Kwɛmɔ Ohe Nɔ Jogbaŋŋ Yɛ Ohenyɛlɔ Abonsam He!
“Ŋyɛhiɛ akaa shi, nyɛsraa; ejaakɛ nyɛ henyɛlɔ abonsam Iɛ nyiɛ tamɔ jata ni huuɔ ootao mɔ ni eeemi.” 1 PETRO 5:8.
1. Mɛɛ Henyɛlɔ Yehowa Odasefoi yɔɔ, shi ani abaanyɛ aha enitsumɔi afee yaka?
1 ANI oji Yehowa Nyɔŋmɔ odasefonyo ni ojɔɔ ohe nɔ kwraa oha lɛ ni nɔ ko eshwɛɛɛ yɛ sɛɛ? Kɛji nakai ni lɛ, belɛ oyɛ henyɛlɔ ko ni tsɔɔ ŋaa fɔŋ, henyɛlɔ abonsam ko. Shi yɛ nɔ fɛɛ nɔ ni eeenyɛ efee lɛ sɛɛ lɛ, abaanyɛ afite nakai henyɛlɔ hiɛtɛlɔ lɛ ŋaa lɛ. Obaanyɛ ofee anɔkwafo oha Ŋwɛi Flooflo Nyɔŋmɔ lɛ, Yehowa. Ŋwanejee ko bɛ he akɛ obaanyɛ ona oŋwɛi Tsɛ lɛ gbɛi ni eko kɛ lɛ yeee egbɔ lɛ bembuu lɛ mli gbɛfaŋnɔ. Yɛ anɔkwale mli lɛ, obaanyɛ oha Yehowa tsui anya ni okɛ hetoo aha lɛ, ni ekɛha Mpoatswalɔ Kpeteŋkpele lɛ. Hɛɛ, ni obaanyɛ ona nyɔmɔwoo ni ji naanɔ wala yɛ paradeiso miishɛɛ mli.—Abɛi 27:11; Luka 23:43; Kpojiemɔ 2:7.
2. Mɛni ji nɔ ni bɔfo Petro wie yɛ wɔ henyɛlɔ nukpa lɛ he?
2 Kɛ ooonyɛ ohi shi akɛ anɔkwafo oha Nyɔŋmɔ lɛ, belɛ esa akɛ okwɛ ohe nɔ jogbaŋŋ yɛ ohenyɛlɔ titri lɛ he. Bofɔ Petro ŋma yɛ ehe akɛ: “Nyɛhiɛ akaa shi, nyɛsraa; ejaakɛ nyɛ henyɛlɔ abonsam Iɛ nyiɛ tamɔ jata ni huuɔ eetao mɔ ni eeemi.” Shi abaanyɛ abu he kɛjɛ nɛkɛ henyɛlɔ nɛɛ he, ejaakɛ bɔfo lɛ tee nɔ akɛ: “Nyɛdamɔa shi Shiŋŋ yɛ hemɔkɛyeli lɛ mli nyɛtsia lɛ gbɛ . . . Kɛ nyɛna amanehulu fioo nɛɛ ta lɛ, . . . duromɔ fɛɛ Nyɔŋmɔ . . . lɛ, lɛ diɛŋtsɛ . . . eeewonyɛ hewalɛ ni eeeha nyɛfi shi shiŋŋ.” (1 Petro 5:8-10) Nɛkɛ wiemɔi nɛɛ kɛ miishɛjemɔ bahaa Yesu Kristo sɛɛnyiɛlɔi ni afɔ amɛ mu lɛ titri. Ni etsɔɔ nɔ ko diɛŋtsɛ hu kɛhaa Yehowa tsuji ni kpaa gbɛ akɛ amɛbaahi shi kɛya naanɔ yɛ paradeiso shikpɔŋ lɛ nɔ lɛ.
3. (a) Namɛi efee klalo akɛ amɛbaaye amɛbua wɔ? (b) Mɛɛ henyɛlɔi Satan kɛtsuɔ eyiŋtooi fɔji lɛ ahe nii?
