Na Miishɛɛ Ni Ŋmɛɔ Pɛ Yɛ Yookpeemɔ Okpɔlɔŋmɛɛi Ashishi
1, 2. (a) Mɛni hewɔ esa akɛ wɔsusu yookpeemɔ okpɔlɔŋmɛɛ he jogbaŋŋ ŋmɛnɛ Iɛ? (b) Te okpɔlɔŋmɛɛi nɛɛ ahe hiamɔ lɛ yɔɔ tɛŋŋ?
1 EKOLƐ ona odaseyelii babaoo ni tsɔɔ bɔ ni gbalɛ ni kɛɔ akɛ “yɛ naagbee gbii lɛ anɔ lɛ” gbɔmɛi baasumɔ “shwɛmɔ kɛ ŋɔɔmɔ fe Nyɔŋmɔ” lɛ akɛ eji anɔkwale. (2 Timoteo 3:14) Anaa enɛ he odaseyeli lɛ oya yɛ gbɛ ni mɛi pii susuɔ yookpeemɔ okpɔlɔŋmɛɛ he kɛ nɔ ni amɛfeɔ yɛ he lɛ mli.a Te esa akɛ wɔsusu enɛɛmɛi ahe wɔha tɛŋŋ? Ani esa akɛ Kristofoi akwa okpɔlɔŋmɛɛ aloo yookpeemɔi ashishi ni amɛaaya? Aloo sane lɛ ji akɛ ni ‘wɔɔsumɔ Nyɔŋmɔ’ lɛ biɔ ni wɔkpoo osharai komɛi?
2 Yɛ bɔ ni eji nɔ ni afɔɔ feemɔ yɛ akutsoŋ ni oyɔɔ lɛ akɛ yɛ yookpeemɔ lɛ sɛɛ nɔŋŋ lɛ akpe ni ajie hiɛtserɛ lɛ fɛɛ sɛɛ lɛ, Ŋmalɛ naa gbɛnaa nii ko kaaa Kristofoi anɔ akɛ amɛfee nakai. Nɔ ni mɛikomɛi feɔ ji ni amɛbua amɛwekumɛi loo nanemɛi ni bɛŋkɛ amɛ lɛ ateŋ mɛi fioo ko naa ni akɛ amɛ aye nii yɛ shia. Ni anyɛŋ ni atsɔɔ akɛ yookpeemɔ okpɔlɔŋmɛɛ shishi ni mɔ ko aaaya lɛ hu tsɔɔ akɛ mɔ lɛ sumɔɔ “shwɛmɔ kɛ ŋɔɔmɔ,” ejaakɛ Yesu kɛ ekaselɔi lɛ hu tee nifeemɔ ni tamɔ nɛkɛ shishi yɛ Kana.
3. Ani afɔɔ okpɔlɔŋmɛɛ yɛ yookpeemɔi ashishi yɛ Biblia bei amli?
3 Yookpeemɔ ji mlifilimɔ be kɛha mɛi heei ni ekpee amɛhe lɛ, amɛwekumɛi kɛ nanemɛi. Yookpeemɔ okpɔlɔŋmɛɛ jeee nɔ ni efɔɔɔ kaa kɛjɛ blema. (1 Mose 29:21, 22; Kojolɔi 14:3, 10, 17) Akɛni Yudafoi lɛ le yookpeemɔ okpɔlɔŋmɛɛ jogbaŋŋ hewɔ lɛ, Yesu baanyɛ ni ekɛtsu nii yɛ nɔkwɛmɔ nii sɔrɔtoi etɛ mli. (Mateo 22:2-14; 25:1-13; Luka 14:7-11) Biblia mli naagbee wolo lɛ po kɛɔ akɛ: “Miishɛɛ ji mɛi ni atsɛ amɛ kɛba Toobi lɛ yookpeemɔ gbɛkɛnaashi niyenii lɛ he lɛ.”—Kpojiemɔ 19:9.
4. Te tsutsu okpɔlɔŋmɛɛi lɛ pii yɔɔ ha tɛŋŋ?
4 Nyɔŋmɔ tsuji ni hi shi yɛ blema—ni Yesu kɛ ekaselɔi lɛ fata he—ná yookpeemɔ okpɔlɔŋmɛɛ ko shishi ni amɛtee lɛ mli ŋɔɔmɔ ni ŋmɛɔ pɛpɛɛpɛ. Kristofoi akpei abɔ ni yɔɔ wɔbe nɛɛ mli hu lɛ efee nakai nɔŋŋ. Wekunyo ko ni heee yeee ni tee eko shishi yɛ South Afrika lɛ kɛɛ akɛ: “Mileee akɛ Odasefoi lɛ yɛ yookpeemɔi ahe gbɛjianɔtoo ni yɔɔ fɛo nɛkɛ. Daatɔɔ kɛ lalai ni naa wa ni yaa nɔ gbii etɛ nɛɛ yɛ yookpeemɔi ashishi lɛ etɔ wɔ agbɛnɛ.” Kristofoi okpɔlɔŋmɛɛi babaoo hu yɛ ni baaná yijiemɔ ni tamɔ nɛkɛ.
