Ani Niyenii Nɛɛ Aanyɛ Atsɔɔ Nɔ Ko Kɛha Bo?

NYƆƆŊTSERE ni eye muu lɛ kɛ la ni naa waaa miikpɛ shikpɔŋ lɛ nɔ. Hii 12 ebua amɛhe naa kɛbɔle okpɔlɔ ko he yɛ ŋwɛitsu ko nɔ yɛ blema Yerusalem. Amɛteŋ mɛi 11 tara shi diŋŋ kɛmiibo amɛ-Tsɔɔlɔ lɛ toi waa yɛ be mli ni etsiɔ gbijurɔyeli ko ta etsɔɔ ni ewieɔ wiemɔi ni he hiaa babaoo lɛ. Abɔ amaniɛ ko akɛ:

“Yesu [Kristo] kɔ aboloo, ni ejɔɔ nɔ ni ekumɔ mli, ni eŋɔha ekaselɔi lɛ, ni ekɛɛ: ‘Nyɛhea nyɛyea. Enɛ damɔ shi kɛha migbɔmɔtso lɛ.’ Ni ewo kpulu lɛ, ni eda shi, ni eŋɔha amɛ ni ekɛɛ: ‘Nyɛ fɛɛ nyɛnua eko; ejaakɛ enɛ ji “mila ni ji kpaŋmɔ lɛ nɔ lɛ,” ni aaafɔse ashwie shi yɛ mɛi pii ahewɔ ha eshaifaa lɛ. Shi miikɛɛ nyɛ akɛ, kɛjɛ enɛ nɔ kɛyaa nɛɛ, minuŋ weintso yibii nɛɛ eko dɔŋŋ, kɛyashi gbi nɔ ni mikɛ nyɛ aaanu lɛ ehee yɛ mi-Tsɛ maŋtsɛyeli lɛ mli.’ Ni beni amɛla yijiemɔ lala ko lɛ, amɛje kpo amɛtee Mugɔŋ lɛ nɔ.”​—Mateo 26:​26-30, New World Translation.

Enɛ ba mli yɛ Yudafoi anyɔŋ ni ji Nisan lɛ gbi ni ji 14 lɛ nɔ, beni hulu enyɔ shi sɛɛ yɛ afi 33 Ŋmɛnɛŋmɛnɛ Beaŋ. Yesu kɛ ebɔfoi lɛ eye Hehoo ni afeɔ akɛkaiɔ lsraelbii lɛ akpɔmɔ kɛmiijɛ Mizraim nyɔŋyeli mli yɛ afii ohai 16 D.Ŋ.B. lɛ amɛgbe naa. No mli lɛ Kristo eshwie Yudas Iskariot, mɔ ni eshwɛ fioo ni ebaatsɔɔ esɛɛ gbɛ lɛ. No hewɔ lɛ Yesu kɛ ebɔfoi anɔkwafoi 11 lɛ pɛ kɛkɛ eshwɛ.

Nɛkɛ gbɛkɛnaashi niyenii nɛɛ jeee Yudafoi a-Hehoo lɛ nɔtsamɔ. Eji nɔ hee ko ni abatsɛ no akɛ Nuŋtsɔ lɛ Gbɛkɛnaashi Niyenii. Yesu fa esɛɛnyiɛlɔi lɛ yɛ nɛkɛ gbijurɔ nɛɛ he akɛ: “Nyɛfea enɛ ni nyɛŋɔkai mi.” (Luka 22:​19, 20; 1 Korintobii 11:​24-26) Mɛni hewɔ ekɛɛ nakai? Ni te aaafee tɛŋŋ ni afii ohai abɔ ni eho nɛɛ mli nɔ ni ba lɛ aaanyɛ atsɔɔ nɔ ko kɛha bo lɛ?