3 Kɛji akɛ wɔbaanyɛ wɔkwɛ wɔhe nɔ jogbaŋŋ yɛ wɔ Henyɛlɔ lɛ he lɛ, belɛ yelikɛbuamɔ he baahia wɔ, kɛ agbɛnɛ eŋaa nitsumɔi lɛ ahe nilee. Mɛi ni amɛfee klalo ni amɛmiisumɔ ni amɛye amɛbua wɔ fɛɛ ni wɔhiɛ wɔ emuuyeli mli ji Yehowa Nyɔŋmɔ, Yesu Kristo, ŋwɛi bɔfoi krɔŋkrɔŋi lɛ kɛ Kristofoi asafo lɛ. Shi yɛ gbɛ kroko nɔ lɛ, wɔyɛ wɔ heloo ni yeee emuu lɛ, yiwalɛ nibii agbɛjianɔtoo lɛ kɛ Satan Abonsam diɛŋtsɛ ni wɔkɛ amɛ baapele nibii ahe. Jwɛŋmɔ fɔŋ ji nɔ ni kanyaa lɛ, ni efee klalo yɛ be fɛɛ mli akɛ ebaabi ni wɔ henyɛlɔi enyɔ ni eshwɛ lɛ aye abua lɛ ni enyɛ etsu eyiŋtoo gbonyo lɛ he nii.—Yohane 15:19; 1 Korintobii 9:27.
4. (a) Mɛɛ gbɛ̀i sɔrɔtoi ejwɛ akɛleɔ Satan? (b) Mɛni hewɔ sabalai “Abonsam,” “onufu” kɛ “drako” lɛ sa Satan Iɛ?
4 Gbɛ́i sɔrɔtoi ni Ŋmalɛi lɛ kɛhaa wɔ Henyɛlɔ Iɛ yeɔ ebuaa wɔ koni wɔnu egbɛ̀i, eŋaatsɔɔi lɛ ashishi jogbaŋŋ. Atsɛɔ lɛ akɛ Satan, Abonsam, onufu kɛ drako. (Kpojiemɔ 12:4, 9, 10) Egbɛi Satan lɛ shishi ji “Shitee-kɛ-wolɔ,” aloo “Henyɛlɔ.” (Hiob 1:6; 2:1) “Abonsam” shishi ji “Mɔ Heguɔgbelɔ,” “Naafolɔlɔ,” aloo “Mɔ ni Wieɔ Mɛi Ahe Efɔŋ.” Atsɛɔ Satan hu akɛ “onufu” ejaakɛ etsɔ onufu lɛ nɔ elaka Hawa yɛ Eden abɔɔ lɛ mli. (1 Mose 3:1-7) Ni atsɛɔ lɛ “drako” hu akɛni enyɛɔ emiɔ mɔ lɛ hewɔ.
Satan Jwɛŋmɔi kɛ Eyiŋtooi
5. Mɛɛ shidaamɔ Satan ekɔ yɛ Yehowa he?
5 Satan Abonsam, ni kulɛ eji Nyɔŋmɔ ŋwɛi bii lɛ ateŋ mɔ kome kɛjɛ shishijee lɛ gbee shi yɛ shitee-kɛ-wolɔ kɛ Yehowa gbɛi lɛ fitelɔ ni ebatsɔ hewɔ. Satan yiŋtoo ji ni etsi adesai kɛjɛ Nyɔŋmɔ he, koni no atsu Satan pɛsɛmkunya yiŋtooi lɛ ahe nii. Abonsam nifeemɔ lɛ ha ebafee faŋŋ akɛ eeebi sane yɛ anɔkwale ni Nyɔŋmɔ yeɔ lɛ he, kɛ agbɛnɛ kɛ́ ehe miihia po ni adesai kɛ amɛhe afɔ Yehowa nɔ ni amɛkwɛ lɛ gbɛ kɛha wala kɛ miishɛɛ ni eeeya nɔ ekɛha amɛ. Nɔ ni Satan gbɛ nɛɛ tsɔɔ diɛŋtsɛ ji sane ni ebi yɛ hegbɛ ni Nyɔŋmɔ yɔɔ akɛ eyeɔ nɔ kɛ gbɛ ni etsɔɔ nɔ eyeɔ nɔ lɛ he. Shishitoo mla ni Yehowa kɛ ehe kpɛtɛɔ he ji nɔyeli yɛ jalɛ naa koni ena bɔɔ nii ni aaajɛ amɛsuɔmɔ mli amɛsɔmɔ lɛ yɛ suɔmɔ ni amɛyɔɔ kɛha lɛ kɛ jalɛ nifeemɔ hewɔ. Shi yɛ gbɛ kroko nɔ lɛ, shidaamɔ ni Satan ekɔ ji akɛ pɛsɛmkunya sɛɛnamɔ ji nɔ ni ataoɔ babaoo moŋ. Ni ji akɛ, eetsɔɔ akɛ esa akɛ bɔɔ nii fɛɛ ni yɔɔ jwɛŋmɔ lɛ atsɔmɔ pɛsɛmkunyatsɛmɛi tamɔ lɛ, ni nakai amɛji hu.—Hiob, yitsei 1 kɛ 2.
