Kasemɔ ni Akaseɔ bɔ ni Amɛɔ He Naagba Lɛ
NI WƆƆKASE bɔ ni wɔɔfee wɔmɛ nibii ni wɔsumɔɔ lɛ ji nikasemɔi ni wa fe fɛɛ ni abiɔ ni wɔ adesai wɔkpɛlɛ nɔ lɛ ateŋ ekome. Yɛ amɛfɔmɔ su naa lɛ gbekɛbii bibii bɛ tsuishitoo. Amɛsumɔɔ nɔ fɛɛ nɔ ni amɛhiŋmɛii gbaa nɔ ni gbalaa amɛjwɛŋmɔ lɛ, ni amɛsumɔɔ ni amɛnine ashɛ nɔ amrɔ nɔŋŋ! Shi taakɛ ole kɛjɛ niiashikpamɔ mli lɛ, eji shihilɛ mli anɔkwa sane akɛ, jeee nɔ fɛɛ nɔ ni wɔtaoɔ lɛ ji nɔ ni wɔnine shɛɔ nɔ. Yɛ nibii ni wɔshweɔ po lɛ agbɛfaŋ lɛ, esa akɛ wɔkase bɔ ní wɔɔfee wɔmɛ kɛyashi be ni sa mli koni wɔnine ashɛ nɔ. Mɛi pii kaseɔ enɛ; mɛi krokomɛi hu nyɛɛɛ afee nakai.
Gbɔmɛi ni sumɔɔ ni amɛna ŋwɛi duromɔ lɛ yɛ yiŋtoi sɔrɔtoi pɔtɛɛ komɛi ni haa amɛkaseɔ bɔ ni afeɔ amɛɔ. Yeremia, ni ji Yehowa tsulɔ, ni hi shi dani Kristofoi abe lɛ shɛ lɛ ma enɛ nɔ mi: “Ehi akɛ afee dioo amɛ Yehowa yiwalaheremɔ.” Yɛ sɛɛ mli lɛ, Kristofonyo kaselɔ Yakobo kɛɛ: “No hewɔ lɛ, nyɛŋmɛa nyɛtsui shi, anyɛmimɛi, kɛyashia Nuŋtsɔ lɛ baa be lɛ.”—Yeremia Yaafo 3:26; Yakobo 5:7.
Yehowa yɛ be ni lɛ diɛŋtsɛ eto ni ekɛbaagbe eŋwɛi yiŋtoi lɛ anaa. Kɛ wɔnyɛɛɛ wɔmɛ kɛyashi lɛ diɛŋtsɛ ebe aaashɛ ni ekɛaafee nibii komɛi lɛ, wɔtsui enyɔŋ wɔmli ni wɔmli baawo la, ni ehaŋ wɔna miishɛɛ. Kɛ Nyɔŋmɔ tsulɔ bɛ miishɛɛ lɛ, ebaagbɔjɔ yɛ mumɔŋ, taakɛ Nehemia kɛɛ emaŋbii lɛ: “Miishɛɛ ni anaa yɛ NUŊTSƆ lɛ mli lɛ ji nyɛhewalɛ.”—Nehemia 8:10, The New English Bible.
Nilee ni Yɔɔ Kasemɔ ni Akaseɔ Bɔ ni Amɛɔ lɛ Mli
Eji adebɔɔ naa su akɛ oshijafoi aaasumɔ ni amɛbote gbalashihilɛ mli aloo ni mɛi ni bɛ bii lɛ aaasumɔ ni amɛfɔ bii. Agbɛnɛ hu, nɔ fɔŋ ko bɛ heloo gbɛfaŋ nibii ni sa ni wɔnine aaashɛ nɔ lɛ mli. Ni kɛlɛ, akɛni wɔheɔ wɔyeɔ akɛ etsɛŋ ni nibii agbɛjianɔtoo nɛɛ baaba enaagbee, ni akɛ yɛ gbɛjianɔtoo hee ni baa lɛ mli lɛ, Nyɔŋmɔ ‘aaagbɛ edɛŋ, ni eha nibii fɛɛ ni hiɛ kamɔ atɔrɔ kɛ nii ni amɛtaoɔ’ hewɔ lɛ, Kristofoi pii ekpɛ amɛyiŋ akɛ amɛbaamɛ kɛyashi be mli ni amɛnine aaashɛ nibii ni amɛshweɔ nɛɛ ekomɛi anɔ yɛ be ni sa diɛŋtsɛ mli.—Lala 145:16.
