Sanebimɔi Ni Jɛ Kanelɔi Adɛŋ
Ani esa akɛ wɔnu shishi kɛjɛ Hiob 1:8 lɛ akɛ be mli ni Hiob kɛhi shi lɛ mli fɛɛ lɛ, lɛ ekome pɛ ji adesa ni ye Yehowa anɔkwa?
Dabi. Hiob 1:8, ni kɛɔ nɛkɛ lɛ fiii nakai sanenaamuu sɛɛ:
“Ni Yehowa kɛɛ Satan akɛ: ‘Ani oŋɔ otsui ofɔ mitsulɔ Hiob hu nɔ? Ejaakɛ mɔ ko mɔ ko bɛ ni tamɔ lɛ yɛ shikpɔŋ lɛ nɔ, eji nuu ni kpa ko bɛ ehe ni eja, esheɔ Nyɔŋmɔ gbeyei, ni esɔleɔ ehe yɛ efɔŋ he.’” Nyɔŋmɔ wie ehe tamɔ nakai nɔŋŋ yɛ Hiob 2:3, ni ebi Satan akɛ: “Ani oŋɔ otsui ofɔ mitsulɔ Hiob hu nɔ lo? Ejaakɛ mɔ ko mɔ ko bɛ ni tamɔ lɛ yɛ shikpɔŋ lɛ nɔ, eji nuu ni kpa ko bɛ ehe ni eja, esheɔ Nyɔŋmɔ gbeyei, ni esɔleɔ ehe yɛ efɔŋ he.”
Hiob wolo lɛ diɛŋtsɛ tsɔɔ akɛ jeee Hiob kome pɛ ji adesa ni yɔɔ wala mli ni Nyɔŋmɔ kpɛlɛ enɔ akɛ anɔkwafo. Kɛji wɔje shishi kɛjɛ yitso 32 lɛ, wɔkaneɔ Elihu he sane. Eyɛ mli akɛ eji obalanyo moŋ, shi Elihu jaje tɔmɔ ni Hiob kɛsusuɔ saji ahe lɛ ni ewo anɔkwa Nyɔŋmɔ lɛ hiɛ nyam.—Hiob 32:6–33:6, 31-33; 35:1–36:2.
Enɛ hewɔ lɛ, Nyɔŋmɔ wiemɔ akɛ ‘mɔ ko mɔ ko bɛ shikpɔŋ nɔ tamɔ Hiob’ lɛ baanyɛ atsɔɔ akɛ Hiob titri sa kadimɔ waa akɛ mɔ ni hiɔ shi akɛ jalɔ. Eeenyɛ efee akɛ ekolɛ Hiob hi shi yɛ be ni ka Yosef gbele yɛ Mizraim kɛ Mose sɔɔmɔ shishijee akɛ Nyɔŋmɔ gbalɔ lɛ teŋ lɛ mli. Nakai be lɛ mli lɛ, Israelbii babaoo hi Mizraim shikpɔŋ lɛ nɔ. Yiŋtoo ko bɛ ni aaadamɔ nɔ asusu akɛ amɛ fɛɛ amɛyee anɔkwa, ni no hewɔ lɛ Nyɔŋmɔ ekpɛlɛɛɛ amɛnɔ; ekolɛ amɛteŋ mɛi pii kɛ amɛhe fɔ Yehowa nɔ. (2 Mose 2:1-10; Hebribii 11:23) Ni kɛlɛ, amɛteŋ mɔ ko kwraa naaa gbɛhe titri ko, taakɛ Yosef na lɛ, ni nakai nɔŋŋ nakai jalɔi lɛ jeee mɛi ni akadi amɛ waa yɛ anɔkwa jamɔ gbɛfaŋ, taakɛ Mose baafee yɛ Israel maŋ lɛ hiɛnyiɛmɔ mli kɛmiijɛ Mizraim lɛ.
Shi kɛlɛ, nuu ko hi he kroko ni bɔ ni ehiɛ emuuyeli mli lɛ sa kadimɔ waa. “Nuu ko hi Uz shikpɔŋ lɛ nɔ, ni egbɛi ji Hiob; ni nakai nuu lɛ kpa ko bɛ ehe ni eja, ni esheɔ Nyɔŋmɔ gbeyei, ni esɔleɔ ehe yɛ efɔŋ he.”—Hiob 1:1.
Enɛ hewɔ lɛ, Yehowa baanyɛ atsi Hiob ta akɛ hemɔkɛyeli kɛ hetuu-kɛhamɔ he nɔkwɛmɔ nɔ ni sa kadimɔ jogbaŋŋ. Nakai nɔŋŋ hu Biblia ŋmalɔi Ezekiel kɛ Yakobo tsi blema beaŋ mɔ ko ni ji Hiob kome pɛ ta akɛ efee jalɛ kɛ tsuishiŋmɛɛ he nɔkwɛmɔ nɔ efɔ shi.—Ezekiel 14:14; Yakobo 5:11.