Apasa Jamɔ Fee Ehe Ajwamaŋ
1. Te mɛi pii esusu ajwamaŋbɔɔ he amɛha tɛŋŋ?
MƐI komɛi tsɛɔ enɛ akɛ nitsumɔ ni etsɛ fe fɛɛ—no ji ajwamaŋ nitsumɔ lɛ loo nyenyeŋtswibɔɔ. Taakɛ afɔɔ kɛ nitsumɔ lɛ, nɛkɛ wiemɔi nɛɛ tsɔɔ nɔ kometoo, eetsɔɔ yoo ajwamaŋ ni hɔɔ egbɔmɔtso ehaa hii. Ni kɛlɛ, be ko ba ni abuɔ nɛkɛ nifeemɔ nɛɛ akɛ nɔ ko ni hiɛ yɔɔ nyam!
2, 3. Yɛ mɛɛ gbɛ nɔ esoro nii ni yei osɔfoi loo wɔyei lɛ tsu yɛ blema Babilon lɛ yɛ Yehowa mla ni ekɛha Israel yɛ hii kɛ yei ajwamaŋi ahe lɛ he kwraa yɛ?
2 Yɛ be mli ni ewieɔ blema Babilon osɔfoyeli lɛ he lɛ, Nilelɔ S. H. Hooke, ni ekase Biblia maji ashitsaa he nii lɛ kɛɛ akɛ: “Osɔfoi lɛ jeee hii pɛ, yei hu fa babaoo yɛ amɛgbatsui lɛ amli. Abuɔ lɛ akɛ eji woo kɛ mɔ ko fata yei osɔfoi loo okɔmfoi lɛ ahe, ni wɔnuɔ he akɛ maŋtsɛmɛi pii jɔɔ amɛbiyei anɔ koni amɛyatsɔmɔ osɔfoi. . . . Amɛnitsumɔ ni he hiaa fe fɛɛ ji ni amɛtsu nii akɛ ajwamaŋi krɔŋkrɔŋi yɛ amɛ gbijuji wuji lɛ ashishi. . . . Yei pii ni tamɔ nɛkɛ yɛ Ishtar [fɔmɔ kɛ ta nyɔŋmɔyoo] lɛ sɔlemɔ tsu loo gbatsu lɛ mli.”
3 Esoro enɛ yɛ jamɔ ni Israel maŋ lɛ kɛbaaha Yehowa Nyɔŋmɔ lɛ he kwraa. Mla lɛ jaje yɛ faŋŋ mli akɛ: “Israel biyei lɛ ateŋ mɔ ko akafee ehe sɔlemɔ tsu mli ajwamaŋ, ni Israel bihii lɛ hu ateŋ mɔ ko mɔ ko akafee ehe ajwamaŋbɔlɔ [hii kɛ hii ni kɛ amɛhe feɔ yakayaka nii]. Okɛ ajwamaŋbɔɔ mli nikee nii loo gbee apaabɔɔ nii ko akaba Yehowa o-Nyɔŋmɔ lɛ we lɛ obaha yɛ shiwoo ko hewɔ; ejaakɛ Yehowa o-Nyɔŋmɔ lɛ miihi enyɔ lɛ fɛɛ.” (5 Mose 23:17, 18; New World Translation) No hewɔ lɛ aheee ajwamaŋbɔɔ he nyɔmɔwoo ko akɛ nikee nii ahaaa Nyɔŋmɔ sɔlemɔ we lɛ. Abuɔ ajwamaŋbɔɔ ni jamɔ nifeemɔ ko bɛ sɛɛ lɛ po akɛ hiɛgbejianii. Afa Israelbii lɛ akɛ: “Kaabule obiyoo ni oha ebɔ ajwamaŋ, koni shikpɔŋ lɛ akabɔ ajwamaŋ, ni shikpɔŋ lɛ nɔ bayi tɔ kɛ musu.” Mla ni akɛteɔ shi awoɔ ajwamaŋbɔɔ kɛ hii kɛ hii ni kɛ amɛhe feɔ yakayaka nii, ni atsɔɔ mli akɛ eji “nihii nii” lɛ yɛ kɛha maŋ lɛ fɛɛ yibaamɔ, yɛ mumɔŋ kɛ gbɔmɔtsoŋ fɛɛ.—3 Mose 19:29; 20:13.
Mumɔŋ Ajwamaŋbɔɔ Ehiii fe Fɛɛ
4. Mɛni ji ajwamaŋbɔi lɛ ateŋ nɔ ni ehiii fe fɛɛ lɛ?
4 Shi yɛ Nyɔŋmɔ hiɛ lɛ, ajwamaŋbɔɔ lɛ eko yɛ ni ehiii kwraa—mumɔŋ ajwamaŋbɔɔ, aloo ni mɔ ko aaakɛɛ akɛ ajaa anɔkwale Nyɔŋmɔ lɛ yɛ be mli ni yɛ anɔkwale mli lɛ ekɛ jamɔ kɛ hedɔɔ haa nyɔŋmɔi krokomɛi. Blema Yerusalem kpa ejwamaŋbɔɔ lɛ mli kɛtee hiɛ. Ekɛ nikee nii ha nakai jeŋmaji ni kɛ lɛ bɔɔ mumɔŋ ajwamaŋ lɛ, ni ebule anɔkwale jamɔ lɛ.—Ezekiel 16:34.
5, 6. Namɛi bɔɔ mumɔŋ ajwamaŋ yɛ afii ohai 20 nɛɛ mli lɛ, ni mɛɛ sanebimɔi enɛ kɛbaa?
5 Jɛ lɛŋ jamɔ gbɛjianɔtoi lɛ mumɔŋ ajwamaŋbɔɔ ebu yɛ afii ohai 20 nɛɛ po mli. Kristendom ji nakai gbɛjianɔtoo—ni Biblia lɛ tsɛɔ lɛ akɛ “Babilon kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ” fa titri.—Kpojiemɔ 17:5.
6 Shi mɛni baaba Babilon kpeteŋkpele lɛ nɔ yɛ naagbee? Ni te nɔ ni baajɛ mli aba yɛ enaagbee lɛ baasa bo kɛ osuɔlɔi ahe aha tɛŋŋ? Kɛji akɛ Nyɔŋmɔ kɛ fɔbuu kojomɔ ba blema Israel ajwamaŋbɔlɔi anɔ lɛ, mɛni ebaafee yɛ ŋmɛnɛŋmɛnɛ beaŋ mumɔŋ ajwamaŋbɔɔ he? Nikasemɔi ni nyiɛ sɛɛ nɛɛ baasusu nakai sanebimɔi lɛ kɛ ekrokomɛi ni kɔɔ he lɛ ahe.