Adafitswaa
Yelikɛbuamɔ kɛha Nɔyeli Kuu Ajinafoi
Yehowa Odasefoi a-Nɔyeli Kuu lɛ mlibii, ni amrɔ nɛɛ amɛ yibɔ ji 12 lɛ, yaa nɔ amɛsɔmɔɔ yɛ anɔkwayeli mli yɛ amɛ nitsumɔi sɔrɔtoi lɛ amli. Amɛdaa “asafo babaoo” ni amɛyi faa daa nɛɛ lɛ amlibii anɔkwafoi lɛ ashi yɛ amɛsɛɛfimɔ yɛ ekaa naa lɛ hewɔ. (Kpojiemɔ 7:9, 15) Yɛ yifalɛ babaoo ni yaa nɔ yɛ jeŋ fɛɛ lɛ hewɔ lɛ, etamɔ nɔ ni esa jogbaŋŋ yɛ nɛkɛ be nɛɛ mli akɛ akɛ yelikɛbuamɔ kroko ni fata he aaaha Nɔyeli Kuu lɛ. No hewɔ lɛ akpɛ yiŋ akɛ abaafɔ nine atsɛ mɛi pii ni baaye abua, titri lɛ mɛi ni jɛ tooi krokomɛi lɛ ateŋ, koni amɛbana Nɔyeli Kuu Ajinafoi sɔrɔtoi lɛ eko fɛɛ eko kpeei lɛ amli gbɛfaŋnɔ, ni ji, Nitsulɔi Anɔkwɛmɔ, Wolofeemɔ, Sɔɔmɔ, Nitsɔɔmɔ, kɛ Niŋmaa Ajinafoi lɛ. No hewɔ lɛ, abaaha mɛi ni yaa nɛkɛ ajinafoi nɛɛ akpeei nɛɛ eko fɛɛ eko shishi lɛ ayifalɛ aya hiɛ kɛyashɛ mɛi kpawo loo kpaanyɔ. Nɛkɛ mɛi ni baaye abua nɛɛ baana saji ni asusuɔ he lɛ amli gbɛfaŋnɔ, ni amɛbaatsu nitsumɔi sɔrɔtoi ni ajinafoi lɛ kɛbaawo amɛdɛŋ yɛ Nɔyeli Kuu ajinafoi lɛ mlibii agbɛtsɔɔmɔ shishi lɛ hu he nii. Nɛkɛ gbɛjianɔtoo hee nɛɛ jeɔ shishi yɛ May 1, 1992.
Afii pii nɛ ni Odasefoi ni afɔ amɛ mu lɛ ateŋ shwɛɛnii lɛ ayifalɛ nɔ bɔi gbɔmɔ, yɛ be mli ni asafo babaoo lɛ ayifalɛ etee hiɛ kwraa fe bɔ ni wɔkpaa gbɛ. (Yesaia 60:22) Kwɛ bɔ ni wɔdaa Yehowa shi yɛ nɛkɛ nitsumɔ mlilɛɛmɔ ni yɔɔ naakpɛɛ nɛɛ hewɔ! Beni akɛ shidaa kpɛlɛ gbɛi hee, Yehowa Odasefoi lɛ nɔ yɛ 1931 lɛ, no mli lɛ Maŋtsɛyeli shiɛlɔi, ni amɛteŋ mɛi pii kɛɔ akɛ amɛji Kristo nyɛmimɛi shwɛɛnii ni afɔ amɛ mu lɛ ateŋ mɛi komɛi lɛ ayifalɛ ni fe fɛɛ ji 39,372. (Yesaia 43:10-12; Hebribii 2:11) Afii nyɔŋmai ekpaa sɛɛ, yɛ 1991 lɛ, jeŋ fɛɛ shiɛlɔi ayifalɛ ni fe fɛɛ lɛ ji 4,278,820, ni amɛteŋ mɛi 8,850 pɛ kɛɔ akɛ amɛji shwɛɛnii ni afɔ amɛ mu lɛ ateŋ mɛi komɛi. Taakɛ akpa gbɛ yɛ Ŋmalɛi lɛ ashishinumɔ naa lɛ, “asafo babaoo” lɛ ayi fa fe “asafoku bibioo” lɛ mli shwɛɛnii lɛ kwraa, fe shwɛɛnɔ 1 yɛ tooi krokomɛi 480 ateŋ. (Luka 12:32; Kpojiemɔ 7:4-9) Yɛ anɔkwale mli lɛ asafo babaoo lɛ ni kɛ amɛ aaakpa gbee ni amɛye amɛbua amɛ yɛ Maŋtsɛyeli lɛ he nibii ni mli lɛɛɔ lɛ anɔkwɛmɔ mli lɛ he miihia shwɛɛnii lɛ ni amɛhiɛ sɔɔ enɛ waa.