Shi, gbɔmɛi ni bɛ Kristofoi ahiɛnɔkamɔ ni ma shi shiŋŋ nɛɛ eko lɛ nuŋ nɔ hewɔ ni esa akɛ amɛtsi amɛto lɛ shishi. Akɛni amɛbɛ hemɔkɛyeli yɛ Yehowa, ni ji “duromɔ nii kpakpai fɛɛ kɛ nikeenii ni hi kɛwula shi fɛɛ” halɔ lɛ mli hewɔ lɛ, amɛbiɔ jwɛŋmɔ ni yɔɔ tsi ni aaatsi nibii kɛaaya wɔsɛɛ be ni amɛheee amɛyeee akɛ eeeba lɛ mli lɛ shishi. Amɛhiɔ shi yɛ hemɔkɛyeli ni ji: “Nyɛhaa wɔyea nii ni wɔnua daai, ejaakɛ wɔ be nɛ, wɔgboi” lɛ naa.—Yakobo 1:17; 1 Korintobii 15:32; Yesaia 22:13.
Guɔyeli nitsumɔi ni yɔɔ maji ni amɛtee hiɛ lɛ amli lɛ tsɔɔ nitsumɔ he adafitswaa nɔ amɛkɛ akɔnɔ ni mɛi naa akɛ amɛna nɔ fɛɛ nɔ amrɔ nɔŋŋ lɛ tsuɔ nii. Awoɔ gbɔmɛi ahewalɛ ni amɛhiɛ amɛhe dɔdɔɔdɔ. Jarayeli nitsumɔi baaha wɔhe wɔye akɛ ŋmɛnɛŋmɛnɛ nibii heei ni afee kɛ miishɛjemɔ ji hiamɔ nii yɛ gbɛ fɛɛ gbɛ nɔ. Amɛkɛ naataomɔ lɛ baa akɛ, mɛni hewɔ ni esaaa akɛ onine shɛɔ enɛ nɔ, titri lɛ kɛ gbɛjianɔtoo yɛ akɛ abaanyɛ afiri nɔ fɛɛ nɔ ni ataoɔ bianɛ ni awo he nyɔmɔ yɛ sɛɛ mli yɛ lɛ? Kɛfata he lɛ, ‘Nɔ ni hi fe fɛɛ lɛ sa bo; naa ohe mɔbɔ! Kaimɔ akɛ, na mli ŋɔɔmɔ bianɛ loo ha eje odɛŋ kɛya naanɔ!’ Nakai ji bɔ ni adafitswai ni ehe gbɛi lɛ kɛɔ.
Beni enɛ yaa nɔ lɛ, niyenii fioo ko pɛ gbɔmɛi akpekpei nyɔŋmai abɔ ni yɔɔ maji ni kpaako amɛnaa nɔyaa lɛ amli lɛ bɔɔ mɔdɛŋ ni amɛnine ashɛ nɔ—aloo nɔ ni shɛɛɛ nakai po. Ani nɔ ko yɛ ni baanyɛ ama emuu ni adesa maŋkwramɔŋ kɛ shika-helɛtemɔ gbɛjianɔtoi lɛ yeee lɛ nɔ mi fe enɛ?
