Sanebimɔi ni jɛ Kanelɔi Adɛŋ
◼ Ani bɔfo Paulo fata Kristofoi anɔyeli kuu lɛ he?
Shishinumɔ yɛ he akɛ aaamu sane naa akɛ Paulo fata Kristofoi anɔyeli kuu ni hi shi yɛ klɛŋklɛŋ afii oha lɛ mli lɛ he.
Sane mlitsɔɔmɔ fioo ko pɛ Biblia lɛ kɛhaa yɛ mɛi ni feɔ mra be mli nɔyeli kuu lɛ he, ni anaa ehe saji titri lɛ yɛ Bɔfoi lɛ Asaji yitso 15. Nakai sane lɛ tsɔɔ akɛ yɛ afi 49 Ŋ.B. lɛ, kuu ni feɔ nɔyeli kuu lɛ ji “bɔfoi lɛ kɛ onukpai ni yɔɔ Yerusalem lɛ.” Namɛi ji nɛkɛ hii nɛɛ?—Bɔfoi lɛ Asaji 15:2, 4, 6.
Yakobo, ni ji Yesu nyɛ bi lɛ ni mɔ ni fee sɛinɔtalɔ yɛ kpee ko ni akɛsusu kɛji akɛ ehe miihia ni Jeŋmajiaŋbii ni atsake amɛ kɛba Kristojamɔ mli lɛ aye Mose Mla lɛ ni ketiafoo fata he lɛ nɔ lo lɛ. Bɔfo Petro ná nakai sane he susumɔ lɛ mli gbɛfaŋnɔ. Sane lɛ wieɔ Yuda (ni atsɛɔ lɛ Barsaba) kɛ Sila he akɛ “nyɛmimɛi lɛ ateŋ onukpai,” shi etsɔɔɔ pɔtɛɛ akɛ amɛji nɔyeli kuu lɛ mli bii. (Bɔfoi lɛ Asaji 15:7, 13, 22) Sane lɛ ji akɛ Biblia lɛ etsɔɔɔ mɛi fɛɛ ni feɔ nɔyeli kuu lɛ agbɛi. Mɛi komɛi nuɔ he akɛ ekolɛ akɛ Paulo fataaa he akɛni eji maŋsɛɛ sanekpakpa shiɛlɔ gbɛfalɔ lɛ hewɔ, ni akɛ lɛ ji mɔ ni kɛ sanebimɔ ni jɛ Antiokia yɛ Siria lɛ ba lɛ hewɔ.
Eji anɔkwale akɛ Paulo fataaa “nyɔŋma kɛ enyɔ” ni kɛ Yesu nyiɛ lɛ ahe, ejaakɛ ahala Matia akɛ lɛ to Yuda Iskariot najiaŋ.a Ni asaŋ ahalaaa kaselɔ Yakobo hu, eyɛ mli akɛ eka shi faŋŋ akɛ efata nɔyeli kuu lɛ he. (Bɔfoi lɛ Asaji 6:2; 1:1626) Agbɛnɛ hu, Yesu jie ehe kpo etsɔɔ Paulo ni ehala lɛ akɛ ‘dɛŋdade ni baatere egbɛi kɛya jeŋmaji lɛ amli.’ No hewɔ lɛ Paulo batsɔ “bɔfo ni jeee gbɔmɛi aŋɔɔ ejɛ, ni jeee gbɔmɔ ko nɔ hu etsɔ, shi moŋ Yesu Kristo kɛ Tsɛ Nyɔŋmɔ” lɛ. Etsɛ lɛ diɛŋtsɛ ehe akɛ “bɔfo kɛha jeŋmaji lɛ.”—Bɔfoi lɛ Asaji 9:3-6, 15; Galatabii 1:1; Romabii 11:13; 1 Korintobii 9:1; 15:7, 8.