6. Satan gbɛ lɛ jieɔ mɛni kpo yɛ eyiŋtooi ahe?
6 Kɛ Satan aaatsɔ gbɛ nɛɛ nɔ lɛ, belɛ no tsɔɔ akɛ eŋmɛ gbɛ ni hiɛnyam-taomɔ ni anyɛɛɛ nɔ aye batsɔ akɔnɔ kɛ yiŋtoo ko yɛ emli ni enɛ he egbɔmɔtso muu lɛ fɛɛ. Enɛ hu jeɔ kpo yɛ bɔfo Paulo kɔkɔ ni ebɔ eshi mɛi ni atsake amɛ ehee ni aaahala amɛ akɛ amɛ awo gbɛhei akɛ nɔkwɛlɔi lɛ he lɛ, “koni ekawo ehe nɔ ni egbee Abonsam kojomɔ mli.” (1 Timoteo 3:6) Hɛɛ, etsɔɔ bɔ ni henɔwomɔ eyi Satan mli obɔ akɛ eeete shi ewo Ofe lɛ, Ŋwɛi Flooflonyo lɛ, Je Muu Fɛɛ Maŋtsɛ lɛ, Naanɔ Maŋtsɛ, Yehowa Nyɔŋmɔ, akɛ ekɛ lɛ baawuu. (1 Mose 17:1; 2 Samuel 7:28; Lala 83:19; 1 Timoteo 1:17) Ákɛ Abonsam akɔnɔ titri ji ni ewo lɛ diɛŋtsɛ ehe nɔ, ákɛ ehiɛ kɔ̃ɔ jamɔ nibɔɔ nii ni yɔɔ jwɛŋmɔ lɛ kɛhaa Yehowa Nyɔŋmɔ lɛ nɔ lɛ, lɛ diɛŋtsɛ ejie enɛ kpo beni ekɛ “je lɛŋ maŋtsɛyelii fɛɛ” tsɔɔ Yesu Kristo akɛ ekɛbaaha lɛ, kɛ́ Yesu kɛ ehe aaawo jamɔ nifeemɔ ko mli koni ekɛja lɛ lɛ.—Mateo 4:8, 9.
7. Mɛni hewɔ Nyɔŋmɔ kpataa atuatselɔi, Satan, Adam kɛ Hawa hiɛ amrɔ nɔŋŋ?
7 Kulɛ Yehowa Nyɔŋmɔ baanyɛ akpata Satan kɛ adesai enyɔ ni fee esha lɛ ahiɛ amrɔ nɔŋŋ. Shi yɛ saji ni Satan etee lɛ shi lɛ kɛ agbɛnɛ mɔbɔ ni ena Adam bii ni efɔko amɛ lolo lɛ hewɔ lɛ, Nyɔŋmɔ ŋmɛ Abonsam gbɛ koni ehi shi ni ebɔ mɔdɛŋ akɛ eeebu ehepupuumɔ kɛ naafolɔmɔ lɛ bem. Yɛ nakai beaŋ nɔŋŋ Iɛ Yehowa kɛ hegbɛ ha adesai ni sumɔɔ akɛ amɛaabɔ mɔdɛŋ ni amɛye amɛ diɛŋtsɛ amɛhe nɔ ni Nyɔŋmɔ kɛ ejalɛ shishitoo mlai fataaa he lɛ ni amɛka amɛkwɛ.
Lakamɔ ni kɔɔ Shihilɛ mli ni Eyɔɔ Lɛ he
8. Satan eshishiu adesai yɛ shihilɛ mli ni eyɔɔ lɛ he yɛ mɛɛ gbɛ nɔ?
8 Satan kɛ ŋaa gbɛi sɔrɔtoi tsuɔ nii ni ekɛha eyiŋtoo akɛ Yehowa Nyɔŋmɔ Henyɛlɔ lɛ aya nɔ, ni kɛ́ aaahi lɛ, koni egbala adesai fɛɛ kɛjɛ amɛ-Bɔlɔ lɛ jamɔ ni ja lɛ he. Eŋaa gbɛi nɛɛ ekome ji ni eha gbɔmɛi ahe aye akɛ ebɛ shihilɛ mli kwraa! Enɛ haa amɛgbeeɔ edɛŋ yɛ gbɛ ni waaa kwraa nɔ. No hewɔ lɛ, ŋmɛnɛ, jamɔi pii yɛ ni nɔ ni amɛheɔ amɛyeɔ ji akɛ gbɔmɔ ko ni atsɛɔ lɛ Satan Abonsam bɛ. Akɛ nɔkwɛmɔ nɔ lɛ, nibii amlitaomɔ ko ni Center for Policy Research ni yɔɔ New York Maŋtiase lɛ mli lɛ bɔ he amaniɛ yɛ 1974 ji akɛ Amerikabii ateŋ mɛi ni fá fe fã heee yeee jogbaŋŋ akɛ mɔ ko diɛŋtsɛ yɛ shihilɛ mli ni atsɛɔ lɛ Abonsam. Osɔfoi lɛ ateŋ mɛi pii po heee yeee akɛ Abonsam ji mɔ ko diɛŋtsɛ ni yɔɔ shihilɛ mli.