5. Mɛɛ naagbai nɛkɛ ete shi?
5 Shi nɔnyɛɛ ni jɛ je lɛ mli ni wɔfee “mɛi ni sumɔɔ shwɛmɔ kɛ ŋɔɔmɔ” lɛ mli wa. No hewɔ lɛ Kristofoi onukpai komɛi bɔ amaniɛ akɛ:
“Amɛteŋ mɛi pii ŋɔɔ hegbɛ [ni yookpeemɔ okpɔlɔŋmɛɛ] kɛhaa lɛ ni amɛkɛfee nɔ ni amɛsumɔɔ. Amɛkɛɔ akɛ hegbɛi ni tamɔ nɛkɛ baaa pii, no hewɔ lɛ amɛmiisumɔ ni amɛŋɔ hegbɛ lɛ ni amɛkɛjie amɛhiɛtserɛ fioo, ni amɛkɛŋmɛɛ amɛ akɔnɔi ni amɛtsĩ naa yɛ be ni eho lɛ mli lɛ ahe fioo. Ebɛ naakpɛɛ akɛ shihilɛ lɛ bafeɔ basabasa.”—Europa.
“Etamɔ nɔ ni gbalashihilɛ mlibote he nifeemɔ kɔɔ wiemɔ, aye ni anu, ni agbɛnɛ ajo aahu kɛyashi lebi ŋmlɛtswaai lɛ amli. Mɛi komɛi nuɔ he akɛ amɛbaanyɛ amɛnu dãa babaoo fe bɔ ni sa yɛ hiɛtserɛjiemɔi ashishi, yɛ be babaoo mli lɛ amɛnuɔ pii tsɔ.”—Latin Amerika.
“Nɔ ni baanyɛ afata yookpeemɔ okpɔlɔŋmɛɛ he ji ‘jooi ni yaa nɔ kɛyashiɔ Iebi.’ Nifeemɔi nɛɛ ekomɛi ji je lɛŋ nifeemɔi diɛntsɛ—eyɛ hoo, kɛ ninumɔ babaoo kɛ je lɛŋ jooi. Mɛi komɛi bɔɔ mɔdɛŋ ni amɛjie nɔ ni amɛyɔɔ lɛ kpo amɛtsɔɔ kɛtsɔ hesaamɔ loo atadei ni jara wawai awoo nɔ, kɛ agbɛnɛ beer pii ni aaanu nɔ.”—Afrika.
Hiɛshikamɔ He Miihia
6. Mɛni wɔbaanyɛ wɔkase yɛ Yudafoia okpɔlɔŋmɛɛi ahe yɛ nɔ ni awie yɛ Kana lɛ hewɔ?
6 Mɛi pii le akɛ Yesu ha nu tsɔ wein yɛ Kana okpɔlɔŋmɛɛ lɛ shishi. Shi kaimɔ nɛkɛ sane oti nɛɛ: “Shi beni piafonyo lɛ sa enaa nu ni etsɔ wein lɛ, . . . piafonyo lɛ tsɛ ayemforowu Iɛ ni ekɛɛ lɛ akɛ: Mɔ fɛɛ mɔ lɛ wein kpakpa ekɛbamaa shi klɛŋklɛŋ, ni beni mɛi lɛ etɔrɔ lɛ, no dani amɛkɛ nɔ ni eŋɔɔɔ lɛ baa.” (Yohane 2:9, 10) Ekɛɛɛ akɛ yɛ nɛkɛ okpɔlɔŋmɛɛ nɛɛ diɛŋtsɛ shishi lɛ gbɔmɛi “tɔrɔ daa.”b Yɛ anɔkwale mli lɛ anyɛŋ akɛɛ akɛ Yesu baakpɛlɛ daatɔɔ nɔ ni ekɛ wein babaoo hu afata he. Shi kɛlɛ, nɛkɛ nuu nɛɛ le akɛ daa ni anuɔ kɛtekeɔ nɔ ji nɔ ni yaa nɔ yɛ Yudafoia yookpeemɔi ashishi.
7. Mɛni esa akɛ Kristofonyo asusu he yɛ dãa ni wa ni aaanu hewɔ?
7 Mɛi ni ŋmɛɔ okpɔlɔ lɛ ateŋ mɛi komɛi kɛ daa ni wa tsuuu nii kwraa yɛ daa ni anuɔ pii tsɔ yɛ he ni amɛyɔɔ lɛ hewɔ, koni ekaka gbɔi ni amɛba jɛmɛ ni sumɔɔ daa, lɛ eko. Afrika nyɛmimɛi komɛi po ekɛɛ akɛ daa ni wa ni akɛtsuuu nii lɛ po haa “Kristofoia yookpeemɔ feɔ krɔŋŋ.” Ni eji anɔkwale akɛ daa ni wa ni anuŋ lɛ baafee nɔ ni sa yɛ akutsoŋ he ni amɛteɔ shi amɛwoɔ Kristofoi ni nuɔ daa ni wa yɛ lɛ. (Romabii 14:20, 21) Shi kɛlɛ ni aaaŋmɛ pɛpɛɛpɛ yɛ enɛ he lɛ he miihia. Bi ohe akɛ, Ani okpɔlɔŋmɛɛ ni Yesu tee shishi lɛ ‘bɛ krɔŋŋ’ yɛ wein ni anu lɛ hewɔ? Biblia lɛ wieɔ eshiɔ daatɔɔ shi jeee hiɛshikamɔ ni akɛnuɔ daa ni wa.—Abɛi 23:20, 21; 1 Petro 4:3.
8, 9. (a) Kɛ akɛ dãa ni wa miiha lɛ, te esa ákɛ akɛ hiɛshikamɔ atsu nii aha tɛŋŋ? (lɔ) Mɛni onukpa ko kɛɛ yɛ naagba nɛɛ he?
