Maŋtsɛyeli Jajelɔi Bɔ Amaniɛ
Bulɛ Kɛha bɔ ni Wala Yɔɔ Krɔŋŋ lɛ
BIBLIA LƐ tsɔɔ akɛ lá jara wa waa yɛ Nyɔŋmɔ hiɛ, ni akɛ ebuɔ ekɛ nitsumɔ yɛ gbɛ fɔŋ nɔ lɛ fɔ. (3 Mose 17:14; Bɔfoi lɛ Asaji 15:19, 20, 28, 29) Yɛ Biblia mli gbɛtsɔɔmɔi nɛɛ ahewɔ lɛ, Yehowa Odasefoi ekpɛlɛɛɛ ni agbala la awo amɛmli.
Bɔni afee ni eye ebua datrɛfoi kɛ helatsamɔ he nitsulɔi ni amɛnu jamɔ mli shidaamɔ ni Yehowa Odasefoi ekɔ yɛ nɛkɛ sane nɛɛ he lɛ shishi, ni amɛle akɛ Odasefoi lɛ baakpɛlɛ tsofa-feemɔi krokomɛi anɔ lɛ, Buu Mɔɔ Asafo lɛ eto Hospital Liaison Committees (HLC) ni ji Kui ni kɛ Helatsamɔ Hei Naa Sharamɔ ahe gbɛjianɔ yɛ shikpɔji pii anɔ. Nɛkɛ kui nɛɛ amlibii yasaraa helatsamɔ hei ni amɛkɛ jɛmɛ nitsulɔi lɛ wieɔ. Nyɛsɛɛ nɛɛ, afee kpeei fe 200 yɛ maji 12 mli yɛ Poland, ni datrɛfoi ni fa fe mɛi 500 fata nɛkɛ kpee nɛɛ he, titri lɛ helatsamɔ hei bibii aloo helatsamɔ hei awɔɔhe nɔkwɛlɔi. Niiashikpamɔ ni nyiɛ sɛɛ lɛ ba yɛ nɛkɛ saramɔi nɛɛ ekome mli:
“Kpee ko ni afee yɛ Cardio-Surgical Clinic ni yɔɔ Zabrze lɛ ye omanye waa diɛŋtsɛ. Kɛjɛ 1986 kɛbaa nɛɛ, kuu ni yɔɔ nɛkɛ helatsamɔ he nɛɛ efee wɔnyɛmimɛi lɛ opreshɛn yɛ omanyeyeli mli ni la fataaa he. Kɛbashi amrɔ nɛɛ, afee nɛkɛ opreshɛn nɛɛ 40 shweshweeshwe. Helatsamɔ he lɛ efee klalo akɛ ebaahe helatsɛmɛi ni jɛ Poland he fɛɛ he, kɛ maŋsɛɛ po. Yɛ minitii 50 sanegbaa sɛɛ Iɛ, helatsamɔ he wɔɔhe nɔkwɛlɔ lɛ sɛɛyelɔ lɛ kɛ HLC kuu lɛ mli bii lɛ tsɔɔ helatsɛmɛi akuu ko ni ekɛɛ amɛ akɛ: ‘Nɛkɛ gbɔmɛi nɛɛ, Yehowa Odasefoi ji amɛ. Amɛkɛ wɔ helatsamɔ he lɛ feɔ ekome, ni amɛyeɔ amɛbuaa wɔ. Jeee amɛnanemɛi heyelilɔi lɛ kɛkɛ naa amɛyelikɛbuamɔ lɛ he sɛɛ, shi moŋ mɛi krokomɛi hu. Kɛtsɔ Yehowa Odasefoi anɔ lɛ, wɔyiŋ etsɔ kwraa kɛmɔ shi akɛ abaanyɛ afee tsui opreshɛn shweshweeshwe ni akɛ la tsuuu he nii.
“ ‘Akɛ nɔkwɛmɔ nɔ lɛ, wɔfee obalayoo nɛɛ opreshɛn [ekɛ enine tsɔɔ ehelatsɛmɛi lɛ eko] ni wɔkɛ la tsuuu nii, ni Ju lɛ, abaajie lɛ ni eya shia. Masumɔ ni makɛɛ hu akɛ wɔkɛ la tsuuu nii babaoo dɔŋŋ bianɛ tamɔ wɔfeɔ tsutsu lɛ ejaakɛ oshara yɛ he waa. Ekɛ helai tamɔ HIV, kɛ mlɛbo hela nyiɛ, ni ehaa etsɛɔ dani helatsɛ lɛ naa hewalɛ.
“ ‘Katoliknyo ji mi, shi yɛ wɔshia lɛ, wɔkpɛlɛɔ mɛi krokomɛi asusumɔi anɔ wɔhaa amɛ be fɛɛ be. Be ko lɛ mikɛ mibii lɛ yashɛra shi yɛ Slaski Shwɛmɔ He lɛ masɛi. Tsutsu ko lɛ, asaaa nɛkɛ shwɛmɔ he nɛɛ kwraa, shi wɔna akɛ amrɔ nɛɛ asaa lɛ fɛfɛo ni oyooo akɛ jɛmɛ nɔŋŋ ni. Mibi nitsulɔi lɛ ateŋ mɔ kome, bɔ ni fee ni tsakemɔ nɛɛ ba. Ekɛɛ mi akɛ shwɛ fioo po ni jɛmɛ nɔkwɛlɔi lɛ anijiaŋ aje wui yɛ shwɛmɔ he lɛ saamɔ he, shi akɛhai Yehowa Odasefoi, ni amɛ amɛsaa jɛmɛ nɛkɛ lɛ.
“‘No hewɔ lɛ gbɔmɛi ni wɔ fɛɛ wɔbaanyɛ wɔkase nii babaoo kɛjɛ amɛŋɔɔ nɛ. Misusuɔ akɛ esa akɛ wɔkɛ bulɛ aha mɛi krokomɛi asusumɔi waa yɛ nɛkɛ helatsamɔ he wɔɔhe nɛɛ.‘ Kɛkɛ ni, beni ekɛ enine tsɔɔ Odasefonyo ni abaafee lɛ opreshɛn yɛ gbii fioo ko mli lɛ, ekɛɛ: ‘Yehowa Odasefonyo ji nɛkɛ awura nɛɛ, ni wɔbaafee lɛ opreshɛn ni wɔkɛ la tsuŋ nii.’”
Eyɛ mli akɛ Yehowa Odasefoi ebɔɔɔ mɔdɛŋ akɛ amɛaanyɛ amɛhemɔkɛyelii anɔ amɛwo mɛi krokomɛi amli moŋ, shi amɛ diɛŋtsɛ lɛ amɛnyiɛɔ bɔfoi lɛ anɔkwɛmɔ nɔ lɛ sɛɛ ni ‘amɛboɔ Nyɔŋmɔ moŋ toi akɛ nɔyelɔ fe gbɔmɛi.’ (Bɔfoi lɛ Asaji 5:29) Nɔ ni fata enɛ he ji bulɛ ni amɛyɔɔ kɛha la. Kɛ mɛi krokomɛi jie bulɛ kpo amɛtsɔɔ amɛjamɔ mli yiŋkpɛi ni kɔɔ sane nɛɛ, ni damɔ henilee kpakpa nɔ lɛ he lɛ, amɛhiɛ sɔɔ waa diɛŋtsɛ.