9, 10 Ŋmalɛi lɛ kɛ anɔkwale ni eji akɛ Abonsam ji mɔ ni yɔɔ diɛŋtsɛ lɛ mamɔɔ shi yɛ faŋŋ mli yɛ mɛɛ gbɛ nɔ?
9 Shi ákɛ Abonsam ji mɔ ko ni yɔɔ diɛŋtsɛ lɛ, Ŋmalɛi lɛ shiii wɔ yɛ yiŋkɔshikɔshifeemɔ mli. Ŋmalɛi lɛ tsɔɔ akɛ mɔ ko wie kɛtsɔ onufu lɛ nɔ, elaka ni eshishiu klɛŋklɛŋ yoo lɛ ni ji Hawa. Hiob wolo lɛ hu tsɔɔ akɛ Satan yɛ diɛŋtsɛ akɛ mɔ ko, ejaakɛ etsɔɔ akɛ ekɛ Yehowa Nyɔŋmɔ wie, ni etswa emuuyeli mli ni Nyɔŋmɔ tsulɔ Hiob hiɛ lɛ mpoa. Agbɛnɛ, Sanekpakpa lɛ ŋmalɔi Mateo, Marko kɛ Luka ŋma akɛ Abonsam ka Yesu Kristo. Ákɛ nɛkɛ kaai nɛɛ baanyɛ ajɛ mɔ ko ni jɛ he kroko ŋɔɔ aba Yesu nɔ lɛ yɛ faŋŋ, jeee yɛ nɔ ni wɔle yɛ Yesu emuuyeli kɛ esu kɛ baŋ he lɛ hewɔ pɛ kɛkɛ, shi moŋ kɛmiijɛ gbɛ ni Satan kaa ni ji etɛ lɛ tsɔ nɔ ebɛ lɛ hewɔ. Te aaafee tɛŋŋ ni Yesu aaakula shi ni eja yɛ efɔŋ Shishitoo mla ko loo susumɔ ko hiɛ hu? Nɔ ni sa kadimɔ waa hu ji bɔ ni Yesu fɔɔ Satan he wiemɔ akɛ gbɔmɔ loo mɔ ko lɛ, ni akɛ “je nɛŋ lumɔ” lɛ.—Yohane 12:31; 14:30; 16:11; 8:44: Mateo 4:1-10; 12:26; Luka 10:18.
10 Yesu bɔfoi lɛ hu yoo Abonsam akɛ gbɔmɔ loo mɔ ko. Paulo tsɔɔ akɛ anɔkwale Kristofoi jeee mɛi ni leee Satan “jwɛŋmɔi” ni bɔfo Paulo bɔ amɛ kɔkɔ eshi “Abonsam ŋaatsɔɔi.” (2Korintobii 2:11; Efesobii 6:11) Taakɛ bɔ ni wɔle momo lɛ, Petro wo nanemɛi heyelilɔi lɛ aŋaa ni amɛkwɛ amɛhe nɔ jogbaŋŋ yɛ amɛ Henyɛlɔ, Abonsam he. Ni bɔfo Yohane ye odase akɛ “jeŋ muu lɛ fɛɛ ka mɔ fɔŋ lɛ mli,” ni ákɛ “Abonsam baaŋɔ [Kristofoi lɛ] nyɛteŋ mɛi komɛi awo tsuŋ.”—1 Yohane 6:19; Kpojiemɔ 2:10; 1 Petro 5:8.
