Aafɔ Bo Nine ni Oba “Mɛi ni Sumɔɔ Heyeli” Kpokpaa Wulu nɔ Kpee Lɛ
KƐJƐ November 1989 mli kɛbaa nɛɛ, sane ni kɔɔ heyeli he lɛ ebaje kpo fe be fɛɛ. Gbɔmɛi ni yɔɔ Europa Bokagbɛ maji lɛ amli lɛ titri miina maŋkwramɔŋ heyeli mli ŋɔɔmɔ fe bɔ ni amɛna yɛ afii 40 kɛ babaoo ni eho lɛ amli.
Shi heyeli ko yɛ ni he hiaa waa kwraa fe maŋkwramɔŋ heyeli. Wɔbaanyɛ wɔkane enɛ he sane yɛ Nyɔŋmɔ Wiemɔ lɛ ni ji Biblia lɛ mli. Yesu Kristo kɛɛ be ko akɛ: “Ni nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:32) Hɛɛ, aha Kristofoi ni amɛjɔɔ amɛhe nɔ lɛ eye amehe kɛjɛ gbɔmɔ gbeyeishemɔ kɛ esha kɛ gbele nyɔŋyeli shishi, taakɛ wɔkaneɔ yɛ Romabii 6:18, 22 lɛ. Wɔkaneɔ hu akɛ “he ni Nuŋtsɔ [Yehowa] mumɔ lɛ yɔɔ lɛ, jɛi heyeli yɔɔ.” (2 Korintobii 3:17) Yɛ anɔkwale mli lɛ, Nyɔŋmɔ Wiemɔ lɛ kɛ hiɛnɔkamɔ kpakpa haa akɛ, “bɔɔnii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.”—Romabii 8:21.
Kɛji akɛ mɔ ko miisumɔ ni ena Kristofoi aheyeli yɛ ŋmɛnɛŋmɛnɛ be nɛɛ mli lɛ, belɛ esa akɛ ebɔ enɛ feemɔ he mɔdɛŋ diɛŋtsɛ. Ejeee gbɛ ni waaa ko kɛkɛ nɔ tsɔmɔ. Ni aaaya nɔ ana heyeli nɛɛ mli ŋɔɔmɔ lɛ biɔ mɔdɛŋbɔɔ kroko, yɛ hewalɛi ni shɔɔ nakai heyeli lɛ kɛjɛɔ wɔdɛŋ lɛ hewɔ: Satan Abonsam, eyiwalɛ je lɛ, kɛ wɔ diɛŋtsɛ esha su ni wɔna kɛjɛ fɔmɔ mli lɛ. Yehowa Nyɔŋmɔ etsɔ e-Wiemɔ ni jɛ mumɔŋ lɛ, emumɔ krɔŋkrɔŋ lɛ, kɛ egbɛjianɔtoo loo esafo ni anaa lɛ nɔ ekɛ yelikɛbuamɔ eha.—Luka 11:13.
Bɔni afee ni aye abua mɛi fɛɛ ni sumɔɔ heyeli lɛ koni amɛmɔ heyeli ni amɛhiɛ mli lɛ mli waa lɛ, afi nɛɛ mli Yehowa Odasefoi akpokpaa wuji anɔ kpeei lɛ tsuɔ saneyitso “Mɛi ni Sumɔɔ Heyeli” lɛ he nii. Nɛkɛ kpeei nɛɛ baahe gbii etɛ, ni ebaaje shishi kɛjɛ Sohaa leebi 9:30 ni ebaaya nɔ aahu kɛyashi Hɔgbaa shwane 4:00. Mɛi fɛɛ ni baa kpeei nɛɛ ashishi lɛ baana mumɔŋ hejɔɔmɔ, ni abaawaje amɛ kɛtsɔ wiemɔi ni kanyaa mɔ, sanebimɔi kɛ hetooi ni yɔɔ miishɛɛ, nɔkwɛmɔ nii ni mɔɔ shi, kɛ ŋmɛnɛŋmɛnɛ beaŋ drama ni kanyaa mɔ nɔ; ni asaŋ esaaa akɛ wɔkuɔ wɔhiɛ wɔshwieɔ naanyobɔɔ ni miishɛɛ yɔɔ mli lɛ mli ŋɔɔmɔ ni wɔkɛ nanemɛi memeji kɛ nanemɛi heei lɛ baana, miishɛɛ ni wɔbaana akɛ wɔkɛ nanemɛi akpei abɔ krokomɛi efee ekome kɛmiila wɔ Maŋtsɛyeli lalai, ni wɔmiina sɔlemɔ ni jɛ tsuiŋ yɛ mɛi fɛɛ hiɛ lɛ mli gbɛfaŋnɔ lɛ nɔ.
