Nanemɛi Kpakpai Ataomɔ
OBALANYO ko pila waa yɛ oshara ni ekɛ tutuutu na hewɔ. Nɔ nyɔ enɔ otsii pii, kɛkɛ ni eje shishi ebɔi wala mli baa fiofio. Ekɛɛ, “Eji miyɛ nanemɛi kpakpai pii yɛ mɛi ni mikɛ amɛ bɔɔ lɛ ateŋ kulɛ mihe baawa mi oya kwraa fe nɛkɛ.” ‘Nanemɛi ni miyɔɔ dani oshara lɛ ba minɔ lɛ ateŋ mɛi pii eshi mi. Nanemɛi kpakpai baanyɛ afee mɛi ni tsaa mɔ.’
Shihilɛ nɛɛ tamɔ ŋmɛnɛŋmɛnɛ jeŋ ni naanyobɔɔ su bɛ mli lɛ. Mɛi ni akɛɛ atsɛɔ amɛ nanemɛi lɛ ayi baafa yɛ be mli ni nɔ fɛɛ nɔ yaa nɔ jogbaŋŋ. Shi kɛji akɛ sane fɔŋ ko ba lɛ amɛlaajeɔ. Ewa akɛ aaana nanemɛi kpakpai.
Ni kɛlɛ, ni ooona naanyo kpakpa kome loo mɛi enyɔ ni hi diɛŋtsɛ lɛ kɛ sɔrɔtofeemɔ agbo baa shihilɛ mli. Mɛi ni yɔɔ sane nɛɛ he nilee lɛ kɛɔ akɛ: “Shwe ni ashweɔ ni abɛŋkɛ he kpaakpa lɛ ji saneyitso titri ko yɛ wɔbe nɛɛ amli.” Ni taakɛ blema abɛ ko kɛɔ lɛ: ‘Nanemɛi yɛ hiamɔ be mli lɛ ji nanemɛi diɛŋtsɛ.’
Be ko ni eho lɛ, gbɔmɛi susuɔ mɛi krokomɛi ahe ni amɛsumɔɔ ni amɛye amɛbua amɛnanemɛi loo akutseiaŋbii, shi Jeŋ Ta I be ni nibii babaoo ebɔle lɛ lɛ kɛ wekukpaa ni kamɔ adesai ateŋ lɛ fitemɔ ba. Nɔ ni afɔɔ feemɔ bianɛ ji trumufeemɔ, henumɔ ni bɛ, mi-klɛŋklɛŋ su.
Atsɔ hiɛ agba shihilɛ ni yɔɔ mɔbɔ nɛɛ afɔ shi afii ohai 19 ni eho nɛ yɛ nɛkɛ wiemɔi nɛɛ amli: “Ebaawa akɛ mɔ ko aaafee Kristofonyo yɛ naagbee gbii lɛ amli. Ejaakɛ gbɔmɛi baasumɔ amɛ diɛŋtsɛ amɛhe kɛ amɛshika; amɛbaafee henɔwolɔi kɛ hepupuulɔi, mɛi ni nyaŋeɔ Nyɔŋmɔ, mɛi ni booo amɛfɔlɔi atoi, ni amɛhiɛ esɔɔɔ amɛ, mɛi ni efite kwraa. Amɛbaafee yitsoŋwalɔi ni amɛŋmɛŋ sane he amɛhaŋ mɛi krokomɛi; amɛbaamale daa, kɛ haolɔi, ni amɛsusuŋ jeŋba shara he akɛ eji nɔ ko. Amɛbaafee mɛi ni yɔɔ basabasa ni yi wa, ni amɛyeɔ mɛi ni bɔɔ mɔdɛŋ ni amɛfee ekpakpa lɛ ahe fɛo. Amɛbaatsɔɔ amɛnanemɛi asɛɛgbɛ.”—2 Timoteo 3:1-4, The Living Bible.
Mɛɛ shihilɛ ni yɔɔ mɔbɔ ni eji anɔkwale hu yɔɔ je lɛŋ nɛkɛ! Eka shi faŋŋ akɛ ekɛ hiɛnɔkamɔ ko haaa akɛ wɔɔna nanemɛi kpakpai, ni kɛlɛ aaanyɛ ana nanemɛi kpakpai diɛŋtsɛ po ŋmɛnɛ. Ni kwɛ bɔ ni amɛjara wa waa ha! Obaanyɛ otsɔ ohe kɛya amɛŋɔɔ kɛha yelikɛbuamɔ yɛ be fɛɛ mli kɛha ŋaawoo, miishɛjemɔ kɛ naanyobɔɔ ni miishɛɛ yɔɔ mli. Shi ehe miihia ni ole mɛi ni ji anɔkwale kɛ apasa nanemɛi.
