Wɔhe Ni Wɔkɛaakpɛtɛ Nyɔŋmɔ Gbɛjianɔtoo Lɛ He Gbagbalii

TAAKƐ ROY A. RYAN GBA LƐ

Sandhill, Missouri, gbɛi ni akɛwo lɛ lɛ sa jogbaŋŋ, ejaakɛ eda fioo fe shia gɔŋ agbo ko ni ma shikpɔŋ kplanaa ko nɔ. Nɛkɛ akrowa ni yɔɔ gbɛŋta mli nɛɛ ka aaafee shitoi etɛ yɛ Rutledge anaigbɛ ni shiai kpaanyɔ loo nɛɛhu pɛ yɔɔ mli, kɛ Methodist sɔlemɔ tsu, kɛ dade sɔlɔ tsu bibioo ko. Jɛmɛ ji he ni afɔ mi yɛ, yɛ October 25, 1900.

MITSƐ ji sɔlɔ ni yɔɔ akrowa lɛ. Eyɛ mli akɛ mifɔlɔi efɔɔɔ sɔlemɔyaa moŋ, shi Awo ha mibɔi Hɔgbaa skul yaa yɛ Methodist Sɔlemɔ lɛ mli. Misumɔɔɔ gbɛi Methodist lɛ, ejaakɛ miheɔ miyeɔ moŋ akɛ esa akɛ atsɛ mɔ lɛ Kristofonyo; shi kɛlɛ Biblia mli anɔkwale lɛ he kumai yeɔ mi, ni mina naanɔ wala ni aaana lɛ he miishɛɛ.

Beni miye afi 16 lɛ, mitee miyatsu nii miha Santa Fe oketeke nitsumɔ he lɛ. Majimaji Ateŋ Biblia Kaselɔi (taakɛ atsɛɔ Yehowa Odasefoi yɛ nakai beaŋ) lɛ ateŋ mɔ ko ni atsɛɔ lɛ Jim bafata wɔ oketeke gbɛ saalɔi akuu lɛ he, ni mikɛ lɛ fɛɛ fɔɔ nitsumɔ yɛ he kome. Jim wieɔ, ni miboɔ nɔ ni eyɔɔ kɛɛmɔ yɛ Biblia lɛ he lɛ toi. Ebaŋɔɔ minaa waa diɛŋtsɛ, no hewɔ lɛ mibi lɛ ni ema mi ewoji lɛ ekome.

Jim kɛ Studies in the Scriptures ni C. T. Russell ni efata Majimaji Ateŋ Biblia Kaselɔi Akuu lɛ he lɛ ŋma lɛ klɛŋklɛŋ kpo lɛ ma mi. Beni miku sɛɛ mikɛha lɛ lɛ, miha ekɛ kpoi krokomɛi babaoo ha mi. No sɛɛ etsɛɛɛ lɛ, Jim shi oketeke gbɛ nɔ nitsumɔ lɛ, ni enɔ be kroko ni mina lɛ ji yɛ Rutledge gbɛjegbɛ nɔ, ni ekɛ Scenario of the Photo-Drama of Creation wolo ni mfonirii yɔɔ mli babaoo lɛ miiha ni ashɛ. Yɛ sɛɛ mli lɛ efɔ mi nine kɛtee kpeei ni amɛkuu lɛ feɔ yɛ eshia Iɛ. Daa Hɔgbaa lɛ, minyiɛɔ shitoi etɛ kɛyaa Rutledge kɛha kpeeyaa.