8 Kɛji akɛ gbalashihilɛ mli hefatalɔi miisumɔ ni amɛkɛ daa ni wa atsu nii yɛ yookpeemɔ shishi lɛ, ebaafee nilee kɛ nii ahesusumɔ yɛ amɛgbɛfaŋ akɛ amɛaajwɛŋ hiɛshikamɔ kɛ nifeemɔ he. (1 Timoteo 3:2; Mateo 23:25) Akɛ nɔkwɛmɔ nɔ lɛ, yɛ Kana yookpeemɔ lɛ shishi lɛ, mɛni akɛha gbɔi ni ba jɛmɛ lɛ? Ni ji akɛ kɛtsɔ “tsuji” lɛ anɔ? (Yohane 2:5, 9) No hewɔ lɛ gbalashihilɛ mli hefatalɔi lɛ baahala mɛi komɛi ni amɛkɛ daa aha mɛi (ni afo abɔ ni amɛkɛaaha lɛ he husu) . Esa akɛ daa ni waaa aloo nɔ ni yɔɔ dɔkɔdɔkɔ ahi Kristofoi ahiɛtserɛjiemɔi ashishi koni mɛi ni sumɔɔ no lɛ nine ashɛ nɔ.
9 Onukpa ko ni yɔɔ Central Amerika wie akɛ: “Naagba lɛ ji akɛ okpɔlɔŋmɛɛ lɛ da tsɔ, no hewɔ lɛ gbɛ ko bɛ ni aaatsɔ nɔ aye mɛi ni baa shishi lɛ fɛɛ nɔ. Yɛ bei komɛi amli lɛ, je lɛŋ bii komɛi ni baa okpɔlɔŋmɛɛ lɛ shishi lɛ fiteɔ lɛ, amɛkɛ daa ni wa baa jɛmɛ ni amɛhaa jɛmɛ feɔ hoo.” No hewɔ lɛ namɔ baakudɔ amɛ aloo ekwɛ amɛ? Mɛi enyiɛ baaba? Mɛni baaba okpɔlɔŋmɛɛ ni tamɔ nɛkɛ shishi?
Namɔ Baakudɔ Amɛ Aloo Ekwɛ Amɛnɔ?
10. Mɛɛ Biblia mli nɔkwɛmɔ nɔ sɛɛnyiɛmɔ baaha anyɛ akwɛ okpɔlɔŋmɛɛ lɛ nɔ jogbaŋŋ?
10 “Piafonyo” ko yɛ Kana okpɔlɔŋmɛɛ lɛ shishi ni lɛ ekwɛɔ nibii anɔ. (Yohane 2:9) Nakai nɔŋŋ hu abaanyɛ ahala nyɛminuu ko ni yɔɔ nyɛmɔ ni akɛ hegbɛ awo edɛŋ ni ekwɛ nibii lɛ fɛɛ nɔ. Akɛni ele nɔ ni mɛi ni amɛkpee amɛhe ehee nɛɛ sumɔɔ hewɔ lɛ, ebaanyɛ ekɛ gbɛtsɔɔmɔ aha lalatsɛmɛi, mɛi ni sɔmɔɔ mɛi kɛ mɛi krokomɛi, aloo ebaanyɛ ekɛ mɛi ni amɛbote gbalashihilɛ mli lɛ agba sane ni etsu amɛsuɔmɔnaa nii ahe nii. No tsɔɔ hu akɛ abaakwɛ mɛi ni sɔmɔɔ yɛ jɛmɛ lɛ fɛɛ hu nɔ. Amɛ fɛɛ amɛbaanyɛ amɛfee ekome ni amɛye amɛbua gbɔi ni eba jɛmɛ lɛ, ni ‘amɛku mɛi ni baafite okpɔlɔŋmɛɛ lɛ anaa.’ Yɛ be mli ni awieɔ sane ni kɔɔ nibii anɔkwɛmɔ he nɛɛ, kadimɔ nɔ ni ba gbɔ ko ni ejieee bulɛ kpo etsɔɔɔ yɛ yookpeemɔ okpɔlɔŋmɛɛ ko shishi lɛ nɔ yɛ Yesu abɛbua lɛ mli lɛ.—Mateo 22:11-13.
11. Mɛni esa akɛ asusu he beni ahalaa mɔ ko ni eye ebua mɛi ni boteɔ gbalashihilɛ mli lɛ ni amɛkwɛ nibii anɔ lɛ?
11 Yɛ je lɛŋ okpɔlɔŋmɛɛi pii ashishi lɛ, asa lɛ nɔkwɛlɔ lɛ loo jooi ashwɛlɔi lɛ ahiɛnyiɛlɔ lɛ ji mɔ ni feɔ nifeemɔ lɛ nɔkwɛlɔ. Ekolɛ ele gbɛjianɔtoo lɛ ni eyɛ wiemɔi komɛi ni ekase aloo sasansɔ wiemɔi komɛi ni ebaaha anu. Shi kɛji akɛ oosumɔ okpɔlɔŋmɛɛ ni kɛ Kristofoi ashishitoo mlai kpaa gbee lɛ, ani obaasumɔ ni ohala jeŋnyo ko—ni ejeee omumɔŋ nyɛmi ni asaŋ ejeee owekunyo—ni ebawie etsɔɔ gbɔi lɛ aloo efee mɔ ni abaagbala jwɛŋmɔ kɛba enɔ? Ani enɛ kɛ ŋaawoo akɛ “wɔfea mɛi fɛɛ ejurɔ, shi titri lɛ, mɛi ni ji hemɔkɛyeli lɛ webii lɛ” aaakpa gbee?—Galatabii 6:10.
