Feemɔ Klalo Kɛha Yehowa Gbi Lɛ!
Tesalonikabii a-Klɛŋklɛŋ Wolo lɛ Mli Saji Oti
YEHOWA gbi! Kristofoi ni yɔɔ blema Tesalonika lɛ susu akɛ ebɛŋkɛ! Ani amɛsane lɛ ja? Mɛɛ be mli ebaaba? Enɛ ji sane kome ko ni he hiaa ni awie he yɛ bɔfo Paulo klɛŋklɛŋ wolo ni eŋma kɛjɛ Korinto eyaha Tesalonikabii, aaafee afi 50 yɛ wɔ Ŋmɛnɛŋmɛnɛ Beaŋ lɛ mli.
Paulo kɛ Sila to asafo ni yɔɔ Tesalonika, ni ji Roma nɔyeli he ni ji Makedonia maŋnɔkwɛmɔ maŋtiase lɛ. (Bɔfoi lɛ Asaji 17:1-4) Yɛ sɛɛ mli lɛ, Paulo jie amɛyi, ekɛ ŋaawoo ha amɛ, ni ewie Yehowa gbi lɛ he yɛ eklɛŋklɛŋ wolo ni ekɛyaha Tesalonikabii lɛ mli. Wolo nɛɛ he baanyɛ aba sɛɛnamɔ aha wɔ hu, titri lɛ akɛni Yehowa gbi lɛ ebɛŋkɛ kpaakpa agbɛnɛ lɛ hewɔ.
Jiemɔ Yi ni Owo Hewalɛ
Klɛŋklɛŋ lɛ Paulo jie Tesalonikabii lɛ ayi. (1:1-10) Yijiemɔ sa amɛ yɛ amɛ anɔkwayeli nitsumɔ kɛ tsuishiŋmɛɛ lɛ hewɔ. Amɛsa yijiemɔ hu, akɛni amɛkɛ “mumɔ krɔŋkrɔŋ mli miishɛɛ mɔ wiemɔ lɛ mli yɛ amanehulu babaoo mli” lɛ hewɔ. Ani ojieɔ mɛi krokomɛi ayi taakɛ Paulo fee lɛ?
Bɔfo lɛ eto okadi kpakpa efɔ shi. (2:1-12) Yɛ niseniianii ni afee lɛ yɛ Filipi lɛ fɛɛ sɛɛ lɛ, ena ‘ekaa yɛ Nyɔŋmɔ mli koni ekɛjaje sanekpakpa lɛ’ etsɔɔ Tesalonikabii lɛ. Ekpoo naadɔkɔmɔ, hiɛjoomɔ kɛ anunyam ni eeetao. Paulo tsɔɔɔ jatsu ehaaa amɛ, shi moŋ emli jɔ kɛha amɛ ni etsɔ tamɔ bii anyɛ ni hiɛɔ ebii dɔdɔɔdɔ kɛha amɛ. Mɛɛ nɔkwɛmɔ nɔ kpakpa po enɛ ji kɛha onukpai ŋmɛnɛ nɛkɛ!
Paulo wiemɔi ni nyiɛ sɛɛ lɛ wo Tesalonikabii lɛ hewalɛ ni amɛdamɔ shi shiŋŋ kɛ aawa amɛ yi. (2:13–3:13) Amɛŋmɛ amɛtsui shi yɛ yiwaa ni amɛmaŋbii kɛba amɛnɔ lɛ mli ni Timoteo kɛ sanekpakpa ni kɔɔ amɛmumɔ shihilɛ lɛ he amaniɛ ebaha Paulo. Bɔfo lɛ sɔle koni amɛteke nɔ yɛ suɔmɔ mli ni amɛtsuii afi shi shiŋŋ. Nakai nɔŋŋ hu Yehowa Odasefoi sɔleɔ bianɛ amɛhaa amɛnanemɛi heyelilɔi ni awaa amɛ yi lɛ, amɛwoɔ amɛ hewalɛ kɛ amɛaanyɛ, ni amɛmli filiɔ amɛ yɛ amaniɛbɔɔ ni kɔɔ amɛ anɔkwayeli he lɛ he.
Nyɛhia Shi akɛ Mɛi ni Hiɛ Ka yɛ Mumɔŋ!