Beni akɛ Golden Age wolo tɛtrɛɛ (amrɔ nɛɛ Awake!) lɛ bɔi nitsumɔ yɛ 1919 lɛ, no mli lɛ miitao maje shiɛmɔyaa shishi. Biblia Kaselɔ hee kroko kɛ mi tswa wɔfai shi akɛ wɔbaaja nɛkɛ wolo tɛtrɛɛ hee nɛɛ yɛ shinaa kɛ shinaa naa. Wɔnu he akɛ wɔmiishe gbeyei akɛ wɔɔya gbɔmɛi ni yɔɔ wɔ diɛŋtsɛ wɔmaŋ lɛ aŋɔɔ, no hewɔ lɛ wɔfo oketeke ni wɔtee maŋ ni bɛŋkɛ wɔ lɛ mli. Beni wɔyashɛ jɛmɛ leebi lɛ, wɔgbala wɔmli ni wɔtee shinai anaa aahu kɛyashi wɔkpe yɛ shwane mli, eyɛ mli akɛ wɔnako tsɔsemɔ ko yɛ nitsumɔ nɛɛ mli. Miha mɛi enyɔ shɛ woji tɛtrɛbii lɛ eko, ni amɛteŋ mɔ kome lɛ, mikɛ lɛ etsu nii yɛ oketeke gbɛ lɛ nɔ da.

Yɛ October 10, 1920 lɛ, abaptisi mi yɛ nu bu ko ni bɛŋkɛ Rutledge lɛ mli. Mifɔlɔi te shi wo mihe ni mikɛbɔɔ Majimaji Ateŋ Biblia Kaselɔi lɛ waa diɛŋtsɛ. Enɛ jɛ shitee-kɛ-woo ni osɔfoi lɛ woɔ he hewalɛ ni Biblia Kaselɔi lɛ kɛkpe yɛ afii ni akɛwuɔ ta lɛ amli ni ji 1914-18 lɛ hewɔ. Shi, yɛ sɛɛ mli lɛ, mitsɛ bɔi Biblia Kaselɔi lɛ akpeei lɛ ekomɛi yaa, ni ekane The Golden Age wolo lɛ hu. Ni dani minyɛ aaagbo lɛ, ebana Biblia mli anɔkwale lɛ he shishinumɔ ni wɔna Iɛ he miishɛɛ babaoo. Shi kɛlɛ miweku lɛ mlibii lɛ ateŋ mɔ ko mɔ ko kɛ anɔkwale lɛ efeee enɔ.

Kaa Be

Yɛ nakai shishijee gbii lɛ amli lɛ, mɛi etɛ pɛ fata mihe ni amɛ hu amɛyaa Biblia kasemɔ kpeei daa yɛ Butledge. Shi yɛ naagbee lɛ, nɛkɛ mɛi etɛ nɛɛ shi asafo lɛ. Amɛteŋ mɔ kome he esa waa kɛ wiemɔ, ni enyɛɔ ehaa Biblia mli maŋshiɛmɔ yɛ nakai shikpɔŋkuku lɛ mli. Shi, ewo ehe nɔ waa yɛ enyɛmɔi nɛɛ ahewɔ, ni enu he akɛ enɔ kwɔ fe bɔ ni ekɛ ehe aaawo shia-kɛ-shia shiɛmɔ nitsumɔ lɛ mli taakɛ mra be mli Kristofoi lɛ fee lɛ.​—Bɔfoi lɛ Asaji 5:​42; 20:⁠20.

Beni nɛkɛ mɛi etɛ nɛɛ kɛ Majimaji Ateŋ Biblia Kaselɔi lɛ kpa bɔɔ lɛ, mikaiɔ akɛ eha minu he tamɔ bɔ ni bɔfo Petro nu he beni Yesu kɛ gbɔmɛi lɛ wie ‘Yesu heloo yeli kɛ ela hu numɔ’ he lɛ pɛpɛɛpɛ. Akɛni etsɔɔmɔ nɛɛ tɔtɔ amɛnaji hewɔ lɛ, mɛi pii shi lɛ yɛ nakai be lɛ mli. Kɛkɛ ni, Yesu bi Petro akɛ: “Ani nyɛ hu nyɛmiisumɔ akɛ nyɛaatee?” Petro ha hetoo akɛ: “Nuŋtsɔ, namɔ ŋɔɔ wɔɔtee? Bo oyɔɔ naanɔ wala wiemɔi lɛ.”​—Yohane 6:​67, 68.