Taakɛ atsɔɔ mli yɛ Buu-Mɔɔ nɛɛ mli lɛ, kuu ko yɛ ni kɛ mumɔŋ Israel miisɔmɔ ŋmɛnɛ, ni abaanyɛ akɛ amɛ ato Nethinim lɛ kɛ Salomo tsuji abii lɛ ni kɛ Yuda shwɛɛnii lɛ ku amɛsɛɛ kɛjɛ Babilon nomŋɔɔ mli lɛ ahe; nakai gbɔmɛi ni jeee lsraelbii lɛ ayi fa kwraa fe Levibii ni ku amɛsɛɛ lɛ. (Ezra 2:40-58; 8:15-20) “Mɛi ni akɛ amɛ eha” ni jɛ asafo babaoo lɛ ateŋ ŋmɛnɛ ji Kristofoi hii ni amɛdara yɛ mumɔŋ ni amɛna niiashikpamɔ babaoo yɛ nitsumɔ he niji anɔkwɛmɔ, kɛ gbɛfaa nitsumɔ lɛ mli, kɛ mɛi ni yɔɔ asafoi 66,000 ni ato yɛ shikpɔŋ nɔ fɛɛ bianɛ lɛ amli lɛ.
Afee Maŋtsɛyeli Sɔɔmɔ Skul sɔrɔtoi yɛ jeŋ fɛɛ, koni akɛtsɔse nɔkwɛlɔi kɛ amɛ asafoŋ sɔɔlɔi ni yeɔ buaa amɛ lɛ. Mɛi ni tee eko yɛ U.S. Amɛrika pɛ ji nɔkwɛlɔi 59,420. Awula nɛkɛ “onukpai” nɛɛ koni amɛtsu amɛ gbɛnaa nii lɛ ahe nii kɛmɔ shi.—1 Petro 5:1-3; okɛto Efesobii 4:8, 11 he.
“Mɛi ni akɛ amɛ eha” nɛɛ ateŋ mɛi komɛi kɛ afii babaoo esɔmɔ yɛ Yehowa Odasefoi anitsumɔ he yitso ni yɔɔ Brooklyn lɛ. Mɛi ni fata mɛnɛɛmɛi ahe ji nɔkwɛlɔi ni amɛdara yɛ mumɔŋ ni jɛ asafo babaoo lɛ ateŋ ni amɛna nyɛmɔ kɛ niiashikpamɔ ni fa babaoo diɛŋtsɛ. No hewɔ lɛ, Nɔyeli Kuu lɛ ehala nɔkwɛlɔi nɛɛ ateŋ mɛi fioo ko koni amɛye amɛbua yɛ Nɔyeli Kuu ajinafoi lɛ akpeei amli. Jeee akɛ mɛnɛɛmɛi ji mɛi ni kɛ afii ni fa fe fɛɛ esɔmɔ. Shi moŋ, amɛdara yɛ mumɔŋ, hii ni yɔɔ niiashikpamɔ kɛ hesaai ni haa amɛfeɔ mɛi ni baanyɛ aye abua yɛ nitsumɔi pɔtɛɛ amli. Nitsumɔ ni akɛwoɔ amɛdɛŋ ni amɛkɛ ajinafoi akuu ko atsu lɛ kɛ gbɛhe ko ni yɔɔ sɔrɔto wooo amɛdɛŋ. Taakɛ Yesu wie yɛ ekaselɔi lɛ ahe lɛ, “shi nyɛ fɛɛ lɛ, nyɛmimɛi ji nyɛ.” (Mateo 23:8) Kɛlɛ, akɛ babaoo baawo hii nɛɛ adɛŋ, no hewɔ lɛ “pii aaatao yɛ [amɛ]dɛŋ.”—Luka 12:48.
Wɔmli filiɔ wɔ yɛ Yehowa gbɛjianɔtoo ni yaa ehiɛ kɛ foi ŋmɛnɛ lɛ hewɔ. Mɛi ni kɛ amɛhe woɔ sɔɔmɔ nitsumɔ lɛ mli yɛ afii nyɔŋma ni eho nɛ mli lɛ ayifalɛ eku ebɔ he, yɛ gbalɛ ni kɔɔ David Kpeteŋkpele, Yesu Kristo he lɛ mlibaa mli: “Elumɔyeli lɛ shweremɔ kɛ hejɔlɛ lɛ sɛɛ efoŋ.” (Yesaia 9:7, King James Version) Bɔ ni Nethinim lɛ kɛ osɔfoi lɛ fee ekome kɛtsu nii yɛ Yerusalem gbogboi lɛ saamɔ mli lɛ, nakai nɔŋŋ gbalɛ ni kɔɔ Yehowa gbɛjianɔtoo lɛ he lɛ baa mli ŋmɛnɛ: “Ni gbɔi abii aaatswa ogbogboi lɛ.” (Yesaia 60:10; Nehemia 3:22, 26) Esa akɛ ajie ŋmɛnɛŋmɛnɛ beaŋ Nethinim lɛ ayi yɛ ekãa ní amɛjieɔ lɛ kpo yɛ anɔkwa jamɔ tswaa kɛ eshimaa, kɛ “Yehowa osɔfoi” lɛ ni amɛyeɔ amɛbuaa amɛ yɛ nitsumɔ fɛɛ nitsumɔ loo sɔɔmɔ fɛɛ sɔɔmɔ ni akɛaawo amɛdɛŋ yɛ Yehowa jeŋ muu fɛɛ gbɛjianɔtoo lɛ mli lɛ mli lɛ hewɔ.—Yesaia 61:5, 6.