Namɔ Ŋma Biblia Lɛ?
MƐI ni amɛyiŋ feɔ amɛ kɔshikɔshi lɛ baakɛɛ akɛ, “Saji ni teɔ shi woɔ ehe sɔŋŋ eyi Biblia lɛ mli obɔ. Ni kɛfata he lɛ, adesa jeŋ nilee yɔɔ mli. No hewɔ lɛ, te aaafee tɛŋŋ ni mɔ ko aaakpɛlɛ Biblia lɛ nɔ akɛ eji shihilɛ mli gbɛtsɔɔmɔ nɔ ni anyɛɔ akɛ he fɔɔ nɔ?”
Ani okɛ jwɛŋmɔ ni mɛi ni yiŋ feɔ amɛ kɔshikɔshi nɛɛ hiɛ akɛ Biblia lɛ jeee nɔ ko nɔ ko fe wolo ko kɛkɛ ni miitsɔɔ adesai ni tɔɔ fa lɛ asusumɔ lɛ kpaa gbee? Osɔfoi komɛi feɔ nakai. Swiss Protestant nyɔŋmɔjamɔ he nilelɔ Karl Barth ni gbo nyɛsɛɛ nɛɛ lɛ ŋma yɛ wolo Kirchliche Dogmatik (Sɔlemɔ lɛ Hemɔkɛyeli ni Abiii Sane yɛ He) lɛ mli akɛ: “Gbalɔi lɛ kɛ bɔfoi lɛ nyɛɔ amɛtɔɔ yɛ wiemɔ kɛ niŋmaa mli.” Eji anɔkwale akɛ, sɔrɔtofeemɔ baanyɛ aba yɛ wiemɔ mli ni abaanyɛ ana enɛ yɛ bɔ ni mɛi ni fe Biblia mli niŋmalɔ kome aaawie yɛ sane ko ni eba he lɛ mli. Ni abaanyɛ ana wiemɔi ni kɛ akwɛ yɛ ehiɛ gbɛ lɛ eeefee tamɔ nɔ ni esoro no kwraa yɛ wiemɔi krokomɛi ni ana yɛ Biblia lɛ hei komɛi lɛ ahe. Shi ani enɛɛmɛi ji nii ni teɔ shi woɔ amɛhe diɛŋtsɛ? Ani Biblia lɛ ji nɔ ko ni gbɔmɛi kɛkɛ fee? Yɛ anɔkwale mli lɛ, namɔ ŋma Biblia lɛ?
Hetoo lɛ mli ka shi faŋŋ: “Gbɔmɛi wie kɛjɛ Nyɔŋmɔ ŋɔɔ,” shi te fee tɛŋŋ ni amɛle nɔ ni esa akɛ amɛwie ni amɛŋmala hu? Gbɔmɔ ni wɔtsɛ wiemɔ kɛjɛ esaji amli lɛ ni ji bɔfo Simon Petro yaa nɔ etsɔɔ mli akɛ “mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋ lɛ ni amɛwieɔ.”—2 Petro 1:21, New World Translation.
Yɛ anɔkwale mli lɛ, Biblia lɛ maa nɔ mi shii abɔ akɛ eji “Nyɔŋmɔ wiemɔ.” Awie yɛ enɛ he yɛ Lala 119 mli kukuji 176 lɛ fɛɛ mli shii 176! Nɔ ni haa enɛ feɔ nɔ ko ni yɔɔ sɔrɔto waa ji akɛ niŋmalɔi miisumɔ ni titri lɛ amɛha ale akɛ amɛŋmala saji pɔtɛɛ komɛi amɛshwie shi. Shi gbɔmɛi ni ŋmala Biblia lɛ tamɔɔɔ nakai. Esa akɛ akɛ woo lɛ fɛɛ aha Nyɔŋmɔ. Lɛ ewolo ni, jeee amɛ amɛ nɔ̃ ni.—1 Tesalonikabii 2:13; 2 Samuel 23:2.
