edasefoi lɛ ayi kɛtsɔ Jeŋ Ta I mli lɛ?
7 Taakɛ eji yɛ asafo ni yɔɔ Kolose lɛ gbɛfaŋ yɛ nɔ ni akɛɛ atsɛɔ lɛ Kristofoi Abe lɛ klɛŋklɛŋ afii oha lɛ mli Iɛ he lɛ, eji gbɛnaa nii ni ka ŋmɛnɛŋmɛnɛ gbii nɛɛ amli Yehowa odasefoi lɛ anɔ akɛ amɛhiɛ amɛ ekomefeemɔ he gbɛjianɔtoo nɛɛ mli kpɛŋŋ yɛ jeŋ ni mli egbala nɛɛ mli. Nakai eji titri kɛjɛ “jeŋmaji abei ni ato” lɛ naagbee kɛjɛ nakai 1914 afi ni ta kpata hiɛ lɛ naagbee kɛbaa nɛɛ! (Luka 21:24) Klɛŋklɛŋ jeŋ ta lɛ wo Yehowa Odasefoi lɛ ashihilɛ he gbeyei akɛ anɔkwale Kristofoi agbɛjianɔtoo. Shi yɛ ‘maŋtsɛyeli lɛ he sanekpakpa nɛɛ ni aaashiɛ yɛ shikpɔŋ lɛ fɛɛ nɔ ni akɛye jeŋmaji lɛ fɛɛ odase’ lɛ hewɔ lɛ, Nyɔŋmɔ Ofe lɛ eŋmɛɛɛ gbɛ ni henyɛlɔi ni amɛfee ekome ni yɔɔ Kristendom kɛ wɔŋjalɔi amaji lɛ amli lɛ akpata edasefoi ni efɔ amɛ mu lɛ fɛɛ ahiɛ kɛjɛ shikpɔŋ nɔ. (Mateo 24:14; Marko 13:10) Yehowa Nyɔŋmɔ ha amɛye amɛhe yɛ ta lɛ sɛɛ klɛŋklɛŋ afi ni ji 1919 Ŋ.B lɛ mli kɛjɛ amɛnaatsii lɛ mli ni etsu amɛ ni amɛya shiɛmɔ nitsumɔ lɛ nɔ yɛ jeŋmaji fɛɛ ateŋ.
8. Akɛni enyɛɛɛ ejɛ sɛɛ efite Kristofoia ekomefeemɔ lɛ hewɔ lɛ, mɛni Satan feɔ koni ekɛbɔ mɔdɛŋ efee enɛ?
8 Satan Abonsam nyɛɛɛ ajɛ asafo lɛ sɛɛ atsɔ enajiaŋdamɔlɔi anɔ efite Yehowa Odasefoi, no hewɔ lɛ kɛjɛ nakai be lɛ nɔ kɛbaa nɛɛ eebɔ mɔdɛŋ ni efite bɔ ni ato amɛ gbɛjianɔ yɛ ekomefeemɔ mli lɛ yɛ ŋaa gbɛ nɔ, kɛtsɔ shi ni eeegbu kɛjɛ mli gbɛ, kɛjɛ gbɛjianɔtoo lɛ mli diɛŋtsɛ lɛ nɔ. Yɛ enɛ hewɔ lɛ agba afɔ shi yɛ Kpojiemɔ 12:17, yɛ nɛkɛ wiemɔi nɛɛ amli: “Ni drako lɛ mli fu yoo lɛ, ni eyiŋ etee ni ekɛ yoo lɛ seshibii ni eshwɛ ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ ayawuu.”