Anaa nilee ni yɔɔ kasemɔ ni akaseɔ bɔ ni amɛɔ lɛ mli lɛ yɛ gbɔmɛi akpekpei abɔ ni sumɔɔɔ ni amɛmɛɔ—loo kɛ hoo lɛ amɛnaaa nɔ hewɔ ni esa akɛ amɛfee nakai—yɛ nyɔmɔ babaoo ni amɛbɔ koni amɛnine ashɛ amɛ amrɔ akɔnɔ nii anɔ lɛ mli. Nibii ni baa trukaa ni akpaaa gbɛ, tamɔ hela loo nitsumɔ ni jeɔ mɔ dɛŋ baanyɛ atsɔ oshara aha amɛ. German adafitswaa wolo, Frankfurter Allgemeine Zeitung tsɔɔ nɔ hewɔ ni abɔ amaniɛ akɛ gbɔmɛi akpeiakpe kome yɛ Germany ni bɛ shia lɛ mli: “Kɛ aaatsɔɔ mli pɔtɛɛ lɛ, nɔ ni tsɔɔ shia ni abɛ hiɛ yɛ bei pii amli ji nitsumɔ ni anaaa atsu loo nyɔmɔ babaoo ni ahiɛ.”
Akɛni amɛnyɛɛɛ amɛwo nyɔmɔ ni amɛhiɛ lɛ hewɔ lɛ, aŋkroaŋkroi ni he baaa nii ni tamɔ nɛkɛ lɛ laajeɔ amɛshia kɛ amɛnibii fɛɛ yɛ gbɛ ni yɔɔ mɔbɔ nɔ. Ni yɛ bei pii amli lɛ, ekɛ haomɔi kɛ weku mli béi baa. Gbalashihilɛi ni damɔɔɔ shi shiŋŋ lɛ jeɔ fitemɔ shishi. Naagbai kɛ gbɔmɔtsoŋ helai krokomɛi baa be fɛɛ be. Yɛ Kristofoi agbɛfaŋ lɛ, ebaanyɛ esa amɛmumɔŋ shihilɛ he, ni nɔ ni baajɛ mli aba ji jwɛŋmɔ ni ejaaa kɛ jeŋba gbonyo. Gbɔmɛi ni je shishi akɛ amɛmiitao nɔ fɛɛ nɔ yɛ gbɛ ni nilee bɛ mli nɔ lɛ yagbeɔ naa akɛ gbɔmɛi ni bɛ nɔ ko nɔ ko kwraa.
Eji Kaa Hee Kɛha Mɛi Pii
Yesu fee lɛ faŋŋ akɛ esa akɛ wɔkwɛ jogbaŋŋ ejaakɛ “jɛ nɛŋ he naagbamɔ kɛ ninamɔ he lakamɔ kɛ nii krokomɛi ahe akɔnɔ yaboteɔ mli, ni amɛgbeɔ wiemɔ lɛ.” (Marko 4:19) Esa akɛ wɔha ahi wɔjwɛŋmɔ mli akɛ, maŋkwramɔŋ gbɛjianɔtoo ko bɛ ni ejie yeyeeye-feemɔ, ni shika-helɛtemɔ mli nɔ̃ hu fata he, ni Yesu wie he lɛ kɛtee yɛ omanyeyeli mli.
Komunist nɔyeli ni Europa Bokagbɛ maji lɛ ekpoo agbɛnɛ lɛ bɔ mɔdɛŋ koni aha nɔ fɛɛ nɔ afee pɛpɛɛpɛ kɛtsɔ amɛ shika he gbɛjianɔtoo ni Maŋ lɛ aaakudɔ lɛ nɔ. Nɔ ni tamɔɔɔ maji ni aŋkroaŋkroi bɔɔ jwetri amɛhaa amɛhe yɛ guɔyeli nitsumɔ mli lɛ, tsutsu gbɛjianɔtoo ni yɔɔ Komunist nɔyeli shishi lɛ kɛ shika-helɛtemɔ mli shweshweeshwe shihilɛ ko ha aŋkroaŋkroi ni yɔɔ nakai maji lɛ anɔ lɛ yɛ be mli ni nɔyelii ni haa mɛi bɔɔ jwetrii amɛhaa amɛhe lɛ nyɛɛɛ afee nakai. Ni kɛlɛ, yeyeeye-feemɔ ni Yesu wie he lɛ hi shi tamɔ guɔyeli nibii ni anaaa ahe nɛkɛ kɛ heyeli ni bɛ.