Eyɛ mli akɛ Petro nuuu nɔ ni Yesu wiemɔ ni ji ‘Yesu heloo yeli kɛ ela numɔ’ lɛ tsɔɔ lɛ shishi jogbaŋŋ moŋ, shi eyoo akɛ Yesu yɛ wala wiemɔi lɛ. Nakai ji bɔ ni minu he yɛ asafo lɛ he. Ehiɛ anɔkwale lɛ, eyɛ mli akɛ jeee be fɛɛ be minuɔ nɔ fɛɛ nɔ ni mikaneɔ yɛ woji lɛ amli lɛ shishi. Shi kɛlɛ, be fɛɛ be ni akɛɔ nɔ ko ni minuuu shishi lɛ, miwieee mishiii kɔkɔɔkɔ. Yɛ sɛɛ mli lɛ, agbalaa sane lɛ mli jogbaŋŋ, aloo bei komɛi lɛ atsakeɔ shishinumɔ ni ayɔɔ yɛ he lɛ. Eŋɔɔ minaa be fɛɛ be akɛ mikɛ tsuishitoo mɛɔ kɛhaa sane lɛ mligbalamɔ.​—Abɛi 4:⁠18.

Tsakemɔi Kɛha Gbɛgbamɔ

Yɛ July 1924 mli lɛ, mitee majimaji ateŋ kpee wulu ko yɛ Columbus, Ohio. The Golden Age lɛ wie he akɛ “kpee wulu fe fɛɛ ni Biblia Kaselɔi lɛ efee kɛbashi nakai be mli.” Jɛmɛ ji he ni akpɛlɛ yiŋkpɛɛ ni mli wa ni ji “Fɔbuu” lɛ nɔ yɛ. Adafitswaa ni wɔnine shɛ nɔ kɛ mumɔ ni ajie lɛ kpo yɛ nakai kpee lɛ shishi lɛ wo mi hewalɛ ni mafee be-fɛɛ sɔɔlɔ, loo gbɛgbalɔ.

Beni miku misɛɛ kɛjɛ kpee lɛ, mikpa minitsumɔ ni ji oketeke gbɛ saamɔ lɛ, ni mikɛ Biblia Kaselɔ kroko bɔi sɔɔmɔ akɛ gbɛgbalɔi. Shi, aaafee afi sɛɛ lɛ, mifɔlɔi agbɔmɔtsoŋ hewalɛ nɔ bagbɔ kwraa bɔ ni miyelikɛbuamɔ he bahia amɛ waa diɛŋtsɛ. No hewɔ lɛ mikpa gbɛgbamɔ lɛ ni miyatao nitsumɔ yɛ nitsumɔ he ko ni tsaa shi kɛhaa ododobɛŋ ni nu baatsɔ mli, shi akɛni gbɔmɛi ni tsuɔ nii yɛ jɛmɛ lɛ miina minɔ hewalɛ fɔŋ hewɔ lɛ, mishi nakai nitsumɔ lɛ hu ni mikɛ mihe wo wobii alɛɛ kɛ wo hɔɔmɔ mli koni mikɛna shika.

Beni shɛɔ 1933 gbo be mli lɛ, no mli lɛ mifɔlɔi enyɔ lɛ fɛɛ egboi, no hewɔ lɛ gbɛnaa nii ko kaaa minɔ dɔŋŋ. No hewɔ lɛ 1934 agbiɛnaa be mli lɛ, mikɛ miwobii lɛ ha mɔ kroko ni ekwɛ nɔ eha mi, kɛkɛ ni mima tsu bibioo ni anyɛɔ agbalaa yɛ tsɔne sɛɛ kɛnyiɛɔ lɛ eko, ni mije be-fɛɛ sɔɔmɔ nitsumɔ lɛ shishi ekoŋŋ akɛ gbɛgbalɔ. Klɛŋklɛŋ kwraa lɛ mikɛ Odasefonyo ko ni eda yɛ afi amli tsu nii yɛ Quincy niiaŋ, yɛ Illinois. Yɛ sɛɛ mli lɛ miku misɛɛ kɛtee Missouri, ni miyafata gbɛgbalɔi akuu ko he yɛ jɛmɛ.