Satan Ŋaa Nitsumɔ ni ji Apasa Jamɔ
11. Mɛni Satan efee yɛ jamɔ mli henumɔ ni gbɔmɔ yɔɔ lɛ he?
11 Satan ŋaatsɔɔ koni eha mɛi ahi shi akɛ mɛi ni amɛshwila lɛ kɔɔ apasa jamɔ ni ekɛtsuɔ nii lɛ he. (2 Korintobii 4:4) Nyɔŋmɔ bɔ gbɔmɔ kɛ hiamɔ ko, ákɛ ekɛ e-Bɔlɔ lɛ aye sharamɔ kɛtsɔ jamɔ nɔ. Satan egbala jwɛŋmɔ kɛjɛ nɛkɛ henumɔ nɛɛ nɔ kɛtsɔ pɛsɛmkunya ni etɛo ewo amɛmli kɛ jamɔ krɔŋŋ he nii ni aleee ni éha eshwere lɛ nɔ. Bɔni afee ni enyɛ etsu eyiŋtoo nɛɛ he nii lɛ, eyaa nɔ “etsakeɔ ehe otsɔɔ la bɔfo.” (2 Korintobii 11:14) Nɔ ni ejɛ nɛkɛ shishiumɔ nɛɛ mli eba ji akɛ adesai kɛ amɛhe ewo apasa jamɔi sɔrɔtoi akpei abɔ mli.
12. Te esa akɛ wɔsusu epasa jamɔ kɛ futufutu hemɔkɛyeli he wɔha tɛŋŋ?
12 Apasa jamɔi fɛɛ ji nii ni Satan kɛba, ejaakɛ Paulo jaje akɛ: “Afɔle ni jeŋmaji lɛ shaa lɛ, daimonioi amɛshaa amɛhaa, shi jeee Nyɔŋmɔ.” Yesu kɛɛ: “Mɔ ni bɛ migbɛfaŋ lɛ, shi ete ewo mi; ni mɔ ni kɛ mi buaa naa lɛ, gbɛ egbɛɔ eshwaa.” Agbɛnɛ hu, Kristo eŋmɛɛɛ futufutu hemɔkɛyeli gbɛ kwraa, shi moŋ ekɛɛ: “Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.”—1 Korintobii 10:20; Mateo 12: 30; Yohane 14:6, NW.
13. Mɛɛ gbɛi anɔ Satan etsɔ ekɛ bɔ ni gbɔmɔ sumɔɔ akɛ epɛi mumɔi atsɛmɔ nifeemɔi amli ekwɛ lɛ etsu nii?
13 Satan kɛ nibii amli ni gbɔmɔ taoɔ ale yɛ mumɔi atsɛmɔ nifeemɔi ahe lɛ kɛ shihilɛ ni gbohii lɛ yɔɔ mli lɛ tsuɔ nii yɛ gbɛ fɔŋ nɔ. Étsɔ ŋaa nitsumɔi ni kɛ Ŋmalɛi lɛ kpaaa gbee kwraa tamɔ gbohii ni akɛ amɛ wieɔ aloo mumɔi atsɛmɔ, klamɔ, ŋulamiiaŋkwɛmɔ kɛ sũu nɔ ewo gbɔmɛi babaoo ni anyɛŋ akane amɛ lɛ ahe gbeyei. Yɛ anɔkwale mli lɛ, ŋmɛnɛ, gbɔmɛi ena nibii ni tamɔ nɛkɛ he miishɛɛ babaoo diɛŋtsɛ. Enɛ etee nɔ kɛyashɛ shɔŋŋ akɛ agbɛnɛ mɛi yɛ ni miija Abonsam diɛŋtsɛ.—2 Mose 22:18; 3 Mose 19:26; 20:6; 5 Mose 18:10-12.
Henɔwomɔ Ni Satan Haa Efeɔ Fɛo Yɛ Mɛi Ahiɛ Lɛ
14, 15. (a) Mɛni Satan tso nɔ ekɛtsu nii ni enine shɛ Hawa kɛ Kain nɔ koni amɛtsu eyiŋtoo he nii lɛ? (b) Mɛɛ nɔkwɛmɔ nii krokomɛi Biblia lɛ kɛhaa yɛ enɛɛmɛi nɔŋŋ he?
14 Satan gbee shi yɛ henɔwomɔ he kaa mli. No hewɔ lɛ etee henɔwomɔ ko ni ji pɛsɛmkunya akɔnɔ ko shi yɛ Hawa mli koni etamɔ Ŋwɛi Flooflo Nyɔŋmɔ lɛ, ni enyɛ etsɔ enɛ nɔ egbala wɔ klɛŋklɛŋ fɔlɔi lɛ kɛjɛ Yehowa Nyɔŋmɔ jamɔ he. Ŋwanejee ko bɛ he akɛ Satan tsɔ nakai gbɛ nɔ nɔŋŋ yɛ Kain sane lɛ mli. Akɛni eyoo bɔ ni Kain mli efu, yɛ enyɛmi Habel ni nine eshɛ ŋwɛi nɔkpɛlɛmɔ nɔ lɛ hewɔ lɛ, Satan baanyɛ awo nakai mlifu Iɛ mli hewalɛ ni etsɔ gbɔmɔgbee kɛ hetsɛ̃.—1 Mose 4:3-8; 1 Yohane 3:11, 12.