12. Mɛni yɔɔ Biblia lɛ mli ni tsɔɔ mɔ ni nɔ ni yaa nɔ yɛ okpɔlɔŋmɛɛ lɛ shishi lɛ he gbɛnaa nii ka enɔ?
12 Yɛ bei komɛi amli lɛ ayemforo lɛ loo ewu lɛ fɔlɔi yeɔ buaa mɛi ni boteɔ gbalashihilɛ mli lɛ ni amɛwoɔ yookpeemɔ okpɔlɔŋmɛɛ lɛ he nyɔmɔ lɛ. Ekolɛ fɔlɔi lɛ baanu he akɛ belɛ amɛyɛ hegbɛ akɛ amɛfɔɔ nine amɛtsɛɔ mɔ ni amɛsumɔɔ, nɔ niyenii kɛ dãa ni abaanu aloo bɔ ni esa akɛ ato gbɛjianɔ lɛ. Biblia lɛ etsɔɔɔ wɔ mɔ ni wo Kana okpɔlɔŋmɛɛ lɛ he nyɔmɔ lɛ, shi ekɛɔ wɔ akɛ beni sane ko ni he hiaa te shi lɛ, “piafonyo lɛ tsɛ ayemforowu lɛ.” (Yohane 2:9) Ayemforowu lɛ ji mɔ ni yɛ Ŋmalɛ lɛ naa lɛ ebafeɔ weku hee ni ato lɛ yitso yɛ okpɔlɔŋmɛɛ lɛ shishi. (Efesobii 5:22, 23) No hewɔ lɛ, yɛ be mli ni esa akɛ ekɛ suɔmɔ asusu eyemforo lɛ kɛ amɛwekui lɛ asuɔmɔ naa nii ahe yɛ gbi krɛdɛɛ nɛɛ nɔ lɛ, ehe miihia ni titri lɛ etere nɔ fɛɛ nɔ ni baaba kɛ nɔ ni baŋ lɛ he sɔ̃ loo gbɛnaa nii yɛ nɛkɛ be nɛɛ mli.
Namɛi Baaba Jɛmɛ?
13. Te yookpeemɔ okpɔlɔŋmɛɛ lɛ adaramɔ yɔɔ tɛŋŋ yɛ Biblia bei amli?
13 Wɔleee bɔ ni Biblia bei amli yookpeemɔ okpɔlɔŋmɛɛ adaramɔ ji ha. Samson kɛ efɔlɔi, eyemforo lɛ nanemɛi 30 kɛ agbɛnɛ ekolɛ nanemɛi kɛ wekumɛi krokomɛi fata he. (Kojolɔi 14:5, 10, 11, 18) Gbɔi ni baa Yudafoi ayookpeemɔi ashishi lɛ ji nanemɛi jalɔi ni jɛ maŋ lɛ mli kɛ gbɔi diɛŋtsɛ hu. Yesu kɛ ekaselɔi ni jɛ he kroko yɛ Galilea lɛ tee Kana okpɔlɔŋmɛɛ lɛ shishi. Dãa ni akɛba jɛmɛ lɛ tsɔɔ kuu lɛ dalɛ.—Yohane 2:1, 2, 6.
14, 15. Mɛi komɛi eto gbɛjianɔ koni aŋmɛ okpɔlɔ lɛ yɛ “shia ko kpo teŋ” yɛ mɛɛ gbɛ nɔ, shi mɛɛ naagbai baanyɛ ate shi?
14 Ŋmɛnɛ, kusum nifeemɔi kɛ bɔ ni asumɔɔ ni okpɔlɔŋmɛɛ lɛ dalɛ afee lɛ yɛ sɔrɔto. Yɛ hei komɛi lɛ nɔ ni afɔɔ feemɔ ji ni afee yɛ shia ko mli; ni afɔɔ nine atsɛɔ Kristofoi fɛɛ ni ji mɛi ni amɛboteɔ gbalashihilɛ mli lɛ ananemɛi. Akɛ daaŋjiemɔ nibii shɛjeɔ amɛ mii, ni yiŋtoo lɛ jeee ni aha mɔ fɛɛ mɔ ana nɔ ni etao, shi moŋ ni akpã miishɛɛ kɛ naanyobɔɔ ninejurɔ mli aha amɛ. Yɛ hei krokomɛi hu ni nanemɛi fɛɛ baa jɛmɛ lɛ, mɛi pii kɛ niyenii ko baa jɛmɛ—nɔ ko ni áje gbɛ ahoo, dãa ko loo daaŋjiemɔ nii ko. Mɛi fɛɛ ni jɛɔ amɛsuɔmɔ mli amɛbaa jɛmɛ lɛ hu yeɔ buaa. Mɔ fɛɛ mɔ naa nɔ ko eyeɔ ni efeee jatsu ko efɔɔɔ mɛi ni boteɔ gbalashihilɛ mli lɛ loo mɔ kroko nɔ.—Bɔfoi lɛ Asaji 20:35.
