Obalaŋtai ni ‘Kɛ Amɛhe Fɔɔ Yehowa Nɔ’
OBALAŊTAI bɛ hewalɛ yɛ hefɛo nɔ, ni nakai nɔŋŋ jeee onukpai pɛ anɔ ji nilee. (Okɛto Abɛi 11:22; Jajelɔ 10:1 he.) Shi moŋ, mɛi ni yɔɔ hefɛo ni hiɔ shi daa kɛ anɔkwa nilee ji mɛi ni kɛ amɛhe fɔɔ Yehowa nɔ, ni amɛjɛɔ amɛtsui muu fɛɛ mli amɛwieɔ yɛ ehe akɛ: “Bo ji mi-Nyɔŋmɔ.”—Lala 31:15; Abɛi 9:10; 16:31.
Gbɔmɛi ni he yɔɔ fɛo, ni amɛyi miifa babaoo yɛ je lɛŋ fɛɛ, gbekɛbii kɛ onukpai fɛɛ, ni tsɔɔ amɛnilee kɛtsɔɔ Nyɔŋmɔ sɔɔmɔ kɛ Nyɔŋmɔ Maŋtsɛyeli lɛ he sanekpakpa lɛ shiɛmɔ nɔ. Akɛ nɔkwɛmɔ nɔ lɛ, susumɔ Sabrina ni eye afii kpaanyɔ lɛ he okwɛ.
Sabrina yɛ Germany, ni eyɛ skul sɛi ni ji enyɔ lɛ nɔ. Lɛ ji Yehowa Odasefonyo klɛŋklɛŋ ni etee skul ni eyaa lɛ. Shi dɔlɛ sane ji akɛ, lɛ ji mɔ ni eskulbii lɛ jɛɔ lɛ fe mɔ fɛɛ mɔ kɛyashi gbi ko lɛ, tsɔɔlɔ lɛ bi ni skulbii lɛ ateŋ mɔ fɛɛ mɔ kɛ wolo ni esumɔɔ fe fɛɛ lɛ aba klas. Sabrina kpɛ eyiŋ akɛ ekɛ My Book of Bible Stories wolo lɛ baaya. Gbi gbɛkɛ ni tsɔ hiɛ lɛ, eyɛ mli akɛ eshashao shi moŋ, shi esaa ehe jogbaŋŋ kɛha klas. Akɛni nikaselɔi 26 yɔɔ eklas lɛ hewɔ lɛ, ele akɛ ekolɛ enaŋ be babaoo. Shi ekpɛ eyiŋ akɛ ehaŋ mɔ ko afo wiemɔ ni ebaawie lɛ mli, ni eyɛ nɔmimaa hu akɛ Yehowa baaye abua lɛ. Beni gbi ni ato lɛ bashɛ lɛ, tsɔɔlɔ lɛ bi mɔ ni kɛ wolo ko eba, ni ebaasumɔ ni efee klɛŋklɛŋ mɔ ni kɛ ewolo lɛ baatsɔɔ. Naakpɛɛ sane ji akɛ, Sabrina pɛ kɛ eko eba. Ete shi edamɔ klas lɛ hiɛ ni ebɔi wiemɔ, ni ekane nii kɛjɛ wolo lɛ mli ni ekɛ emli mfonirii lɛ tsɔɔ amɛ ni egbala mli etsɔɔ amɛ akɛ nɔ fɛɛ nɔ damɔ Biblia lɛ nɔ. Beni emuɔ naa lɛ, ebi akɛ: “Namɔ baasumɔ ni ena wolo nɛɛ eko?” Ekɛ wolo lɛ ekome ha etsɔɔlɔ lɛ, ni gbii fioo ni nyiɛ sɛɛ lɛ, ekɛ nyɔŋma kroko hu fata he kɛha eklasbii lɛ ateŋ mɛi komɛi. Nɔ pɛ ni tsɔɔlɔ lɛ wie yɛ ewiemɔ lɛ he ji akɛ: “Minako nɔ ko tamɔ nakai dã.” Eha Sabrina A yɛ enifeemɔ lɛ he.
