Etsɛŋ Hela Loo Gbele Bɛ Dɔŋŋ!

MƆ KO MƆ KO nyaaa ehe ni aaaye lɛ he, ni asaŋ adesai sumɔɔɔ ni amɛgboi. Tsofafeemɔ mli nilelɔ ko kɛɛ: “Etamɔ nɔ ni wala sɛɛkɛlɛ taomɔ lɛ yɛ jeŋ fɛɛ yɛ yinɔsane be fɛɛ mli yɛ gbɔmɛi ashihilɛi pii amli. Ekɔɔ shishijee nii ni tsirɛɔ mɔ koni abaa wala yi lɛ he . . . Ponce de Leon ji gbɔmɛi ni tsara nɔ kakadaŋŋ ni kɛ amɛshihilɛ be tsu nii amɛkɛtao wala sɛɛkɛlɛ lɛ ateŋ mɔ ni ehe gbɛi fe fɛɛ kɛkɛ. Ajɔɔ tsofa-feemɔ mli nilee lɛ mli nɔ ni fa nɔ aha wala sɛɛkɛlɛ yibaamɔ kɛtsɔ hela kɛ gbele ni awuɔ ashiɔ lɛ nɔ.”

Yɛ be babaoo mli lɛ, gbele haa wɔmligbɛ bɔɔ su lɛ piŋɔ aahu akɛ kɛ eye nanemɛi kɛ weku mlibii anɔ kunim lɛ, wɔbɔɔ mɔdɛŋ ni wɔkpee nɔnyɛɛ lɛ naa amrɔ nɔŋŋ. Wolo, Funeral Customs the World Over lɛ kɛɛ: “Kuu ko bɛ, ni bɔ ni ehiŋmɛi gbeleko kwraa ha loo ehiŋmɛi egbele waa ha, ni kɛ aŋmɛɛ amɛhe ni amɛfee bɔ ni amɛsumɔɔ yɛ bɔ ni amɛaanyɛ naa lɛ, ekɛ woo loo kusum-nifeemɔi efuŋ emlibii lɛ agbohii. . . . Etsuɔ jeŋ muu fɛɛ kanyamɔi ni mli kwɔ vii lɛ ahe nii. Ni aaatsu he nii lɛ tamɔ nɔ ni ‘ja,’ ni ehe nii ni atsuŋ, titri lɛ kɛha mɛi ni bɛŋkɛ kpaakpa yɛ weku, henumɔ, shihilɛ, niiashikpamɔi loo yɛ tsakpaai krokomɛi amli lɛ tamɔ nii ni ‘ejaaa,’ nii ni ashi ni afeee, nii ni esa akɛ akpa he fai loo hiɛ agbo yɛ he. . . . [Gbɔmɔ] ji bɔɔnɔ ko ni kɛ woo loo kusum-nifeemɔ fuɔ egbohii.”

Hela kɛ Gbele Shishijee

No hewɔ lɛ jwɛŋmɔ ni ahiɛ akɛ gbi ko lɛ abaajie hela kɛ gbele kɛya lɛ ŋɔɔ mɛi anaa waa, shi ani nɔ ko yɛ ni aaadamɔ nɔ ahe nɔ ko ni tamɔ nɛkɛ aye? Eko yɛ diɛŋtsɛ, ni jwɛŋmɔ yɛ mli, anyɛɔ akɛ he fɔɔ nɔ, ni tɔmɔ bɛ mli. No ji wɔ Bɔlɔ lɛ Wiemɔ ni jɛ mumɔŋ lɛ​—Ŋmalɛ Krɔŋkrɔŋ ni ji Biblia lɛ.

Nakai wolo lɛ tsɔɔ adesai ahaomɔ lɛ shishijee mli yɛ faŋŋ mli. Ekɛɔ wɔ akɛ Nyɔŋmɔ bɔ klɛŋklɛŋ adesa lɛ, Adam, ni ekɛlɛ yato paradeiso abɔɔ ko mli yɛ Boka Teŋgbɛ he ko. Abɔ Adam akɛ mɔ ni yeɔ emuu; eleee hela kɛ gbele. Etsɛɛɛ ni ŋa ni yeɔ emuu hu bafata ehe, ni amɛyi enyɔ lɛ fɛɛ na naanɔ wala gbɛkpamɔ yɛ shikpɔŋ nɔ lɛ mli ŋɔɔmɔ.​—1 Mose 2:​15-17, 21-24.