15 Satan enyɛ ekɛ gbɔmɛi henɔwolɔi etsu nii akɛ edɛŋdadei yɛ adesa yinɔsane he fɛɛ mli—gbɔmɛi tamɔ Nimrod, Mizraim Farao yɛ Mose gbii lɛ amli kɛ Maŋtsɛ Sanherib, Ashurnyo lɛ. (1 Mose 10:8-12; 2 Mose 5:2; Yesaia 36:7-10, 16-20) Ŋmɛnɛ Satan emɔmɔ gbɔmɛi pii yɛ edɛŋ kɛtsɔ henɔwomɔ nɔ. Weku mli henɔwomɔ, maŋ nɔ henɔwomɔ, woloŋlee mli henɔwomɔ, shihilɛ mli henɔwomɔ kɛ ekrokomɛi. Enɛɛmɛi fɛɛ tsuɔ Abonsam yiŋtoo he nii, ejaakɛ ehãa gbɔmɛi tsimɔɔ amɛtoi yɛ Nyɔŋmɔ sane lɛ he.
Heloo Gbɛfaŋ Ninamɔ Mli Hiɛjoomɔ Lakamɔ Lɛ
16. Mɛɛ omanye Satan eye yɛ heloo gbɛfaŋ ninamɔ mli hiɛjoomɔ ni ekɛtsu nii lɛ hewɔ?
16 Nɔ kroko ni Satan kɛtsuɔ nii ni ekɛwoɔ adesai ahe gbeyei aloo ekɛtsɔɔ amɛ tsɔne ji ninamɔ, hiɛjoomɔ, shika he suɔmɔ, henɔwomɔ yɛ heloo gbɛfaŋ nibii ni ayɔɔ hewɔ. No hewɔ lɛ etsɔ Yesu gbii lɛ amli osɔfoi shikasuɔlɔi hiɛjoolɔi lɛ tsɔne (Luka 16:14) Ekɛ heloo gbɛfaŋ ninamɔ mli hiɛjoomɔ lakamɔ lɛ tsu nii ni ‘Satan yi [Anania] tsuiŋ obɔ, ni emale etsɔɔ mumɔ krɔŋkrɔŋ lɛ.’ (Bɔfoi lɛ Asaji 5:1-11) Ni ŋwanejee ko bɛ he akɛ Abonsam kɛ heloo gbɛfaŋ nibii ahe suɔmɔ kɛ je lɛŋ akɔnɔi tsu nii ni ekɛgbala Dema kɛ Kristofoi krokomɛi kɛjɛ Yehowa sɔɔmɔ mli.—2 Timoteo 4:10.
17. Mɛɛ nɔkwɛmɔ nɔ titri ko ni ehiii kwraa ni kɔɔ gbɔmɔ ko ni gbee shi yɛ hiɛjoomɔ he tsɔne ni Satan kɛtsu nii hewɔ lɛ wɔyɔɔ?
17 Nɔkwɛmɔ nɔ titri ko ni ehiii ni tsɔɔ bɔ ni Satan kɛ hiɛjoomɔ tsɔɔ mɛi tsɔne ji Yuda Iskariot nɔ̃ lɛ. Jeee akɛ ebatsɔ julɔ kɛ hiɛjoolɔ kɛkɛ, shi moŋ hiɛjoomɔ fata nɔ ni ha Yuda tsɔɔ e-Nuŋtsɔ lɛ eeegbɛ lɛ he. Ákɛ jɛmɛ ji he ni egbala ejwɛŋmɔ kɛtee lɛ anaa enɛ yɛ bɔ ni ewie eshi mu ni jara wa ni Maria ŋɔ-fɔ Yesu naji ahe lɛ hewɔ lɛ. (Yohane 12:4-6; Mateo 26:14-16) Kwɛ bɔ ni esa akɛ wɔkwɛ jogbaŋŋ koni Satan akatsɔ heloo gbɛfaŋ ninamɔ mli hiɛjoomɔ lakamɔ lɛ nɔ ni enine shɛ wɔnɔ!