Eba akɛ Yehowa tsuji fɛɛ ni amɛjɔɔ amɛhe nɔ lɛ eŋmɛŋ gbɛ ni nɔ ko nɔ ko atsi amɛ kpeei nɛɛ ashishi ni amɛaahi yɛ be mli ni amɛjeɔ shishi yɛ Sohaa leebi lɛ gbɛ. Ni kwɛmɔ ni oba, ni jeee kɛ o-Biblia kɛ lala wolo pɛ, shi kɛ pɛnsil kɛ wolo ni obaaŋmala saji otii owo mli lɛ hu. Agbɛnɛ ba, akɛ mɔ ni hiɛ yɔɔ emumɔŋ hiamɔ nii anɔ diɛŋtsɛ akɛ gbɔmɛi ni amɛye amɛhe lɛ fa.—Mateo 5:3, NW.
“Mɛi Ni Sumɔɔ Heyeli” Kpokpaa Wuji Anɔ Kpeei
Akɛni wɔmiikpa gbɛ akɛ etsɛŋ ni abaajie naatsii ni akɛba wɔnitsumɔ lɛ nɔ hewɔ lɛ, wɔto wɔ 1991 kpokpaa wuji anɔ kpeei lɛ ahe gbɛjianɔ taakɛ nyɛnaa yɛ shishigbɛ lɛ. Shi kɛ ajieee naatsii lɛ yɛ be ni sa mli taakɛ wɔkpaa gbɛ lɛ, belɛ bɔni afee ni wɔnyɛ wɔfee nɛkɛ kpeei nɛɛ lɛ, wɔto gbɛjianɔ ni wɔbaafee Twi kpeei enyɔ yɛ Cote d’ivoire kɛ kpeei etɛ yɛ Ewe, Ga kɛ Twi mli yɛ Benin, kɛmiiya afi lɛ naagbee mli, yɛ be ni baahi aha Nigeria kɛ Cote d’Ivoire nitsumɔ be niji lɛ.
GHANA
DATE
December 20-22, 1991
MAŊ WIEMƆI
ACCRA Twi, English
SUNYANI Twi
December 27-29, 1991
ACCRA Ga, Ewe
KUMASI Twi
January 3-5, 1992
KUMASI Twi
KOFORIDUA Twi
TAKORADI Twi
January 10-12, 1992
BOLGATANGA Twi
COTE DʹIVOIRE
DATE
August 16-18, 1991
MAŊ WIEMƆI
BOUAKE French
KOUMASSI-Abidjan French
August 23-25, 1991
KOUMASSI-Abidjan French
YOPOUGON-Abidjan French
August 30-September, 1991
YOPOUGON-Abidjan French
KOUMASSI-Abidjan Twi
BURKINA FASO
DATE
December 20-22, 1991
MAŊ WIEMƆI
OUAGADOUGOU French
December 27-29, 1991
OUAGADOUGOU Moore
Nifeemɔ ko ni Esaaa ni Ehoɔ Ohe
“Nyɛfea enɛ ni nyɛŋɔkai mi.” Wɔ-Nuŋtsɔ Yesu Kristo wie nɛkɛ wiemɔi ni anaa yɛ Luka 22:19 nɛɛ yɛ be mli ni eto egbele Iɛ kaimɔ lɛ shishi lɛ. Yesu gbele lɛ ji nɔ ni kɛ naanɔ wala yɛ Paradeiso shihilɛ mli he gbɛkpamɔ lɛ haa adesai. No hewɔ lɛ egbele lɛ ji nɔ ko ni esa akɛ wɔkai. Ani okɛ ohe baawo ekaimɔ lɛ mli afi nɛɛ?
Ofainɛ kpɛlɛmɔ nɛkɛ ninefɔɔ ni jɛ Yehowa Odasefoi aŋɔɔ nɛɛ nɔ koni obafata amɛhe ni akɛkai nɛkɛ nifeemɔ ni he hiaa waa nɛɛ. Abaafee kaimɔ lɛ yɛ be mli ni hulu eyanyɔ shi sɛɛ yɛ gbi ni kɛ Nisan 14 kpaa gbee yɛ Biblia lɛ nyɔŋtsere kalenda lɛ nɔ lɛ nɔ. Kadimɔ gbi lɛ yɛ okalenda lɛ nɔ koni ohiɛ akakpa nɔ. Mɔ ni kɛ ninefɔɔ nɛɛ haa bo lɛ baanyɛ atsɔɔ bo he pɔtɛɛ ni abaakpe yɛ kɛ be lɛ hu.