Maŋtsɛyeli Jajelɔi Bɔ Amaniɛ
“Nyɔŋmɔ Jeee Mɛi Ahiɛaŋkwɛlɔ”
AFII ohai nyɔŋma kɛ nɛɛhu ni eho nɛ lɛ, bɔfo Petro ni akɛ mumɔ tsirɛ lɛ ŋma akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35) Anaa gbɔmɛi ni jɛ hewolonɔ sui kɛ jamɔi sɔrɔtoi fɛɛ amli ŋmɛnɛ yɛ Yehowa Odasefoi ateŋ. Amɛsumɔɔ jalɛ nifeemɔ, ni amɛsheɔ Nyɔŋmɔ gbeyei. Yehowa hereɔ amɛ fɛɛ atuu kɛbaa jeŋ hee gbɛjianɔtoo lɛ mli, akɛ nɔkwɛmɔ nɔ lɛ, taakɛ efee eha yoo ko yɛ Chad lɛ.
Yoo nɛɛ tsui enyɔɔɔ emli yɛ jamɔ ni eyɔɔ mli lɛ he. Afii komɛi ni eho lɛ, ehe Your Youth—Getting the Best Out Of It wolo ni Yehowa Odasefoi fee lɛ ekome, ni ena ŋaawoo fɛfɛo ni yɔɔ wolo lɛ mli lɛ he miishɛɛ waa. Akɛ lɛ je Biblia mli nikasemɔ shishi, ni ebaa jɛmɛ be fɛɛ be kɛha nikasemɔ lɛ. Shi, beni awo lɛ hewalɛ ni eba kpeei yɛ Maŋtsɛyeli Asa lɛ nɔ lɛ, ebaaa. Mɛni hewɔ? Eyɛ mli akɛ ewu eteee shi ewooo nii ni ekaseɔ lɛ moŋ, shi nuu lɛ ekpɛlɛɛɛ akɛ eeeha eba kpeei yɛ Maŋtsɛyeli Asa lɛ nɔ.
Beni ŋa lɛ tsɔɔ akɛ eesumɔ ni eya kpokpaa nɔ kpee lɛ, Odasefonyo ni kɛ lɛ kaseɔ nii lɛ kɛ wiemɔ he gbɛjianɔtoo lɛ tsɔɔ ewu lɛ, ni egbala ŋaawoo fɛfɛo ni akɛbaaha lɛ mli etsɔɔ lɛ. Enɛ ha ekpɛlɛ nɔ akɛ eŋa lɛ aya “shikome pɛ.” Etee kpee lɛ ni ena wiemɔi ni aha lɛ he miishɛɛ waa. No sɛɛ beni egbala nibii ni ekase lɛ mli etsɔɔ ewu lɛ, agbɛnɛ nuu lɛ etsiii enaa akɛ ekaya kpeei krokomɛi lɛ dɔŋŋ. Nɔ ni ena he miishɛɛ fe fɛɛ ji bɔ ni gbɔmɛi ni jɛ wekui sɔrɔtoi amli lɛ efee ekome yɛ asafo lɛ mli ni amɛyɔɔ amɛhe miishɛɛ babaoo lɛ. Sɛɛ mli lɛ, etee kpokpaa wulu nɔ kpee lɛ eko ni efee lɛ naakpɛɛ waa akɛ eeena ni Odasefoi ni jɛ maji krokomɛi anɔ ehole ebii amɛtara amɛnɔ. Odasefoi lɛ kɛ amɛ ye nii hu, ni amɛna amɛhe miishɛɛ tamɔ nɔ ni amɛkɛ amɛ jɛ weku mli. Enɛ bafee tsakemɔ be krɛdɛɛ ko kɛha lɛ.
Shi shitee-kɛ-woo nyiɛ sɛɛ kɛba. Eyɛ mli akɛ yoo nɛɛ hiɛ gboɔ fioo moŋ, shi ebɔi saji ahetoohamɔ yɛ kpeei ashishi ni ekɛ ekaa te shi ewo wiemɔi gbohii ni ewekumɛi kɛ ekuuŋbii wieɔ amɛshiɔ lɛ lɛ. Eyɛ mli akɛ ekɛ ewu ehi shi afii babaoo nɛ moŋ, shi amɛgbalashihilɛ lɛ ji nɔ ni mɛi enyɔ lɛ kɛ amɛhe hiɔ shi kɛkɛ lɛ eko. Te ebaafee tɛŋŋ ewie mla naa gbalashihilɛ he sane nɛɛ he? Beni ekɛ anɔkwayeli esɔle eha Yehowa sɛɛ lɛ, ekɛ ewu lɛ wie he, ni nuu lɛ kɛɛ lɛ akɛ ebaakwɛ akɛ ebaahi feemɔ lo. Naagbee lɛ efee, ni amɛbote gbalashihilɛ mli yɛ mla naa.
Ewuyoo ko ni kɛ amɛ yɔɔ lɛ ha amɛ naagbai babaoo, shi nuu lɛ kpɛ eyiŋ jogbaŋŋ ni efi eŋa lɛ sɛɛ. Kɛkɛ ni nuu lɛ tsɛ ba ebasara amɛ. Ni efa ebi lɛ akɛ ekɛ eŋa lɛ atse gbala lɛ mli, ejaakɛ etsake ejamɔ. Tsɛ lɛ kɛɛ ebinuu lɛ akɛ ebaawo gbala nii ni aheɔ lɛ eha lɛ ni eyatao “ŋa kpakpa.” Shi hetoo ni ebinuu lɛ ha lɛ ji: “Dabi, mifeŋ nakai. Ŋa kpakpa ji lɛ. Kɛ lɛ diɛŋtsɛ eetao eya lɛ, no lɛ esoro no, shi mi diɛŋtsɛ lɛ, mikɛŋ lɛ akɛ eya.” Ŋa lɛ jie bulɛ babaoo kpo etsɔɔ eshaanuu lɛ, ni ehiɛ gbo yɛ esubaŋ lɛ he. Shi, beni eku esɛɛ kɛtee ekrowa lɛ, eŋma wolo ebaha ebinuu lɛ, ni agbɛnɛ eefa lɛ doo akɛ efee nɔ ni ekɛɛ lɛ. Ekɛɛ lɛ akɛ kɛji ekpɛlɛɛɛ ni ebaashwie eŋa lɛ ni eya lɛ, no lɛ jeee ebi ji lɛ dɔŋŋ. Shi nuu lɛ saa efi eŋa lɛ sɛɛ ekoŋŋ. Feemɔ miishɛɛ ni yoo lɛ na beni ena akɛ ewu ekɔ shidaamɔ kpakpa lɛ he mfoniri okwɛ.
Amrɔ nɛɛ amɛbihii bibii enyɔ lɛ sumɔɔ ni amɛfata amɛnyɛ he kɛya Maŋtsɛyeli Asa lɛ nɔ. Amɛbi amɛtsɛ po ni ehe tai ni afiɔ eha amɛ, ejaakɛ amɛnaa nyɛmimɛi hii ni haa wiemɔi lɛ akɛ amɛteŋ mɔ fɛɛ mɔ fiɔ eko. Ŋmɛnɛ, yoo nɛɛ etsɔ nyɛmiyoo ni abaptisi lɛ.
Efata Odasefoi 345 ni yɔɔ miishɛɛ yɛ Chad ni amɛjajeɔ Yehowa Maŋtsɛyeli lɛ he sanekpakpa lɛ amɛtsɔɔ, ni amɛyooɔ lɛlɛŋ akɛ, “Nyɔŋmɔ jeee mɛi ahiɛaŋkwɛlɔ” lɛ ahe.