Su Kɛ Baŋ Ni Esa Akɛ Ana Bo Yɛ Mli
9. Mɛɛ tsɛŋemɔ esa akɛ Yehowa Odasefoi akwɛ amɛhe nɔ Jogbaŋŋ yɛ he, ni mɛni Lala 91 yɔɔ kɛɛmɔ yɛ enɛ he?
9 Nyɛɛ su ni etsɛŋe jeŋ fɔŋ lɛ miigbɛ kɛmiishwa, taakɛ bɔ ni Yesu Kristo diɛŋtsɛ gba fɔ shi yɛ egbalɛ ni kɔɔ “nibii agbɛjianɔtoo lɛ naagbee” he lɛ, akɛ: “Ni amɛle gbalɔi pii aaate shi, ni amɛaalaka mɛi pii. Ni nɔ ni mlakwamɔ baafa hewɔ lɛ, mɛi pii asuɔmɔ lɛ he aaajɔ. Shi mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:3, 11-13) Nyɛ̃ɛ mumɔ lɛ nyɛɔ etsɛŋeɔ mɔ waa, no hewɔ Iɛ esa akɛ Yehowa gbɛjianɔtoo ni anaa lɛ mlibii lɛ akwɛ amɛhe nɔ jogbaŋŋ koni enɛ akatsɛŋe amɛ. Bɔ ni wɔɔfee enɛ wɔha lɛ, mumɔnaa Lalatsɛ lɛ tsɔɔ, akɛ: “Mɔ ni hiɔ Ŋwɛinyo lɛ teemɔ he lɛ, eeehi Ofe lɛ hɔ̃ŋ lɛ shishi. Makɛɛ Yehowa akɛ: Mibobaa he kɛ mimɔɔ jio, mi-Nyɔŋmɔ hu ni mihiɛ ka enɔ! Osheŋ nyɔŋ ŋmiŋmi gbeyei, loo gaimlibi ni filikiɔ shwane lɛ, loo gbele hela ni nyiɛɔ duŋ mli lɛ, loo tsɛŋemɔ hela ni kpataa mɔ hiɛ shwane lɛ. Kɛ mɛi akpe nyɔ yɛ omasɛi, ni mɛi akpei nyɔŋma hu nyɔ yɛ oninejurɔ nɔ po, bo lɛ, ebɛŋkɛŋo. Ohiŋmɛii kɛkɛ okɛaakwɛ, ni ooona mɛifɔji anyɔmɔwoo.”—Lala 91:1, 2, 5-8.
10. Te wɔɔfee tɛŋŋ wɔkwa gbɔmɔtsoŋ su kɛ baŋ ko ni haa wɔtamɔɔ mɛi ni yɔɔ je lɛ mli lɛ, ni te Nyɔŋmɔ kwɛɔ wɔ tɛŋŋ ni esoro no yɛ je ni egbo lɛ he?
10 Ama ŋwɛi hebuu nɔ mi aha wɔ, shi esa akɛ wɔhi shi yɛ shihilɛi ni akɛkpɛtɛ he lɛ naa. Kɛji akɛ wɔkpoo ekomefeemɔ ni wɔkɛ je lɛ aaafee ni kɛ mumɔŋ gbele baa lɛ, belɛ wɔwoŋ su kɛ baŋ ni baaha wɔtamɔ gbɔmɛi ni yɔɔ je lɛ mli lɛ. Belɛ wɔwoŋ nyɛ̃ɛ su ni yɔɔ je lɛ mli lɛ tamɔ atade. Nɔ ni teɔ shi woɔ nyɛ̃ɛ ji suɔmɔ, Yehowa kɛ e-Kristo lɛ kɛ wɔ-Kristofoi anyɛmimɛi hii kɛ yei lɛ ahe suɔmɔ. Gbɔmɔ su kɛ baŋ ni jieɔ nɛkɛ su nɛɛ kpo ji su kɛ baŋ ni bɔfo Paulo ni mumɔ yɔɔ enɔ lɛ kɛɔ wɔ akɛ wɔwo akɛ Yesu Kristo kaselɔi lɛ. Kɛji akɛ wɔfee enɛ lɛ belɛ wɔmiijie wɔhe kpo wɔtsɔɔ mɛi krokomɛi akɛ Nyɔŋmɔ sɔɔlɔi kɛtsɔ,“suɔmɔ ni osato bɛ mli” nɔ. (2 Korintobii 6:4-10) Nɛkɛ suɔmɔ nɛɛ jɛ Nyɔŋmɔ, ni eko ni wɔyɔɔ lɛ tsɔɔ akɛ wɔkɛ lɛ ebote wekukpaa mli akɛni wɔtsɔ wɔsɛɛ wɔha je lɛ kɛ wɔtsui kɛ wɔsusuma muu lɛ fɛɛ hewɔ. Nyɔŋmɔ buɔ je lɛ akɛ egbo kɛ mɛi hu ni ji efa lɛ hu akɛ mɛi ni amɛgboi; eka shi faŋŋ akɛ amɛjeee mɛi ni hiɛ ka kɛha lɛ. Ni yɛ Nyɔŋmɔ hiɛ lɛ, wɔ Yesu Kristo kaselɔi ni wɔjɔɔ wɔhe nɔ ni abaptisi wɔ lɛ yɛ wala mli; hɛɛ, wɔyɛ wala mli akɛ E-gbɛjianɔtoo lɛ ni suɔmɔ yɔɔ mli lɛ fa. No hewɔ lɛ ejeee wiemɔ ni awo he tsɔ, ákɛ 1 Yohane 3:14 aaakɛɛ akɛ: “Wɔle akɛ wɔfoŋ kɛjɛ gbele mli kɛtee wala mli, ejaakɛ wɔsumɔɔ wɔnyɛmimɛi; mɔ ni sumɔɔɔ enyɛmi lɛ ehiɔ gbele mli,”
11. Suɔmɔ gbalaa wɔ ewoɔ mɛɛ nyɛmifeemɔ kuu mli?
11 No hewɔ lɛ wɔnaa akɛ suɔmɔ gbalaa wɔ woɔ nyɛmifeemɔ ko ni Yesu Kristo, Nyɔŋmɔ Bi lɛ ji wɔnyɛmi nukpa lɛ mli. Nɛkɛ Kristofoi asu nɛɛ ji atade ko, aloo hehaa nɔ ko, ni wɔtsɔɔ nɔ wɔtsɔɔ aloo wɔjieɔ bɔ ni wɔji Iɛ kpo, ni osatofeemɔ bɛ mli. No ji oti ni he hiaa fe fɛɛ ni Nyɔŋmɔ Wiemɔ lɛ kɛɔ akɛ esa akɛ wɔna ni wɔkɛtsu nii lɛ.
12. Mɛni esa akɛ afee ni nine ashɛ nakai suɔmɔ lɛ nɔ, ni ani esa akɛ aŋmɛɛ nakai nibii lɛ ahe yɛ no sɛɛ?
12 Wɔnuɔ shishi akɛ nibii komɛi yɛ ni esa akɛ kaselɔ toibolɔ lɛ afee koni eshɛ suɔmɔ ni yɔɔ krɔŋŋ nɛɛ he. Kɛha mɛi ni kɛ anunyam nyɔmɔwoo ni ji ŋwɛi gbɔmɔtso lɛ ema amɛhiɛ lɛ, 2 Petro 1:5-8 kɛɔ akɛ: “Belɛ enɛ nɔŋŋ hewɔ lɛ nyɛkɛ mɔdɛŋbɔɔ fɛɛ afataa he, ni nyɛtsɔa nuufeemɔ yɛ nyɛhemɔkɛyeli lɛ mli; shi nuufeemɔ lɛ mli hu, nyɛtsɔɔa nilee; ni nilee Iɛ mli hu lɛ, hiɛshikamɔ; ni hiɛshikamɔ mli lɛ, tsuishitoo; ni tsuishitoo mli lɛ, Nyɔŋmɔ jamɔ; ni Nyɔŋmɔ jamɔ mli lɛ, nyɛmimɛi ahedɔɔ; ni nyɛmimɛi ahedɔɔ mli lɛ, suɔmɔ. Ejaakɛ kɛji nɛkɛ nii nɛɛ yɛ nyɛmli ni efa lɛ, ehaŋ nyɛfee hejɔ̃lɔi aloo mɛi ni wooo yibii yɛ wɔ-Nuŋtsɔ Yesu Kristo he nilee lɛ gbɛfaŋ.” Esaaa akɛ aŋmɛɛɔ nibii babaoo ni akɛfata he lɛ ahe yɛ be mli ni nine eshɛ oti ni ji su ni ji suɔmɔ nɔ lɛ. Dabi, shi moŋ esa akɛ hemɔkɛyeli, nuufeemɔ, nilee, hiɛshikamɔ, tsuishitoo, Nyɔŋmɔ jamɔ, kɛ nyɛmimɛi ahedɔɔ ahi shi akɛ wɔgbɔmɔtso su kɛ baŋ ni eye emuu lɛ fa. Esa akɛ amɛha suɔmɔ aya nɔ afa babaoo. Nɛkɛ gbɛ nɔ mɛi ni yɔɔ subaŋi ni hiɔ shi daa nɛɛ aaatsɔ ni amɛnine ashɛ nyɔmɔwoo lɛ nɔ yɛ Nyɔŋmɔ dɛŋ yɛ ebe ni sa,mli.