Yɛ 1935 lɛ, nu hɔmɔ ko ni naa wa waa ba Midwest, ni akɛni wɔmiitsu nii yɛ he ko ni ahuɔ yɛ titri hewɔ lɛ, shihilɛ lɛ wa waa diɛŋtsɛ. Mɔ ko mɔ ko bɛ shika, no hewɔ lɛ mɛi ni hiɛ sɔɔ wɔ lɛ haa wɔ niyenii kɛ nibii krokomɛi yɛ be kɛ bei amli kɛji wɔkɛ woji ha amɛ.

Gbɛgbamɔ yɛ Wuoyigbɛ

Nakai afi lɛ fɛ̃i be mli lɛ, wɔba Arkansas bɔni afee ni wɔjo fɛ̃i lɛ naa foi. Wɔnyɛ wɔja woji babaoo yɛ nakai shikpɔŋkuku lɛ mli ni wɔnyɛ wɔhe tsɛŋsi mli niyenii ni he baahia wɔ lɛ fɛɛ. Yɛ bei babaoo hu mli lɛ, wɔheɔ nibii ni wɔbaanyɛ wɔhɔ̃ɔ, tamɔ sanyaa tsɛŋsii memeji, ayawa loo akɔɔble nibii memeji, kɛ kar he nibii memeji tamɔ radiator kɛ battery. Enɛ haa wɔnaa shika ni wɔkɛheɔ pɛtrol wɔwoɔ mi-Model A Ford tsɔne ni wɔkɛtsuɔ nii yɛ shiɛmɔ nitsumɔ lɛ mli lɛ mli.

Wɔsɔmɔ yɛ Newton, Searcy, kɛ Carroll maji bibii ni yɔɔ Ozark Plateau gɔji ashikpɔŋ lɛ nɔ lɛ amli. Niiashikpamɔi ni wɔna beni wɔshiɛɔ yɛ gɔji ashikpɔŋ nɔ bii ni yɔɔ Arkansas lɛ ateŋ lɛ baayi wolo muu kɛji akɛɛ aaŋma. Akɛni tsutsu blema gbɛi pɛ yɔɔ yɛ nakai bei amli, aloo hei komɛi po lɛ, eko bɛ hewɔ lɛ, wɔnitsumɔ lɛ mli babaoo yɛ ni nyiɛmɔ wɔnyiɛ ni wɔkɛtsu. Gbɛgbalɔi komɛi ni fata wɔkuu lɛ he lɛ fɔɔ okpɔŋɔ nɔ tamɔ ni amɛkɛyaa gbɔmɛi ni yɔɔ shɔŋŋ yɛ gɔji lɛ anɔ lɛ aŋɔɔ.

Gbi ko lɛ wɔna wɔle akɛ nuu ko yɛ wiemɔ lɛ he miishɛɛ ni atsɛɔ lɛ Sam, ni yɛ naagbee lɛ wɔna akɛ eyɛ gɔji lɛ ateŋ ekome nɔ. Ekɛ miishɛɛ babaoo here wɔ atuu ni eŋɔɔ enaa waa akɛ wɔwɔ eshia lɛ nakai gbi lɛ. Eyɛ mli akɛ Sam ŋa bɛ wɔwiemɔ lɛ he miishɛɛ moŋ, shi ebinuu Rex, ni eye afii 16 lɛ yɛ he miishɛɛ. Beni wɔshi jɛmɛ lɛ, Sam ku sɛɛ efɔ wɔ nine ni wɔku wɔsɛɛ wɔba jɛmɛ ekoŋŋ. No hewɔ lɛ, otsii enyɔ sɛɛ lɛ, wɔkɛ amɛ hi shi ekoŋŋ.