‘Mumɔ Krɔŋkrɔŋ lɛ Tsirɛɔ Amɛ’—Yɛ Mɛɛ Gbɛ Nɔ?
‘Mumɔ krɔŋkrɔŋ lɛ tsirɛɔ amɛ’ yɛ mɛɛ gbɛ nɔ? Wolo ko ni aŋma ayaha Kristofonyo Timoteo ni hi shi yɛ klɛŋklɛŋ afi oha lɛ mli lɛ ha hetoo: “Ŋmalɛ fɛɛ ŋmalɛ . . . jɛ Nyɔŋmɔ mumɔ lɛŋ.” Atsɔɔ wiemɔ “jɛ Nyɔŋmɔ mumɔ lɛŋ” lɛ shishi kɛjɛ Biblia mli shishijee wiemɔ kɛha Hela wiemɔ the·oʹpneu·stos ni eshishi diɛŋtsɛ ji “Nyɔŋmɔ mu” lɛ mli. Nyɔŋmɔ kɛ enifeemɔ hewalɛ—emumɔ krɔŋkrɔŋ lɛ—tsu nii ni ‘emu’ esusumɔi ewo niŋmalɔi lɛ ajwɛŋmɔi amli. No hewɔ lɛ, Yehowa Nyɔŋmɔ ji Biblia lɛ Jɛɛhe kɛ Feelɔ. Esusumɔi ji nɔ ni kudɔ eŋmaa tamɔ nitsumɔtsɛ kɛ woloŋmalɔ tsu nii koni eŋmala woji eha lɛ lɛ.—2 Timoteo 3:16.
Agbɛnɛ hu nɛkɛ “Nyɔŋmɔ mu” he shishinumɔ nɛɛ hu tamɔ Biblia mli wiemɔ ‘mumɔ krɔŋkrɔŋ lɛ tsirɛɔ amɛ’ lɛ. Yɛ mɛɛ gbɛ nɔ? Akɛ ‘tsirɛɔ amɛ’ nɛɛ tsuɔ nii yɛ Hela mli akɛtoɔ lɛji ni kɔɔyɔɔ tsirɛɔ amɛ kɛtsɔɔ gbɛ pɔtɛɛ ko nɔ lɛ he.(Okɛto Bɔfoi lɛ Asaji 27:15, 17 he.) No hewɔ lɛ, be mli ni kɔɔyɔɔ tswaa ni etsirɛɔ lɛlɛ ko yisɛɛ lɛ, nakai nɔŋŋ hu Biblia mli niŋmalɔi lɛ susu, amɛwie ni amɛŋmala yɛ Nyɔŋmɔ gbɛtsɔɔmɔ shishi, beni mumɔ krɔŋkrɔŋ lɛ tsirɛɔ amɛ ni ‘emuɔ’ eshwieɔ amɛnɔ lɛ.
Gbɔmɛi ni Nyɔŋmɔ kɛ Amɛ Tsu Nii Koni Amɛŋmala
Biblia mli niŋmalɔi lɛ ahe yinɔsane fioo ko pɛ wɔyɔɔ. Amɛbuuu amɛhe kwraa akɛ amɛhe hiaa babaoo, shi moŋ, amɛbɔ mɔdɛŋ ni amɛkɛ woo aha Nyɔŋmɔ kɛtsɔ teemɔ ni amɛtee amehe lɛ nɔ. Shi wɔle moŋ akɛ mɛi ni fata he ji maŋsɔɔlɔi, kojolɔi, gbalɔi, maŋtsɛmɛi, tookwɛlɔi, okwaafoi kɛ wolɛi—hii aaafee 40 sɔŋŋ. No hewɔ lɛ, ehi akɛ Biblia lɛ ji shɛɛ sane ni jɛ Nyɔŋmɔ ŋɔɔ moŋ, shi miishɛɛ, sɔrɔtofeemɔ kɛ adesa henumɔ yɛ mli.