13. Yɛ mɛɛ gbɛ nɔ Paulo lɛɔ nakai shishijee taomɔ nii lɛ amli yɛ Kolosebii 3:12-14?
13 Yɛ nibii ni esa akɛ wɔ diɛŋtsɛ lɛ wɔfee lɛ he wiemɔ mlitsɔɔmɔ lolo bɔni afee ni wɔnine ashɛ nyɔmɔwoo ni sa nɔ lɛ, abaanyɛ atsi sui komɛi ni bɔfo Paulo kɛɔ akɛ esa akɛ wɔwo ni wɔkɛtsɔɔ wɔsu kɛ baŋ lɛ ta yɛ gbɛ ni sa nɔ yɛ biɛ. Dani eeetsɔɔ nɔ ni ji ekomefeemɔ kpaa ni yeɔ emuu lɛ, Paulo kɛɛ akɛ: “No hewɔ lɛ, akɛ nɔ ni Nyɔŋmɔ halamɔbii, mɛi krɔŋkrɔŋi kɛ suɔmɔmɛi ji nyɛ nɛɛ lɛ, nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo, ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni Kristo hu ŋɔ fa nyɛ lɛ, nakai nyɛ hu nyɛfea; shi, yɛ enɛɛmɛi fɛɛ sɛɛ lɛ, nyɛwoa suɔmɔ, ejaakɛ eji ekomefeemɔ kpaa ni yeɔ emuu lɛ.”—Kolosebii 3:12-14, NW.
Srɔtofeemɔ Ni Ka Amɛ Kɛ Mɛi Ni Efeko Ekome Lɛ Ateŋ
14. Mɛɛ gbɔmɛi sɔrɔtoi nɛkɛ nakai Kristofoi asafo lɛ mlibii lɛ ji dani amɛtsu nakai bɔfoi lɛ afamɔi lɛ ahe nii?
14 Nakai famɔi ni bɔfoi lɛ kɛha lɛ tsɔɔ nɔ gbɔmɛi ni esa akɛ Kristofoi asafo lɛ mlibii lɛ afee. Tsutsu lɛ amɛji je ni leee Nyɔŋmɔ ni bɛ suɔmɔ kɛ emli Abonsam sui lɛ fa. No hewɔ lɛ mɛɛ su kɛ baŋ amɛhiɛ yɛ nakai be lɛ mli? Bɔfo Paulo tsiɔ enɛ ta yɛ 1 Korintobii 6:9-11 akɛ: “Ani nyɛleee akɛ amimyelɔi anine shɛŋ Nyɔŋmɔ maŋtsɛyeli lɛ nɔ? Nyɛkahaa alakaanyɛ! Ajwamaŋbɔlɔi loo wɔŋjalɔi loo gbalaŋkulɔi loo mɛi ni kɛ amɛ diɛŋtsɛ amɛheloo feɔ yakayakanii loo hii ni kɛ hii feɔ yakayakanii . . . anine shɛŋ Nyɔŋmɔ maŋtsɛyeli lɛ nɔ kwraa. Ni nɛkɛ nyɛteŋ mɛi komɛi yɔɔ sa; shi agbɛnɛ aju nyɛhe, ni asaŋ atsuu nyɛhe, ni abunyɛ bem hu yɛ Nuŋtsɔ Yesu gbɛi kɛ wɔ-Nyɔŋmɔ lɛ Mumɔ mli.”
