Yesu Shihilɛ kɛ Esɔɔmɔ Nitsumɔ

SANE ni aŋma, ni ji “Yesu Gbe Nitsumɔ ni Nyɔŋmɔ Kɛha Lɛ lɛ Fɛɛ Naa,” ni yɔɔ baafai ni nyiɛ sɛɛ lɛ amli lɛ ji saji babaoo ni wɔŋmala kɛtsara nɔ yɛ saneyitso ni ji “Yesu Shihilɛ kɛ Esɔɔmɔ Nitsumɔ” lɛ shishi lɛ mli naagbee nɔ. Nɛkɛ sane nɛɛ eje kpo yɛ Buu-Mɔɔ lɛ mli yɛ nɔ ni fe afi ekpaa nɛ yɛ ekomekomei 149 ni etsara nɔ lɛ amli, ni ejeɔ shishi yɛ April 1, 1985, blɔfo nɔ lɛ mli.

Wɔhiɛ ka nɔ akɛ nɛkɛ saji ni wɔŋmala kɛtsara nɔ yɛ Buu-Mɔɔ lɛ mli lɛ eye ebua bo koni onyiɛ ŋaawoo ni bɔfo Paulo kɛha akɛ ‘wɔkwɛ Yesu jogbaŋŋ’ ni wɔye famɔ ni Nyɔŋmɔ kɛha akɛ ‘wɔbo lɛ toi’ lɛ nɔ lɛ sɛɛ. (Hebribii 12:​2, 3; Mateo 17:⁠5) Mɛi pii eŋmala wɔ woji yɛ afii abɔ ni eho lɛ amli ni amɛkɛha wɔle akɛ eye ebua amɛ waa ni amɛnyɛ amɛfee enɛ. Mɔ ko ŋma akɛ: “Etamɔ nɔ ni eewie ni miibo lɛ toi ni miikwɛ nɔ ni efeɔ lɛ hu. Mibasumɔ esane waa yɛ nɛkɛ saji ni aŋmala nɛɛ ahewɔ.”

Kanelɔ kroko hu ŋma akɛ: “Etamɔ nɔ ni eko fɛɛ eko ni ba lɛ miiwie oti ko ni mihiɛ ho nɔ beni mikaneɔ Biblia lɛ he. Mina bɔ ni mikase nibii sɔrɔtoi ni ba yɛ Yesu shihilɛ mli lɛ jogbaŋŋ yɛ be mli ni amɛba lɛ naa kɛtsɔ saji ni aŋmala lɛ eko fɛɛ eko kanemɔ nɔ lɛ he miishɛɛ waa.” Mɛi babaoo etsɔɔ hiɛsɔɔ ni tamɔ nɛkɛ ni amɛyɔɔ yɛ nibii ni Yesu fee yɛ esɔɔmɔ nitsumɔ lɛ mli kɛ be mli ni efee kɛ he ni efee yɛ ni amɛkase lɛ he.

Yoo ko ni jɛ Spain lɛ kɛɛ: “Mibua saji ni aŋmala lɛ fɛɛ naa kɛjɛ shishijee tɔɔ. Etsɔɔ onukpai kɛ gbekɛbii fɛɛ anii jogbaŋŋ. Miye afii 44, shi kɛ mikane saji nɛɛ, minaa he miishɛɛ waa. Efeɔ tamɔ nɔ ni miyɛ jɛmɛ yɛ be mli ni yinɔsane mli nibii nɛɛ baa mli lɛ.”

Yoo ko ni yɔɔ United States lɛ ŋma akɛ: “Bɔ ni saji lɛ yɔɔ kukuji ni aŋmala yɛ wiemɔ ni shishinumɔ yɔɔ mlɛo hu mli lɛ hewɔ lɛ, eha miwu ebafata wɔhe yɛ wɔweku nikasemɔ lɛ mli. Mibinuu fioo ni eye afii kpaanyɔ lɛ kɛɛ miŋma nyɛ wolo nɛɛ ni mikɛda nyɛ shi akɛ amrɔ nɛɛ etsɛ hu miikase Biblia lɛ. Eebi ni wɔsɛɛ kɛ aŋmala saji nɛɛ fɛɛ agbe naa lɛ, abua fɛɛ naa afee lɛ wolo kome bɔni afee ni enyɛ ekɛ eskulbii agba emli sane.”

Ekolɛ onuɔ he tamɔ nikanelɔ ni wie nɛkɛ nyɛsɛɛ nɛɛ lɛ niiahenumɔ lɛ pɛpɛɛpɛ: “Kɛ misusu akɛ etsɛŋ ni nɛkɛ saji ni aŋmalaa nɛɛ baaba naagbee akɛni ábɔi Kristo shihilɛ mli naagbee gbii lɛ ahesusumɔ hewɔ lɛ, edɔɔ mi fioo. Mashwe nɛkɛ saji nɛɛ aahu ni makwɛ he ni aŋmaa awoɔ yɛ Buu-Mɔɔ lɛ mli lɛ be fɛɛ be.” Wɔhiɛ ka nɔ akɛ bo hu obaana “Yesu Shihilɛ kɛ Esɔɔmɔ Nitsumɔ” lɛ he saji ni wɔŋmala nɛɛ mli naagbee nɔ nɛɛ he miishɛɛ waa diɛŋtsɛ.