Biblia mli niŋmalɔi babaoo leee amɛhe. Afii ohai babaoo gbalaa amɛmli ni esoro amɛsu kɛ baŋ kɛ niiashikpamɔ kɛ agbɛnɛ kwasafoŋ shihilɛ kɛ tsɔsemɔ loo woloŋlee. Shi kɛlɛ, kɛ amɛji obalaŋtai loo mɛi ni amɛdara jio, amɛniŋmaa lɛ fɛɛ tsɔɔ ekomefeemɔ. Amɛniŋmalamɔ lɛ he aaafee afi 1,600, ni amɛŋmala aaahu kɛyashi be mli ni amɛgbe wolo lɛ naa. Kɛ akwɛ mli jogbaŋŋ lɛ, obaana akɛ Biblia mli wiemɔi lɛ fɛɛ tsɔɔ gbeekpamɔ ni yɔɔ naakpɛɛ. No hewɔ lɛ Biblia lɛ jieɔ e-Feelɔ kome jwɛŋmɔ kpo, tsɛbele, akɛ niŋmalalɔi babaoo tsu nii.
Ani esaaa akɛ enɛ aha “wɔmɔ nii ni wɔnu” kɛjɛ nɛkɛ wolo ni ekaaa, ni ji Biblia nɛɛ mli lɛ “mli ni awa”? Ani esaaa akɛ wɔmuɔ sane naa taakɛ bɔ ni Petro ni ŋma sane ni tamɔ nɛkɛ lɛ mu sane naa lɛ: “Enɛɛmɛi fɛɛ maa gbalɔi lɛ asane lɛ nɔ mi kɛhaa wɔ, nɔ ni kɛ wɔbo toi jogbaŋŋ lɛ, eeehi lɛ, ejaakɛ etamɔ kane ni kpɛ yɛ he ni ewo duŋ?”—Hebribii 2:1; 2 Petro 1:19,—The New English Bible.
Shi agbɛnɛ, nɔ ni mɛi kɛɔ akɛ Biblia lɛ teɔ shi woɔ ehe lɛ hu? Ani efeɔ nakai? Te ohaa hetoo ohaa tɛŋŋ?
[Akrabatsa ni yɔɔ baafa 4]
“Mɛɛ wolo ni yɔɔ naakpɛɛ nɛ! Nɔ ni yɔɔ naakpɛɛ kɛha mi fe emli saji lɛ ji gbɛ ni etsɔɔ nɔ ewieɔ lɛ, heni wiemɔ lɛ batsɔɔ tamɔ adebɔɔ mli nɔ ko tamɔ tso, tamɔ fɔfɔi, tamɔ ŋshɔ, tamɔ ŋulamii, tamɔ gbɔmɔ diɛŋtsɛ. Ekwɛɔ, ehoɔ yɔɔ, ekpɛɔ, eŋmɔɔ, mɔko leee nɔ hewɔ, mɔ ko leee mɛni hewɔ, mɔ ko naa nɔ fɛɛ nɔ akɛ etamɔ adebɔɔ mli nɔ. Eji Nyɔŋmɔ Wiemɔ lɛlɛŋ, ni esoro kwraa yɛ woji krokomɛi ni yeɔ adesa nilee he odase lɛ he.”—Afii ohai 19 lɛ mli German lalafolɔ kɛ woloŋmalɔ Heinrich Heine wiemɔ ni kɔɔ Biblia lɛ he.
[Mfoniri ni yɔɔ baafa 4]
Taakɛ bɔ ni kɔɔyɔɔ tsirɛɔ ŋshɔ hiɛ lɛji lɛ, nakai nɔŋŋ ‘Nyɔŋmɔ mumɔ krɔŋkrɔŋ lɛ tsirɛ’ Biblia mli niŋmalɔi lɛ