Yɛ anɔkwale mli lɛ, Odasefoi obalaŋtai pii kɛ miishɛɛ shiɛɔ sanekpakpa lɛ yɛ skul. Nɔkwɛmɔ nɔ kroko ji Erika, ni ji shiɛlɔ ni eye afii 11 ni eyɔɔ Mexico lɛ. Atsɔɔ lɛ kɛjɛ gbekɛbiiashi tɔ̃ɔ akɛ esumɔ Yehowa. Ebɔɔ mɔdɛŋ waa yɛ skul. Enitsumɔi ni aha lɛ lɛ ekome ji ni eŋma nɔ ko yɛ AIDS kɛ tawa shɛremɔ kɛ daanumɔ ni kaa mɔ he lɛ he. Eŋma sane lɛ jogbaŋŋ, ni ekɛ Awake! wolo tɛtrɛɛ lɛ fee enɛ, ni aha lɛ yijiemɔ ni nɔ kwɔ fe fɛɛ. Etsɔɔlɔ lɛ bi lɛ he ni ekane nibii ni eŋma lɛ yɛ, ni ekɛ woji tɛtrɛbii ni aŋmala nibii nɛɛ ahe saji kɛjɛ mli lɛ eko ha lɛ. Yɛ sɛɛ mli lɛ, tsɔɔlɔ lɛ kɛ nakai woji tɛtrɛbii lɛ tsu nii ni ekɛ klas muu lɛ fɛɛ susu sane lɛ he. Yɛ Erika jeŋba, kɛ bulɛ ni eyɔɔ kɛha etsɔɔlɔ lɛ, kɛ eklas yijiemɔi kpakpai lɛ ahewɔ lɛ, ehe basa kɛha nikeenii, yijiemɔ woji, kɛ skul nikasemɔ lɛ he nyɔmɔwoo lɛ fã ni awoɔ ahaa lɛ. Shi yɛ fɛɛ sɛɛ lɛ, enuɔ he akɛ nɔ wulu fe fɛɛ ni enyɛ etsu ji akɛ enyɛ ejie ehe kpo faŋŋ akɛ Yehowa Odasefonyo, ni enyɛ ekɛ Biblia kasemɔ woji eha, ni ewó Nyɔŋmɔ gbɛi nɔ gojoo.
Agbɛnɛ Shannon hu yɛ, ni eji gbekɛnuu fioo ko ni eye afii nyɔŋma, ni eyɛ New Zealand. Ehiŋmɛi kome pɛ naa nii; kansa fee ekome beni eji abifao lɛ, ni efite nakai hiŋmɛi lɛ. Beni Shannon ye afii kpawo lɛ, nakai be mli ni emami kɛ Yehowa Odasefoi bɔi Biblia lɛ kasemɔ. Shi, beni eje Biblia mli nikasemɔ lɛ shishi etsɛɛɛ tsɔ lɛ, yoo nɛɛ kɛ nuu ko yahi shi, shi jeee yɛ gbalashihilɛ he gbɛjianɔtoo naa, ni no ha ekpɛ eyiŋ akɛ ebaakpa nikasemɔ lɛ. Shannon kpa fai ni akɛ lɛ atsa Biblia mli nikasemɔ lɛ nɔ. Akpɛlɛ enibimɔ lɛ nɔ. Odasefoi lɛ tsa nɔ amɛba eŋɔɔ, ni yɛ naagbee lɛ, weku lɛ mli bii etɛ lɛ fɛɛ kase Biblia lɛ ni amɛtee amɛhiɛ yɛ mumɔŋ. Beni amɛbote gbalashihilɛ mli yɛ mla naa sɛɛ lɛ, abaptisi Shannon nyɛ kɛ etsɛ ni kwɛɔ lɛ nɛɛ fɛɛ.
Gbi ko lɛ Shannon kɛ kpokpaa nɔkwɛlɔ lɛ ŋa tee shiɛmɔ kutuu. Ni shiatsɛ ko bi Shannon akɛ: “Mɛni fee ohiŋmɛi?” Ni eha lɛ hetoo akɛ: “Kansa fee lɛ, ni ebalɛ akɛ esa akɛ afa kwraa. Etsɛŋ ni Yehowa baaha mi ehee yɛ Paradeiso mli, ni no ji nɔ ni wɔba ni wɔkɛ bo baagba he sane lɛ.”