“Nuŋtsɔ Lɛ Gbi Lɛ”
“MIYƐ mumɔ mli yɛ Nuŋtsɔ lɛ gbi lɛ nɔ.” (Kpojiemɔ 1:10) Nɛkɛ ji bɔ ni bɔfo Yohane ni egbɔ, ni afee ehe mfoniri yɛ yiteŋgbɛ nɛɛ wie, yɛ Biblia mli wolo ni ji Kpojiemɔ lɛ klɛŋklɛŋ yitso lɛ mli. Ewiemɔi lɛ yeɔ ebuaa wɔ ni wɔleɔ be mli ni ninaai ni yɔɔ naakpɛɛ ni etee nɔ etsɔɔ mli lɛ baa mli.
Shi jeee mɛi fɛɛ kɛ bɔ ni atsɔɔ Kpojiemɔ 1:10 shishi aha nɛɛ kpaa gbee. Akɛ nɔkwɛmɔ nɔ lɛ, German Biblia shishitsɔɔlɔ Jõrg Zink tsɔɔ shishi akɛ: “Mumɔ krɔŋkrɔŋ yi mi obɔ—nakai gbi lɛ Hɔgbaa ni.” Shi Biblia shishitsɔɔmɔi pii tsɔɔ Hela wiemɔ kuku teiʹ ky·ri·a·keiʹ he·meʹrai shishi akɛ “Nuŋtsɔ lɛ gbi lɛ.” Shi mɛi pii kɛɔ yɛ shishigbɛ niŋmaa mli akɛ etsɔɔ Hɔgbaa. Ani enɛ ja?
German Herders Bibelkommentar, ni ji Katolek wolo ko lɛ tsɔɔ yiŋtoo ni yɔɔ nɛkɛ susumɔ nɛɛ sɛɛ beni ekɛɔ akɛ: “Jeee Naagbee Kojomɔ Gbi lɛ, ni ale hu akɛ ‘Nuŋtsɔ lɛ Gbi lɛ’ agbalaa jwɛŋmɔ kɛbaa nɔ [yɛ Kpojiemɔ 1:10] lɛ, shi moŋ otsi lɛ mli gbi pɔtɛɛ ko. Mra be mli Kristofoi lɛ je shishi amɛye otsi lɛ klɛŋklɛŋ gbi lɛ akɛ gbi kɛha amɛsɔɔmɔi asɔlemɔ titri kɛjɛ klɛŋklɛŋ afii oha lɛ teŋgbɛ tɔɔ. (Bɔfoi 20:7; 1 Kor. 16:2)” Shi ŋmalɛi enyɔ ni nakai wolo lɛ tsɛ lɛ jeee odaseyeli ni tsɔɔ yɛ gbɛ ko nɔ akɛ klɛŋklɛŋ afii oha lɛ mli Kristofoi lɛ bu otsi lɛ mli klɛŋklɛŋ gbi lɛ akɛ “gbi kɛha amɛsɔɔmɔi asɔlemɔ titri.”
Klɛŋklɛŋ ŋmalɛ lɛ, Bɔfoi lɛ Asaji 20:7 lɛ ŋma fɔ shi kɛkɛ akɛ, Paulo, enanemɛi gbɛfalɔi lɛ kɛ Kristofoi ni jɛ Troa lɛ bua amɛhe naa yɛ otsi lɛ mli klɛŋklɛŋ gbi lɛ nɔ kɛha niyeli. Akɛni Paulo baashi amɛ enɔ jetsɛremɔ ni enaŋ amɛ kɛyashi be saŋŋ hewɔ lɛ, eŋɔ hegbɛ ni be lɛ kɛhaa lɛ ni ekɛ amɛ wie babaoo.
Ŋmalɛ ni ji enyɔ, 1 Korintobii 16:2 lɛ wo Kristofoi ni yɔɔ Korinto lɛ hewalɛ koni amɛkɛ shika ko afɔ shi aha “daa otsi mli klɛŋklɛŋ gbi lɛ” koni amɛna nɔ ko ni amɛkɛye amɛbua mɛi ni ehia amɛ yɛ Yudea lɛ. Woloŋlelɔ Adolf Deissmann susu akɛ ekolɛ gbi nɛɛ baanyɛ afee nyɔmɔwoo gbi. Yɛ fɛɛ sɛɛ lɛ, anyɛɔ atsuɔ Paulo ŋaawoo lɛ he nii, ejaakɛ shika baanyɛ ata yɛ otsi lɛ mli.
