Okpɔŋɔ Diŋ Ni Kɛ Hɔmɔ Baa Lɛ

“NI MIKWƐ, ni naa, okpɔŋɔ diŋ; ni mɔ ni ta enɔ lɛ hiɛ nsɛni yɛ edɛŋ. Ni minu gbee ko yɛ hiɛkalɔi ejwɛ lɛ ateŋ miikɛɛ: Ŋmaa susumɔ nɔ̃ kome denario, ni abele susumɔ nii etɛ denario; ni mu kɛ wein lɛ, kaata he!”​—Kpojiemɔ 6:​5, 6.

Wiemɔi ni yɔɔ gbeyei nɛɛ bɔfo Yohane kɛtsɔɔ Kpojiemɔ okpɔŋɔi anɔtralɔi ejwɛ lɛ ateŋ mɔ ni ji etɛ, mɔ ni ta okpɔŋɔ diŋ ni kɛ hɔmɔ baa lɛ nɔ lɛ mli.a Ani ósusu be mli ni okpɔŋɔ nɔ tamɔ ni yɔɔ gbeyei nɛɛ aaaba lɛ he? Kulɛ esa akɛ ofee nakai. Etswaa tsakemɔ kpele ni fe fɛɛ ni je lɛ aaana lɛ he adafi.

Mɛi komɛi nuɔ he akɛ okpɔŋɔ nɔ talɔ nɛɛ eta okpɔŋɔ nɔ kɛbɔle adesai ateŋ yɛ be fɛɛ mli. Eji anɔkwale akɛ yinɔsane eyi obɔ kɛ hɔmɔ ni ba kɛjɛ Abraham kɛ Yosef gbii lɛ amli aahu kɛbashi hɔmɔ kpeteŋkpele ni fe fɛɛ yɛ yinɔsane mli, ni ji nɔ ni ba yɛ China yɛ afi 1878 kɛ 1879 mli lɛ he sane. (1 Mose 12:​10; 41:54) Kɛ abu naa lɛ, Chinabii ni gboi yɛ nakai hɔmɔ lɛ mli lɛ ayibɔ aaafee kɛjɛ akpekpei 9 kɛyashi 13.

Shi okpɔŋɔ diŋ Iɛ kɛ enɔtalɔ lɛ kɔɔɔ hɔmɔ fɛɛ hɔmɔ ni eba yɛ yinɔsane mli lɛ he. Mɛni hewɔ jeee nakai eji lɛ? Ejaakɛ Yohane na okpɔŋɔ tsuru ko ni kɛ ta baa ni nyiɛ okpɔŋɔ diŋ lɛ hiɛ kɛ agbɛnɛ okpɔŋɔ nɔtalɔ ko ni bu akekre ni ta okpɔŋɔ yɛŋ nɔ. Okpɔŋɔ nɔtalɔ nɛɛ ji Yesu Kristo, ni miije kpo, “eeye kunim koni egbe ekunimyeli lɛ naa” lɛ. (Kpojiemɔ 6:​1, 2, NW) No hewɔ lɛ okpɔŋɔ diŋ ni efa kɛyaa lɛ kɛ enɔtalɔ lɛ feɔ hɔmɔ ni ba shikpɔŋ nɔ yɛ be mli ni ahala Yesu akɛ Nyɔŋmɔ Maŋtsɛyeli lɛ nɔ Maŋtsɛ lɛ he mfoniri.

Okpɔŋɔ nɔtaralɔi ahe ninaa ni yɔɔ Kpojiemɔ lɛ tamɔ gbalɛ ko ni Yesu diɛŋtsɛ kɛha lɛ pɛpɛɛpɛ. Be ko lɛ etsɔɔ nibii pii ni baaba shikpɔŋ nɔ ni baakadi beni eba ni anaaa lɛ ni eyɔɔ ŋwɛi akɛ Maŋtsɛ lɛ. Nakai gbalɛ lɛ fa ko kɛɛ akɛ: “Shi maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔji kɛ tsɛŋemɔ helai kɛ shikpɔŋhosomɔi aaaba hei sɔrɔtoi fɛɛ.”​—Mateo 24:​3, 7.

Mɛɛ be okadi nɛɛ ba mli? Mɛɛ be, titri, okpɔŋɔ nɔtalɔ ni kɛ hɔmɔ baa nɛɛ fa kɛtsɔ shikpɔŋ lɛ nɔ? Yehowa Odasefoi kɛ afii pii eha ale akɛ yinɔ ni na afi 1914 lɛ ji yinɔ ni na nɔ ni ejɛ ho ni okpɔŋɔ nɔtalɔ lɛ baho lɛ mli eba lɛ. Ani amɛshishinumɔ lɛ ja?

Mɛi komɛi baakɛɛ akɛ, ‘Ooh dabi, ejaakɛ shikpɔŋ lɛ miiba niyenii pii fe bɔ ni efee yɛ be ni eho lɛ mli, shidaa aha ŋmɛnɛŋmɛnɛ beaŋ okwaayeli he nitsumɔ. Najiaŋdamɔlɔ ni kɛ Jeŋmaji Ekomefeemɔ lɛ tsuɔ nii FAO (Niyenii kɛ Okwaayeli Gbɛjianɔtoo) lɛ miibɔ mɔdɛŋ ni akwɛ ni mɔ fɛɛ mɔ ana niyenii ni sa aye. Nɔ ni fata he lɛ, shishilɛ kpakpa etee hiɛ yɛ hei pii. Maji tamɔ England, ni tsutsu lɛ hɔmɔ yeɔ amɛ lɛ leee nɔ ni ji hɔmɔ dɔŋŋ bianɛ. Maji babaoo yɛ ni ŋmɛnɛ amɛshihilɛ etee hiɛ fe be fɛɛ yɛ yinɔsane mli. Te wɔɔfee tɛŋŋ wɔkɛɛ akɛ nɛkɛ yinɔ nɛɛ ji yinɔ ni baana amanehulu yɛ nɔ ni jɛ fa ni okpɔŋɔ diŋ lɛ fa lɛ mli ba lɛ hewɔ fe yinɔi krokomɛi fɛɛ lɛ?

Sanebimɔ ko ni yɔɔ miishɛɛ nɛ. Eji anɔkwale akɛ adesai etsɔ hɔmɔ mli yɛ yinɔsane be fɛɛ mli. Bɔfo Yohane kɛ Yesu diɛŋtsɛ fɛɛ le enɛ jogbaŋŋ. Shi kɛlɛ, amɛgba be ni hɔmɔ baaba shikpɔŋ nɔ yɛ gbɛ ni eko bako nakai da lɛ nɔ. Mɛɛ gbɛ nɔ aaatsɔ akadi hɔmɔ nɛɛ jogbaŋŋ? Ni yɛ helooŋ gbɛfaŋ nibii ni ŋmɛnɛŋmɛnɛ je lɛ yɔɔ no babaoo hewɔ lɛ, ani nɔ ko yɛ ni aaanyɛ adamɔ nɔ ahe aye akɛ hɔmɔ miiye gbɔmɛi ni yɔɔ wala mli bianɛ lɛ?

[Shishigbɛ niŋmai]