Beni wɔshi amɛ nɔ ni ji shii enyɔ nɔ lɛ, Sam ŋa ji mɔ ni fɔ wɔ nine ni wɔba ekoŋŋ. Ekɛɛ wɔna hewalɛ kpakpa yɛ Rex nɔ waa diɛŋtsɛ. “Eji gbekɛ fɔŋ ni daaŋ wiemɔ ehiii kwraa,” ni yoo lɛ tsɔɔ mli akɛ, “shi kɛjɛ beni nyɛba biɛ nyɛtee sɛɛ nɛɛ minuko wiemɔ sha ko yɛ enaa tamɔ nakai dɔŋŋ.” Afii komɛi asɛɛ lɛ mikɛ Rex kpe ekoŋŋ beni etee Gilead maŋsɛɛ sanekpakpa shiɛlɔi askul lɛ yɛ South Lansing, yɛ New York lɛ. Niiashikpamɔi tamɔ enɛ haa mitsui nyɔɔ mimli waa diɛŋtsɛ yɛ afii abɔ lɛ fɛɛ mli.

Betel Sɔɔmɔ

Beni miŋma wolo akɛ miitao mafee gbɛgbalɔ lɛ, miŋma wolo hu akɛ miitao masɔmɔ yɛ Yehowa Odasefoi anitsumɔ he yitso ni yɔɔ New York, ni atsɛɔ jɛmɛ Betel lɛ hu. Yɛ afi 1935 agbiɛnaa be mli lɛ, atswa mi adafi akɛ akpɛlɛ miwolo lɛ nɔ, no hewɔ lɛ aabi ni miba Buu-Mɔɔ Asafo lɛ Kingdom Farm ni yɔɔ South Lansing, yɛ New York lɛ, ni mibaje mi-Betel sɔɔmɔ lɛ shishi. Amrɔ nɔŋŋ kɛkɛ ni mito gbɛjianɔ koni minaanyo Odasefonyo kroko abawo mishia ni agbalaa yɛ tsɔne sɛɛ lɛ.

Mikɛ mi-Model A Ford tsɔne lɛ tee New York tɔŋŋ, ni miyashɛ jɛmɛ aaafee leebi ŋmɛji nyɔŋma kɛ fa yɛ May 3, 1935. Aaafee shwane ŋmɛlɛ kome mli lɛ, aha mi nitsumɔ akɛ miyagba lai. Enɔ jetsɛremɔ lɛ, akɛɛ mi akɛ miya fufɔŋaa he lɛ ni miyawa ni akɛŋa tsinai lɛ afufɔ. Mitsu nii yɛ fufɔŋaa he lɛ afii babaoo, ni bei komɛi lɛ wɔŋaa tsinai lɛ afufɔ leebi kɛ gbɛkɛ, ni mikɛ mɛi ni tsuɔ abɔɔ kɛ dumɔ nii ahe nii lɛ tsuɔ nii yɛ gbi lɛ mli. Mikwɛɔ wobii hu ni mijieɔ wo mihaa Betel weku lɛ. Yɛ 1958 mli lɛ, ajie mi kɛtee he ni afeɔ keesuu yɛ lɛ.

Mɛi ni na miwala nɔ hewalɛ waa yɛ nɔkwɛmɔ nɔ fɛfɛo ni amɛfee yɛ heshibaa, anɔkwayeli, kɛ toiboo ni amɛfee amɛha Yehowa lɛ mli lɛ ateŋ mɔ kome ji Walter John “Pappy” Thorn. Eji Biblia Kaselɔi 21 ni ahala amɛ yɛ 1894 akɛ amɛfee klɛŋklɛŋ sanekpakpa shiɛmɔ he gbɛfalɔi lɛ ateŋ mɔ kome​—hii ni tsu nitsumɔ ni tamɔ ŋmɛnɛŋmɛnɛ beaŋ kpokpaa nɔkwɛlɔi​—ni amɛyasaraa asafoi sɔrɔtoi ni amɛwoɔ amɛ hewalɛ lɛ. Beni ekɛ nɔ ni fe afii 30 sɔŋŋ etsu nii yɛ gbɛfaa nitsumɔ lɛ mli sɛɛ lɛ, Nyɛminuu Thorn ba Kingdom Farm ni ebatsu nii yɛ wuɔi alɛɛhe lɛ. Bei pii lɛ, minuɔ ni eewie akɛ: “Be fɛɛ be ni eeeba akɛ miisusu mi diɛŋtsɛ mihe waa lɛ, mikɛ mihe woɔ tsu lɛ koŋ, ni kɛ makɛɛ lɛ, mikɛɔ mihe akɛ: ‘Bo mulu kuli bibioo nɛɛ. Mɛni oyɔɔ ni okɛshwãa?’”