Amrɔ nɛɛ nakai maji lɛ babaoo miitsake kɛmiiha guɔyeli nibii afeemɔ kɛ ehemɔ ni naatsii bɛ mli ni aŋkroaŋkroi kɛ amɛhe woɔ mli, ni enɛ kɛ kaa hee ko bafɔɔ maŋbii lɛ ahiɛ. Amaniɛbɔɔ ko tsɔɔ mli nyɛsɛɛ nɛɛ akɛ: “Akɛ nibii amli ni aleee efutu bɔ ni ashweɔ akɛ nine aaashɛ anaigbɛ bii anihemɔ shihilɛ he oyayaayai lɛ.” Bɔni afee ni nine ashɛ enɛ nɔ lɛ, “aagbala gbɔmɛi ni yɔɔ Lãnder hee lɛ ni ji tsutsu German maji ni yaje Komunist nɔyeli shishi yɛ German Bokagbɛ lɛ ateŋ mɛi pii kɛmiiwo nyɔmɔbɔɔ ni amɛnyɛŋ amɛjo naa foi kɔkɔɔkɔ lɛ mli.” Amaniɛbɔɔ lɛ kɛfata he akɛ: “Yɛ hejɔlɛ henumɔ ni je shishi yɛ shika-helɛtemɔ mli heyeli hee lɛ mli sɛɛ lɛ, gbeyeishemɔ kɛ nijiaŋwujee miigbɛ kɛmiishwa agbɛnɛ.” Eyɛ mli akɛ gbɛjianɔtoo lɛ etsake kɛjɛ komunist nɔyeli shishi kɛyaje nɔyeli ni mɔ fɛɛ mɔ bɔɔ jwetri kɛhaa ehe lɛ shishi moŋ, shi yeyeeye-feemɔ yɛ lolo.
Maŋkwramɔŋ kɛ shika-helɛtemɔ mli heyeli babaoo egbele gbɛ kɛha hegbɛi heei koni nibii ahi fioo yɛ shika gbɛfaŋ. No hewɔ lɛ, enɛ baaka aŋkroaŋkroi pii koni amɛkɛ hiɛdɔɔ asusu amɛ diɛŋtsɛ amɛ nitsumɔ ni amɛaaje shishi loo ni amɛfa gbɛ kɛya maŋ kroko ni baaha amɛna nitsumɔ kpakpa amɛtsu lɛ he.
Yiŋkpɛi ni tamɔ nɛkɛ lɛ ji mɔ aŋkro lɛ sane. Ejeee tɔmɔ akɛ Kristofonyo aaabɔ mɔdɛŋ ni eha eshihilɛ yɛ shika gbɛfaŋ lɛ aya hiɛ fioo. Ekolɛ nɔ ni baatsirɛ lɛ ji bɔ ni esumɔɔ ni ekwɛ eweku, ejaakɛ ele akɛ, “kɛ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.”—1 Timoteo 5:8.
No hewɔ lɛ, esaaa akɛ awieɔ ashiɔ yiŋ ni mɛi krokomɛi kpɛɔ lɛ. Yɛ nakai beaŋ nɔŋŋ lɛ, esa akɛ Kristofoi akai akɛ nilee bɛ mli akɛ mɔ ko aaabɔ mɔdɛŋ ni eye ehe kɛjɛ ohia mli kɛtsɔ nyɔmɔ babaoo ni eeebɔ ni baaha no atsɔ amɛ tsɔne lɛ nɔ. Nakai nɔŋŋ hu ebaafee nɔ ni ejaaa akɛ aaatao shika mli heyeli yɛ gbɛ ni aaaha aku hiɛ ashwie mumɔŋ gbɛnaa nii sɔrɔtoi lɛ anɔ.