He ko he ko bɛ Biblia lɛ mli ni awie yɛ akɛ Kristofoi ni hi shi yɛ bɔfoi lɛ agbii lɛ amli lɛ bu otsi lɛ mli klɛŋklɛŋ gbi, ni atsɛɔ lɛ bianɛ akɛ Hɔgbaa lɛ, akɛ Kristofoi ahejɔɔmɔ gbi ko, loo gbi ni ato ama shi aha amɛ daa kpeei kɛha jamɔ. Bɔfoi lɛ agbele sɛɛ pɛ kɛkɛ ni ababu Hɔgbaa yɛ nɛkɛ gbɛ nɔ ni abatsɛ lɛ akɛ, “Nuŋtsɔ lɛ gbi.” Enɛ ji hemɔkɛyeli kwamɔ ni Yesu kɛ bɔfoi lɛ diɛŋtsɛ gba fɔ shi lɛ fa.—Mateo 13:36-43; Bɔfoi lɛ Asaji 20:29, 30; 1 Yohane 2:18.
Belɛ mɛni ji “Nuŋtsɔ lɛ gbi lɛ”? Kpojiemɔ 1:10 mli saji lɛ tsɔɔ akɛ Yesu ji Nuŋtsɔ lɛ ni egbi ji nakai gbi lɛ. Nyɔŋmɔ Wiemɔ lɛ haa wɔleɔ wiemɔi tamɔ “wɔ-Nuŋtsɔ Yesu Kristo gbi lɛ” akɛ eji kojomɔ be kɛha adesai kɛ Paradeiso ni aaaku sɛɛ akɛba ekoŋŋ.—1 Korintobii 1:8; 15:24-26; Filipibii 1:6, 10; 2:16.
No hewɔ lɛ, Hans Bruns ja yɛ eshishitsɔɔmɔ kɛ esane he wiemɔ Das Neue Testament (Kpaŋmɔ Hee) lɛ mli beni ekɛɛ akɛ: “Mɛi komɛi kɛɔ doo akɛ [Yohane] eewie Hɔgbaa he yɛ biɛ, shi eka shi faŋŋ akɛ eewie Nuŋtsɔ lɛ Gbi kpeteŋkpele lɛ, ni yɛ fɛɛ sɛɛ lɛ nɔ ni etsɔɔ mli kɛnyiɛ sɛɛ lɛ fɛɛ kɔɔ he lɛ he.” W. E. Vine kɛɔ akɛ: “‘Nuŋtsɔ lɛ Gbi lɛ’ . . . ji Gbi ni E-baajie ekojomɔ kpo yɛ je lɛ nɔ.” Fritz Rienecker Lexikon zur Bibel (Lexicon of the Bible) lɛ kɛɔ akɛ “Nuŋtsɔ lɛ gbi lɛ” kɔɔ “kojomɔ gbi” lɛ he yɛ faŋŋ mli.
Shishinumɔ ni ja ni kɔɔ “Nuŋtsɔ lɛ gbi” lɛ he lɛ yeɔ ebuaa wɔ ni wɔnuɔ Kpojiemɔ wolo lɛ fɛɛ shishi. Agbɛnɛ odaseyeli lɛ ji akɛ, nakai gbi lɛ eje shishi momo. Belɛ kwɛ bɔ ni ehe hiaa akɛ ‘wɔɔbo Kpojiemɔ gbalɛ wiemɔi lɛ toi ni wɔye nibii ni aŋmala yɛ mli lɛ anɔ’!—Kpojiemɔ 1:3, 19.
[Mfoniri ni yɔɔ baafa 27]
Akɛ Kpojiemɔ wolo Iɛ mli kuku fɛɛ kuku shishitsɔɔmɔ ni mli tse ni yɔɔ faŋŋ eha yɛ “Revelation—lts Grand Climaz At Hand!” wolo Iɛ mli. Obaanyɛ ona nɛkɛ wolo ni yeɔ ebuaa Biblia kasemɔ ni ekanemɔ yɔɔ miishɛɛ nɛɛ eko kɛjɛ Yehowa Odasefoi adɛŋ