Nuu heshibalɔ kroko ni bafee nɔkwɛmɔ nɔ kpakpa kɛha mi hu ji John Booth, ni amrɔ nɛɛ eji Yehowa Odasefoi a-Nɔyeli Kuu lɛ ateŋ mɔ kome lɛ. Atsɛ ewiemɔi asɛɛ yɛ afii abɔ ni eho lɛ amli akɛ ekɛɛ: “Jeee he ni esɔmɔɔ yɛ lɛ ji he ni he hiaa titri, shi moŋ yɛ anɔkwale mli lɛ, mɔ ni osɔmɔɔ lɛ lɛ.” Wiemɔ kuku, shi kwɛ bɔ ni eji anɔkwale ha! Yehowa ni wɔɔsɔmɔ lɛ lɛ ji hegbɛ kpele fe fɛɛ!

Mi-Betel sɔɔmɔ lɛ mli oti titri kome ji Gilead maŋsɛɛ sanekpakpa shiɛlɔi askul lɛ naagbelemɔ yɛ Kingdom Farm yɛ 1943. Gbɛgbalɔi sɔrɔtoi ni jɛ je lɛŋ hei babaoo ni mikɛ amɛ na naanyobɔɔ lɛ ha mina miishɛɛ waa. Yɛ nakai beaŋ lɛ, nikaselɔi aaashɛ oha yɔɔ klas fɛɛ klas mli, no hewɔ lɛ daa nyɔji ekpaa lɛ, mɛi heei oha baa Kingdom Farm. Amɛnikasemɔ lɛ naagbee gbalaa gbɔmɛi akpei abɔ kɛbaa nɛkɛ nikasemɔ he nɛɛ ni yɔɔ New York kooyigbɛ hei ni ahuɔ yɛ nɛɛ mli.

Nitsumɔ Tsakemɔ

Beni ajie Gilead skul lɛ kɛtee Brooklyn ni ahɔɔ wɔɔhe kɛ nikasemɔ he tsui wuji ni yɔɔ South Lansing lɛ, kɛkɛ ni ajie fufɔŋaa he lɛ kɛtee Watchtower Farms yɛ Wallkill, yɛ New York. No hewɔ lɛ 1969 gbo be mli lɛ, ajie mi kɛtee ŋmɔ lɛ mli yɛ Wallkill ni mitee nɔ mifee keesuu aahu kɛbashi 1983. Kɛkɛ ni atsake minitsumɔ lɛ, ni mibɔi nitsumɔ akɛ shikpɔŋ hiɛ saalɔ.

Be ko beni abiɔ mi saji lɛ, abi mi nɔ ni misusuɔ yɛ minitsumɔ ni atsake yɛ be mli ni mikɛ afii 30 sɔŋŋ efee keesuu aahu sɛɛ lɛ he. Miwie faŋŋ akɛ, “Egbaaa minaa kwraa, ejaakɛ yɛ anɔkwale mli lɛ misumɔɔɔ keesuu feemɔ tsɔ.” Nɔ ni mitsɔɔ lɛ ji akɛ, wɔbaanyɛ wɔna miishɛɛ yɛ Yehowa sɔɔmɔ mli yɛ nitsumɔ fɛɛ nitsumɔ ni abaaha wɔ lɛ mli kɛji wɔna jwɛŋmɔ kpakpa yɛ he ni wɔba wɔhe shi wɔha teokrase gbɛtsɔɔmɔ. No hewɔ lɛ eyɛ mli akɛ misumɔɔɔ keesuu feemɔ moŋ, shi mina minitsumɔ lɛ he miishɛɛ ejaakɛ eyeɔ ebuaa Betel weku lɛ. Kɛji wɔkɛ anɔkwayeli sɔmɔ wɔ-Nyɔŋmɔ kpeteŋkpele Yehowa ni wɔgbigbiliii wɔmli lɛ, no lɛ wɔbaana miishɛɛ ni nitsumɔ ni aha wɔ lɛ kɔɔɔ he eko.