Shihilɛ ni ŋɔɔ nɛɛ etsɛɛɛ tsɔ. Mɛni hewɔ? Ejaakɛ Adam jɛ pɛsɛmkunya mli ehala heyeli gbɛ kɛjɛ Nyɔŋmɔ he. Deŋmegbomɔ, piŋmɔ, hela, kɛ naagbee lɛ gbele jɛ mli ba. (1 Mose 3:​17-19) Adam shwiei bana shihilɛ ni miishɛɛ bɛ mli ni ehala nɛɛ akɛ gboshinii. Romabii 5:12 tsɔɔ mli akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.” Romabii 8:22 kɛfataa he akɛ: “Wɔle akɛ bɔɔnii lɛ fɛɛ kɛwɔ dɔmɔɔ ntsɔi ni amɛkɛ wɔ kɔmɔɔ kɛbashi ŋmɛnɛŋmɛnɛ.”

Yɛ Shikpɔŋ Nɔ loo yɛ Ŋwɛi?

Kɛlɛ, Biblia lɛ maa nɔ mi kɛhaa wɔ akɛ etsɛŋ ni Nyɔŋmɔ baaku sɛɛ ekɛ adesai toibolɔi aba miishɛɛ shihilɛ ni Adam kɛ Hawa laaje lɛ lɛ mli ekoŋŋ. Kpojiemɔ 21:​3, 4 kɛɔ akɛ: “Ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” Blema gbalɔ ko hu tsɔ hiɛ ena be mli ni “maŋbii lɛ ateŋ mɔ ko ekɛɛŋ akɛ: ‘Mihe miiye.’”​—Yesaia 33:​24, New World Translation.

Ani obaanyɛ osusu jeŋ ko ni helatsamɔ hei, gbohiiatoo hei, kɛ gbohiiabui bɛ jɛmɛ lɛ he? Ani obaanyɛ osusu shihilɛ kɛmiiya nɔ yɛ be fɛɛ mli, ni piŋmɔ kɛ gbele he gbeyeishemɔ bɛ jɛmɛ lɛ he? Hɛɛ, Nyɔŋmɔ shiwoo lɛ saa henumɔi ni yɔɔ wɔ fɛɛ wɔmli tɔŋŋ lɛ ahe. Ni kɛlɛ, te wɔɔfee tɛŋŋ wɔna nɔmimaa akɛ nɛkɛ gbɛkpamɔ nɛɛ yɛ kɛha wɔshibɔlemɔ ŋulami Shikpɔŋ nɛɛ​—shi jeee ŋwɛi? Kadimɔ ŋmalɛi ni atsi ta kɛtsɔ hiɛ lɛ amli wiemɔi lɛ. Kpojiemɔ yitso 21 klɛŋklɛŋ kuku lɛ wieɔ “ŋwɛi hee kɛ shikpɔŋ hee” he. Ni wiemɔ ni mli ka shi faŋŋ lɛ je kpo akɛ Nyɔŋmɔ kɛ adesai baahi shi, ni amɛaatsɔ ewebii. Nɔ ni nyiɛ shiwoo ni yɔɔ Yesaia wolo lɛ mli akɛ mɔ ko he yeŋ dɔŋŋ lɛ sɛɛ ji wiemɔ akɛ “mɛi ni yɔɔ mli lɛ,” “aŋɔ amɛnishaianii lɛ afa amɛ.”

No hewɔ lɛ, nɛkɛ shiwooi ni woɔ mɔ hewalɛ nɛɛ kɔɔ shikpɔŋ nɔ shihilɛ he! Ni amɛkɛ Yesu sɔlemɔ kɛha e-Tsɛ lɛ kpaa gbee: “Ha afee osuɔmɔnaa nii yɛ shikpɔŋ lɛ nɔ hu, taakɛ afeɔ yɛ ŋwɛi lɛ.”​—Mateo 6:​10, NW.

Mɛni Hewɔ Etsɛŋ Kwraa?