15 Yɛ nɔ ni wɔkane kɛjɛ Yesu abɛbuai lɛ amli lɛ hewɔ Iɛ, etamɔ nɔ ni akɛ niyenii pii baa Yudafoia yookpeemɔi ashishi. (Mateo 22:2; Luka 14:8) Shi niyenii diɛŋtsɛ ni tɔɔ mɔ ni akɛaaha gbɔi ni aaaba okpɔlɔŋmɛɛ shishi ŋmɛnɛ lɛ biɔ gbɛjianɔtoo kpakpa. Nyɛ̃ ko ni jɛ North Amerika gba niiashikpamɔ ni yɔɔ mɔbɔ nɛɛ:
‘Beni mɛi nu he akɛ yookpeemɔ ko miiya nɔ lɛ, obalaŋtai ni jɛ hei pii babua amɛhe naa koni amɛbaye nii yaka ni amɛjo. Yɛ be mli ni mɛi ni afɔ nine atsɛ amɛ lɛ yɔɔ Maŋtsɛyeli Asa lɛ nɔ lɛ, obalaŋtai nɛɛ ateŋ mɛi komɛi yatara sɛii anɔ yɛ okpɔlɔ ni aŋmɛ lɛ sɛɛ yɛ asa lɛ nɔ. Beni mishɛ jɛmɛ lɛ shwɛ sharao kulɛ mifo, ejaakɛ gbɛ ko kwraa bɛ tsu lɛ mli. Edɔ mi waa diɛŋtsɛ yɛ suɔmɔ ni mɛi ni atsɛko amɛ nɛɛ ejieee lɛ kpo, ni amɛbaye niyenii ni mɔ ni ŋmɛ okpɔlɔ lɛ esaa kɛha enanemɛi kɛ ewekumɛi ni bɛŋkɛ amɛ kpaakpa lɛ hewɔ.’
16. Mɛni wɔbaanyɛ wɔkase kɛjɛ Biblia lɛ mli yɛ mɛi ni akpeeɔ amɛ kɛbaa yookpeemɔ lɛ shishi lɛ ahe?
16 Maria, Yesu kɛ ekaselɔi lɛ eyaaa Kana yookpeemɔ lɛ shishi yɛ be mli ni atsɛko amɛ; afɔ nine ‘atsɛ amɛ.’ (Yohane 2:1, 2) Yesu kɛɛ akɛ, “Kɛ mɔ ko bakpee bo kɛtee yokpeemɔ okpɔlɔ he lɛ . . . ” (Luka 14:8, 9, 16, 17) Yesu “wie mɛi ni akpee” lɛ ahe yɛ Yesu abɛbua ni kɔɔ maŋtsɛ lɛ ni ŋmɛ okpɔlɔ eha ebinuu lɛ he lɛ mli. (Mateo 22:3, 9, 10) Agbɛnɛ hu, kɛ nuu ko ni akpee lɛ kɛba okpɔlɔŋmɛɛ lɛ shishi lɛ ejieee bulɛ kpo etsɔɔɔ lɛ, afãa mɛi ni kwɛɔ nibii anɔ lɛ ni amɛshwie lɛ. Yɛ abɛbua kroko mli lɛ, atsi obalayei enumɔ ni miisumɔ ni amɛna yookpeemɔ okpɔlɔŋmɛɛ lɛ mli gbɛfaŋnɔ lɛ gbɛ koni amɛkababote shinaa lɛ mli. (Mateo 22:11-13; 26:10-12) No hewɔ lɛ, esaaa akɛ efeɔ naakpɛɛ kɛ́ afo okpɔlɔŋmɛɛ he husu aha mɛi ni aje gbɛ atsɛ amɛ lɛ pɛ lɛ. Esa akɛ mɛi ni tamɔ nakai lɛ asaa amɛhe jogbaŋŋ. Ni anuɔ shishi akɛ jeee mɔ ni ŋmɛɔ okpɔlɔ lɛ gbɛnaa nii ji ni eha mɛi ni baa jɛmɛ, titri lɛ kɛha niyeli kɛ miishɛɛnamɔ lɛ, atɔrɔ kɛ nibii ni amɛtaoɔ.—Filipibii 3:18, 19; Jajelɔ 5:11.
17. Mɛɛ naagba ete shi yɛ yookpeemɔ okpɔlɔŋmɛɛ lɛ dalɛ he?
17 Kɛji akɛ gbalashihilɛ mli hefatalɔi lɛ kɛ amɛwekumɛi miisumɔ ni amɛhoo niyenii diɛŋtsɛ amɛha gbɔi pii lɛ, enɛ baaha amɛfite shika babaoo diɛŋtsɛ. (Okɛto Marko 6:35-37 he.) Amaniɛbɔɔ nɛɛ jɛ Pasifik:
“Su ni yɔɔ ji ni aŋmɛ okpɔlɔ ni afee nii kɛteke nɔ yɛ shishi. Mɛi komɛi bɔɔ nyɔmɔ yɛ okpɔlɔŋmɛɛ wuji nɛɛ ahewɔ, ni enɛ haa amɛjeɔ gbalashihilɛ shishi kɛ nyɔmɔ. Yɛ be babaoo mli lɛ amɛsumɔɔɔ ni amɛhiɛ agboi, no hewɔ lɛ amɛŋmɛɔ okpɔlɔ ni da fe bɔ ni amɛaanyɛ.”