Nɔ ni Tesalonikabii lɛ anine shɛ nɔ yɛ no sɛɛ ji ŋaawoo. (4:1-18) Esa akɛ amɛnyiɛ bɔ ni aaasa Nyɔŋmɔ hiɛ, ni amɛjie nyɛmimɛi asuɔmɔ babaoo kpo, ni amɛkɛ amɛniji atsu nii ni amɛkɛna nibii ni he hiaa amɛ. Agbɛnɛ, esa akɛ amɛshɛje mɛi krokomɛi amii kɛ hiɛnɔkamɔ akɛ kɛ Yesu ba lɛ, abaatee heyelilɔi ni akɛ mumɔ efɔ amɛ ni amɛtsɔ hiɛ amɛgboi lɛ ashi klɛŋklɛŋ ni amɛkɛ lɛ ayafee ekome. Yɛ no sɛɛ lɛ, kɛ mɛi ni afɔ amɛ mu ni yɔɔ wala mli lɛ gboi ni atee amɛ shi lɛ, amɛbaafata Kristo kɛ mɛi ni atee amɛ shi momo lɛ ahe kɛya ŋwɛi shihilɛ mli.
Yɛ no sɛɛ lɛ Paulo wie Yehowa gbi lɛ he ni etee nɔ ekɛ ŋaawooi krokomɛi ha. (5:1-28) Yehowa gbi lɛ miiba tamɔ julɔ baa, kɛ hiɛkpatamɔ ni baa trukaa yɛ bolɔmɔ akɛ: “Hejɔlɛ yɛ ni wɔyɛ shweshweeshwe!” lɛ sɛɛ. No hewɔ lɛ esa akɛ Tesalonikabii lɛ ahi shi akɛ mɛi ni hiɛ kamɔ yɛ mumɔŋ, ni hemɔkɛyeli kɛ suɔmɔ dama lɛ kɛ dadefai ni ji yiwalaheremɔ nɔhiɛkamɔ lɛ miibu amɛhe. Esa akɛ amɛkɛ bulɛ ni mli kwɔ waa aha mɛi ni kwɛɔ asafo lɛ nɔ lɛ, ni amɛtsi amɛhe kɛjɛ efɔŋ feemɔ he, taakɛ bɔ ni esa akɛ wɔ hu wɔfee lɛ.
Esa akɛ Paulo klɛŋklɛŋ wolo ni ekɛyaha Tesalonikabii lɛ akanya wɔ ni wɔjie wɔnanemɛi heyelilɔi lɛ ayi ni wɔwo amɛ hewalɛ. Esa akɛ etsirɛ wɔ hu ni wɔfee nɔkwɛmɔ nɔ kpakpa yɛ jeŋba loo subaŋ mli. Ni eka shi faŋŋ akɛ emli ŋaawoo lɛ baanyɛ aye abua wɔ ni wɔfee klalo wɔha Yehowa gbi lɛ.
[Akrabatsa/Mfoniri ni yɔɔ baafa 22]
Dama kɛ Dadefai: Yɛ be mli ni ewoɔ mumɔŋ hiɛtsɛɛ he hewalɛ lɛ, Paulo ŋma akɛ: ‘Nyɛhaa wɔhiɛ aka shi, ni wɔwo hemɔkɛyeli kɛ suɔmɔ dama lɛ, ni wɔbumɔ dadefai ni ji yiwalaheremɔ nɔhiɛkamɔ lɛ.” (1 Tesalonikabii 5:8) Dama ji dade ni buɔ tabilɔ lɛ tsitsi he, ni nɔ ni akɛfee ji dade totoi, kɔsɔŋkɔsɔŋi, aloo dade ŋmiiŋmi. Nakai nɔŋŋ hu hemɔkɛyeli dama lɛ buɔ wɔhe yɛ mumɔŋ. Ni blema dadefai lɛ hu? Yɛ be babaoo mli lɛ, dade akɛfeɔ, ni eji tawuu mli fai ni baa tabilɔ lɛ yi yɛ tawuu be mli. Bɔ ni dadefai buɔ tabilɔ yitso he lɛ, nakai nɔŋŋ yiwalaheremɔ nɔhiɛkamɔ lɛ hu buɔ jwɛŋmɔŋ nyɛmɔi ahe, ni eyeɔ ebuaa Kristofonyo lɛ koni ehiɛ emuuyeli mli. Kwɛ bɔ ni ehe hiaa ha akɛ Yehowa webii aaawo mumɔŋ tawuu nii ni tamɔ nɛkɛ!—Efesobii 6:11-17.