Akɛ nɔ kroko ni tsɔɔ akɛ Paulo batsɔ “bɔfoi lɛ kɛ onukpai” lɛ ni kudɔɔ asafoi lɛ ateŋ mɔ ko lɛ, susumɔ nɔ ni etsu yɛ Nyɔŋmɔ hewalɛ naa lɛ he. Paulo ŋmala Kristofoi a-Hela Ŋmalɛi lɛ amli woji 14. Petro kɛ “wɔsuɔlɔ nyɛmi Paulo” niŋmaai lɛ to “ŋmalɛi krokomɛi” lɛ ahe. (2 Petro 3:15, 16) Paulo titri ji mɔ ni nyiɛ Kristojamɔ ni agbɛ ashwa lɛ hiɛ ni ekɛ gbɛtsɔɔmɔi pii ha asafoi lɛ. Eniŋmai ni jɛ mumɔŋ lɛ tsɔɔ akɛ Paulo diɛŋtsɛ saa saji yɛ bei komɛi amli. Nakai ji bɔ ni ebaakpa gbɛ yɛ nakai be lɛ mli nɔyeli ku lɛ ateŋ mɔ ko ni kɛ kuu lɛ teŋ ejɛkɛ ni woloŋmaa hu yɔɔ shɔ̃ɔ lɛ he. (1 Korintobii 5:11-13; 7:10, 17) Shi yɛ bei komɛi amli lɛ, ekɛ sane bafɔɔ kuu muu lɛ fɛɛ hu hiɛ taakɛ bɔ ni sane ni yɔɔ Bɔfoi lɛ Asaji yitso 16 lɛ feɔ he mfoniri lɛ.
Paulo ŋma eyaha Tito akɛ, “Paulo, ni ji Nyɔŋmɔ tsulɔ, kɛ Yesu Kristo bɔfo.” Ni eŋma hu akɛ: “Enɛ hewɔ mishio yɛ Kreta, koni oto nii ni eshwɛ lɛ gbɛjianɔ pɛpɛɛpɛ, ni owowoo onukpai yɛ maŋ fɛɛ maŋ mli taakɛ bɔ ni mikɛo momo lɛ.” (Tito 1: 1, 5) No hewɔ lɛ yɛ be mli ni efaa gbɛ lɛ eka shi faŋŋ akɛ Paulo wie kɛha nɔyeli kuu muu lɛ fɛɛ.—Bɔfoi lɛ Asaji 16:4, 5.
No hewɔ lɛ, eyɛ mli akɛ nitsumɔ ni Nuŋtsɔ lɛ kɛwo edɛŋ lɛ kɔɔ gbɛfaa babaoo he, ni yɛ be babaoo mli lɛ ekɛ nɔyeli kuu lɛ ekpeee akɛni ebɛ amɛmasɛi hewɔ moŋ, shi odaseyeli ni tsɔɔ bɔ ni Nyɔŋmɔ kɛ Kristo tsɔ enɔ amɛkɛ lɛ tsu nii lɛ tsɔɔ akɛ Paulo ji nakai kuu lɛ mlinyo.
[Shishigbɛ niŋmai]
a Nɛkɛ be mli ni agbe bɔfo Yakobo.—Bɔfoi lɛ Asaji 12:2.
[Wiemɔ ni akɔ ni akɛmiitsu nii]
“Akɛ nɔ ni wɔna akɛ wɔteŋ mɛi komɛi yiŋ amɛba amɛbagba nyɛnaa kɛ wiemɔi komɛi ni amɛkɛ-futu nyɛjwɛŋmɔi amɛkɛɛ akɛ afolɔnyɛ ketia ni awaje Mose mla lɛ nɔ, tsɛ wɔwoko amɛ nakai kita hewɔ lɛ . . . wɔtsu Yuda kɛ Sila ni amɛkɛ amɛdaaŋ wiemɔ abajaje nɛkɛ nibii nɛɛ nɔŋŋ amɛtsoɔ nyɛ. Ejaakɛ esa mumɔ krɔŋkrɔŋ lɛ hiɛ, ni esa wɔ hu wɔhiɛ akɛ wɔkɛ jatsu ko akafo nyɛnɔ dɔŋŋ akɛ ja nii ni he hiaa nɛɛ nɔŋŋ: akɛ, nyɛhi loi ni agbe aha wɔji kɛ lá kɛ kooloi ni ashɔtɔ kɛ ajwamaŋbɔɔ; kɛji nyɛhi enɛɛmɛi lɛ, nyɛfee jogbaŋŋ. Nyɛhia shi jogbaŋŋ.”—Bɔfoi lɛ Asaji 15:24, 27-29.
[Baafa 31]July Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