Eyɛ mɔbɔ akɛ aaabote gbalashihilɛ mli ehee kɛ nyɔmɔ ni etsɔ jatsu ni abaatere ni baanyɛ afite amɛ wekukpaa lɛ. Aloo te amɛaanu he amɛha tɛŋŋ, yɛ be mli ni amɛaanu akɛ amɛfɔlɔi ebɔ nyɔmɔ yɛ okpɔlɔŋmɛɛ wulu ko ni amɛkɛ amɛhe wo mli lɛ hewɔ? Ekolɛ je lɛŋ bii baatere yookpeemɔ he nyɔmɔ ni da yɛ henɔwomɔ loo bɔ ni amɛsumɔɔ ni amɛsa akutsoŋbii ahiɛ hewɔ. (Abɛi 15:25; Galatabii 6:3) Shi ani esa akɛ enɛ afee anɔkwale yɛ Kristofoi ahe, yɛ nɔ ni wɔkaneɔ yɛ Luka 12:29-31 lɛ hewɔ?
18, 19. (a) Mɛni haa mɛi komɛi toɔ amɛyiŋ akɛ amɛbaaha okpɔlɔŋmɛɛ lɛ adara lɛ? (b) Te esa akɛ wɔfee wɔnii wɔha tɛŋŋ kɛ afɔɔɔ nine atsɛɛɛ wɔ kɛyaa naanyo ko okpɔlɔŋmɛɛ shishi lɛ? (Luka 14:12
18 Yiŋtoo ni yɔɔ okpɔlɔŋmɛɛ wuji lɛ ekomɛi asɛɛ ji suɔmɔ ni ayɔɔ akɛ aaatsɛ eko ni tamɔ mɔ ko nɔ̃ aloo afee fe mɔ lɛ. Onukpai ni yɔɔ Afrika lɛ kɛɛ akɛ:
“Mɛi komɛi bɔɔ nyɔmɔ babaoo yɛ okpɔlɔŋmɛɛ lɛ hewɔ. Mɔ ni fiteɔ shika babaoo yɛ okpɔlɔŋmɛɛ lɛ he lɛ ji mɔ ni toɔ okadi lɛ. Enɛ kɛ naagbai eba mɛi ni bɛ ekãa tsɔ akɛ amɛaafee mɛi ni yɔɔ sɔrɔto lɛ anɔ. Nɛkɛ shihilɛ mli hewoo nɛɛ baanyɛ atɔtɔ mɛi krokomɛi anane, ni ‘mɔdɛŋ ni aaabɔ akɛ aaatamɔ ashimashi’ lɛ he ehiaaa.”—Kwɛmɔ 1 Yohane 2:15-17.
19 Mɛi krokomɛi hu enu he akɛ anyɛ amɛnɔ koni amɛkɛ amɛhe awo okpɔlɔŋmɛɛ ni afiteɔ shika babaoo yɛ he lɛ mli, akɛni amɛmiishe gbeyei akɛ kɛ amɛfeee nakai lɛ eeeha mɛi komɛi amli afu hewɔ. Amɛsusuɔ akɛ kɛ afɔɔɔ nine atsɛɛɛ nanemɛi komɛi lɛ, amɛmli baafu. No hewɔ lɛ afɔɔ nine atsɛɔ mɛi pii fe bɔ ni sa. Yɛ anɔkwale mli lɛ, wɔteŋ namɛi baasumɔ ni wɔnanemɛi ashe gbeyei akɛ amɛaawo wɔ mlifu kɛ amɛtsɛɛɛ wɔ, ni no hewɔ lɛ amɛkɛ amɛhe aaawo nyɔmɔbɔɔ mli yɛ nakai feemɔ mli koni ekolɛ be fɛɛ sɔɔmɔ nitsumɔ lɛ aje amɛdɛŋ? Kɛji akɛ afɔɔɔ nine atsɛɛɛ wɔ lɛ, ‘kwɛ bɔ ni ehi moŋ akɛ wɔɔsusu akɛ ekolɛ amɛŋmɛ nibii jogbaŋŋ amɛkwɛ, kɛ amɛshika hu. Nine ni afɔɔɔ wɔ lɛ po baatsɔɔ akɛ amɛyɛ hekɛnɔfɔɔ yɛ wɔmli akɛ wɔdara ni wɔmli fuŋ yɛ enɛ hewɔ. (Jajelɔ 7:9; 1 Korintobii 13:4-7) Fɛɛ sɛɛ lɛ wɔbaanyɛ ni wɔkɛ wɔhe awo amɛ miishɛɛnamɔ lɛ mli kɛtsɔ yookpeemɔ wiemɔ lɛ ni wɔɔyabo toi nɔ, ejaakɛ enɛ ji nɔ ni he hiaa titri. Kɛji akɛ wɔyabu okpɔlɔŋmɛɛ lɛ akɛ ehe hiaa fe yookpeemɔ wiemɔ lɛ moŋ lɛ, ani enɛ efeŋ akɛ wɔtsɔmɔ “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ”?—2 Timoteo 3:4.