Nii ni Aaakase Kɛaajɛ Mɛi Krokomɛi Adɛŋ
Yɛ afii ni nyiɛ Jeŋ Ta II sɛɛ lɛ amli lɛ, Germanbii akpei abɔ fa gbɛ kɛjɛ Europa ni tawuu efite jɛmɛ lɛ kɛtee maji krokomɛi anɔ, titri lɛ Australia kɛ Canada. Enɛ fɛne amɛteŋ mɛi pii yɛ shika gbɛfaŋ, shi amɛteŋ mɔ ko mɔ ko nyɛɛɛ ajo shika-helɛtemɔ mli yeyeeye-feemɔ ni Yesu wie he lɛ naa foi kwraa kɛmɔ shi. Yɛ bei komɛi amli lɛ tsabaa ni aaana aha shika mli naagbai lɛ kɛ ekrokomɛi hu baa—shia ni hiɛ tseɔ, wiemɔ hee kasemɔ, niyenii hee ni akaseɔ eyeli, kusumii sɔrɔtoi, nanemɛi heei ni akɛ amɛ aaabɔ, loo subaŋi sɔrɔtoi ni aaadamɔ naa.
Mɛi ni faa gbɛ amɛyahiɔ maji krokomɛi amli nɛɛ ateŋ mɛi komɛi ji Yehowa Odasefoi. Ni nɔ ni sa yijiemɔ ji akɛ, amɛteŋ mɛi pii eŋmɛɛɛ gbɛ koni gbɛfaa mli naagbai lɛ agbe amɛmumɔŋ shihilɛ lɛ. Shi, mɛi komɛi tamɔɔɔ nakai. Amɛgbee ninamɔ he tsɔne ni lakaa mɔ lɛ mli. Amɛ teokrase nɔyaa nyɛɛɛ ekɛ nɔyaa yɛ ninamɔ mli lɛ anyiɛ pɛpɛɛpɛ.
Eka shi faŋŋ akɛ enɛ feɔ nilee ni yɔɔ wɔshihilɛ ni wɔɔpɛi mli jogbaŋŋ dani wɔkpɛ yiŋ ekolɛ yɛ gbɛ ni nilee bɛ mli lɛ he nɔkwɛmɔ nɔ. Sui ni haa adiɔ heloo gbɛfaŋ nibii asɛɛ baaha wɔkpa babaoo feemɔ yɛ kaselɔ feemɔ nitsumɔ ni atsuŋ eko ni tamɔ nakai dɔŋŋ, ni akɛwo wɔdɛŋ lɛ mli. Sane nɛɛ ji anɔkwale ni he ni wɔhiɔ lɛ kɔɔɔ he eko, ejaakɛ maŋ ko bɛ ní emli bii lɛ eye amɛhe kɛjɛ ohia ni haa afeɔ yeyeeye lɛ mli.
Ta Kpakpa lɛ Wuumɔ
Paulo wo Timoteo ŋaa akɛ: “Ni onyiɛ jalɛ, Nyɔŋmɔjamɔ, hemɔkɛyeli, suɔmɔ, tsuishiŋmɛɛ, kɛ mlijɔlɛ sɛɛ. Wuu hemɔkɛyeli he ta kpakpa lɛ, mɔ naanɔ wala lɛ mli, nɔ he hu ni atsɛo kɛba . . . lɛ.” Ekɛɛ Korinto Kristofoi lɛ akɛ: “Nyɛfia shi ni nyɛkagbugbaa, ni nyɛtekea nɔ yɛ Nuŋtsɔ lɛ nitsumɔ lɛ mli daa nɛɛ.”—1 Timoteo 6:11, 12; 1 Korintobii 15:58.