15. Mɛni hewɔ je lɛŋ bii bɛ ekomefeemɔ “kpaa” ni tseee lɛ eko?
15 Ebaawa akɛ je lɛŋ bii ni atsɔɔ bɔ ni amɛji yɛ yiteŋgbɛ nɛɛ aaana nɔ ko ni jeee pɛsɛmkunya nɔ, nɔ ko ni yɔɔ krɔŋŋ ni eeeye ebua amɛ akɛ kpaa ko ni fimɔɔ amɛ ni tseee. No hewɔ lɛ, adesa weku lɛ ni yɔɔ sɛɛ yɛ jeŋ momo nɛɛ mli lɛ bɛ nɔ ko ni feɔ amɛ ekome. Ekolɛ nibii ni amɛnyaa he lɛ baanyɛ efee amɛ ekome yɛ be ko mli. Shi yɛ be ni sa mli lɛ, kɛ ajie nɛkɛ nibii ni amɛ diɛŋtsɛ lɛ amɛnyaa he nɛɛ kɛtee lɛ, je lɛŋ bii lɛ laajeɔ miishɛɛ ni amɛyɔɔ kɛha amɛhe lɛ. Nibii ni fimɔɔ amɛ lɛ mli tserɛɔ. No hewɔ lɛ, yɛ naagbee lɛ, amɛtsui shi amɛtoɔ amɛhaa amɛhe kɛkɛ akɛ amɛnanemɛi gbɔmɛi ni yɔɔ akutso kome mli ni amɛnyɛŋ amɛkwa amɛ.
16. Kɛ amɛye amɛhe kɛje nibii ni feɔ amɛ ekome yɛ be fioo mli lɛ ahe lɛ, mɛni ji nɔ ni je lɛŋ bii tsɔɔ amɛhe kɛyaa he, ni mɛni hewɔ?
16 Maŋhedɔɔ! Maŋ sane yeli! Jamɔi amligbalamɔ ni akɛhe kpɛtɛɔ he yɛ sɛkɛyeli mli! Weku mligbalamɔ! Kɛ awo nɛkɛ nibii ni kanyaa henumɔ nɛɛ mli la kɛtee shɔŋŋ lɛ, ebaanyɛ eye mɛi ni kɛ amɛhe woɔ mli lɛ anɔ ni amɛnu he akɛ nitsumɔ kɛ gbɛnaa nii ko ka amɛnɔ. Shi yɛ fɛɛ sɛɛ lɛ, adesai ka he amɛji nakai gbɔmɛi lɛ nɔŋŋ akɛ mɛi ni amɛsusuɔ amɛ pɛ amɛhe. No hewɔ lɛ kɛ amɛkpa nitsumɔ, kɛ amɛye amɛhe ni amɛbaanyɛ amɛkɛ amɛhe awo nibii ni amɛ diɛŋtsɛ amɛsumɔɔ kɛ nɔ ni amɛsumɔɔɔ mli lɛ, abaayoo amɛ akɛ nakai gbɔmɛi memeji ni sɔmɔɔ amɛ pɛ amɛhe lɛ nɔŋŋ. Eyɛ mli akɛ ekolɛ nɔ ko ni ekaaa ni átsu yɛ je lɛŋ, aloo ekolɛ yɛ he ní atuu aha je lɛŋ nitsumɔ ko hewɔ lɛ, abaajie gbɔmɛi ni amɛtuu amɛhe amɛha je nɛɛ yi kɛyashɛ ŋwɛi shɔŋŋ, ni abaakɛɛ akɛ amɛsa mɛi ni akɛ ŋwɛi woo kɛ anunyam haa amɛ moŋ, shi yɛ tɛi ni Biblia lɛ efolɔ eshwie shi lɛ naa lɛ, anyɛŋ abu amɛ akɛ mɛi ni sa akɛ amɛnaa gbɛhe yɛ Yehowa Nyɔŋmɔ ŋwɛi Maŋtsɛyeli lɛ mli ni amɛkɛ Kristo aye maŋtsɛ.