20. Okpɔlɔŋmɛɛ lɛ ni wɔhaŋ eda tsɔ lɛ baaha wɔkwa mɛɛ nifeemɔi?
20 Gbɔmɛi lɛ ayifalɛ kɛ okpɔlɔŋmɛɛ he nyɔmɔbɔɔ lɛ he susumɔ baaye abua wɔ ni wɔkpa nifeemɔi ni esaaa. Akɛ nɔkwɛmɔ nɔ lɛ, shika suɔmɔ etsirɛ mɛi saŋŋ ni amɛhe mamai pɔtɛɛ komɛi ni akɛkpɛɔ yookpeemɔ atadei, kɛkɛ lɛ amɛbi mɛi ni baakpee amɛhe lɛ ni amɛhé atade bo loo mama lɛ kɛjɛ amɛdɛŋ yɛ jara ni wa naa. Yɛ bei komɛi amli lɛ ebiɔ ni gbɔi ni baa okpɔlɔŋmɛɛ lɛ shishi lɛ “ahe” keeki ni ayeɔ lɛ eko aloo “amɛheɔ”, joo ni amɛkɛ ayemforo lɛ aaajo lɛ kɛ shika, ni amɛkɛ kpɛtɛɔ etadei amli. Shika ni amaa nɔ mi nɛɛ nɔŋŋ hewɔ ni gbɔi ni baa jɛmɛ lɛ famɔɔ shika ni “amɛshɛrɛɔ amɛshwieɔ shi” aloo amɛfɔɔ amɛhaa jooshwɛlɔi lɛ loo amɛkɛ nibii wuji keɔ koni amɛná sɛi pɔtɛɛ ko ni bɛŋkɛ he ni mɛi ni amɛkpee amɛhe ehee lɛ tara lɛ.—Luka 14:8-11.
Ye Obua Ni Mɔ Fɛɛ Mɔ Ana Miishɛɛ
21. Mɛni lalai tsuɔ yɛ yookpeemɔ okpɔlɔŋmɛɛi ashishi?
21 Yɛ Makabeabii atai lɛ amli lɛ “mɛi ni tswaa saŋkui sɔrɔtoi kɛ obɛntai” kɛ mɛi ni kpeeɔ amɛhe lɛ kɛ amɛsɛɛ bii kpeɔ. (1 Maccabees 9:39, The Oxford Annotated Bible; okɛto Lala 45:9 he.) Ŋmɛnɛ hu, akɛ lalai fataa yookpeemɔ okpɔlɔŋmɛɛi ahe. Ekɛ nɔ ko fataa miishɛɛ ni Kristofoi naa yɛ be nɛɛ mli lɛ he aloo ebaanyɛ ejie nɔ ko kɛjɛ mli. Mɛni hewɔ sɛɛkpee nɔ̃ nɛɛ baanyɛ aba lɛ? Yɛ be babaoo mli lɛ lalai lɛ anaa waa tsɔ ni anyɛɛɛ aye nɔ. Jooshwɛlɔi Iɛ ateŋ mɛi komɛi sumɔɔ disko lalai, aloo amɛbaayi joo lɛ waa ni henɔyeli bɛ mli aloo ni amɛkɛtsɔɔ bɔ ni amɛhe esa ha. Shi Kristofoi ahiɛtserɛjiemɔi ashishi jeee he ni afeɔ enɛɛmɛi yɛ. Ani gbɔi, gbekɛbii loo onukpai aaanyɛ ana Kristofoi anaanyobɔɔ mli ŋɔɔmɔ kɛji akɛ lala ni atswaa yɛ jɛmɛ lɛ naa wa aahu akɛ mɛi ni tara okpɔlɔ lɛ he lɛ nuuu sane ni amɛgbaa lɛ po lɛ?
22. Te aaafee tɛŋŋ aba naagbai ni lalai kɛbaa lɛ ashi?
22 Eka shi faŋŋ akɛ ehe miihia ni ato gbɛjianɔ jogbaŋŋ ni akwɛ lalai loo jooshwɛlɔi ni baa jɛmɛ lɛ alalai Iɛ nɔ jogbaŋŋ. Ebaahi kɛ atsɛɛɛ jooshwɛlɔi ni ji jeŋ bii kwraa. Kɛji akɛ átsɛ jooshwɛlɔi ni awo amɛ nyɔmɔ lɛ, ayemforowu lɛ loo nyɛmi ni ahala lɛ ni ekwɛ nibii anɔ lɛ baafee lɛ faŋŋ aha jooshwɛlɔi le nɔ̃ lalai ni asumɔɔ kɛ nɔ ni asumɔɔɔ. (2 Mose 32:6, 17, 18) Esa akɛ akɛma shi faŋŋ akɛ gbɔi ni eba jɛmɛ lɛ biŋ lalai ko ni atswa aha amɛ ni ayɛmforowu lɛ loo okpɔlɔŋmɛɛ lɛ “nɔkwɛlɔ” lɛ leee he eko. Yɛ naagbai ni lalai ni atswaa lɛ waa lɛ kɛbaa hewɔ lɛ, mɛi ni boteɔ gbalashihilɛ mli lɛ ateŋ mɛi pii ehala akɛ amɛbaatswa lalai ni akɛwo plɛte loo kpãa nɔ momo ni nɔ ni amɛhala ni atswa aha amɛ lɛ hu yɔɔ nɔ momo lɛ. Mɔ ni amɛhaa ekwɛɔ lalai lɛ anɔ lɛ ji onukpa ni mɔ ko nyɛŋ atsɔ eyiŋ koni etswa lalai ni obalaŋtai ni darako yɛ mumɔŋ lɛ sumɔɔ lɛ eha amɛ.—1 Korintobii 13:11; Hebribii 5:14.
23-25. Mɛɛ nifeemɔi ni sa mɛi ni kpeeɔ amɛhe ehee lɛ baanyɛ atsu he nii koni Kristofoi ahenaabuamɔ lɛ afee nɔ ni ŋɔɔ?
