Yesu Kristo​—Nyɔŋmɔ, Gbɔmɔ, Aloo Adesa Mli Gbɔmɔ Ko?

RƆK lala ko ni aje shishi yɛ Broadway yɛ New York maŋtiase lɛ mli yɛ 1971 lɛ bafee nɔ ni kɛ naataomɔ babaoo ba, ejaakɛ ekɔɔ jamɔ sane ko he. Shi ekolɛ, naataomɔ babaoo bɛ sane lɛ mli tamɔ mɔ ni lala lɛ diɛŋtsɛ wieɔ ehe lɛ.

Nɛkɛ lalai nɛɛ ekome bi akɛ: “Yesu Kristo Mɔ Ni Ehe Gbɛi Fe Fɛɛ, ani osusuɔ akɛ oji mɔ ni akɛɔ akɛ oji lɛ?” Namɛi gbɔmɛi ni hi shi yɛ afii oha lɛ mli lɛ kɛɔ akɛ Yesu ji? Yesu diɛŋtsɛ bi ekaselɔi lɛ nakai sane lɛ ni enine shɛ hetoi sɔrɔtoi babaoo nɔ. (Mateo 16:​13, 14) Ŋmɛnɛ, yɛ nɔ ni miihe ashɛ afii 2,000 sɛɛ nɛɛ, mɔ ni Yesu Kristo diɛŋtsɛ ji lɛ etsɔ naataomɔ sane.

Ani mɔ ni Yesu ji diɛŋtsɛ lɛ kɔɔ he eko? Te mɔ ni eji diɛŋtsɛ lɛ aaasa wɔhe aha tɛŋŋ? Ojogbaŋŋ, gbɔmɛi ni he gbɛi yɛ blema bei lɛ amli kudɔ jeŋ yinɔsane, ni esa wɔ fɛɛ wɔhe, kɛ jeee yɛ gbɛ pɔtɛɛ nɔ po. Shi ŋmɛnɛ amɛgboi. No hewɔ lɛ, eyɛ mli akɛ nɔ ni amɛfee lɛ sa wɔhe moŋ, shi ŋmɛnɛ nɔ ni amɛfeɔ lɛ nyɛŋ asa wɔhe.

Shi, yɛ Yesu Kristo gbɛfaŋ lɛ, shihilɛ lɛ yɛ sɔrɔto kwraa. Akpekpei abɔ heɔ yeɔ, ni amɛyɛ odaseyeli ni ma shi shiŋŋ kɛha nɛkɛ hemɔkɛyeli nɛɛ, akɛ Yesu hiɛ ka ŋmɛnɛ, jeee akɛ adesa yɛ shikpɔŋ nɔ, shi moŋ akɛ mumɔ ni yɔɔ hewalɛ yɛ ŋwɛi. Nɔ ni Yesu feɔ, titri lɛ yɛ wɔ afii ohai 20 nɛɛ mli lɛ esa adesai fɛɛ he babaoo. Agbɛnɛ, bɔni Yesu naa wɔnɔ hewalɛ lɛ kɔɔɔ nɔ ni etsu yɛ be ni eho lɛ mli lɛ pɛ he. Emli kpaa kɛbashɛɔ nɔ ni efeɔ bianɛ, kɛ agbɛnɛ yɛ miishɛɛ mli lɛ, nɔ ni ebaafee yɛ wɔsɛɛ be mli lɛ hu he.

Yɛ be mli ni wɔkuɔ sɛɛ wɔyaa wɔ saneyitso: Yesu Kristo​—Nyɔŋmɔ, Gbɔmɔ, aloo Adesa Mli Gbɔmɔ Ko? lɛ nɔ lɛ, mɛni ji nɔ ni osusuɔ? Adesa mli Yesu Kristo baatsɔɔ akɛ ejeee Nyɔŋmɔ, ni asaŋ ejeee gbɔmɔ, no hewɔ lɛ ehe ehiaaa ni wɔsusu no he dɔŋŋ. Shi yɛ gbɛ kroko nɔ lɛ, wɔbaasumɔ ni wɔkɛ miishɛɛ akase Yesu ni yɔɔ wala mli ni Nyɔŋmɔ kɛ hewalɛ ewo edɛŋ koni ekɛ naanɔ sɛɛnamɔi abaha adesai lɛ he nii.