Yehowa Odasefoi eye ebua gbɔmɛi akpekpei abɔ koni amɛyoo akɛ nɛkɛ shiwooi nɛɛ baaba mli yɛ wɔsɛɛ be ni ebɛŋkɛ kpaakpa lɛ mli. Shi, mɛni nɔ amɛdamɔɔ amɛnuɔ nɔmimaa ni mli wa waa nakai lɛ he? Yɛ odaseyelii babaoo ni tsɔɔ akɛ ŋmɛnɛŋmɛnɛ nibii agbɛjianɔtoo ni yɔɔ shikpɔŋ nɔ lɛ “naagbee gbii” lɛ amli wɔyɔɔ nɛɛ lɛ hewɔ. (2 Timoteo 3:​1-5) Yesu kaselɔi lɛ bi okadi ni baatsɔɔ be mli ni nibii agbɛjianɔtoo lɛ naagbee lɛ baaba. Yɛ hetoo-hamɔ mli lɛ, Yesu gba nibii ni yaa nɔ yɛ je lɛŋ bianɛ ni etee nɔ kɛjɛ be mli ni Jeŋ Ta I fɛ yɛ 1914 lɛ kɛbaa nɛɛ lɛ efɔ shi.a Kɛkɛ ni ekɛfata he akɛ: “Beni nyɛaana nii nɛɛ fɛɛ lɛ, nyɛlea akɛ eshɛ agboi lɛ anaa eta. Lɛlɛŋ miikɛɛ nyɛ akɛ: Nɛkɛ yinɔ nɛɛ hoŋ, ja nii nɛɛ fɛɛ eba mli da.” No hewɔ lɛ, ŋmɛnɛŋmɛnɛ jeŋ gbɛjianɔtoo nɛɛ naagbee baaba yɛ gbɔmɛi ayinɔ ni yɔɔ wala mli yɛ 1914 lɛ awala be mli.​—Mateo 24:​33, 34.

Yɛ nakai beaŋ lɛ, Yehowa Nyɔŋmɔ kɛ nitsumɔ baawo e-Bi, Kristo Yesu dɛŋ, akɛ eya ni eyakpata nibii fɛɛ ni kɛ piŋmɔ kɛ haomɔ baa Shikpɔŋ fɛfɛo ni ji shibɔlemɔ ŋulami nɛɛ nɔ lɛ ahiɛ. Biblia lɛ wieɔ efɔŋfeemɔ ni aaajie kɛaaya lɛ he akɛ “Nyɔŋmɔ Ofe lɛ gbi wulu lɛ nɔ ta” yɛ Harmagedon.​—Kpojiemɔ 16:​14, 16.

Adesai babaoo ni sheɔ Nyɔŋmɔ gbeyei baaje nii ni yɔɔ gbeyei ni baaba nɛɛ mli ni amɛbaahi wala mli ni amɛna Kristo Yesu toiŋjɔlɛ nɔyeli lɛ shishijee. (Kpojiemɔ 7:​9, 14; 20:⁠4) Eyɛ mli akɛ enɔyeli lɛ baajɛ ŋwɛi moŋ, shi mɛi fɛɛ ni hiɔ shikpɔŋ nɔ​—mɛi ni je Harmagedon ta lɛ mli lɛ kɛ akpekpei toi akpekpei abɔ ni abaatee amɛ shi kɛjɛ gbohii ateŋ lɛ fɛɛ baana sɛɛnamɔ ni jɛɔ mli baa lɛ mli ŋɔɔmɔ. Shiwoo lɛ baaba mli diɛŋtsɛ akɛ: “Ja [Kristo] eye maŋtsɛ kɛyashi beyinɔ ni [Nyɔŋmɔ] eeeŋɔ henyɛlɔi lɛ fɛɛ eto enajiashi. Naagbee henyɛlɔ ni abaafo esɛɛ ji gbele.”​—1 Korintobii 15:​25, 26.

No hewɔ lɛ wɔbaanyɛ ni wɔkɛ hekɛnɔfɔɔ abo akɛ: “Etsɛŋ hela loo gbele bɛ dɔŋŋ!” Enɛ jeee lamɔ ko ni lakaa mɔ, ni asaŋ ejeee susumɔ ko kɛkɛ ni ana kulɛ eba mli. Eji Yehowa Nyɔŋmɔ “ni maleee” lɛ shiwoo ni ma shi shiŋŋ. Ani okɛ ohe baafɔ nɛkɛ hiɛnɔkamɔ nɛɛ nɔ? Ehe baanyɛ aba sɛɛnamɔ aha bo kɛya naanɔ!​—Tito 1:⁠2.

[Shishigbɛ niŋmai]

[Mfoniri ni yɔɔ baafa 7]

Etsɛŋ ni akɛ gbɔmɔtsoŋ hewalɛnamɔ kpakpa kɛ naanɔ wala baaye hela kɛ gbele najiaŋ