Kpojiemɔ Kooloi Lɛ—Mɛni Hewɔ Esa Akɛ Okane Amɛhe Sane?
APOKALIPS! Eji gbɛi ni hɛleɔ mɔ jwɛŋmɔ shi ni akɛha Biblia lɛ mli naagbee woji lɛ ateŋ ekome. Atsɛɔ lɛ hu akɛ Kpojiemɔ wolo lɛ. Okadi wiemɔi ni akɛfee mfonirii ji nɔ ni eyi wolo lɛ mli obɔ, ni nɔ ni ekaaa yɛ mli ji drako lɛ kɛ kooloi etɛ ni hiɛ wa lɛ. Mɛi komɛi naa akɛ nɛkɛ kooloi nɛɛ ahe yɛ gbeyei waa. Mɛi krokomɛi susuɔ akɛ nuumo ko susumɔi ni. Belɛ mɛni hewɔ esa akɛ okane Apokalips lɛ kooloi lɛ ahe sane lɛ? Ejaakɛ ekɔɔ omiishɛɛnamɔ he.
Eji anɔkwale akɛ bɔfo Yohane egbɔ yɛ be mli ni eŋmaa Kpojiemɔ wolo lɛ fe afii 1,900 ni eho nɛ lɛ. Ani no tsɔɔ akɛ belɛ kooloo lɛ ni etsɔɔ mli lɛ jɛ ninaai ko ni jwɛŋmɔ ni he ejɔ na? Dabi, ni Yohane jeee klɛŋklɛŋ nuumo ni nine shɛ ninaai ni tamɔ nɛkɛ nɔ. Nuu ko ni atsɛɔ lɛ Daniel hu na kooloi ahe ninaa yɛ egbɔlɛ be mli, ni nɛkɛ ninaai nɛɛ batsɔ gbalɛ ni ja ni tsɔɔ tsakemɔ yɛ adesa nɔyeli mli. (Daniel yitsei 7 kɛ 8) Agbɛnɛ hu, Yesu Kristo diɛŋtsɛ bu Daniel akɛ ajɛ ŋwɛi atsirɛ lɛ, ni etsɛ lɛ gbalɔ, ni etsɛ wiemɔi kɛjɛ eniŋmai lɛ amli.—Mateo 24:15.
Yesu hu tsɔɔ akɛ yɛ egbele sɛɛ lɛ, ebɔfoi lɛ anine baashɛ Ŋwɛi famɔi anɔ. (Yohane 16:12, 13) Ni akɛni Kpojiemɔ wolo lɛ mli nibii lɛ babaoo ba mli yɛ naakpɛɛ gbɛ nɔ hewɔ lɛ, wɔbaanyɛ wɔná nɔmimaa akɛ bɔfo Yohane ninaai ni kɔɔ Kpojiemɔ kooloi lɛ ahe lɛ ji nɔ ko ni ajɛ Ŋwɛi akɛha.—2 Timoteo 3:16.
Kpojiemɔ wolo lɛ hiɛkpamɔ kaneɔ akɛ: “Yesu Kristo Kpojiemɔ, ni Nyɔŋmɔ ŋɔ ha . . . ni ekɛtsu ebɔfo lɛ koni ekɛbatsɔɔ etsulɔ Yohane yɛ okadii amli.” (Kpojiemɔ 1:1) No hewɔ lɛ, amagai ni yɔɔ Kpojiemɔ wolo lɛ mli lɛ ni emli kooloi lɛ fata he lɛ fɛɛ ji okadii, jeee nɔ ko pɔtɛɛ diɛŋtsɛ. No hewɔ lɛ gbeyeishemɔ ko bɛ kɛ aakane amɛhe sane. Nɛkɛ okadi kooloi nɛɛ kɛ nilee ni he hiaa waa haa Kristofoi. Ehaa amɛbaa wekukpaa ni ka amɛkɛ Nyɔŋmɔ teŋ lɛ yi. No hewɔ lɛ, bɔfo Yohane baanyɛ aŋma akɛ: “Miishɛɛ ji mɔ ni kaneɔ lɛ kɛ mɛi ni nuɔ gbalɛ wiemɔi lɛ, kɛ mɛi ni yeɔ nibii ni aŋma yɛ mli lɛ anɔ lɛ; ejaakɛ be ni ato lɛ eshɛ eta.” Hɛɛ, nɛkɛ okadii nɛɛ ni ooonu shishi lɛ baanyɛ ekɛ miishɛɛ abaha bo bianɛ kɛ agbɛnɛ yɛ wɔsɛɛ be mli.—Kpojiemɔ 1:3, NW.