Nuu Nitsumɔ

“¡Ropa, zapato, casa, y comida!” Nɛkɛ wiemɔi nɛɛ jɛ Spainbii ablema lala ko ni ato naa ni atsɔɔ nibii titrii ejwɛ ni akpaa gbɛ akɛ nuu ana aha eweku lɛ mli: atadei, aspaaterei, wɔɔhe, kɛ niyenii. Ni hii ni kwɛɔ amɛwe nɔ jogbaŋŋ lɛ ateŋ mɛi pii kɛ miishɛɛ bɔɔ mɔdɛŋ akɛ amɛaatsu gbɛnaa nii nɛɛ he nii.

Shi, kɛji nuu ji bo ni oyɛ weku lɛ, ani otsuɔ nibii ni he hiaa waa ni ji oweku lɛ mumɔŋ hiamɔ nii lɛ ahe nii? Aloo ani osusuɔ akɛ kwɛmɔ ni aaakwɛ jamɔ mli saji anɔ ni atsu he nii lɛ jeee nuu nitsumɔ diɛŋtsɛ, taakɛ hii pii susuɔ lɛ? Yɛ kusumii komɛi amli lɛ, akpaaa gbɛ po akɛ hii baahe be ni amɛkɛtsɔɔ amɛbii lɛ nibii ni kɔɔ Nyɔŋmɔ kɛ Biblia lɛ he.

Nyɔŋmɔ Wiemɔ lɛ kɛ sɔ̃ fɔɔ nuu ni yɔɔ shia lɛ nɔ titri akɛ mɔ ni gbɛnaa nii ka enɔ akɛ edu suɔmɔ ni aaana aha Nyɔŋmɔ kɛ hiɛsɔɔ ni mli kwɔ kɛha shishitoo mlai ni ejɛ ŋwɛi efolɔ eshwie shi lɛ ewo weku lɛ mlibii lɛ amli. Akɛ nɔkwɛmɔ nɔ lɛ, Ŋmalɛi lɛ woɔ Kristofoi hii aŋaa, yɛ Efesobii 6:​4, akɛ: “Ni nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ lɛ [Yehowa] tsɔsemɔ kɛ ŋaawoo lɛ mli.”

Eyɛ mli akɛ amɛle wiemɔi nɛɛ jogbaŋŋ moŋ, shi mɛi komɛi nuuu shishi jogbaŋŋ akɛ ŋmalɛ nɛɛ kɔɔ tsɛ lɛ, ni ji nuu ni yɔɔ shia lɛ mli lɛ he titri. Akɛ nɔkwɛmɔ nɔ lɛ, ekolɛ aŋkroaŋkroi ni ji Spainbii kɛ Portuguebii baanu wiemɔi ni yɔɔ Efesobii 6:4 lɛ shishi akɛ akɛ tsɛ lɛ kɛ nyɛ lɛ fɛɛ miiwie. Wiemɔ ni akɛtsuɔ nii ahaa “tsɛmɛi” yɛ nɛkɛ wiemɔi nɛɛ amli, kɛ wiemɔ ni akɛtsuɔ nii ahaa “fɔlɔi” hu lɛ ji wiemɔ kometoo lɛ nɔŋŋ. Shi kɛlɛ, Paulo tsĩ tsɛ lɛ kɛ nyɛ lɛ fɛɛ ta yɛ kuku 1 lɛ mli yɛ Efesobii yitso 6 lɛ, kɛtsɔ Hela wiemɔ go·neuʹsin, ni jɛ go·neusʹ mli, ni eshishi ji “fɔlɔ” ni ekɛtsu nii lɛ mli. Shi Hela wiemɔ ni ekɛtsu nii yɛ kuku 4 lɛ ji pa-te’res, ni eshishi ji “tsɛmɛi.” Hɛɛ, Paulo kɛ nuu ni yɔɔ weku lɛ mli lɛ miiwie tɛɛ, yɛ ewiemɔi ni yɔɔ Efesobii 6:4 lɛ mli.