Ŋaawoo kpakpa nɛɛ sɛɛdii ji gbɛ ni hi fe fɛɛ ni aaatsɔ nɔ awuu ashi heloo gbɛfaŋ nibii asɛɛdii yɛ omanyeyeli mli, ni eka shi faŋŋ akɛ babaoo yɛ ni Kristofonyo baatsu! Yɛ maji komɛi ni Maŋtsɛyeli shiɛlɔi lɛ faaa yɛ jɛmɛ lɛ amli lɛ, mɛi pii yɛ jɛmɛ ni anɔkwale lɛ he nɔ ko fioo ko pɛ amɛnu. Yesu gba anɔkwale akɛ: “Nikpamɔ lɛ fa moŋ, shi nitsulɔi lɛ faaa.”—Mateo 9:37.
Yɛ nɔ najiaŋ ni amɛaaŋmɛ gbɛ ni nɛkɛ maji nɛɛ amli shika-helɛtemɔ mli naagbai aaagbala amɛjwɛŋmɔ kɛaajɛ mumɔŋ nitsumɔ ni ka shi lɛ nɔ lɛ, Yehowa Odasefoi kɛ hegbɛi ni amɛnaa lɛ tsuɔ shihilɛ lɛ he nii kɛmɔɔ shi. Kɛ amɛteŋ mɛi komɛi bɛ nitsumɔ yɛ be fioo ko mli lɛ, amɛteŋ mɛi pii lɛɛɔ amɛshiɛmɔ nitsumɔ lɛ mli. Kɛfata amɛsɔɔmɔ ni haa Yehowa yijiemɔ lɛ yaa hiɛ lɛ he lɛ, ehaa amɛnaa miishɛɛ ni he hiaa ni aaaha amɛnyɛ amɛdamɔ amɛ diɛŋtsɛ amɛshika-helɛtemɔ mli naagbai lɛ anaa.
Nɛkɛ Odasefoi nɛɛ kɛ shiɛmɔ nitsumɔ lɛ feɔ amɛhiamɔ nii titri, ni amɛkɛ shika-helɛtemɔ mli naagbai bayeɔ sɛɛ, ni enɛ haa jeŋ muu fɛɛ nyɛmimɛi asafo lɛ leɔ akɛ amɛkɛ amɛhiɛ fɔɔ Yehowa nɔ kwraa akɛ eeekwɛ amɛ. Eshiwoo ji akɛ: “Nyɛtaoa Nyɔŋmɔ Maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.”—Mateo 6:33.
Kɛjɛ be mli ni ato anɔkwa jamɔ ama shi yɛ 1919 kɛbaa nɛɛ, Yehowa hako ewebii lɛ agbugbaa. Ebu amɛhe kɛtsɔ yiwaai ni naa wa mli, ni yɛ hei komɛi hu kɛtsɔ afii nyɔŋmai abɔ ni amɛkɛtsu nii yɛ teemɔŋ lɛ mli. Yehowa Odasefoi etswa amɛfai shi akɛ, amɛŋmɛŋ gbɛ ni Abonsam atsu nɔ ni enyɛɛɛ etsu kɛtsɔ yiwaa nɔ lɛ, kɛtsɔ heloo gbɛfaŋ nibii sɛɛdii he tsɔne ni baa nigii yɛ teemɔŋ lɛ nɔ!