Beni mifii yaa hiɛ ni migbɔjɔɔ lɛ, misusuuu akɛ manyɛ mana shihilɛ kpakpa ko fe ni masɔmɔ yɛ Betel. Akwɛɔ mi jogbaŋŋ, ni minyɛ mitee nɔ mitsu minitsumɔi fɛɛ ni ahaa mi lɛ, eyɛ mli akɛ miye afii 90. Afii babaoo nɛ, ni minaa hegbɛ akɛ mafee leebi kpee kɛha jamɔ ni Betel weku lɛ feɔ yɛ Watchtower Farms lɛ nɔ sɛinɔtalɔ. Ni kɛji mina hegbɛ hu lɛ, miwoɔ mɛi heei ni yɔɔ Betel lɛ hewalɛ ni amɛŋɔ sɔɔmɔ hegbɛi sɔrɔtoi fɛɛ ni akɛhaa amɛ lɛ ni amɛtsu he nii, ni amɛbɔ mɔdɛŋ ni amɛmii ashɛ he ni amɛna miishɛɛ.

Yɛ afii ni eho lɛ amli fɛɛ lɛ, minyɛ mitee maŋsɛɛ hei sɔrɔtoi shii abɔ​—India, Nepal, kɛ Boka Shɔŋŋ, kɛ Europa hu. Ŋaawoo ni nyiɛ sɛɛ nɛɛ baanyɛ aye abua mɛi fɛɛ ni yɔɔ Yehowa webii asafoi sɔrɔtoi lɛ amli yɛ je lɛŋ hei sɔrɔtoi fɛɛ lɛ: Na miishɛɛ ni otsui anyɔ omli yɛ shihilɛ ni oyɔɔ mli amrɔ nɛɛ he ni owo yibii yɛ mumɔŋ yɛ sũ mli he ni adu bo yɛ lɛ.

Mihala akɛ mahi shi oshijafonyo, ejaakɛ eye ebua mi ni minyɛ mitee nɔ yɛ sɔɔmɔ ni mikɛhaa Nyɔŋmɔ lɛ mli ni nɔ ko gbalaaa mijwɛŋmɔ. Ni wɔ-Nyɔŋmɔ kpeteŋkpele lɛ eha mi naanɔ wala he gbɛkpamɔ akɛ nakai sɔɔmɔ lɛ he jweremɔ nɔ. Kɛha mɛi pii lɛ, enɛ baafee wala ni bɛ naagbee yɛ paradeiso shia yɛ shikpɔŋ nɔ yɛ biɛ. Wɔteŋ mɛi krokomɛi hu ahiɛ ka wala ni sɛɛ efooo nɔ yɛ ŋwɛi, he ni wɔbaatsu nitsumɔ fɛɛ nitsumɔ ni abaaha wɔ lɛ yɛ lɛ.

Ekolɛ mɛi komɛi baasusu akɛ afii 90 ni miye lɛ sɛɛ jɛkɛ, ni ehe eba sɛɛnamɔ hu. Sɛɛnamɔ eba mishihilɛ he, shi esɛɛ jɛkɛɛɛ. Kɛji wɔtee nɔ wɔkɛ wɔhe kpɛtɛ Nyɔŋmɔ gbɛjianɔtoo lɛ kɛ enɔkwale wiemɔi lɛ ahe gbagbalii lɛ, wɔbaanyɛ wɔha wɔwala sɛɛ akɛ kɛya naanɔ.a

[Shishigbɛ niŋmai]

[Mfoniri ni yɔɔ baafa 26]

Nyɛminuu Ryan yɛ ebalahiɛŋ ni edamɔ e-Model T Ford tsɔne Iɛ he