Eji anɔkwale akɛ, kɛji nuu bɛ weku lɛ mli ni baanyiɛ hiɛ lɛ, no Iɛ esa akɛ yoo lɛ atsu gbɛnaa nii nɛɛ he nii. Ni nyɛmɛi pii enyɛ amɛtsɔse amɛbii yɛ omanyeyeli mli yɛ Yehowa tsɔsemɔ kɛ gbeyeishemɔ mli kɛtsɔ Yehowa yelikɛbuamɔ nɔ. Shi, kɛji Kristofonyo nuu yɛ lɛ, no lɛ esa akɛ lɛ enyiɛ hiɛ. Kɛji eku ehiɛ efɔ nɛkɛ gbɛnaa nii nɛɛ nɔ lɛ, no lɛ ebawaa waa diɛŋtsɛ kɛhaa weku lɛ mlibii ni eshwɛ lɛ akɛ amɛaahiɛ mumɔŋ niyenii kpakpai ahe gbɛjianɔtoo kpakpa mli. Ni nuu ni tamɔ nɛkɛ baabu akɔntaa etsɔɔ Yehowa yɛ ehiɛ ni eku efɔ enɛ nɔ lɛ he.

Anaa bɔ ni Nyɔŋmɔ nuɔ he ehaa yɛ sane nɛɛ mli lɛ he odaseyeli yɛ Ŋmalɛ naa taomɔ nii ni atsɔɔ akɛ akwɛ yɛ nɔkwɛlɔi kɛ asafoŋ sɔɔlɔi ahe yɛ Kristofoi asafo lɛ mli lɛ mli. Biblia lɛ feɔ lɛ faŋŋ akɛ esa akɛ mɔ ni ahalaa lɛ kɛhaa gbɛhe ni tamɔ nɛkɛ lɛ afee nuu “ni yeɔ lɛ diɛŋtsɛ ewe nɔ jogbaŋŋ, ni ebii boɔ lɛ toi kɛ woo fɛɛ; (shi kɛ [nuu] leee lɛ diɛŋtsɛ ewe nɔ yeli lɛ, te eeefee tɛŋŋ ekwɛ Nyɔŋmɔ asafo lɛ hu?).”​—1 Timoteo 3:​4, 5, 12; Tito 1:⁠6.

Esa akɛ nuu ni yɔɔ weku lɛ asumɔ akɛ ekɛ emiishɛɛnamɔ kɛ nibii ni hiɔ haa lɛ lɛ aaasha afɔle eha ebii lɛ amumɔŋ hilɛ-kɛhamɔ. Bei komɛi lɛ ebaabi ni etse be ni etuu eha nibii krokomɛi afeemɔ lɛ nɔ bɔni afee ni ena be ni fa bɔ ni sa eha ebii lɛ daa gbi. (5 Mose 6:​6, 7) Shi yɛ enɛ fɛɛ sɛɛ lɛ, eŋmɛŋ nɛkɛ nitsumɔ ni Nyɔŋmɔ kɛwo edɛŋ nɛɛ he ehaŋ mɛi krokomɛi ni amɛtsu he nii. Suɔmɔ ni eyɔɔ kɛha ebii lɛ kɛ amɛhe miishɛɛ ni eyɔɔ lɛ baaya shɔŋŋ kwraa fe atadei, aspaaterei, wɔɔhe, kɛ niyenii kɛkɛ ni eeena eha amɛ.

Eji kaa kpele diɛŋtsɛ akɛ aaatsɔse gbekɛbii “yɛ Nuŋtsɔ lɛ [Yehowa] tsɔsemɔ kɛ ŋaawoo lɛ mli.” No hewɔ ni ehe klɛŋklɛŋ gbɛnaa nii lɛ ji nuu nɔ lɛ. Kɛji tsɛ ni ji Kristofonyo lɛ tsu enitsumɔ lɛ jogbaŋŋ lɛ, no lɛ ebaanyɛ ebu ebii ni sheɔ Nyɔŋmɔ gbeyei lɛ akɛ jɔɔmɔ ni jɛ Yehowa dɛŋ. Ebaanyɛ ekɛ lalatsɛ lɛ akɛɛ akɛ: “Bɔ ni gãi mlibii yɔɔ yɛ ekaalɔ dɛŋ lɛ, nakai obalahiiaŋ bii yɔɔ. Ajɔɔ nuu ni amɛyi egãi mlibii akotoku lɛ tɔ lɛ!”​—Lala 127:​4, 5.