Jeee “Nanemɛi” Fɛɛ Ji Nanemɛi Kpakpai
Obalanyo ni pila yɛ oshara ni ba kɛjɛ shishijee lɛ mli lɛ ji football kuu ko mlinyo ni eyɛ “nanemɛi” babaoo. Kui amlibii loo akutsei bibii amlibii bɔɔ naanyo ni miishɛɛ yɔɔ mli yɛ be babaoo mli. Shi nɛkɛ naanyobɔi nɛɛ baanyɛ afee nɔ ni bɛ shiŋŋ. Ni kɛlɛ ni ooona “nanemɛi” babaoo ni yɛ nakai beaŋ nɔŋŋ lɛ ooolaaje amɛ fɛɛ lɛ baafee nɔ ni jeɔ mɔ nijiaŋ wui waa diɛŋtsɛ taakɛ obalanyo lɛ bayoo lɛ. Etsɛɛɛ ni onaa mɔ ko ni okɛ lɛ bɔ, shi ni ooona nanemɛi kpakpai lɛ bɛ nakai.
Niiatsɛmɛi aloo mɛi ni yɔɔ gbɛhei ni kwɔlɔ lɛ baanyɛ ana “nanemɛi” babaoo yɛ gbɛ ni waaa nɔ. Taakɛ Biblia lɛ kɛɔ lɛ: “Niiatsɛ yɛ nanemɛi babaoo.” “Mɔ fɛɛ mɔ sumɔɔ ni ena hiɛ yɛ gbɔmɛi ni yɔɔ gbɛi lɛ ahiɛ; mɔ fɛɛ mɔ kɛɔ akɛ enaanyo ji mɔ ni keɔ nii lɛ.” (Abɛi 14:20; 19:6, Today’s English Version) Shi amɛteŋ mɛi enyiɛ yɔɔ jwɛŋmɔi krokomɛi fe enɛ? Ni kɛji akɛ mɔ ni akɛ lɛ eyabɔ naanyo nɛɛ laaje shika aloo gbɛhe ni eyɔɔ lɛ, etsɛɛɛ ni amɛnaa akɛ amɛbɛ nanemɛi kwraa.
Mɛi ni amɛgbɔmɔtsei yɔɔ fɛo lɛ hu naa “nanemɛi” babaoo hu—ni amɛteŋ mɛi pii ji mɛi ni gbɔmɔtso lɛ ji nɔ ni gbalaa amɛ. Shi nɛkɛ naanyobɔɔ nɛɛ baanyɛ afee nɔ ni yeɔ awui, ebaanyɛ elaaje kɛ haomɔ ba, tamɔ bɔ yɛ latsaa be mli. No hewɔ lɛ ehe miihia diɛntsɛ ni . . .
Ohala Mli
Hɛɛ, nilee yɛ nanemɛi ni ahalaa mli lɛ mli. Yɛ be babaoo mli lɛ apasa nanemɛi dɔkɔɔ amɛnaa koni amɛna duromɔ yɛ yiŋtoo ko ni amɛhiɛ. “Mɔ ni dɔkɔɔ enaa ehaa enaanyo lɛ, eeŋmɛ yaa eha enajifamɔi”—Abɛi 29:5, The Jerusalem Bible.
No hewɔ lɛ susumɔ nanemɛi ni ebɔle ohe bianɛ lɛ ahe. Ani amɛnaa onɔ hewalɛ kɛhaa ekpakpa loo efɔŋ? Ani amɛsusuɔ amɛ pɛ amɛhe, amɛsane ŋɔɔ amɛnaa, aloo amɛbooo mɔ ko toi? Ani amɛkɛ mlifu feɔ nii ni amɛnyaa nifeemɔi ni kɛ osharai baa lɛ ahe? Mɛni ji su ni amɛhiɛ yɛ yei loo hii ahe? Ani amɛbuɔ mɔ aloo amɛkɛ amɛhe kpɛtɛɔ mɛi ahe babaoo tsɔ ni ekolɛ amɛbɛ jeŋba diɛŋtsɛ po? Ani onaa mɛi ni okɛ amɛ bɔɔ lɛ akɛ amɛjeee anɔkwafoi, amɛjeee gbɔmɛi ni anyɛɔ akɛ he fɔɔ amɛnɔ? Ani amɛkɛ tsofai fɔji tsuɔ nii? Ani amɛnuɔ daa babaoo? Kɛji nakai ni lɛ, belɛ oyɛ oshara mli. Ekolɛ oji anɔkwafo, ohe tse, oji heshibalɔ, shi kaimɔ: “Naanyobɔɔ fɔŋ fiteɔ jeŋba kpakpa.”—1 Korintobii 15:33.
Oshara kpeteŋkpele ni yɔɔ nanemɛi fɔji ni akɛ amɛ bɔɔ lɛ mli ji akɛ obaakase amɛ. Fiofio, ekolɛ obayoŋ, shi amɛsu kɛ baŋ baaka onɔ. Taakɛ Biblia lɛ kɛɔ lɛ: “Mɔ ni kɛ nilelɔi nyiɛɔ lɛ, eeetsɔ nilelɔ, shi mɔ ni kɛ kwashiai bɔɔ lɛ, eeena amane.”—Abɛi 13:20.
Ewaaa akɛ oootɔ, yɛ be mli ni otaoɔ nanemɛi lɛ. Ni kaaha enɛ miije onijiaŋ wui. Nanamɛi kpakpai akpekpei abɔ yɛ je lɛŋ lolo. No hewɔ lɛ te ooofee tɛŋŋ ona nɛkɛ nanemɛi kpakpai nɛɛ?
[Mfoniri ni yɔɔ baafa 4]
Onanemɛi baanyɛ ana onɔ hewalɛ waa