17. Nyɔŋmɔ Maŋtsɛyeli lɛ biɔ mɛni yɛ mɛi ni taoɔ no klɛŋklɛŋ lɛ agbɛfaŋ ni mɛni ji nɔ ni yeɔ buaa amɛ yɛ enɛ mli?
17 Nyɔŋmɔ Maŋtsɛyeli lɛ kɛ je nɛɛ kɛ mɛi ni amɛtuu amɛhe amɛha lɛ lɛ bɛ naanyobɔɔ ko. Akɛni je ni yɔɔ Satan shishi lɛ nyɛɛɛ abua eshishibii anaa ni efee amɛ ekome hewɔ lɛ, Nyɔŋmɔ Maŋtsɛyeli ni yɔɔ Kristo shishi lɛ biɔ nifeemɔ yɛ ekomefeemɔ mli kɛ sɔɔmɔ yɛ Kristofoi ni amɛjɔɔ amɛhe nɔ ni abaptisi amɛ ni taoɔ no klɛŋklɛŋ lɛ agbɛfaŋ Nyɔŋmɔ suɔmɔ ji nɔ ni kɛ nɛkɛ Maŋtsɛyeli nɛɛ ba. Nakai ŋwɛi nɔyeli lɛ mumɔ diɛŋtsɛ ji suɔmɔ, nɔ ni fe fɛɛ lɛ suɔmɔ kɛha Nyɔŋmɔ kɛ nyɛ̃ɛ kɛha ehenyɛlɔ kpeteŋkpele, Satan, kɛ ejeŋ ni lɛ ji “nyɔŋmɔ” lɛ. Yɛ naagbai ni Satan ebɔ mɔdɛŋ ni ekɛfite nii lɛ fɛɛ sɛɛ lɛ, suɔmɔ nɛɛ ni jɛɔ Yehowa Nyɔŋmɔ, ŋwɛi Tsɛ lɛ ŋɔɔ lɛ yaa nɔ etsuɔ nii akɛ “ekomefeemɔ kpaa ni yeɔ emuu” kɛhaa mɛi fɛɛ ni kɛ amɛhe kpɛtɛɔ eshikpɔŋ nɔ gbɛjianɔtoo ni anaa lɛ he lɛ, hɛɛ, kɛha Nyɔŋmɔ weku ni yɔɔ ŋwɛi kɛ shikpɔŋ nɔ lɛ.a
[Shishigbɛ niŋmai]
a Ajie kɛjɛ December 15, 1982 Blɔfo Buu-Mɔɔ lɛ mli.
Ani Okaiɔ?
□ Anɔkwale Kristofoi efee ekome yɛ mɛɛ gbɛ nɔ, ni yɛ mɛɛ gbɛ nɔ esoro Kristendom yɛ enɛ mli?
□ Satan miibɔ mɔdɛŋ ni efite wɔ Kristofoia ekomefeemɔ lɛ yɛ mɛɛ gbɛ nɔ?
□ Te wɔɔfee tɛŋŋ ‘wɔwo suɔmɔ’ yɛ je lɛ nyɛ̃ɛ lɛ fɛɛ sɛɛ?
□ Te suɔmɔ aaafee tɛŋŋ afimɔ wɔ afee wɔ ekome fe nibii ni fimɔɔ je lɛ?
[Mfoniri ni yɔɔ baafa 10]
Kristofoi ji nyɛmifeemɔ ko ni suɔmɔ yɔɔ mli ni Yesu Kristo ji nyɛmi nukpa lɛ fa.