Satan kɛ Adesa Gbɔjɔmɔi Tsuɔ Nii
18. (a) Mɛɛ gbɛjianɔ Nyɔŋmɔ to kɛha gbɔmɔ koni ená shihilɛ he miishɛɛ? (b) Satan kɛ enɛɛmɛi etsu nii ni ekɛye gbɔmɔ awui yɛ mɛɛ gbɛ nɔ?
18 Gbɔjɔmɔi sɔrɔtoi ni Satan kɛtsuɔ nii ji bɔlɛnamɔ mli miishɛɛnamɔ ni ahiɔ lɛ he akɔnɔ. Yehowa Nyɔŋmɔ to eyiŋ akɛ esa akɛ wɔná nibii pii amli miishɛɛ ni kɛji akɛ ana enɛɛmɛi ahe miishɛɛ yɛ esuɔmɔnaa nii ahe husu ni efo kɛha wɔ lɛ amli lɛ, nɔkpakpa kɛ miishɛɛ diɛŋtsɛ baanyɛ ajɛ mli aba aha wɔ. Shi Satan ka adesai koni amɛkɛ enɛɛmɛi ayɛ klɛŋklɛŋ gbɛhe yɛ amɛshihilɛ mli, ni amɛkɛ amɛhe awo mli yɛ jeŋbashara gbɛi ni kuɔ Nyɔŋmɔ mla mli lɛ nɔ. No hewɔ lɛ Satan ha Israelbii 24,000 gbee shi yɛ Baal-Peor lakamɔ hewɔ. (4 Mose 25:1-9) Ŋmɛnɛ, je lɛ eye sɛkɛ yɛ bɔlɛnamɔ mli miishɛɛnamɔ he. Woji tɛtrɛbii, adafitswaa woji, sinii kɛ tɛlivishin nɔ nibii ni ajieɔ miigbala jwɛŋmɔ kɛmiiya bɔlɛnamɔ mli nibii anɔ yɛ gbɛ ni tekeɔ nɔ lɛ he yɛ faŋŋ mli. Shi ákɛ Kristofoi ni Nyɔŋmɔ mumɔ lɛ tsɔɔ wɔ gbɛ lɛ, esa akɛ wɔkpoo nɛkɛ kaai nɛɛ.—1 Korintobii 14:20.
19. (a) Mɛɛ Satan tsɔne ko obalaŋtai Kristofoi titri gbeeɔ mli? (b) Esa akɛ obalaŋtai Kristofoi akwɛ amɛhe nɔ jogbaŋŋ yɛ mɛni he?
19 Satan ŋaa nitsumɔ kroko ji miishɛɛnamɔ babaoo he akɔnɔ ni ehaa gbɔmɔ shweɔ lɛ. Nɛkɛ tsɔne nɛɛ nyɛɔ eduɔ obalaŋtai ni ji Kristofoi titri. Yɛ be babaoo mli lɛ amɛkɛ amɛhe woɔ kpɔiaŋgbɔlemɔi kɛ akaŋshii amli nibii sɔrɔtoi amli vii, ákɛ mɛi ni yakwɛɔ nibii nɛɛ kɛ mɛi ni kɛ amɛhe woɔ mli fɛɛ. Shi enɛ baaha amɛtsɔmɔ “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.” (2 Timoteo 3:4) Obalaŋtai krokomɛi yɛ ni nɔ ni amɛshwɛɔ ni amɛnaa he miishɛɛ ji saŋku-lalai kɛ lalai sɔrɔtoi ni haa jeŋbashara kɛ basabasa-feemɔ shwereɔ. Eka shi faŋŋ akɛ ehe miihia waa ni wɔkwɛ wɔhe nɔ jogbaŋŋ, ejaakɛ nihii nɛɛ lakaa obalaŋtai ni ji Kristofoi kɛjɛɔ emuuyeli kɛ jeŋba kpakpa gbɛ lɛ nɔ.—Lala 16:11; 2 Petro 2:20-22.
20. Satan kɛ gbeyeishemɔ tsuɔ nii yɛ mɛɛ gbɛ nɔ?
20 Agbɛnɛ Satan kɛ gbɔmɔ he gbeyeishemɔ ni tsɔɔ mɔ tsɔne lɛ tsuɔ nii. Ewaaa akɛ mɔ ko aaagbala ehe shi kɛjɛ ehe fɛo ni aaaye lɛ he ni ebɔ mɔdɛŋ ni ejo piŋmɔ naa foi. Gbeyeishemɔ ni tamɔ nɛkɛ eha mɛi pii eŋmɛɛ saji ahe amɛkɛsaa yɛ nɔnyɛ̃ɛ bei amli. (Abɛi 29: 25; Hebribii 2:14, 15) Yɛ Nyɔŋmɔ yelikɛbuamɔ naa lɛ wɔŋmɛŋ gbɛ ni enɛ aba lɛ nakai yɛ wɔgbɛfaŋ.