23 Kristofoi ni amɛkpee amɛhe kpaako lɛ baasumɔ ni mɛi ni afɔ nine atsɛ amɛ kɛba amɛ okpɔlɔŋmɛɛ lɛ shishi lɛ akai nɛkɛ be nɛɛ kɛ miishɛɛ. No hewɔ lɛ kɛji akɛ lalai kɛ jooi miiya nɔ lɛ, esa akɛ efee nɔ ni kɛ Kristofoi ashishitoo mlai kpãa gbee. Kɛ ahala mɛi komɛi ni amɛwo ŋaa fioo lɛ, esa akɛ nɔ ni amɛkɛɔ lɛ afee nɔ ni sa Kristofoi ahenaabuamɔ lɛ ni ewo hiɛ nyam.
24 Yɛ obalayei nyɔŋma lɛ he abɛbua lɛ mli lɛ, okpɔlɔŋmɛɛ lɛ je shishi nyɔɔŋteŋ, ejaakɛ ayɛmforowu lɛ sɛɛ tsɛ. (Mateo 25:5, 6) Yɛ ekroko mli lɛ, nɔ ni Yesu kɛɛ yɛ maŋtsɛ ni ŋmɛɔ okpɔlɔ lɛ he lɛ kɛ etsuji ni ekɛɛ amɛyatsɛ mɛi ni nyiɛ gbɛjegbɛi anɔ lɛ tsɔɔ akɛ aŋmɛ okpɔlɔ yɛ shwane mli. (Mateo 22:4, 9) Yɛ ŋmɛnɛŋmɛnɛ gbii nɛɛ amli lɛ, okpɔlɔŋmɛɛ nɛɛ ekomɛi asɛɛ tsɛɔ waa kɛboteɔ nyɔɔŋteŋ, ni ebafeɔ nɔ ni anyɛɛɛ nɔ aye, ni ehaa Kristofoi onukpai ni amɛdara lɛ shiɔ koni amɛya shia amɛyajɔɔ amɛhe aloo amɛyana wɔ mli ŋɔɔmɔ. Bɔni afee ni ekaba lɛ nakai lɛ, gbalashihilɛ mli hefatalɔi hiɛshikalɔi lɛ toɔ be he gbɛjianɔ koni amɛ okpɔlɔŋmɛɛ lɛ aje shishi yɛ be ko mli koni eba naagbee yɛ be ko mli. Mɔ fɛɛ mɔ baanyɛ adamɔ enɛ nɔ ato ebe he gbɛjianɔ ni Kristofoi asɔɔmɔ nitsumɔ lɛ he gbɛjianɔtoo ni sa fata he yɛ enɔjetsɛremɔ.c
[Shishigbɛ niŋmai]
a Yɛ maji komɛi anɔ lɛ, kɛ akpee yoo lɛ agbe naa lɛ, gbɔi lɛ fɛɛ yaa okpɔlɔŋmɛɛ ni anuɔ daa ni waaa, kɔfe loo tii kɛ bodobodo fioo yɛ jɛmɛ lɛ shishi. Yɛ sɛɛ mli lɛ mɛi ni akpee amɛ ehee lɛ kɛ amɛwekumɛi kɛ nanemɛi kpeɔ yɛ shia ni amɛyeɔ nii aloo yɛ niyeli he. Yɛ hei krokomɛi hu lɛ, okpɔlɔŋmɛɛ lɛ ji nɔ ko ni afeɔ yɛ yookpeemɔ lɛ sɛɛ—kɛ daaŋjiemɔ nibii bibii loo niyeli.
b Ejɛ Hela wiemɔ methusko, ni eshishi ji “atɔ daa” mli. Shishitsɔɔlɔi komɛi kɛɔ akɛ wiemɔ lɛ tsɔɔ daa ni anuɔ bɔ ni sa ni aaaha mɔ ana miishɛɛ. Ŋmalɛi krokomɛi fiii jwɛŋmɔ nɛɛ sɛɛ.—Mateo 24:49; Luka 12:45; Bɔfoi 2:15; Efesobii 5:18; 1 Tesalonikabii 5:7.
c Ajie kɛjɛ April 15, 1984 Watchtower lɛ mli.
Yɛ Nɔ ni Asusu he Nɛɛ Mli Lɛ, Ani Okaiɔ?
□ Nɔ hewɔ ni esa akɛ Kristofoi asusu okpɔlɔŋmɛɛi ahe lɛ?
□ Nɔ ni ji ŋaawoo ni sa yɛ dãa ni wa ni akɛbaa yookpeemɔ okpɔlɔŋmɛɛ shishi lɛ he lɛ?
□ Mɔ ni nɔ ni afeɔ yɛ okpɔlɔŋmɛɛi lɛ ashishi lɛ he sɔ ka enɔ?
25 Yookpeemɔ okpɔlɔŋmɛɛ baanyɛ afee be ni sa jogbaŋŋ kɛha Kristofoi amiishɛɛnamɔ ni ŋmɛɔ pɛpɛɛpɛ. Shi te ekɔɔ nɔ ni nyiɛɔ sɛɛ baa lɛ he ehaa tɛŋŋ—gbalashihilɛ akɛ anɔkwale Kristofoi?
[Mfoniri ni yɔɔ baafa 24]
Mɔ ni kwɛɔ okpɔlɔŋmɛɛ lɛ nɔ lɛ kɛ ayɛmforowu lɛ gba wein lɛ he sane