Kasemɔ ni Akaseɔ Bɔ Ni Amɛɔ yɛ Nɔ Fɛɛ Nɔ Mli
Maŋtsɛyeli Asai ni dara, tsɔnei ni jara wa ni awieɔ awoɔ mli, Kpee Asai, kɛ Betel shiai ni yɔɔ fɛo woɔ Nyɔŋmɔ hiɛ nyam ni ekɛ odaseyeli ni yɔɔ dioo haa akɛ eejɔɔ ewebii lɛ. Ekolɛ Yehowa Odasefoi ni yɔɔ maji ni atsi nitsumɔ lɛ naa yɛ be kakadaŋŋ mli yɛ jɛmɛ lɛ baanu he akɛ yɛ enɛ gbɛfaŋ lɛ, amɛyɛ babaoo feemɔ koni amɛnyɛ amɛshɛ he ni maji krokomɛi eshɛ lɛ. Shi nɔ ni he hiaa fe fɛɛ ji akɛ amɛyaa nɔ amɛshwereɔ yɛ mumɔŋ. Kponɔgbɛ nii ni anaa ni tsɔɔ Nyɔŋmɔ jɔɔmɔ yɛ heloonaa lɛ baaje kpo yɛ be ni sa mli.
Ehe miihia ni Yehowa tsuji ni amɛjɔɔ amɛhe nɔ lɛ akwɛ jogbaŋŋ koni yɛ nibii ni amɛ diɛŋtsɛ amɛsumɔɔ lɛ asɛɛdii mli lɛ, amɛkanu he akɛ amɛbasumɔŋ ni heloonaa nibii komɛi abɔ amɛ dɔŋŋ. Anuɔ bɔ ni asumɔɔ ni aye he kɛjɛ ohia kɛ kwasafoŋ shihilɛ ni yeee egbɔ lɛ mli lɛ shishi, shi Yehowa webii ekuuu amɛhiɛ amɛshwieee anɔkwale ni eji akɛ Nyɔŋmɔ tsuji fɛɛ miishwe ni amɛhe ajɔ amɛ lɛ nɔ. Shwilafoi miishwe ni amɛna nii ekoŋŋ, mɛi ni amɛhelai ehiii tsamɔ lɛ miishwe ni amɛna gbɔmɔtsoŋ hewalɛ kpakpa ekoŋŋ, mɛi ni amɛhao lɛ miishwe shihilɛ ni miishɛɛ yɔɔ mli, ni mɛi ni agbo ashi amɛ lɛ miishwe ni amɛna amɛsuɔlɔi ni egboi lɛ ekoŋŋ.
Yɛ shihilɛi komɛi ahewɔ lɛ, aanyɛ Kristofonyo fɛɛ Kristofonyo nɔ yɛ gbɛ ko nɔ koni emɛ Yehowa jeŋ hee lɛ koni atsu enaagbai ahe nii yɛ jɛmɛ. Esa akɛ enɛ aha wɔbi wɔ diɛŋtsɛ wɔhe akɛ, ‘Kɛ miyɛ niyenii kɛ hehaanii kɛkɛ lɛ, ani esaaa akɛ mitsui nyɔɔ mimli yɛ enɛɛmɛi ahe koni mamɛ be ni aaajie ohia mli naagbai nɛɛ kɛaaya lɛ?’—1 Timoteo 6:8.
Kristofoi ni kɛ amɛhe fɔɔ Yehowa nɔ kwraa lɛ baanyɛ ana nɔmimaa akɛ kɛ amɛmiisumɔ ni amɛmɛ kɛkɛ lɛ, etsɛŋ ni amɛnine baashɛ amɛtaomɔ nii kɛ hiamɔ nii ni sa lɛ fɛɛ nɔ. Mɔ ko mɔ ko efeŋ mɔ ni emɛ efolo. Wɔmiiti Paulo wiemɔi lɛ amli: “Nyɛfia shi ni nyɛkagbugbaa, ni nyɛtekea nɔ yɛ Nuŋtsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛ mɔdɛŋbɔɔ lɛ efeee yaka yɛ Nuŋtsɔ lɛ mli.”—1 Korintobii 15:58.
No hewɔ lɛ, ani esa akɛ kasemɔ ni akaseɔ bɔ ni amɛɔ lɛ afee naagba wulu ko nakai?
[Mfoniri ni yɔɔ baafa 10]
Kasemɔ ni akaseɔ bɔ ni afeɔ amɛɔ lɛ baanyɛ ahere oyiwala