21. Mɛni hewɔ ehe ehiaaa ni nijiaŋwujee aye wɔnɔ lɛ?
21 Satan ŋaai lɛ eko hu ji mɔdɛŋ ni ebɔɔ koni eje Nyɔŋmɔ tsuji anijiaŋ wui koni amɛŋmɛɛ he. Abonsam bɔ enɛ feemɔ he mɔdɛŋ yɛ Hiob he, eha esusu akɛ ena ni kulɛ egbo aloo afɔɔɔ lɛ po. Satan kɛ enɛ hu ka Mose. (Hiob 3:1-13; 14:13; 4 Mose 11:10-15) Nijiaŋwujee nɛɛ nyɛɛɛ afite nɛkɛ hii anɔkwafoi nɛɛ. Shi moŋ, amɛdi ŋwɛi suɔmɔnaa nifeemɔ sɛɛ. Esaaa akɛ wɔŋmɛɔ gbɛ koni shihilɛi komɛi aye wɔnɔ, ejaakɛ Yehowa baanyɛ awaje wɔ ni eŋmɛŋ gbɛ ni jalɔ adidã taakɛ efee yɛ nɛkɛ hii nɛɛ ahe lɛ—Lala 55:23.
Nyɛdamɔa Shi Shiŋŋ!
22, 23. Bɔni afee ni wɔnyɛ wɔdamɔ shi shiŋŋ wɔshi Satan “ŋaatsɔɔi” ni wɔkɛ wɔhe akawo enitsumɔi amli lɛ, mɛni esa akɛ wɔfee?
22 Yɛ mɔdɛŋ ni Satan ebɔ yɛ adesai ateŋ mɛi ni fá ni etse amɛ kɛjɛ Nyɔŋmɔ he lɛ hewɔ lɛ, mɛni esa akɛ wɔfee? Ákɛ Yehowa Odasefoi ekãalɔi lɛ, esa akɛ “Wɔdamɔ shi Shiŋŋ wɔshi Abonsam ŋaatsɔɔi lɛ,” esa akɛ wɔte shi wɔwo enitsumɔi lɛ, eŋaa gbɛi kɛ elakamɔi lɛ. (Efesobii 6:11) Wɔbaatsɔ enɛ nɔ ni wɔha ana lɛ akɛ amalelɔ hepupuulɔ ni eba shi, taakɛ eji diɛŋtsɛ hu lɛ.
23 Shi wɔnyɛŋ wɔdamɔ shi shiŋŋ wɔshi Satan yɛ wɔ diɛŋtsɛ wɔhewalɛ mli, ejaakɛ ehewalɛi lɛ fa babaoo fe wɔ, eyɛ nilee babaoo ni eyɛ niiashikpamɔ fe bɔ ni wɔyɔɔ. No hewɔ lɛ bɔni afee ni wɔnyɛ wɔdamɔ shi shiŋŋ wɔshi lɛ lɛ, esa akɛ wɔkɛ yelikɛbuamɔ nibii lɛ fɛɛ ni Yehowa Nyɔŋmɔ kɛhaa ewebii lɛ atsu nii. Nakai gbɛ pɛ nɔ wɔɔtsɔ ni wɔha nakai henyɛlɔ hiɛtɛlɔ lɛ nitsumɔi afee yaka!a
[Shishigbɛ niŋmaa]
a Ajie kɛjɛ October 15, 1984 Watchtower lɛ mli.
Ani Obaanyɛ Okai?
◻ Mɛɛ henyɛlɔi Abonsam kɛtsuɔ nii koni enine ashɛ eyiŋtoi fɔji lɛ anɔ?
◻ Mɛni ji shidaamɔ ni Satan ekɔ yɛ Yehowa he?
◻ Mɛɛ gbɛ nɔ Biblia Iɛ tsɔɔ yɛ akɛ Satan ji mɔ ko diɛŋtsɛ ni yɔɔ?
◻ Mɛni ji nibii komɛi ni Abonsam tsɔɔ nɔ ekɛtsɔɔ wɔ tsɔne, ni fe wɔɔfee tɛŋŋ wɔjo enɛɛmɛi ni aaatsɔ wɔ tsɔne lɛ naa foi?
[Mfoniri ni yɔɔ baafa 13]
Yehowa Odasefoi eŋmɛɛɛ amɛhe amɛhaa gbɔmɔ gbeyeishemɔ